New Rules: ಇಂದಿನಿಂದ ಎಲ್ಲಾ ಚೇಂಜ್‌... ಚೇಂಜ್‌! ಪಿಎಫ್, ಎಲ್‌ಪಿಜಿ, ಕ್ರೆಡಿಟ್ ಕಾರ್ಡ್ ಸೇರಿದಂತೆ ಹಲವು ಹೊಸ ನಿಯಮಗಳು ಜಾರಿ

ನವದೆಹಲಿ: ಪ್ರತಿ ತಿಂಗಳ ಆರಂಭ ಅಥವಾ ಅಂತ್ಯದಲ್ಲಿ ಕೆಲವು ಹೊಸ ನಿಯಮಗಳು ಜಾರಿಯಾಗುತ್ತವೆ. ಅಂತೆಯೇ ಜೂನ್ ತಿಂಗಳಲ್ಲಿ ಪ್ರತಿಯೊಬ್ಬರ ಜೇಬಿನ ಮೇಲೆ ಪರಿಣಾಮ ಬೀರುವ ಹಲವು ಮಹತ್ತರವಾದ ಬದಲಾವಣೆಗಳು ಆಗಲಿದೆ. ಬ್ಯಾಂಕ್, ಪಿಎಫ್, ಎಲ್‌ಪಿಜಿ, ಕ್ರೆಡಿಟ್ ಕಾರ್ಡ್, ಆಧಾರ್ ಮತ್ತು ಯುಪಿಐಗೆ ಸಂಬಂಧಿಸಿದ ಹೊಸ ನಿಯಮಗಳು ಜೂನ್ 1ರಿಂದ ಜಾರಿಗೆ ಬರಲಿದೆ. ಇದು ಪ್ರತಿಯೊಬ್ಬರ ದೈನಂದಿನ ಜೀವನದ ಮೇಲೆ ಮತ್ತು ಹಣಕಾಸಿನ ಯೋಜನೆಗಳ ಮೇಲೆ ನೇರ ಪರಿಣಾಮ ಬೀರಲಿದೆ.

ಇಪಿಎಫ್‌ಒ 3.0 ಬಿಡುಗಡೆ

ಸಂಬಳ ಪಡೆಯುವ ಉದ್ಯೋಗಿಗಳಿಗೆ ಇನ್ನು ಮುಂದೆ ಪಿಎಫ್ ಹಿಂಪಡೆಯುವಿಕೆ ಸುಲಭವಾಗಲಿದೆ. ನೌಕರರ ಭವಿಷ್ಯ ನಿಧಿ ಸಂಸ್ಥೆಯು ಇಪಿಎಫ್‌ಒ 3.0 ಅನ್ನು ಜೂನ್ 1ರಿಂದ ಪ್ರಾರಂಭಿಸಲಿದೆ. ಈ ಮೂಲಕ ಪಿಎಫ್ ಹಿಂಪಡೆಯುವುದು, ಕೆವೈಸಿ ನವೀಕರಣ ಮತ್ತು ಕ್ಲೈಮ್ ಮಾಡುವುದು ಹೆಚ್ಚು ಸರಳ ಮತ್ತು ಸುಲಭವಾಗಲಿದೆ. ಅಲ್ಲದೇ ಇದರಿಂದ ಎಟಿಎಂನಿಂದ ಇಪಿಎಫ್ ಕಾರ್ಡ್‌ ಬಳಸಿ ಹಣ ಮರಳಿ ಪಡೆಯಬಹುದು.

ಎಫ್‌ಡಿ ಬಡ್ಡಿದರ ಬದಲಾವಣೆ

ಈ ಬಾರಿ ಬ್ಯಾಂಕ್‌ಗಳ ಸ್ಥಿರ ಠೇವಣಿ (ಎಫ್‌ಡಿ) ಬಡ್ಡಿ ದರಗಳು ಕಡಿಮೆಯಾಗಲಿದೆ. ಆರ್‌ಬಿಐ ರೆಪೊ ದರದಲ್ಲಿ ಕಡಿತ ಮಾಡಿರುವುದರಿಂದ ಬ್ಯಾಂಕುಗಳು ಬಡ್ಡಿ ದರಗಳನ್ನು ಇಳಿಸಲಿದೆ.ಸೂರ್ಯೋದಯ ಸಣ್ಣ ಫೈನಾನ್ಸ್ ಬ್ಯಾಂಕ್ 5 ವರ್ಷಗಳ ಎಫ್‌ಡಿ ಮೇಲಿನ ಬಡ್ಡಿಯನ್ನು ಶೇ. 8.6 ರಿಂದ ಶೇ. 8ಕ್ಕೆ ಇಳಿಕೆ ಮಾಡಿದೆ. ಜೂನ್ 1 ರಿಂದ 3 ಕೋಟಿಗಿಂತ ರೂ. ಕಡಿಮೆ ಠೇವಣಿಗಳಿಗೆ ತನ್ನ ಸ್ಥಿರ ಠೇವಣಿ ದರಗಳನ್ನು 60 ಬೇಸಿಸ್ ಪಾಯಿಂಟ್‌ಗಳವರೆಗೆ ಕಡಿಮೆ ಮಾಡುತ್ತದೆ. ಹೊಸ ದರಗಳು ಶೇ. 4ರಿಂದ ಶೇ. 8.4 ರವರೆಗೆ ಇರುತ್ತವೆ.

ಕ್ರೆಡಿಟ್ ಕಾರ್ಡ್ ರಿವಾರ್ಡ್‌ ಮತ್ತು ದಂಡ

ಕ್ರೆಡಿಟ್ ಕಾರ್ಡ್‌ಗೆ ಸಂಬಂಧಿಸಿದ ನಿಯಮಗಳು ಜೂನ್ 1 ರಿಂದ ಬದಲಾಗುತ್ತದೆ. 450 ರೂ. ನಿಂದ 5000 ರೂ. ವರೆಗೆ ಸ್ವಯಂ ಡೆಬಿಟ್ ವಿಫಲವಾದರೆ ಶೇ. 2ರಷ್ಟು ದಂಡ ವಿಧಿಸಲಾಗುತ್ತದೆ. ಇನ್ನು ರಿವಾರ್ಡ್ ಪಾಯಿಂಟ್‌ಗಳ ಗರಿಷ್ಠ ಮಿತಿಯನ್ನು ನಿಗದಿಪಡಿಸಲಾಗುತ್ತದೆ. ಕೆಲವು ಬ್ಯಾಂಕುಗಳು ಕ್ರೆಡಿಟ್ ಕಾರ್ಡ್ ಮೂಲಕ ವಿದ್ಯುತ್, ನೀರು ಇತ್ಯಾದಿ ಯುಟಿಲಿಟಿ ಬಿಲ್‌ಗಳ ಪಾವತಿಯ ಮೇಲೆ ಹೆಚ್ಚುವರಿ ಶುಲ್ಕ ವಿಧಿಸಲಿದ್ದು, ಕ್ಯಾಶ್‌ಬ್ಯಾಕ್ ನಿಯಮಗಳು ಬದಲಾಗಲಿದೆ.

ಕ್ರೆಡಿಟ್ ಕಾರ್ಡ್ ಬಳಕೆದಾರರು ಅದರಲ್ಲೂ ವಿಶೇಷವಾಗಿ ಕೋಟಕ್ ಮಹೀಂದ್ರಾ ಬ್ಯಾಂಕ್, ಹೆಚ್ ಡಿಎಫ್ಸಿ ಬ್ಯಾಂಕ್ ಮತ್ತು ಆಕ್ಸಿಸ್ ಬ್ಯಾಂಕ್ ಕಾರ್ಡ್‌ಗಳನ್ನು ಹೊಂದಿರುವವರು ಈ ತಿಂಗಳು ಹಲವಾರು ಬದಲಾವಣೆಗಳನ್ನು ನಿರೀಕ್ಷಿಸಬಹುದು.

ಜೂನ್ 1 ರಿಂದ ಕೋಟಕ್ ಮಹೀಂದ್ರಾ ಬ್ಯಾಂಕ್ ಇಂಧನ, ಬಾಡಿಗೆ, ಯುಟಿಲಿಟಿ ಬಿಲ್‌ಗಳು ಮತ್ತು ವಿಮೆಯಂತಹ ವಿಭಾಗಗಳಲ್ಲಿ ರಿವಾರ್ಡ್ ಪಾಯಿಂಟ್‌ಗಳ ಮೇಲೆ ಮಿತಿಗಳನ್ನು ಪರಿಚಯಿಸಿದೆ. ಮಾಸಿಕ ಮಿತಿಯನ್ನು ಮೀರಿದ ಇಂಧನ ಪಾವತಿಗಳಿಗೆ ಶೇ. 1 ವಹಿವಾಟು ಶುಲ್ಕ ಅನ್ವಯಿಸುತ್ತದೆ. ಬಾಡಿಗೆ ಮತ್ತು ಶಿಕ್ಷಣ ಪಾವತಿಗಳಿಗೆ ಶೇ. 1 ಶುಲ್ಕವನ್ನು ವಿಧಿಸುತ್ತವೆ.

ಜೂನ್ 10 ರಿಂದ ಎಚ್‌ಡಿಎಫ್‌ಸಿ ಬ್ಯಾಂಕ್ ಟಾಟಾ ನ್ಯೂ ಇನ್ಫಿನಿಟಿ ಮತ್ತು ಟಾಟಾ ನ್ಯೂ ಪ್ಲಸ್ ಕಾರ್ಡ್‌ದಾರರಿಗೆ ತನ್ನ ಲೌಂಜ್ ಪ್ರವೇಶ ನೀತಿಯನ್ನು ಪರಿಷ್ಕರಿಸಲಿದೆ. ಹಿಂದಿನ ಸ್ವೈಪ್ ಆಧಾರಿತ ವ್ಯವಸ್ಥೆಯನ್ನು ಬದಲಾಯಿಸಿ, ಖರ್ಚಿನ ಆಧಾರದ ಮೇಲೆ ವೋಚರ್‌ಗಳ ಮೂಲಕ ಲೌಂಜ್ ಪ್ರವೇಶವನ್ನು ನೀಡಲಾಗುವುದು.

ಜೂನ್ 20 ರಿಂದ ಆಕ್ಸಿಸ್ ಬ್ಯಾಂಕ್ ತನ್ನ ರಿವಾರ್ಡ್ಸ್ ಕ್ರೆಡಿಟ್ ಕಾರ್ಡ್‌ಗೆ ಹಂತಹಂತವಾಗಿ ಬದಲಾವಣೆಗಳನ್ನು ಪ್ರಾರಂಭಿಸುತ್ತದೆ. ಇದು ಕ್ಯಾಶ್‌ಬ್ಯಾಕ್, ರಿವಾರ್ಡ್ ಪಾಯಿಂಟ್‌ಗಳು, ಲೌಂಜ್ ಪ್ರವೇಶಗಳ ಮೇಲೆ ಪರಿಣಾಮ ಬೀರಲಿದೆ.

ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್ ಬೆಲೆ

ಪ್ರತಿ ತಿಂಗಳಂತೆ ಈ ಬಾರಿ ಜೂನ್ 1ರಂದು ಎಲ್‌ಪಿಜಿ ಸಿಲಿಂಡರ್ ಬೆಲೆಯಲ್ಲೂ ಬದಲಾವಣೆಯಾಗುತ್ತದೆ. 19 ಕೆ.ಜಿ. ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯಲ್ಲಿ 24 ರೂ. ಇಳಿಕೆಯಾಗಿದ್ದು, ಪರಿಷ್ಕೃತ ಬೆಲೆ ಜೂನ್ 1 ರಿಂದಲೇ ಜಾರಿಗೆ ಬರಲಿದೆ. ತೈಲ ಮಾರುಕಟ್ಟೆ ಕಂಪೆನಿ ನಿಗದಿಪಡಿಸಿದ ಹೊಸ ಬೆಲೆಗಳ ಪ್ರಕಾರ ದೆಹಲಿಯಲ್ಲಿ ಜೂನ್ 1 ರಿಂದ 19 ಕೆ.ಜಿ. ವಾಣಿಜ್ಯ ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್ ಬೆಲೆ ಈಗ 1,723.50 ರೂ. ಆಗಿರುತ್ತದೆ. 19 ಕೆಜಿ ಸಿಲಿಂಡರ್‌ಗಳ ಬೆಲೆಯಲ್ಲಿ ಬದಲಾವಣೆಯಾಗಿದ್ದರೂ 14 ಕೆ.ಜಿ. ಎಲ್‌ಪಿಜಿ ವಾಣಿಜ್ಯ ಸಿಲಿಂಡರ್‌ಗಳ ಬೆಲೆಯಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.

ಶುಲ್ಕ ಹೆಚ್ಚಳ, ಸೆಬಿ ಹೊಸ ಸಮಯ

ಉಚಿತ ವಹಿವಾಟು ಮೀರಿ ಬ್ಯಾಂಕ್‌ ಎಟಿಎಂ ಬಳಕೆಗೆ ಹೆಚ್ಚುವರಿ ಶುಲ್ಕ ವಿಧಿಸಲಾಗುತ್ತದೆ. ಮ್ಯೂಚುಯಲ್ ಫಂಡ್‌ಗಳಲ್ಲಿ ಹೊಸ ಕಟ್-ಆಫ್ ಸಮಯವನ್ನು ನಿಗದಿಪಡಿಸಲಾಗಿದೆ. ಮ್ಯೂಚುಯಲ್ ಫಂಡ್‌ಗಳಲ್ಲಿ ಹೂಡಿಕೆ ಮಾಡಲು ಸೆಬಿ ಹೊಸ ಸಮಯವನ್ನು ನಿಗದಿಪಡಿಸಿದ್ದು, ಆಫ್‌ಲೈನ್ ಹೂಡಿಕೆಗೆ ಮಧ್ಯಾಹ್ನ 3 ಗಂಟೆಯವರೆಗೆ ಹಾಗೂ ಆನ್‌ಲೈನ್ ಹೂಡಿಕೆಗೆ ಸಂಜೆ 7 ಗಂಟೆಯವರೆಗೆ ಅವಕಾಶವಿದೆ. ಇದರ ಅನಂತರ ಮಾಡಿದ ಹೂಡಿಕೆಯನ್ನು ಮರುದಿನಕ್ಕೆಂದು ಪರಿಗಣಿಸುವುದಾಗಿ ಸೆಬಿ ಹೇಳಿದೆ.

ಇದನ್ನೂ ಓದಿ: Kamal Haasan Controversy: ತಮಿಳಿನಿಂದ ಕನ್ನಡ ಬಂದಿದ್ರೆ ಸರಿ.... ಅದ್ರಲ್ಲಿ ಅವಮಾನ ಏನು? ಕಮಲ್‌ ಹಾಸನ್‌ ಪರ ನಟ ಕಿಶೋರ್‌ ಬ್ಯಾಟಿಂಗ್‌

ಉಚಿತ ಆಧಾರ್ ನವೀಕರಣ

ಉಚಿತವಾಗಿ ಆಧಾರ್ ಕಾರ್ಡ್‌ನಲ್ಲಿ ಹೆಸರು, ವಿಳಾಸದಂತಹ ಬದಲಾವಣೆಗಳನ್ನು ಜೂನ್ 14ರವರೆಗೆ ಮಾಡಬಹುದಾಗಿದೆ. ಬಳಿಕ ಆನ್‌ಲೈನ್ ನವೀಕರಣಕ್ಕಾಗಿ 25 ರೂ. ಮತ್ತು ಸೇವಾ ಕೇಂದ್ರದಲ್ಲಿ 50 ರೂ. ಪಾವತಿಸಬೇಕಾಗುತ್ತದೆ.

ಯುಪಿಐ ವಹಿವಾಟು

ಇನ್ನು ಮುಂದೆ ಯುಪಿಐ ವಹಿವಾಟು ಮಾಡುವಾಗ ಅದರಲ್ಲಿ ಸ್ವೀಕರಿಸುವವರ ನಿಜವಾದ ಹೆಸರು, ಬ್ಯಾಂಕ್ ಹೆಸರು ಕಾಣುತ್ತದೆ. ಈ ನಿಯಮ ಜೂನ್ 30 ರೊಳಗೆ ಎಲ್ಲಾ ಅಪ್ಲಿಕೇಶನ್‌ಗಳು ಜಾರಿಗೆ ತರಲು ಆದೇಶಿಸಲಾಗಿದೆ.

ಬ್ಯಾಂಕ್ ಕ್ಲೋಸ್

ಜೂನ್‌ ತಿಂಗಳಲ್ಲಿ ಬ್ಯಾಂಕುಗಳು ಒಟ್ಟು 12 ದಿನ ಮುಚ್ಚಿರುತ್ತವೆ. ಆರ್ ಬಿಐ ಕ್ಯಾಲೆಂಡರ್ ಪ್ರಕಾರ ಜೂನ್‌ನಲ್ಲಿ ಒಟ್ಟು 12 ಬ್ಯಾಂಕ್ ರಜಾದಿನಗಳು ಇರಲಿದೆ. ಇದರಲ್ಲಿ ಭಾನುವಾರ, ಎರಡು ಮತ್ತು ನಾಲ್ಕನೇ ಶನಿವಾರ, ಬಕ್ರೀದ್‌ ಹಬ್ಬ ಸೇರಿವೆ.