SS Rajamouli: ದಿಢೀರ್‌ ಅಂತ ʻವಾರಣಾಸಿʼ ಟೈಟಲ್‌ನಲ್ಲಿ ಬದಲಾವಣೆ; ರಾಜಮೌಳಿಯ ಈ ನಿರ್ಧಾರಕ್ಕೆ ಕಾರಣವೇನು ಗೊತ್ತಾ?
Varanasi Movie Title Controversy: ರಾಜಮೌಳಿ ಮತ್ತು ಮಹೇಶ್ ಬಾಬು ಕಾಂಬಿನೇಷನ್‌ನ ಬಹುನಿರೀಕ್ಷಿತ 'ವಾರಣಾಸಿ' ಚಿತ್ರದ ಟೈಟಲ್‌ನಲ್ಲಿ ಒಂಚೂರು ಬದಲಾವಣೆ ಆಗಲಿದೆ ಎಂಬ ಮಾಹಿತಿ ಸಿಕ್ಕಿದೆ. ತೆಲುಗಿನಲ್ಲಿ 'ವಾರಣಾಸಿ' ಎಂಬ ಶೀರ್ಷಿಕೆ ಎರಡು ವರ್ಷಗಳ ಹಿಂದೆಯೇ ಬೇರೆ ನಿರ್ಮಾಪಕರಿಂದ ನೋಂದಣಿ ಆಗಿದ್ದರಿಂದ, ರಾಜಮೌಳಿ ತಂಡವು ತೆಲುಗಿನಲ್ಲಿ 'ರಾಜಮೌಳಿ ವಾರಣಾಸಿ' ಎಂದು ಬಿಡುಗಡೆ ಮಾಡಲು ನಿರ್ಧರಿಸಿದೆಯಂತೆ.
-
'ಸೂಪರ್‌ ಸ್ಟಾರ್' ಮಹೇಶ್ ಬಾಬು ಮತ್ತು ನಿರ್ದೇಶಕ ಎಸ್ ಎಸ್ ರಾಜಮೌಳಿ ಅವರು 'ವಾರಣಾಸಿ' ಚಿತ್ರಕ್ಕಾಗಿ ಒಂದಾಗಿದ್ದಾರೆ. ಭಾರತೀಯ ಚಿತ್ರರಂಗದಲ್ಲಿಯೇ ಭಾರಿ ಬಜೆಟ್‌ನಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರದ ಮೇಲೆ ಸಿಕ್ಕಾಪಟ್ಟೆ ನಿರೀಕ್ಷೆ ಇದೆ. ಈಗಾಗಲೇ ಸಣ್ಣ ಝಲಕ್‌ ನೀಡಿರುವ ರಾಜಮೌಳಿ ಟೀಮ್‌, ಈ ಸಿನಿಮಾದ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದ್ದಾರೆ. ಸದ್ಯ ಈ ಚಿತ್ರದ ಟೈಟಲ್‌ ಕುರಿತಂತೆ ಒಂದು ಬಿಗ್ ಅಪ್ಡೇಟ್‌ ಸಿಕ್ಕಿದ್ದು, ಫ್ಯಾನ್ಸ್‌ಗೆ ಅಚ್ಚರಿಯಾಗಿದೆ. ಅಷ್ಟಕ್ಕೂ ಏನದು ಅಪ್ಡೇಟ್‌?
ಟೈಟಲ್‌ನಲ್ಲಿ ಬದಲಾವಣೆ ಏಕೆ?
ರಾಜಮೌಳಿ ಮತ್ತು ಮಹೇಶ್ ಬಾಬು ಕಾಂಬಿನೇಷನ್‌ ಸಿನಿಮಾಗೆ ಮೊದಲು ತಾತ್ಕಾಲಿಕವಾಗಿ ಎಸ್‌ಎಸ್‌ಎಂಬಿ 29 ಎಂದು ಕರೆಯಲಾಗುತ್ತಿತ್ತು. ನಂತರ ಚಿತ್ರಕ್ಕೆ 'ವಾರಣಾಸಿ' ಎಂದು ಘೋಷಣೆ ಮಾಡಲಾಯಿತು. ಎಲ್ಲಾ ಭಾಷೆಗಳಲ್ಲೂ ಇದೇ ಶೀರ್ಷಿಕೆಯಲ್ಲಿ ಸಿನಿಮಾ ತೆರೆಗೆ ಬರಲಿದೆ ಎಂದು ಹೇಳಲಾಗಿತ್ತು. ಆದರೆ ಇದೀಗ ಟೈಟಲ್‌ನಲ್ಲಿ ಒಂದಷ್ಟು ಬದಲಾವಣೆ ಕೇಳಿಬಂದಿದೆ. ಯಾಕೆಂದರೆ, ತೆಲುಗಿನಲ್ಲಿ ಇದೇ ಹೆಸರಿನಲ್ಲಿ ಎರಡು ವರ್ಷಗಳ ಹಿಂದೆಯೇ ಒಂದು ಸಿನಿಮಾ ಟೈಟಲ್‌ ನೋಂದಣಿ ಆಗಿತ್ತು. ಹಾಗಾಗಿ, ಅವರಿಂದ ಅಡ್ಡಿ ಎದುರಾದ ಹಿನ್ನೆಲೆಯಲ್ಲಿ ರಾಜಮೌಳಿಯ ವಾರಣಾಸಿ ಸಿನಿಮಾದ ಟೈಟಲ್‌ನಲ್ಲಿ ಬದಲಾವಣೆ ಮಾಡಲಾಗಿದೆಯಂತೆ.
Varanasi title dispute: ರಾಜಮೌಳಿ 'ವಾರಣಾಸಿ' ಸಿನಿಮಾ ಟೈಟಲ್‌ ವಿವಾದ; ದೊಡ್ಡ ಮೊತ್ತದ ಹಣ ವ್ಯರ್ಥ?
ಏನದು ಬದಲಾವಣೆ?
ಮಹೇಶ್ ಬಾಬು ಹೀರೋ ಆಗಿರುವ ವಾರಣಾಸಿ ಸಿನಿಮಾವನ್ನು ತೆಲುಗಿನಲ್ಲಿ 'ರಾಜಮೌಳಿ ವಾರಣಾಸಿ' ಎಂಬ ಹೆಸರಿನಲ್ಲಿ ಬಿಡುಗಡೆ ಮಾಡಲಾಗುವುದು ಎಂದು ಹೇಳಲಾಗುತ್ತಿದೆ. ಉಳಿದ ಭಾಷೆಗಳಲ್ಲಿ 'ವಾರಣಾಸಿ' ಎಂಬ ಹೆಸರಿನಲ್ಲೇ ಈ ಸಿನಿಮಾ ತೆರೆಗೆ ಬರಲಿದೆಯಂತೆ. ರಾಮಭಕ್ತ ಹನುಮ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ಸಿ ಎಚ್ ಸುಬ್ಬಾ ರೆಡ್ಡಿ ವಾರಣಾಸಿ ಟೈಟಲ್‌ ನೋಂದಾಯಿಸಿರುವುದರಿಂದ ಈ ಬದಲಾವಣೆ ಮಾಡಲಾಗಿದೆ ಎಂಬ ಮಾತು ಕೇಳಿಬಂದಿದೆ.
SSMB29: ಕೊಟ್ಟ ಮಾತಿಗೆ ತಪ್ಪಿ ನಡೆಯದ ರಾಜಮೌಳಿ; 'ವಾರಣಾಸಿ' ಚಿತ್ರಕ್ಕಿದೆ 15 ವರ್ಷಗಳ ಹಿಂದಿನ ಒಪ್ಪಂದದ ಇತಿಹಾಸ!
ಇದೇ ಮೊದಲಲ್ಲ?
ಮಹೇಶ್ ಬಾಬು ಈ ಹಿಂದೆ ನಟಿಸಿದ್ದ 'ಖಲೇಜಾ' ಚಿತ್ರದ ಶೀರ್ಷಿಕೆಯ ಬಗ್ಗೆಯೂ ಇದೇ ರೀತಿಯ ವಿವಾದವಿತ್ತು. ಕೊನೆಗೆ ಆ ಸಿನಿಮಾವನ್ನು 'ಮಹೇಶ್ ಖಲೇಜಾ' ಎಂದು ಬದಲಾಯಿಸಿಲಾಯಿತು ಎನ್ನಲಾಗಿದೆ. ಇತ್ತೀಚೆಗೆ 'ಕುಬೇರ' ಸಿನಿಮಾದ ಶೀರ್ಷಿಕೆಯ ಬಗ್ಗೆ ವಿವಾದ ಭುಗಿಲೆದ್ದ ನಂತರ, ಅದನ್ನು 'ಶೇಖರ್ ಕಮ್ಮುಲ ಕುಬೇರ' ಎಂದು ಬಿಡುಗಡೆ ಮಾಡಲಾಗಿತ್ತು. ಈಗ, 'ವಾರಣಾಸಿ' ಚಿತ್ರವು ತೆಲುಗಿನಲ್ಲಿ 'ರಾಜಮೌಳಿ ವಾರಣಾಸಿ' ಶೀರ್ಷಿಕೆಯೊಂದಿಗೆ ಬಿಡುಗಡೆಯಾಗಲಿದೆ ಎಂದು ಹೇಳಲಾಗುತ್ತಿದೆ. ಆದರೆ ಈ ಬಗ್ಗೆ ಚಿತ್ರತಂಡ ಅಧಿಕೃತವಾಗಿ ಘೋಷಣೆ ಮಾಡಬೇಕಿದೆ.
'ವಾರಣಾಸಿ' ಸಿನಿಮಾವು 2027ರ ಮಾರ್ಚ್‌ನಲ್ಲಿ ತೆರೆಗೆ ಬರಲಿದೆ. ಮಹೇಶ್ ಬಾಬು ಜೋಡಿಯಾಗಿ ನಟಿ ಪ್ರಿಯಾಂಕಾ ಚೋಪ್ರಾ ಕಾಣಿಸಿಕೊಳ್ಳಲಿದ್ದು, ಪೃಥ್ವಿರಾಜ್‌ ಸುಕುಮಾರನ್‌ ಅವರು ವಿಲನ್‌ ಪಾತ್ರ ಮಾಡುತ್ತಿದ್ದಾರೆ. ಎಂ ಎಂ ಕೀರವಾಣಿ ಅವರ ಸಂಗೀತ ನೀಡಿದ್ದು, ಪಿ ಎಸ್ ವಿನೋದ್‌ ಅವರು ಛಾಯಾಗ್ರಹಣ ಮಾಡುತ್ತಿದ್ದಾರೆ. ವಿಜಯೇಂದ್ರ ಪ್ರಸಾದ್‌, ಎಸ್ ಎಸ್ ಕಂಚಿ, ದೇವ ಕಟ್ಟ ಅವರು ಸ್ಕ್ರಿಪ್ಟ್‌ ವಿಭಾಗದಲ್ಲಿ ಕೆಲಸ ಮಾಡುತ್ತಿದ್ದಾರೆ.
