Vishweshwar Bhat Column: ಇನ್ನಷ್ಟು ಚೆಂದಗೊಳಿಸಲು ಸುಂದರ ಹೂವಿಗೆ ಬಣ್ಣ ಹಚ್ಚಬಾರದು !

ಇದೇ ಅಂತರಂಗ ಸುದ್ದಿ

ಒಳ್ಳೆಯದಾಗಿರುವುದನ್ನು ಬದಲಾಯಿಸುವ ಅಗತ್ಯವಿಲ್ಲ’ (If something is good no need to change it ) ಎಂಬ ಮಾತಿದೆ. ಒಂದು ವ್ಯವಸ್ಥೆ ಅಥವಾ ವಸ್ತು ಈಗಾಗಲೇ ನಮಗೆ ನಿರೀಕ್ಷಿತ ಫಲಿ ತಾಂಶ ನೀಡುತ್ತಿರುವಾಗ, ಅದರ ಮೇಲೆ ಅನಗತ್ಯ ಪ್ರಯೋಗಗಳನ್ನು ಮಾಡುವುದು ಅಪಾಯ ಕಾರಿ. ಇದನ್ನು ಇಂಗ್ಲಿಷ್‌ನಲ್ಲಿ ‘ If it ain't broke, don't fix it ’ ಎನ್ನುತ್ತಾರೆ.

ಯಾವುದೇ ಒಂದು ವಿಷಯ ‘ಚೆನ್ನಾಗಿದೆ’ ಎಂದರೆ ಅದರ ಅರ್ಥ ಅಲ್ಲಿ ಒಂದು ಅದ್ಭುತವಾದ ಸಮತೋಲನ (ಬ್ಯಾಲೆನ್ಸ್) ಇದೆ ಎಂದರ್ಥ. ಉದಾಹರಣೆಗೆ, ನಿಮ್ಮ ಮನೆಯಲ್ಲಿ ಅಜ್ಜಿ ಮಾಡುವ ಸಾಂಬಾರ್ ರುಚಿ ಅದ್ಭುತವಾಗಿರುತ್ತದೆ. ಅದಕ್ಕೆ ‘ಇನ್ನೂ ಚೆನ್ನಾಗಿರಲಿ’ ಎಂದು ನೀವು ವಿದೇಶಿ ಮಸಾಲೆಗಳನ್ನು ಹಾಕಿದರೆ, ಅದು ತನ್ನ ಅಸಲಿ ಸೊಬಗನ್ನು ಕಳೆದುಕೊಳ್ಳುತ್ತದೆ. ‌

ಖಾರ, ಉಪ್ಪು, ಹುಳಿ ಮತ್ತು ಮನೆಯ ಕುಟ್ಟಿದ ಮಸಾಲೆಯ ಪ್ರಮಾಣವು ದಶಕಗಳ ಅನುಭವದ ಫಲವಾಗಿರುತ್ತದೆ. ಅಲ್ಲಿ ಪ್ರತಿಯೊಂದು ಪದಾರ್ಥವೂ ಇನ್ನೊಂದಕ್ಕೆ ಪೂರಕವಾಗಿ ಕೆಲಸ ಮಾಡು ತ್ತದೆ. ಇಲ್ಲಿ ‘ಬದಲಾವಣೆ’ ಎನ್ನುವುದು ಸುಧಾರಣೆಗಿಂತ ಹೆಚ್ಚಾಗಿ ಆ ಮೂಲ ಸ್ವಾದ ಅಥವಾ ಸತ್ವ ವನ್ನು ನಾಶಪಡಿಸುತ್ತದೆ.

ಬದಲಾವಣೆ ಎನ್ನುವುದು ಯಾವಾಗಲೂ ಪ್ರಗತಿಯ ಸಂಕೇತ ಇಂದು ಭಾವಿಸಬೇಕಿಲ್ಲ. ಕೆಲವೊಮ್ಮೆ ‘ಸ್ಥಿರತೆ’ಯೂ ಒಂದು ದೊಡ್ಡ ಸಾಧನೆಯೇ ಆಗಿರುತ್ತದೆ. ಯಾವುದೇ ಒಂದು ಸಿದ್ಧ ಮಾದರಿಯು ( Proven Model ) ನಮಗೆ ನಿರಂತರವಾಗಿ ಸುಖ ಅಥವಾ ಯಶಸ್ಸನ್ನು ನೀಡುತ್ತಿದ್ದರೆ, ಅದನ್ನು ಕದಡುವುದು, ಕೆಣಕುವುದು ಎಂದರೆ ಅಪಾಯವನ್ನು ಮೈಮೇಲೆ ಎಳೆದುಕೊಂಡಂತೆ.

ಏಕೆಂದರೆ, ಆ ವ್ಯವಸ್ಥೆಯ ಮೂಲ ಸ್ವಾದ ಅಥವಾ ಸತ್ವವು ಒಮ್ಮೆ ನಾಶವಾದರೆ, ಮತ್ತೆ ಮೊದಲಿನ ಸ್ಥಿತಿಗೆ ತರುವುದು ಅಸಾಧ್ಯ. ಪರಿಪೂರ್ಣತೆಗೆ ಅಂತ್ಯವಿಲ್ಲ ಎಂಬುದು ನಿಜವಾದರೂ, ತೃಪ್ತಿಕರವಾದ ಪರಿಪೂರ್ಣತೆಯನ್ನು ಗೌರವಿಸುವುದು ಜಾಣತನ. ಅಜ್ಜಿಯ ಕೈರುಚಿಯ ಸೊಬಗು ಇರುವುದೇ ಅದರ ಆ ಹಳೆಯ ಮತ್ತು ಸ್ಥಿರವಾದ ಮಸಾಲೆಯಲ್ಲಿ. ಅದನ್ನು ಬದಲಾಯಿಸಲು ಹೋದರೆ ನಮಗೆ ಸಿಗುವುದು ಹೊಸ ರುಚಿಯಲ್ಲ, ಬದಲಾಗಿ ಮೂಲ ರುಚಿಯ ಅಂತ್ಯ.

ಇದನ್ನೂ ಓದಿ: Vishweshwar Bhat Column: ನಡೆಯುವಾಗ ನಮ್ಮ ಶೂಲೇಸ್‌ ತನ್ನಷ್ಟಕ್ಕೆ ಬಿಚ್ಚಿಕೊಳ್ಳುತ್ತದಲ್ಲ, ಏಕೆ ?

ಹಾಗಾಗಿ, ಯಾವುದು ಚೆನ್ನಾಗಿದೆಯೋ ಅದನ್ನು ಹಾಗೆಯೇ ಆಸ್ವಾದಿಸುವುದರಲ್ಲಿ ವಿಶಿಷ್ಟವಾದ ಕಲೆ ಇದೆ. ಒಂದು ಯಂತ್ರ ಅಥವಾ ಸಾಫ್ಟ್‌ʼವೇರ್ ಸರಳವಾಗಿ ಕೆಲಸ ಮಾಡುತ್ತಿರುವಾಗ ಅದನ್ನು ‘ಇನ್ನೂ ಸ್ಮಾರ್ಟ್’ ಮಾಡಲು ಹೋದರೆ ಏನಾಗುತ್ತದೆ? ಎಂಜಿನಿಯರಿಂಗ್ ಲೋಕದಲ್ಲಿ ಇದಕ್ಕೆ ‘ಓವರ್ ಎಂಜಿನಿಯರಿಂಗ್’ ಎನ್ನುತ್ತಾರೆ.

ಸರಳವಾದ ಯಂತ್ರದಲ್ಲಿ ಭಾಗಗಳು ಕಡಿಮೆ ಇರುತ್ತವೆ, ಹೀಗಾಗಿ ಕೆಟ್ಟು ಹೋಗುವ ಸಾಧ್ಯತೆಯೂ ಕಡಿಮೆ. ಆದರೆ, ಹೆಚ್ಚಿನ ನಿರೀಕ್ಷೆಯೊಂದಿಗೆ ನಾವು ಹೊಸ ತಂತ್ರಜ್ಞಾನ ಅಥವಾ ಭಾಗಗಳನ್ನು ಜೋಡಿಸಿದಾಗ, ಆ ಯಂತ್ರದ ಸಂಕೀರ್ಣತೆ (Complexity) ಹೆಚ್ಚಾಗುತ್ತದೆ. ಹೊಸದಾಗಿ ಸೇರಿಸಿದ ಒಂದು ಸಣ್ಣ ಭಾಗ ಕೆಟ್ಟರೂ ಇಡೀ ಯಂತ್ರವೇ ಸ್ಥಗಿತಗೊಳ್ಳಬಹುದು. ಇಲ್ಲಿ ಉತ್ತಮ ವಾಗಿದ್ದ ಹಳೆಯ ಫಲಿತಾಂಶವೂ ಇಲ್ಲವಾಗಿ, ಹೊಸ ಸಮಸ್ಯೆಗಳ ಸರಣಿಯೇ ಆರಂಭವಾಗುತ್ತದೆ.

ಬದಲಾವಣೆ ಎನ್ನುವುದು ಯಾವಾಗಲೂ ಅನಿಶ್ಚಿತತೆಯನ್ನು ಹೊತ್ತು ತರುತ್ತದೆ. ಒಂದು ಪದ್ಧತಿ ಯು ದೀರ್ಘಕಾಲದಿಂದ ಯಶಸ್ವಿಯಾಗಿ ನಡೆಯುತ್ತಿದೆ ಎಂದರೆ, ಅದು ಕಾಲದ ಪರೀಕ್ಷೆಯಲ್ಲಿ ಗೆದ್ದಿದೆ ಎಂದರ್ಥ. ಅದನ್ನು ಬದಲಿಸಲು ಹೋದಾಗ ನಾವು ‘ಪರಿಚಿತ ಲಾಭ’ವನ್ನು ಬಿಟ್ಟು ‘ಅಪರಿಚಿತ ನಷ್ಟ’ದ ಕಡೆಗೆ ಹೆಜ್ಜೆ ಇಡುತ್ತೇವೆ. ನಿರೀಕ್ಷೆಗಳು ಗಗನಚುಂಬಿಯಾಗಿದ್ದಾಗ, ಸಣ್ಣ ಸೋಲು ಕೂಡ ದೊಡ್ಡ ದುರಂತದಂತೆ ಕಾಣುತ್ತದೆ.

‘ಒಳ್ಳೆಯದನ್ನು ಉತ್ತಮಪಡಿಸುವುದು’ ಪ್ರಗತಿಯ ಲಕ್ಷಣವಾದರೂ, ‘ಅದ್ಭುತವಾದುದನ್ನು ಕೆಣಕು ವುದು’ ಮೂರ್ಖತನವಾಗಬಹುದು. ಈಗಾಗಲೇ ಫಲಿತಾಂಶ ಉತ್ತಮವಾಗಿರುವಾಗ, ನಮ್ಮ ನಿರೀಕ್ಷೆ ಗಳನ್ನು ವಾಸ್ತವಕ್ಕೆ ಹತ್ತಿರವಿಟ್ಟುಕೊಳ್ಳುವುದು ಜಾಣತನ. ಬದಲಾವಣೆಯ ಹೆಸರಿನಲ್ಲಿ ಅತಿಯಾದ ನಿರೀಕ್ಷೆ ಇಟ್ಟುಕೊಂಡು, ಇರುವ ನೆಮ್ಮದಿಯನ್ನು ಕಳೆದುಕೊಳ್ಳುವ ಬದಲು, ಸುಗಮವಾಗಿ ಸಾಗುತ್ತಿರುವ ಪದ್ಧತಿಯನ್ನು ಗೌರವಿಸುವುದೇ ನಿಜವಾದ ‘ಸಂತೋಷ’ದ ಸೂತ್ರ.

ಯಾವುದೋ ಒಂದು ಹೊಸ ಮಾದರಿಯ ಬೆನ್ನತ್ತಿ ಹೋದಾಗ, ಕೈಯಲ್ಲಿದ್ದ ಹಳೆಯ ಫಲಿತಾಂಶವೂ ಕೈಜಾರಿ ಹೋಗುವ ಸಾಧ್ಯತೆ ಇರುತ್ತದೆ ಎಂಬ ಎಚ್ಚರಿಕೆ ನಮಗಿರಬೇಕು. ‘ಒಳ್ಳೆಯದನ್ನು ಕೆಣಕ ಬಾರದು’ ಎಂಬ ತತ್ವಕ್ಕೆ ‘ನ್ಯೂ ಕೋಕ್’ (New Coke) ಅತ್ಯುತ್ತಮ ಉದಾಹರಣೆ. 1980ರ ದಶಕದಲ್ಲಿ ಕೋಕಾ-ಕೋಲಾ ಮಾರುಕಟ್ಟೆಯಲ್ಲಿ ಅಗ್ರಸ್ಥಾನದಲ್ಲಿದ್ದರೂ, ತನ್ನ ಪ್ರತಿಸ್ಪರ್ಧಿ ‘ಪೆಪ್ಸಿ’ ಯಿಂದ ತೀವ್ರ ಪೈಪೋಟಿ ಎದುರಿಸುತ್ತಿತ್ತು.

ಪೆಪ್ಸಿಯ ರುಚಿ ಸ್ವಲ್ಪ ಸಿಹಿಯಾಗಿತ್ತು ಮತ್ತು ಯುವಜನರಿಗೆ ಹೆಚ್ಚು ಇಷ್ಟವಾಗುತ್ತಿತ್ತು. ಇದರಿಂದ ಆತಂಕಗೊಂಡ ಕೋಕಾ-ಕೋಲಾ ಕಂಪನಿಯು, ತನ್ನ ಸುಮಾರು 99 ವರ್ಷಗಳ ಹಳೆಯ ಮತ್ತು ಯಶಸ್ವಿ ಫಾರ್ಮುಲಾವನ್ನು ಬದಲಾಯಿಸಲು ನಿರ್ಧರಿಸಿತು. ಅವರಿಗೆ ತಮ್ಮ ಮೂಲ ರುಚಿ ‘ಒಳ್ಳೆಯದಾಗಿದ್ದರೂ’, ಅದನ್ನು ‘ಇನ್ನೂ ಉತ್ತಮ’ ಮಾಡಬೇಕೆಂಬ ಹಂಬಲವಿತ್ತು.

1985 ಏಪ್ರಿಲ್‌ನಲ್ಲಿ ಕಂಪನಿಯು ಹೊಸ ರುಚಿಯ ‘ನ್ಯೂ ಕೋಕ್’ ಅನ್ನು ಮಾರುಕಟ್ಟೆಗೆ ಪರಿಚಯಿ ಸಿತು. ಕಂಪನಿಯು ನಡೆಸಿದ ರುಚಿ ಪರೀಕ್ಷೆಗಳಲ್ಲಿ ಹೊಸ ಪಾನೀಯ ಗೆದ್ದಿತ್ತು ನಿಜ. ಆದರೆ, ಅವರು ಜನರ ಭಾವನಾತ್ಮಕ ಸಂಬಂಧವನ್ನು ಲೆಕ್ಕಕ್ಕೇ ತೆಗೆದುಕೊಂಡಿರಲಿಲ್ಲ. ಕೋಕಾ-ಕೋಲಾ ಕೇವಲ ಒಂದು ಪಾನೀಯವಾಗಿರದೇ, ಜನರ ಸಂಸ್ಕೃತಿಯ ಭಾಗವಾಗಿತ್ತು.

ಹೊಸ ರುಚಿ ಬಂದ ಕೂಡಲೇ ಅಮೆರಿಕದಾದ್ಯಂತ ಜನ ಆಕ್ರೋಶ ವ್ಯಕ್ತಪಡಿಸಿದರು. ಹಳೆಯ ಕೋಕ್ ಬಾಟಲಿಗಳನ್ನು ಸಂಗ್ರಹಿಸಿಟ್ಟುಕೊಳ್ಳಲು ಜನ ಮುಗಿಬಿದ್ದರು. ಕಂಪನಿಗೆ ದಿನಕ್ಕೆ ಸಾವಿರಾರು ಪ್ರತಿಭಟನಾ ಕರೆಗಳು ಮತ್ತು ಪತ್ರಗಳು ಬರಲಾರಂಭಿಸಿದವು. ಜನರ ಒತ್ತಡ ಎಷ್ಟು ಹೆಚ್ಚಿತ್ತೆಂದರೆ, ಕೇವಲ 79 ದಿನಗಳಲ್ಲಿ ಕೋಕಾ-ಕೋಲಾ ಕಂಪನಿಯು ತನ್ನ ತಪ್ಪನ್ನು ಒಪ್ಪಿಕೊಂಡಿತು.

ಅದೇ ವರ್ಷದ ಜುಲೈನಲ್ಲಿ ಮತ್ತೆ ಹಳೆಯ ಫಾರ್ಮುಲಾವನ್ನೇ ‘ಕೋಕಾ-ಕೋಲಾ ಕ್ಲಾಸಿಕ್’ ಹೆಸರಿ ನಲ್ಲಿ ಮಾರುಕಟ್ಟೆಗೆ ತರಲಾಯಿತು. ಈ ಸುದ್ದಿಯನ್ನು ಕೇಳಿ ಅಮೆರಿಕದ ಜನರು ಸಮಾಧಾನದ ನಿಟ್ಟುಸಿರು ಬಿಟ್ಟರು. ಒಂದು ವ್ಯವಸ್ಥೆ ಅಥವಾ ಉತ್ಪನ್ನವು ಈಗಾಗಲೇ ಜನರ ಮನ ಗೆದ್ದಿರುವಾಗ, ಅದನ್ನು ಕೇವಲ ಅಂಕಿ-ಅಂಶಗಳ ಆಧಾರದ ಮೇಲೆ ಬದಲಾಯಿಸಲು ಹೋದರೆ ಸೋಲು ಖಚಿತ.

ಇದು ನಮಗೆ ನೀಡುವ ನೀತಿ - ‘ಯಾವುದು ಅದ್ಭುತವಾಗಿ ಕೆಲಸ ಮಾಡುತ್ತಿದೆಯೋ, ಅದರಲ್ಲಿ ಅನಗತ್ಯವಾಗಿ ಕೈಹಾಕಬಾರದು.’ ನಮ್ಮ ಮಿದುಳು ಕೂಡ ಈ ತತ್ವದ ಮೇಲೆ ಕೆಲಸ ಮಾಡುತ್ತದೆ. ಒಂದು ಹಾದಿ ಸುಗಮವಾಗಿದೆ ಎಂದು ತಿಳಿದಾಗ ಮಿದುಳು ಅಲ್ಲಿ ಕಡಿಮೆ ಶಕ್ತಿಯನ್ನು ಬಳಸುತ್ತದೆ. ನಾವು ಅನಗತ್ಯವಾಗಿ ಬದಲಾವಣೆ ಮಾಡಲು ಹೋದರೆ, ಅದು ಮಿದುಳಿಗೆ ಹೆಚ್ಚಿನ ಒತ್ತಡ ಮತ್ತು ಸಮಯದ ವ್ಯಯವನ್ನು ಉಂಟು ಮಾಡುತ್ತದೆ.

ಬದಲಾವಣೆ ಎನ್ನುವುದು ಪ್ರಗತಿಗೆ ಅಗತ್ಯ ನಿಜ, ಆದರೆ ಅದು ‘ಅಗತ್ಯ’ ಇದ್ದಾಗ ಮಾತ್ರ ಇರಬೇಕು. ‘ಪೂರ್ಣವಾಗಿ ಅರಳಿದ ಹೂವಿನ ಮೇಲೆ ಮತ್ತೆ ಬಣ್ಣ ಹಚ್ಚಲು ಹೋದರೆ, ಅದರ ನೈಸರ್ಗಿಕ ಸೌಂದರ್ಯ ಅಳಿಸಿ ಹೋಗುತ್ತದೆ. ‘ಪ್ರಕೃತಿಯಲ್ಲಿ ಪ್ರತಿಯೊಂದು ಜೀವಿಯೂ ತನ್ನದೇ ಆದ ಕಾಲಘಟ್ಟದಲ್ಲಿ ವಿಕಾಸಗೊಂಡು ಒಂದು ಹಂತದಲ್ಲಿ ‘ಪರಿಪೂರ್ಣತೆ’ಯನ್ನು ತಲುಪುತ್ತದೆ.

ಒಂದು ಹೂವು ಅರಳಿದೆ ಎಂದರೆ, ಅದು ಸೂರ್ಯನ ಬೆಳಕು, ಮಣ್ಣಿನ ಸಾರ ಮತ್ತು ನೀರಿನ ಅಂಶಗಳ ಸಮತೋಲನದಿಂದ ತನ್ನ ನೈಜ ಬಣ್ಣ ಮತ್ತು ಸುಗಂಧವನ್ನು ಪಡೆದುಕೊಂಡಿದೆ ಎಂದರ್ಥ. ಈ ನೈಸರ್ಗಿಕ ಸೌಂದರ್ಯಕ್ಕೆ ಮನುಷ್ಯನು ತನ್ನ ಕೃತಕ ಬಣ್ಣವನ್ನು ಹಚ್ಚಲು ಹೋದರೆ, ಅದು ಆ ಹೂವಿನ ಜೀವಂತಿಕೆಯನ್ನು ಕುಂದಿಸುತ್ತದೆ. ಹೊರನೋಟಕ್ಕೆ ಅದು ಹೆಚ್ಚು ಪ್ರಕಟವಾಗಿ ಕಾಣಬಹುದು, ಆದರೆ ಅದರ ನೈಜ ಸತ್ವ ಮತ್ತು ಮೃದುತ್ವ ಅಲ್ಲಿ ನಾಶವಾಗುತ್ತದೆ. ಹೀಗಾಗಿ, ನಿಮ್ಮ ಜೀವನದಲ್ಲಿ ಅಥವಾ ಕೆಲಸದಲ್ಲಿ ಯಾವುದಾದರೂ ವಿಷಯ ನಿಮಗೆ ತೃಪ್ತಿ ನೀಡುತ್ತಿದ್ದರೆ, ಅದನ್ನು ಪ್ರೀತಿಯಿಂದ ಹಾಗೆಯೇ ಉಳಿಸಿಕೊಳ್ಳುವುದು ಜಾಣತನ!

ಪ್ರತಿಯೊಂದರಲ್ಲೂ ಸೌಂದರ್ಯವಿದೆ!

‘ಪ್ರತಿಯೊಂದರಲ್ಲೂ ಸೌಂದರ್ಯವಿದೆ, ಆದರೆ ಅದನ್ನು ಪ್ರತಿಯೊಬ್ಬರೂ ನೋಡುವುದಿಲ್ಲ.’ ಇದು ಚೀನಾ ದೇಶದ ಬೋಧಕ, ರಾಜತಾಂತ್ರಿಕ ಹಾಗೂ ತತ್ವಜ್ಞಾನಿ ಕನ್ಯೂಷಿಯಸ್‌ನ ಪ್ರಸಿದ್ಧ ಉಕ್ತಿ. ಜಗತ್ತು ಅದ್ಭುತಗಳ ಗಣಿ. ಇಲ್ಲಿ ಸಣ್ಣ ಕಣದಿಂದ ಹಿಡಿದು ಬೃಹತ್ ಬ್ರಹ್ಮಾಂಡದವರೆಗೆ ಎಲ್ಲವೂ ಸೌಂದರ್ಯದಿಂದಲೇ ಆವೃತವಾಗಿದೆ. ಆದರೆ, ನಾವೇಕೆ ಎಲ್ಲದರಲ್ಲೂ ಸೌಂದರ್ಯವನ್ನು ಕಾಣಲು ವಿಫಲರಾಗುತ್ತೇವೆ? ಇದರ ಉತ್ತರ ಅಡಗಿರುವುದು ನಾವು ನೋಡುವ ‘ಕಣ್ಣಿನಲ್ಲಿ’ ಅಲ್ಲ, ಬದಲಾಗಿ ನಮ್ಮ ‘ದೃಷ್ಟಿಕೋನದಲ್ಲಿ.’

ನಮ್ಮ ಸಮಾಜವು ಸೌಂದರ್ಯವನ್ನು ಕೇವಲ ಚರ್ಮದ ಬಣ್ಣ, ಮುಖದ ಆಕಾರ ಅಥವಾ ವಸ್ತು ವಿನ ಹೊಳಪಿಗೆ ಸೀಮಿತಗೊಳಿಸಿದೆ. ಆದರೆ, ನಿಜವಾದ ಸೌಂದರ್ಯವು ವಸ್ತುವಿನ ಗುಣ ಮತ್ತು ಅದರ ಅಸ್ತಿತ್ವದಲ್ಲಿದೆ. ಉದಾಹರಣೆಗೆ, ಒಂದು ಹಳೆಯ, ಸುಕ್ಕುಗಟ್ಟಿದ ಕೈಗಳನ್ನು ನೋಡಿ. ಒಬ್ಬ ಸಾಮಾನ್ಯ ವ್ಯಕ್ತಿಗೆ ಅದು ಕೇವಲ ವಯಸ್ಸಾದ ಕುರುಹಾಗಿ ಕಾಣಬಹುದು. ಆದರೆ ಒಬ್ಬ ಕವಿಗೆ ಅಥವಾ ಆತನ ಮೊಮ್ಮಗನಿಗೆ, ಆ ಕೈಗಳಲ್ಲಿ ದಶಕಗಳ ಕಾಲದ ಪರಿಶ್ರಮ, ತ್ಯಾಗ ಮತ್ತು ಮಮತೆಯ ಸೌಂದರ್ಯ ಕಾಣಿಸುತ್ತದೆ. ಆ ಕೈಗಳು ಸವೆದಿರುವುದು ಇನ್ನೊಬ್ಬರ ಜೀವನವನ್ನು ಕಟ್ಟಲು. ಈ ‘ತ್ಯಾಗ’ವೇ ಅಲ್ಲಿನ ಅಸಲಿ ಸೌಂದರ್ಯ.

ಜನರು ಸಾಮಾನ್ಯವಾಗಿ ಅರಳಿದ ಹೂವು ಅಥವಾ ಮಳೆಬಿಲ್ಲನ್ನು ಸುಂದರ ಎಂದು ಕರೆಯುತ್ತಾರೆ. ಆದರೆ ಒಣಗಿದ ಎಲೆ ಅಥವಾ ಗುಡುಗಿನ ಆರ್ಭಟದಲ್ಲಿ ಸೌಂದರ್ಯ ಕಾಣುವವರು ವಿರಳ. ಗಿಡದಿಂದ ಉದುರಿ ನೆಲದ ಮೇಲೆ ಬಿದ್ದಿರುವ ಒಣ ಎಲೆಯು ಸಾವು ಅಥವಾ ಅಂತ್ಯದ ಸಂಕೇತವಾಗಿ ಕಾಣಬಹುದು. ಆದರೆ ಅದು ಮಣ್ಣಿಗೆ ಗೊಬ್ಬರವಾಗಿ ಇನ್ನೊಂದು ಜೀವಕ್ಕೆ ದಾರಿಯಾಗುತ್ತದೆ ಎಂಬ ಸತ್ಯವನ್ನು ಅರಿತಾಗ, ಆ ಉದುರುವಿಕೆಯಲ್ಲೂ ಒಂದು ‘ಸಾರ್ಥಕತೆಯ ಸೌಂದರ್ಯ’ ಕಾಣುತ್ತದೆ.

ಮಳೆ ಬಂದಾಗ ಮಣ್ಣಿನಿಂದ ಬರುವ ಆ ‘ಸೋನೆಯ ಘಮ’ ಅದ್ಭುತ ಸೌಂದರ್ಯ. ನಗರದ ಜನರಿಗೆ ಕೆಸರು ಅಸಹ್ಯವಾಗಿ ಕಾಣಬಹುದು, ಆದರೆ ಒಬ್ಬ ರೈತನಿಗೆ ಅದೇ ಕೆಸರು ಬಂಗಾರದಂತೆ ಸುಂದರ ವಾಗಿ ಕಾಣಬಹುದು.

ಒಬ್ಬ ಶಿಲ್ಪಿ ರಸ್ತೆಯ ಬದಿಯಲ್ಲಿ ಬಿದ್ದಿರುವ ಒಂದು ಒರಟು ಕಲ್ಲನ್ನು ನೋಡಿದಾಗ, ಉಳಿದವರಿಗೆ ಅದು ಕೇವಲ ಕಲ್ಲು. ಆದರೆ ಶಿಲ್ಪಿಗೆ ಆ ಕಲ್ಲಿನ ಒಳಗೆ ಅಡಗಿರುವ ಸುಂದರ ವಿಗ್ರಹ ಕಾಣಿಸುತ್ತದೆ. ಅವನು ಅನಗತ್ಯ ಭಾಗಗಳನ್ನು ಕೆತ್ತಿ ತೆಗೆದಾಗ ಲೋಕಕ್ಕೆ ಆ ಸೌಂದರ್ಯ ಗೋಚರವಾಗುತ್ತದೆ.

ಸೌಂದರ್ಯ ಅಲ್ಲಿ ಮೊದಲೇ ಇತ್ತು, ಅದನ್ನು ನೋಡುವ ಕಣ್ಣು ಶಿಲ್ಪಿಯದಾಗಿತ್ತು ಅಷ್ಟೆ. ಸೌಂದರ್ಯ ಎನ್ನುವುದು ಕೇವಲ ಕಲೆಗೆ ಸೀಮಿತವಲ್ಲ. ವಿಜ್ಞಾನಿಗಳಿಗೆ ಒಂದು ಸಂಕೀರ್ಣವಾದ ಸಮೀಕರಣದಲ್ಲಿ ಸೌಂದರ್ಯ ಕಾಣುತ್ತದೆ. ಐನ್‌ಸ್ಟೈನ್‌ನ E = mc2 ಸೂತ್ರವನ್ನು ನೋಡಿ. ಅಷ್ಟು ಸರಳವಾದ ಅಕ್ಷರಗಳಲ್ಲಿ ಇಡೀ ಬ್ರಹ್ಮಾಂಡದ ಶಕ್ತಿಯ ರಹಸ್ಯ ಅಡಗಿದೆ ಎನ್ನುವುದೇ ಒಂದು ಬೌದ್ಧಿಕ ಸೌಂದರ್ಯ.

ಜೀವನದಲ್ಲಿ ನಾವು ಸೋತಾಗ ಅಥವಾ ನೋವಿನಲ್ಲಿದ್ದಾಗ ಜಗತ್ತು ಕಪ್ಪಾಗಿ ಕಾಣುತ್ತದೆ. ಆದರೆ ಆ ನೋವು ನಮ್ಮನ್ನು ಮಾಗಿಸುತ್ತದೆ, ನಮಗೆ ಸಹಾನುಭೂತಿಯನ್ನು ಕಲಿಸುತ್ತದೆ. ಒಬ್ಬ ವ್ಯಕ್ತಿ ಎಡವಿ ಬಿದ್ದಾಗ ಅವನು ಎದ್ದು ನಿಲ್ಲುವ ‘ಛಲ’ ಇದೆಯಲ್ಲ, ಅದು ಜಗತ್ತಿನ ಅತ್ಯಂತ ಸುಂದರ ದೃಶ್ಯಗಳಲ್ಲಿ ಒಂದು.

ಗಾಯದ ಕಲೆಗಳು ನಾವು ಹೋರಾಡಿ ಗೆದ್ದಿದ್ದೇವೆ ಎಂಬುದಕ್ಕೆ ಸಾಕ್ಷಿ. ಅವುಗಳನ್ನೂ ಸೌಂದರ್ಯದ ಸಂಕೇತವಾಗಿ ನೋಡಬಹುದು. ಜಪಾನಿನ ಸಂಸ್ಕೃತಿಯಲ್ಲಿ ‘ವಾಬಿ-ಸಾಬಿ’ ಎಂಬ ಅದ್ಭುತ ಪರಿಕಲ್ಪನೆಯಿದೆ. ಇದು ‘ಅಪೂರ್ಣತೆಯಲ್ಲಿ ಸೌಂದರ್ಯವನ್ನು ಕಾಣುವುದು’ (Beauty in imperfection ). ಒಡೆದ ಮಡಕೆಯನ್ನು ಬಂಗಾರದ ಲೇಪನ ಹಚ್ಚಿ ಜೋಡಿಸುವ ಕಲೆಯು ಇದನ್ನು ಪ್ರತಿಪಾದಿಸುತ್ತದೆ.

ವಸ್ತು ಒಡೆದಿದೆ ಎಂಬುದು ಅದರ ಇತಿಹಾಸದ ಭಾಗ, ಅದನ್ನು ಮುಚ್ಚಿಡುವ ಬದಲು ಎತ್ತಿ ತೋರಿಸುವುದು ಸೌಂದರ್ಯ ಎಂದು ಅವರು ನಂಬುತ್ತಾರೆ. ನಾವು ಸೌಂದರ್ಯವನ್ನು ಕಾಣಲು ವಿಫಲರಾಗಲು ಪ್ರಮುಖ ಕಾರಣ ನಮ್ಮ ‘ಪೂರ್ವಗ್ರಹ ಪೀಡಿತ ಮನಸ್ಸು’.

ನಾವು ಮೊದಲೇ ಒಂದು ವಸ್ತುವಿನ ಬಗ್ಗೆ ಒಂದು ಚಿತ್ರಣವನ್ನು ಹೊಂದಿರುತ್ತೇವೆ. ಸಿನಿಮಾ ತಾರೆ ಸುಂದರವಾಗಿರಲೇಬೇಕು, ಸೂರ್ಯೋದಯ ಕೆಂಪಾಗಿಯೇ ಇರಬೇಕು ಎಂಬ ಚೌಕಟ್ಟುಗಳನ್ನು ಹಾಕಿಕೊಂಡಿದ್ದೇವೆ. ಈ ಚೌಕಟ್ಟುಗಳನ್ನು ಮೀರಿದಾಗ ಮಾತ್ರ ನಮಗೆ ಅನಿರೀಕ್ಷಿತ ಸೌಂದರ್ಯ ದರ್ಶನವಾಗುತ್ತದೆ.

ನಮ್ಮ ಸುತ್ತಮುತ್ತಲಿನ ಜಗತ್ತು ಒಂದು ಬೃಹತ್ ಕಲಾಕೃತಿ. ದಣಿದು ಮನೆಗೆ ಬಂದ ತಂದೆಯ ಹಣೆಯ ಮೇಲಿನ ಬೆವರಿನ ಹನಿಯಲ್ಲಿ ಸೌಂದರ್ಯವಿದೆ. ಪಕ್ಷಿಗಳು ಗೂಡು ಕಟ್ಟುವ ಶ್ರಮದಲ್ಲಿದೆ. ಮೌನದ ಗಹನತೆಯಲ್ಲಿ ಸೌಂದರ್ಯವಿದೆ.

ಸೌಂದರ್ಯ ಎನ್ನುವುದು ಹೊರಗಿನ ವಸ್ತುವಲ್ಲ, ಅದು ಒಳಗಿನ ಸಂವೇದನೆ. ನಾವು ಪ್ರೀತಿಯಿಂದ, ಮುಕ್ತ ಮನಸ್ಸಿನಿಂದ ಜಗತ್ತನ್ನು ನೋಡಿದಾಗ ಮಾತ್ರ ಈ ಸಾರ್ವತ್ರಿಕ ಸೌಂದರ್ಯ ನಮಗೆ ಗೋಚರ ವಾಗುತ್ತದೆ. ‘ಕಣ್ಣುಗಳು ಕೇವಲ ದೃಶ್ಯಗಳನ್ನು ನೋಡುತ್ತವೆ, ಆದರೆ ಮನಸ್ಸು ಮಾತ್ರ ಸೌಂದರ್ಯ ವನ್ನು ಗ್ರಹಿಸುತ್ತದೆ.’ ಪ್ರತಿಯೊಂದರಲ್ಲೂ ಸೌಂದರ್ಯವಿದೆ ಎಂದು ನಂಬಿದವನಿಗೆ ಈ ಜಗತ್ತು ಎಂದಿಗೂ ಬೇಸರ ತರಿಸುವುದಿಲ್ಲ. ಅವನು ಕತ್ತಲೆಯಲ್ಲೂ ನಕ್ಷತ್ರಗಳ ಹೊಳಪನ್ನು ಸಂಭ್ರಮಿಸು ತ್ತಾನೆ.

ನಾಯಕತ್ವ - ಐಸ್ ಕ್ರೀಮ್ ಮಾರಾಟ

‘ನೀವು ಎಲ್ಲರನ್ನೂ ಸಂತೋಷವಾಗಿಡಲು ಬಯಸುವಿರಾದರೆ, ನಾಯಕನಾಗಲು ಹೋಗಬಾರದು - ಬದಲಾಗಿ ಐಸ್ ಕ್ರೀಮ್ ಮಾರಾಟ ಮಾಡಬೇಕು.’ ಇದು ಆಪಲ್ ಸಂಸ್ಥಾಪಕ ಸ್ಟೀವ್ ಜಾಬ್ಸ್ ಅವರ ಮಾತು. ನಾಯಕತ್ವದ ಕಟು ವಾಸ್ತವ ಮತ್ತು ಜವಾಬ್ದಾರಿಯ‌ ಬಗ್ಗೆ ಅತ್ಯಂತ ಆಳವಾದ ಅರ್ಥವನ್ನು ನೀಡುವ ಒಂದು ಹೇಳಿಕೆ.

ಮ್ಯಾನೇಜಮೆಂಟ್ ಕ್ಲಾಸುಗಳಲ್ಲಿ ಆಗಾಗ ಕೇಳಿ ಬರುವ ಮಾತಿದು. ನಾಯಕತ್ವ ಎನ್ನುವುದು ಕೇವಲ ಅಧಿಕಾರ ಅಥವಾ ಗೌರವದ ಸ್ಥಾನವಲ್ಲ. ಅದು ನಿರ್ಧಾರಗಳನ್ನು ತೆಗೆದುಕೊಳ್ಳುವ ಪೀಠ. ಜೀವ ನದಲ್ಲಿ ನಾವು ಮಾಡುವ ಅತ್ಯಂತ ದೊಡ್ಡ ತಪ್ಪು ಎಂದರೆ ‘ನಾಯಕತ್ವ’ ಮತ್ತು ‘ಜನಪ್ರಿಯತೆ’ ಯನ್ನು ಒಂದೇ ಎಂದು ಭಾವಿಸುವುದು.

ಐಸ್ ಕ್ರೀಮ್ ಮಾರಾಟಗಾರ ಎಲ್ಲರಿಗೂ ಇಷ್ಟವಾಗುತ್ತಾನೆ. ಅವನು ಹೋದಲ್ಲ ತಂಪು, ನಗು ಮತ್ತು ಸಂತೋಷವನ್ನು ಹಂಚುತ್ತಾನೆ. ಅವನ ಕೆಲಸವೇ ಜನರ ಇಚ್ಛೆಗೆ ಅನುಗುಣವಾದ ಸಿಹಿಯನ್ನು ನೀಡುವುದು. ಇಲ್ಲಿ ಯಾರಿಗೂ ನೋವಾಗುವ ಪ್ರಶ್ನೆಯೇ ಇಲ್ಲ. ಆದರೆ ಒಬ್ಬ ನಾಯಕನ ಕೆಲಸ ಜನರ ಇಚ್ಛೆಯನ್ನು ಪೂರೈಸುವುದಲ್ಲ, ಬದಲಾಗಿ ವ್ಯವಸ್ಥೆಯ ಹಿತದೃಷ್ಟಿಯಿಂದ ಯಾವುದು ‘ಸರಿ’ ಇದೆಯೋ ಅದನ್ನು ಮಾಡುವುದು.

ಒಬ್ಬ ನಾಯಕ ತನ್ನ ಸಂಸ್ಥೆ, ದೇಶ ಅಥವಾ ತಂಡವನ್ನು ಮುನ್ನಡೆಸುವಾಗ ಅನೇಕ ಬಾರಿ ಕಠಿಣ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಕಾ ಗುತ್ತದೆ. ಉದಾಹರಣೆಗೆ, ಒಬ್ಬ ಸಂಪಾದಕ ಸುದ್ದಿಯ ಸತ್ಯಾ ಸತ್ಯತೆಯನ್ನು ಪರಿಶೀಲಿಸುವಾಗ ಕೆಲವು ಪ್ರಭಾವಿ ವ್ಯಕ್ತಿಗಳಿಗೆ ಬೇಸರವಾಗಬಹುದು.

ಒಬ್ಬ ಉದ್ಯಮಿಯಾಗಿ ಕಂಪನಿಯ ಉಳಿವಿಗಾಗಿ ಕೆಲವು ಕಟ್ಟುನಿಟ್ಟಿನ ನಿಯಮಗಳನ್ನು ತಂದಾಗ ಉದ್ಯೋಗಿಗಳಿಗೆ ಸಿಟ್ಟು ಬರಬಹುದು. ಇಂಥ ಸಮಯದಲ್ಲಿ ನೀವು ‘ಎಲ್ಲರಿಗೂ ಸಂತೋಷ ನೀಡಬೇಕು’ ಎಂದು ಯೋಚಿಸಿದರೆ, ನೀವು ನಾಯಕನಾಗಿ ಸೋಲುತ್ತೀರಿ. ನಾಯಕತ್ವ ಎಂದರೆ ಕೆಲವೊಮ್ಮೆ ‘ವಿಲನ್’ ಆಗಲು ಸಿದ್ಧರಿರುವುದು.

ಸತ್ಯ ಯಾವಾಗಲೂ ಕಹಿಯಾಗಿರುತ್ತದೆ. ಎಲ್ಲರಿಗೂ ಸಕ್ಕರೆಯಂತಹ ಸುಳ್ಳುಗಳನ್ನು ಹೇಳುತ್ತಾ ಹೋದರೆ ನೀವು ಜನಪ್ರಿಯರಾಗಬಹುದು, ಆದರೆ ಒಳ್ಳೆಯ ನಾಯಕನಾಗಲಾರರಿ. ಸಮಾಜ ಸುಧಾರಕರು ಅಥವಾ ದಾರ್ಶನಿಕರನ್ನು ಗಮನಿಸಿ; ಅವರು ಸಮಾಜದ ಏಳಿಗೆಗಾಗಿ ಹೇಳಿದ ಮಾತುಗಳು ಆರಂಭದಲ್ಲಿ ಯಾರಿಗೂ ಇಷ್ಟವಾಗಲಿಲ್ಲ. ಅವರು ಅಂದು ಐಸ್ ಕ್ರೀಮ್ ಮಾರಲು ಹೋಗಿದ್ದರೆ ಇಂದಿನ ಸುಧಾರಣೆಗಳು ಸಾಧ್ಯವಾಗುತ್ತಿರಲಿಲ್ಲ.

ನಾಯಕತ್ವ ಎನ್ನುವುದು ಕಹಿಯಾದರೂ ಗುಣಪಡಿಸುವ ಔಷಽಯಂತಿರಬೇಕು. ‘ಎಲ್ಲರನ್ನೂ ಮೆಚ್ಚಿಸಲು ಹೋಗುವವನು ಕೊನೆಗೆ ಯಾರನ್ನೂ ಮೆಚ್ಚಿಸಲಾರ’ ಎಂಬ ಮಾತಿದೆ. ಒಬ್ಬ ನಾಯಕ ತನ್ನ ದೃಷ್ಟಿಕೋನದಲ್ಲಿ ( Vision ) ಸ್ಪಷ್ಟತೆ ಹೊಂದಿರಬೇಕು. ಯಾರೋ ಟೀಕಿಸುತ್ತಾರೆ ಎಂಬ ಕಾರಣಕ್ಕೆ ತನ್ನ ತತ್ವಗಳನ್ನು ಬದಲಾಯಿಸುವವನು ಕೇವಲ ಒಬ್ಬ ‘ಅನುಯಾಯಿ’ ಆಗಿ ಉಳಿಯುತ್ತಾನೆಯೇ ಹೊರತು ‘ನಾಯಕ’ನಾಗುವುದಿಲ್ಲ.

ನಾಯಕತ್ವದ ಮೊದಲ ಪಾಠವೇ ‘ಟೀಕೆಗಳನ್ನು ಎದುರಿಸುವ ಧೈರ್ಯ’. ಜೀವನದಲ್ಲಿ ನಮಗೆ ಎರಡು ದಾರಿಗಳಿವೆ. ಒಂದು, ಎಲ್ಲರಿಗೂ ಇಷ್ಟವಾಗುವ ಸಿಹಿಯನ್ನು ಹಂಚುತ್ತಾ ವಿವಾದಗಳಿಂದ ದೂರವಿರುವುದು. ಇದು ಸುರಕ್ಷಿತ ಮತ್ತು ಸುಖಕರ. ಇನ್ನೊಂದು, ಸರಿಯಾದ ಹಾದಿಯಲ್ಲಿ ನಡೆಯುತ್ತಾ ಎದುರಾಗುವ ವಿರೋಧಗಳನ್ನು ಮೆಟ್ಟಿ ನಿಂತು ಬದಲಾವಣೆ ತರುವುದು.

ನೀವು ಎರಡನೇ ಹಾದಿಯನ್ನು ಆರಿಸಿಕೊಂಡರೆ, ಟೀಕೆಗಳಿಗೆ ಅಂಜಬಾರದು. ಒಂದು ವೇಳೆ ನಿಮಗೆ ಕಹಿಯನ್ನು ಜೀರ್ಣಿಸಿಕೊಳ್ಳುವ ಶಕ್ತಿ ಇಲ್ಲದಿದ್ದರೆ, ಖಂಡಿತವಾಗಿಯೂ ಐಸ್ ಕ್ರೀಮ್ ಅಂಗಡಿ ತೆರೆಯುವುದು ಗೌರವಯುತವಾದ ಪರ್ಯಾಯ ದಾರಿ!

ಒಂದು ಶೀರ್ಷಿಕೆ ಮತ್ತು ತಲ್ಲಣ

ಅಮೆರಿಕದ ಪತ್ರಿಕೋದ್ಯಮ ಇತಿಹಾಸದಲ್ಲಿ ‘ FORD TO CITY: DROP DEAD ’ ಎಂಬ ಶೀರ್ಷಿಕೆಯು ಕೇವಲ ಒಂದು ಸುದ್ದಿಯಾಗಿ ಉಳಿದಿಲ್ಲ. 1975ರ ಅಕ್ಟೋಬರ್ 30ರಂದು ನ್ಯೂಯಾರ್ಕ್ ಡೈಲಿ ನ್ಯೂಸ್’ ನೀಡಿದ ಈ ಒಂದು ಹೆಡ್ ಲೈನ್ ರಾಜಕೀಯ ಆಯುಧವಾಗಿ ಹೇಗೆ ರೂಪಾಂತರಗೊಂಡಿತು ಎಂಬುದು ಅತ್ಯಂತ ರೋಚಕವಾದ ಕಥೆ.

1970ರ ದಶಕದಲ್ಲಿ ನ್ಯೂಯಾರ್ಕ್ ನಗರವು ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿತ್ತು. ಸಾಲದ ಹೊರೆ ಅತಿಯಾಗಿ, ನಗರವು ದಿವಾಳಿಯಾಗುವ ಅಂಚಿನಲ್ಲಿತ್ತು. ಅಂದಿನ ಮೇಯರ್ ಅಬ್ರಹಾಂ ಬೀಮ್ ಅವರು ಒಕ್ಕೂಟ ಸರಕಾರದಿಂದ ತುರ್ತು ಆರ್ಥಿಕ ನೆರವನ್ನು ಯಾಚಿಸಿದ್ದರು. ನಗರವನ್ನು ಉಳಿಸಲು ವಾಷಿಂಗ್ಟನ್‌ನ ಸಹಾಯ ಅತ್ಯಗತ್ಯವಾಗಿತ್ತು. 1975ರ ಅಕ್ಟೋಬರ್ 29ರಂದು ಅಂದಿನ ಅಮೆರಿಕದ ಅಧ್ಯಕ್ಷ ಜೆರಾಲ್ಡ್ ಫೋರ್ಡ್, ‘ನ್ಯಾಷನಲ್ ಪ್ರೆಸ್ ಕ್ಲಬ್’ನಲ್ಲಿ ಭಾಷಣ ಮಾಡಿದರು. ‌

ಅವರು ನ್ಯೂಯಾರ್ಕ್ ನಗರಕ್ಕೆ ಯಾವುದೇ ರೀತಿಯ ‘ಬೇಲ್-ಔಟ್’ ಅಥವಾ ಆರ್ಥಿಕ ಸಹಾಯ ನೀಡಲು ಖಡಾಖಡಿ ನಿರಾಕರಿಸಿದರು. ನಗರವು ತನ್ನ ಆರ್ಥಿಕ ಶಿಸ್ತನ್ನು ತಾನೇ ಕಾಪಾಡಿಕೊಳ್ಳಬೇಕು ಎಂದು ಅವರು ವಾದಿಸಿದರು. ಅವರ ಭಾಷಣವು ಕಾನೂನುಬದ್ಧ ಮತ್ತು ತಾಂತ್ರಿಕ ಪದಗಳಿಂದ ಕೂಡಿದ ಸುದೀರ್ಘ ರಾಜಕೀಯ ಭಾಷಣವಾಗಿತ್ತು.

ಜೆರಾಲ್ಡ್ ಫೋರ್ಡ್ ಅವರ ಆ ಸುದೀರ್ಘ ಭಾಷಣವನ್ನು ಸಾಮಾನ್ಯ ಜನರಿಗೆ ಅರ್ಥವಾಗುವಂತೆ ಕಟ್ಟಿಕೊಡುವುದು ಪತ್ರಿಕೆಯ ಮುಂದಿದ್ದ ಸವಾಲಾಗಿತ್ತು. ‘ಡೈಲಿ ನ್ಯೂಸ್’ನ ವ್ಯವಸ್ಥಾಪಕ ಸಂಪಾದಕ ವಿಲಿಯಂ ಕ್ಯಾಸೆಡಿನ್, ಇಡೀ ಭಾಷಣದ ಸಾರಾಂಶವನ್ನು ಕೇವಲ ನಾಲ್ಕು ಪದಗಳಿಗೆ ಇಳಿಸಿದರು FORD TO CITY: DROP DEAD. ವಾಸ್ತವದಲ್ಲಿ ಅಧ್ಯಕ್ಷ ಫೋರ್ಡ್ ಎಲ್ಲಿಯೂ ‘ಸತ್ತು ಹೋಗು’ ( Drop Dead ) ಎಂಬ ಪದಗಳನ್ನು ಬಳಸಿರಲಿಲ್ಲ. ಆದರೆ, ನಗರಕ್ಕೆ ನೆರವು ನೀಡಲು ನಿರಾಕರಿಸಿದ ಅವರ ವರ್ತನೆಯು ನ್ಯೂಯಾರ್ಕ್ ಜನತೆಗೆ ಅಷ್ಟೇ ಕ್ರೂರವಾಗಿ ಭಾಸವಾಗಿತ್ತು.

ಆ ಭಾವನೆಯನ್ನು ಶೀರ್ಷಿಕೆ ಹಿಡಿದಿಟ್ಟಿತ್ತು. ಒಂದು ದೊಡ್ಡ ರಾಜಕೀಯ ವಿದ್ಯಮಾನವನ್ನು ಕೇವಲ 4 ಪದಗಳಲ್ಲಿ ವಿವರಿಸಿದ್ದು ಪತ್ರಿಕೋದ್ಯಮದ ಅತಿದೊಡ್ಡ ಚಮತ್ಕಾರ ಇಂದು ಈಗಲೂ ಪರಿಗಣಿಸ ಲಾಗುತ್ತದೆ. ಈ ಹೆಡ್‌ಲೈನ್ ಪ್ರಕಟವಾದ ತಕ್ಷಣ ನ್ಯೂಯಾರ್ಕ್ ನಗರದ ಜನರಲ್ಲಿ ಅಧ್ಯಕ್ಷರ ವಿರುದ್ಧ ಆಕ್ರೋಶ ಭುಗಿಲೆದ್ದಿತು. ಅಧ್ಯಕ್ಷರು ತಮ್ಮನ್ನು ಕಡೆಗಣಿಸಿದ್ದಾರೆ ಎಂಬ ಭಾವನೆ ಜನರಲ್ಲಿ ಮನೆ ಮಾಡಿತು.

1976ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಜೆರಾಲ್ಡ್ ಫೋರ್ಡ್ ಅವರು ನ್ಯೂಯಾರ್ಕ್ ರಾಜ್ಯದಲ್ಲಿ ತೀವ್ರ ಹಿನ್ನಡೆ ಅನುಭವಿಸಿದರು. ರಾಜಕೀಯ ವಿಶ್ಲೇಷಕರ ಪ್ರಕಾರ, ಈ ಒಂದೇ ಒಂದು ಶೀರ್ಷಿಕೆ ಫೋರ್ಡ್ ಅವರ ಇಮೇಜ್ ಅನ್ನು ‘ಜನವಿರೋಧಿ’ ಎಂದು ಚಿತ್ರಿಸುವಲ್ಲಿ ಯಶಸ್ವಿಯಾಗಿತ್ತು.

ಪತ್ರಿಕೋದ್ಯಮವು ಇಂದಿನ ಸುದ್ದಿಯನ್ನು ಹೇಳುವುದಷ್ಟೇ ಅಲ್ಲ, ನಾಳಿಗೆ ಸಲ್ಲುವ ದಾಖಲೆಯೂ ಹೌದು. ಇಂದು ಯಾರಾದರೂ 1970ರ ಅಮೆರಿಕದ ರಾಜಕೀಯ ಸ್ಥಿತಿಯನ್ನು ಅಭ್ಯಾಸ ಮಾಡಿದರೆ, ಅವರಿಗೆ ಈ ಶೀರ್ಷಿಕೆಯು ಅಂದಿನ ಪರಿಸ್ಥಿತಿಯ ಅತ್ಯುತ್ತಮ ಸಾಕ್ಷಿಯಾಗಿ ಸಿಗುತ್ತದೆ. ಇದು ಶೀರ್ಷಿಕೆಯು ಹೇಗೆ ಇತಿಹಾಸವನ್ನು ರೂಪಿಸುತ್ತದೆ ಎಂಬುದಕ್ಕೆ ಅತ್ಯಂತ ದೊಡ್ಡ ಉದಾಹರಣೆ.

’ DROP DEAD’ ಎಂಬ ಶೀರ್ಷಿಕೆಯು ಪತ್ರಿಕೋದ್ಯಮದ ಸೃಜನಶೀಲತೆಗೆ ಮೈಲಿಗಲ್ಲು. ಅಧಿಕಾರ ದಲ್ಲಿರುವವರ ನಿರ್ಧಾರಗಳನ್ನು ಜನಸಾಮಾನ್ಯರ ಭಾಷೆಯಲ್ಲಿ ವ್ಯಾಖ್ಯಾನಿಸಿದಾಗ ಅದು ಎಷ್ಟು ಶಕ್ತಿಶಾಲಿಯಾಗಿರುತ್ತದೆ ಎಂಬುದಕ್ಕೆ ಇದು ಇಂದಿಗೂ ಒಂದು ಪಾಠವಾಗಿದೆ.