ವಿದ್ಯಾರ್ಥಿಗಳೇ ಗಮನಿಸಿ; NEET-UG 2026 ಮರು ಪರೀಕ್ಷೆಯ ನಕಲಿ ಪ್ರವೇಶ ಪತ್ರದ ಬಗ್ಗೆ ಇರಲಿ ಎಚ್ಚರ, ಮಾಹಿತಿ ಹಂಚಿಕೊಂಡ NTA

ನವದೆಹಲಿ, ಜೂ. 19: ಜೂನ್ 21 ರಂದು ನಡೆಯಲಿರುವ ನೀಟ್ (NEET-UG 2026) ಮರು ಪರೀಕ್ಷೆಗೆ ಅಭ್ಯರ್ಥಿಗಳು ತಮ್ಮ ಪ್ರವೇಶ ಪತ್ರಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಲು ಜ್ಞಾಪನಾ ಎಸ್ಎಂಎಸ್ ಸಂದೇಶಗಳು, ಇಮೇಲ್‌ಗಳು ಮತ್ತು ವಾಟ್ಸಾಪ್ ಅಧಿಸೂಚನೆಗಳನ್ನು ಕಳುಹಿಸುತ್ತಿರುವುದಾಗಿ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ತಿಳಿಸಿದೆ. ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶ ಪರೀಕ್ಷೆಯನ್ನು ಮೇ 3 ರಂದು ನಡೆಸಲಾಗಿತ್ತು. ಆದರೆ ಪ್ರಶ್ನೆಪತ್ರಿಕೆ ಸೋರಿಕೆಯ ಆರೋಪದ ನಂತರ ಮೇ 12 ರಂದು ರದ್ದುಗೊಳಿಸಲಾಯಿತು. ಕೇಂದ್ರ ತನಿಖಾ ದಳವು ಈ ವಿಷಯದ ಬಗ್ಗೆ ತನಿಖೆ ನಡೆಸುತ್ತಿದೆ.

ಎನ್‌ಟಿಎ, ಜೂನ್ 21, 2026 ರ ಭಾನುವಾರದಂದು ಮರು ಪರೀಕ್ಷೆಗೆ ತಮ್ಮ ಪ್ರವೇಶ ಪತ್ರಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಲು ಅಭ್ಯರ್ಥಿಗಳಿಗೆ ಜ್ಞಾಪನಾ ಎಸ್ಎಂಎಸ್ ಮತ್ತು ಇಮೇಲ್‌ಗಳನ್ನು ಕಳುಹಿಸುತ್ತಿದೆ ಎಂದು ಹೇಳಿದೆ. ಎಸ್ಎಂಎಸ್ ಸಂದೇಶಗಳನ್ನು NICPEP ಐಡಿಯಿಂದ ಕಳುಹಿಸಲಾಗುತ್ತದೆ. ಇಮೇಲ್‌ಗಳನ್ನು [email protected] ನಿಂದ ಕಳುಹಿಸಲಾಗುತ್ತದೆ ಎಂದು ಅದು ಹೇಳಿದೆ.

ಅಭ್ಯರ್ಥಿಗಳು ಅಧಿಕೃತ ವೆಬ್‌ಸೈಟ್ http://neet.nta.nic.in ಅನ್ನು ಮಾತ್ರ ಬಳಸಬೇಕು. ವಿಳಾಸವನ್ನು ನೇರವಾಗಿ ತಮ್ಮ ಬ್ರೌಸರ್‌ಗಳಲ್ಲಿ ನಮೂದಿಸಬೇಕು ಎಂದು ಸಂಸ್ಥೆ ತಿಳಿಸಿದೆ. ಎನ್‌ಟಿಎ ಯಾವುದೇ ಪಾವತಿಯನ್ನು ಕೇಳುವುದಿಲ್ಲ, ಪರೀಕ್ಷಾ ಪತ್ರಿಕೆಗಳನ್ನು ಕಳುಹಿಸುವುದಿಲ್ಲ, ಉತ್ತರ ಕೀಗಳನ್ನು ಕಳುಹಿಸುವುದಿಲ್ಲ ಅಥವಾ ಸೋರಿಕೆಯಾದ ವಿಷಯವನ್ನು ಕಳುಹಿಸುವುದಿಲ್ಲ ಅಥವಾ ನಿಮ್ಮ ಪ್ರವೇಶ ಪತ್ರವನ್ನು ಲಿಂಕ್ ಮೂಲಕ ಹಂಚಿಕೊಳ್ಳುವುದಿಲ್ಲ ಎಂದು ಸಲಹಾ ಸಂಸ್ಥೆ ಹೇಳಿದೆ. ನೀವು ಅಂತಹ ಯಾವುದೇ ಸಂದೇಶವನ್ನು ಸ್ವೀಕರಿಸಿದರೆ, ಕ್ಲಿಕ್ ಮಾಡಬೇಡಿ. ರಿಪೋರ್ಟ್ ಮಾಡಿ ಎಂದು ತಿಳಿಸಿದೆ.

ʼʼಸೇನಾ ಕಣ್ಗಾವಲಿನಲ್ಲಿ ನೀಟ್ ಮರುಪರೀಕ್ಷೆ; ವಿದ್ಯಾರ್ಥಿಗಳ ಮೇಲೆ ಹೆಚ್ಚಿನ ಒತ್ತಡ”: ಬಿಜೆಪಿಯಿಂದ ಹೊರ ಬರುತ್ತಿದ್ದಂತೆ ಕೇಂದ್ರದ ವಿರುದ್ಧ ಅಣ್ಣಾಮಲೈ ಗುಡುಗು

ಮರು ಪರೀಕ್ಷೆಗಾಗಿ ಅಭ್ಯರ್ಥಿಗಳಿಗೆ ಪರೀಕ್ಷಾ ನವೀಕರಣಗಳು ಮತ್ತು ಪರೀಕ್ಷಾ ಕೇಂದ್ರದ ಮಾಹಿತಿಯನ್ನು ನೇರವಾಗಿ ವಾಟ್ಸಾಪ್‌ನಲ್ಲಿ ಕಳುಹಿಸುವುದಾಗಿ ಎನ್‌ಟಿಎ ಹೇಳಿದೆ. ಅಭ್ಯರ್ಥಿಗಳು ಸಂದೇಶ ಕಳುಹಿಸಿದ ಖಾತೆಯ ಪಕ್ಕದಲ್ಲಿ ನೀಲಿ ಬಣ್ಣದ ಪರಿಶೀಲನಾ ಗುರುತು (Blue Verified Tick) ಹಾಗೂ ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ (National Testing Agency) ಎಂಬ ಹೆಸರಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳುವಂತೆ ಸೂಚಿಸಿದೆ. ನೀಲಿ ಪರಿಶೀಲನಾ ಗುರುತು ಇಲ್ಲದ ಯಾವುದೇ ಖಾತೆಯಿಂದ ಬರುವ ಸಂದೇಶಗಳು, ಎನ್‌ಟಿಎ ಹೆಸರನ್ನು ಬಳಸಿದ್ದರೂ ಸಹ, ಸಂಸ್ಥೆಯಿಂದ ಕಳುಹಿಸಲ್ಪಟ್ಟವುಗಳಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.

ಎನ್‌ಟಿಎ ತನ್ನ ವಾಟ್ಸ್ಆಪ್ ಸೇವೆಯು ಬ್ರಾಡ್‌ಕಾಸ್ಟ್-ಮಾತ್ರ (Broadcast-only) ಚಾನೆಲ್ ಆಗಿದ್ದು, ನಿಮ್ಮಿಂದ ಉತ್ತರಿಸಲು, ಒಟಿಪಿ (OTP) ಅಥವಾ ವೈಯಕ್ತಿಕ ಮಾಹಿತಿಯನ್ನು ಹಂಚಿಕೊಳ್ಳಲು ಅಥವಾ ಯಾವುದೇ ಹಣ ಪಾವತಿಸಲು ಎಂದಿಗೂ ಕೇಳುವುದಿಲ್ಲ ಎಂದು ತಿಳಿಸಿದೆ. ಆದ್ದರಿಂದ, ಎನ್‌ಟಿಎ ಹೆಸರಿನಲ್ಲಿ ಬರುವ ಯಾವುದೇ ಸಂದೇಶವು ಒಟಿಪಿ, ವೈಯಕ್ತಿಕ ಮಾಹಿತಿ ಅಥವಾ ಹಣವನ್ನು ಕೇಳಿದರೆ, ಅದು ವಂಚನೆಯ ಸಂದೇಶವಾಗಿದ್ದು, ಅದನ್ನು ನಂಬಬಾರದು ಎಂದು ಸಂಸ್ಥೆ ಎಚ್ಚರಿಕೆ ನೀಡಿದೆ.

ಜೂನ್ 21 ರ ಮರು ಪರೀಕ್ಷೆಗೆ ಈಗಾಗಲೇ ಪ್ರವೇಶ ಪತ್ರಗಳನ್ನು ಡೌನ್‌ಲೋಡ್ ಮಾಡಿಕೊಂಡಿರುವ ಅಭ್ಯರ್ಥಿಗಳು ಮತ್ತೆ ಮಾಡಬೇಕಾಗಿಲ್ಲ ಎಂದು ಸಂಸ್ಥೆ ತಿಳಿಸಿದೆ. ಎಸ್‌ಎಂಎಸ್/ಇಮೇಲ್/ವಾಟ್ಸಾಪ್ ಸಂದೇಶಗಳು ಪ್ರಾಥಮಿಕವಾಗಿ ತಮ್ಮ ಹೊಸ ಪ್ರವೇಶ ಪತ್ರಗಳನ್ನು ಇನ್ನೂ ಡೌನ್‌ಲೋಡ್ ಮಾಡಿಕೊಳ್ಳದ ವಿದ್ಯಾರ್ಥಿಗಳಿಗೆ ಈ ಸಂದೇಶ ಎಂದು ಅದು ಸ್ಪಷ್ಟಪಡಿಸಿದೆ.

ನೀಟ್ ಪ್ರಶ್ನೆ ಪತ್ರಿಕೆ ಮತ್ತೆ ಸೋರಿಕೆಯಾಗಿಲ್ಲ: ನಕಲಿ ಸುದ್ದಿ ನಂಬಬೇಡಿ ಎಂದ ಎನ್‌ಟಿಎ

ಮೇ 3 ರ ಪರೀಕ್ಷೆಗೆ ನೀಡಲಾದ ಪ್ರವೇಶ ಪತ್ರಗಳು ಇನ್ನು ಮುಂದೆ ಮಾನ್ಯವಾಗಿಲ್ಲ. ಏಕೆಂದರೆ ಅನೇಕ ವಿದ್ಯಾರ್ಥಿಗಳಿಗೆ ಅವರ ಆದ್ಯತೆಯ ನಗರಗಳಲ್ಲಿ ಹೊಸ ಪರೀಕ್ಷಾ ಕೇಂದ್ರಗಳನ್ನು ನಿಯೋಜಿಸಲಾಗಿದೆ ಎಂದು ಎನ್‌ಟಿಎ ಹೇಳಿದೆ. ಜೂನ್ 21ರ ಮರುಪರೀಕ್ಷೆಯ ಪ್ರವೇಶ ಪತ್ರವನ್ನು ಒಮ್ಮೆ ಡೌನ್‌ಲೋಡ್ ಮಾಡಿ ಮುದ್ರಿಸಿಕೊಂಡರೆ ಸಾಕು ಎಂದು ಎನ್‌ಟಿಎ ಸ್ಪಷ್ಟಪಡಿಸಿದೆ.

ಜೂನ್ 21 ರ ಮರು ಪರೀಕ್ಷೆಗೆ ಸಿದ್ಧತೆಗಳನ್ನು ಮುಂದುವರಿಸಿರುವುದರಿಂದ ಅಭ್ಯರ್ಥಿಗಳು ಅಧಿಕೃತ ವೆಬ್‌ಸೈಟ್‌ನಿಂದ ಮಾತ್ರ ಪ್ರವೇಶ ಪತ್ರಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಬೇಕು. ಜೊತೆಗೆ, ಅನುಮಾನಾಸ್ಪದ ಸಂದೇಶಗಳು ಅಥವಾ ವಂಚನೆಗೆ ಸಂಬಂಧಿಸಿದ ಮಾಹಿತಿಯನ್ನು ನಿಗದಿತ ದೂರು ಸಲ್ಲಿಕೆ ವೇದಿಕೆ (reporting platform) ಅಥವಾ ಸೈಬರ್ ಅಪರಾಧ ಸಹಾಯವಾಣಿ (cybercrime helplines) ಮೂಲಕ ವರದಿ ಮಾಡುವಂತೆ ತಿಳಿಸಿದೆ.