National Investigation Agency: PFI ಹಿಟ್ ಲಿಸ್ಟ್‌ನಲ್ಲಿ 977 ಗಣ್ಯರ ಹೆಸರು; NIA ತನಿಖೆಯಲ್ಲಿ ಬಯಲಾದ ರಹಸ್ಯವೇನು?
ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ (ಪಿಎಫ್‌ಐ) ಆಯೋಜಿಸಿದೆ ಎನ್ನಲಾದ ಪಿತೂರಿಯ ಬಗ್ಗೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ಸ್ಫೋಟಕ ವಿವರಗಳನ್ನು ಬಯಲು ಮಾಡಿದೆ. ನ್ಯಾಯಾಲಯಕ್ಕೆ ಸಂಸ್ಥೆ ನೀಡಿದ ಮಾಹಿತಿಯ ಪ್ರಕಾರ, ಪಿಎಫ್‌ಐ ಕೇರಳದಲ್ಲಿ ನ್ಯಾಯಾಧೀಶರು ಸೇರಿ ಹಲವರ ಹೆಸರು ಇದೆ ಎಂದು ತಿಳಿದು ಬಂದಿದೆ.
Vishakha Bhat
Jun 25, 2025 1:46 PM
ತಿರುವನಂತಪುರಂ: ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ (ಪಿಎಫ್‌ಐ) ಆಯೋಜಿಸಿದೆ ಎನ್ನಲಾದ ಪಿತೂರಿಯ ಬಗ್ಗೆ ರಾಷ್ಟ್ರೀಯ ತನಿಖಾ ಸಂಸ್ಥೆ ( National Investigation Agency) ಸ್ಫೋಟಕ ವಿವರಗಳನ್ನು ಬಯಲು ಮಾಡಿದೆ. ನ್ಯಾಯಾಲಯಕ್ಕೆ ಸಂಸ್ಥೆ ನೀಡಿದ ಮಾಹಿತಿಯ ಪ್ರಕಾರ, ಪಿಎಫ್‌ಐ ಕೇರಳದಲ್ಲಿ ನ್ಯಾಯಾಧೀಶರು, ಕಾರ್ಯಕರ್ತರು ಮತ್ತು ರಾಜಕೀಯ ಕಾರ್ಯಕರ್ತರು ಸೇರಿದಂತೆ ಒಟ್ಟು 977 ವ್ಯಕ್ತಿಗಳನ್ನು ಗುರಿಯಾಗಿಸಿಕೊಂಡು "ಹಿಟ್ ಲಿಸ್ಟ್"ಗಳನ್ನು ಸಿದ್ಧಪಡಿಸಿತ್ತು ಎಂಬ ಅಂಶ ಬೆಳಕಿಗೆ ಬಂದಿದೆ.
ಪಾಲಕ್ಕಾಡ್ ಶ್ರೀನಿವಾಸನ್ ಕೊಲೆ ಪ್ರಕರಣದಲ್ಲಿ ಇಬ್ಬರು ಆರೋಪಿಗಳಾದ ಮುಹಮ್ಮದ್ ಬಿಲಾಲ್ ಮತ್ತು ರಿಯಾಸುದ್ದೀನ್‌ಗೆ ಜಾಮೀನು ನೀಡಬಾರದು ಏಜೆನ್ಸಿ ಆಕ್ಷೇಪಿಸಿದ್ದರಿಂದ ಈ ಮಾಹಿತಿಯನ್ನು ಎನ್‌ಐಎ ವಿಶೇಷ ನ್ಯಾಯಾಲಯದಲ್ಲಿ ಪ್ರಸ್ತುತಪಡಿಸಲಾಯಿತು. ಹಲವು ಹಿಟ್‌ಲಿಸ್ಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಎನ್‌ಐಎ ಸಲ್ಲಿಸಿದ್ದು ಈ ವರದಿ ಆತಂಕಕ್ಕೀಡು ಮಾಡಿದೆ. ಪಿಎಫ್‌ಐನ "ರಿಪೋರ್ಟರ್ ವಿಂಗ್" ಎಂದು ಕರೆಯಲ್ಪಡುವ ಸದಸ್ಯ ಸಿರಾಜುದ್ದೀನ್ 240 ಜನರ ಹೆಸರುಗಳನ್ನು ಹೊಂದಿರುವ ಹಿಟ್ ಲಿಸ್ಟ್ ಅನ್ನು ಹೊಂದಿದ್ದಾನೆ ಎಂದು ಎನ್‌ಐಎ ಹೇಳಿದೆ.
ಈ ಪಟ್ಟಿಗಳಲ್ಲಿ ವಿವಿಧ ವಲಯಗಳ ಪ್ರಮುಖ ವ್ಯಕ್ತಿಗಳ ಹೆಸರು ಸೇರಿದೆ. ತನಿಖೆಯ ಪ್ರಕಾರ, ಹಿಟ್ ಲಿಸ್ಟ್‌ಗಳಲ್ಲಿ ಕೇರಳದ ಮಾಜಿ ಜಿಲ್ಲಾ ನ್ಯಾಯಾಧೀಶರು ಸೇರಿದಂತೆ ಗುರಿಯಾಗಿಸಿಕೊಂಡ ನಿರ್ದಿಷ್ಟ ವ್ಯಕ್ತಿಗಳ ವಿವರಗಳಿವೆ ಎಂದು ತಿಳಿದುಬಂದಿದೆ. ಪಟ್ಟಿಗಳಲ್ಲಿ ಒಂದನ್ನು ಪ್ರಕರಣದ ಮತ್ತೊಬ್ಬ ಆರೋಪಿ ಅಬ್ದುಲ್ ವಹಾಬ್‌ನಿಂದ ಮುಖ್ಯ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಎನ್‌ಐಎ ತನಿಖೆಯು ತಲೆಮರೆಸಿಕೊಂಡಿರುವ ಆರೋಪಿ ಅಯೂಬ್ ಟಿಎ ಮನೆಯಿಂದ 500 ಜನರ ಮತ್ತೊಂದು ಹಿಟ್‌ಲಿಸ್ಟ್ ಅನ್ನು ವಶಪಡಿಸಿಕೊಂಡಿದೆ.
ಹಿಟ್ ಲಿಸ್ಟ್‌ಗಳ ಜೊತೆಗೆ, ಅಲುವಾದ ಪೆರಿಯಾರ್ ವ್ಯಾಲಿ ಕ್ಯಾಂಪಸ್‌ನಲ್ಲಿ ಶಸ್ತ್ರಾಸ್ತ್ರ ತರಬೇತಿ ಸೇರಿದಂತೆ ಕಾನೂನುಬಾಹಿರ ಚಟುವಟಿಕೆಗಳೊಂದಿಗೆ ಪಿಎಫ್‌ಐ ಅನ್ನು ಸಂಪರ್ಕಿಸುವ ದಾಖಲೆಗಳನ್ನು ಸಹ ಎನ್‌ಐಎ ಪತ್ತೆಹಚ್ಚಿದೆ. ಈ ಸ್ಥಳವು ಪಿಎಫ್‌ಐ ಜೊತೆ ಸಂಯೋಜಿತವಾಗಿರುವ ಸಶಸ್ತ್ರ ಉಗ್ರಗಾಮಿಗಳಿಗೆ ತರಬೇತಿ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತಿತ್ತು ಮತ್ತು ಇದನ್ನು ಭಯೋತ್ಪಾದನೆಯ ಆದಾಯವಾಗಿ ಕಾನೂನುಬಾಹಿರ ಚಟುವಟಿಕೆಗಳ ತಡೆಗಟ್ಟುವಿಕೆ ಕಾಯ್ದೆ (ಯುಎಪಿಎ) ಅಡಿಯಲ್ಲಿ ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ ಎಂದು ಎನ್‌ಐಎ ಹೇಳಿದೆ.
ಈ ಸುದ್ದಿಯನ್ನೂ ಓದಿ: Suhas Shetty Murder Case: ಸುಹಾಸ್ ಶೆಟ್ಟಿ ಹತ್ಯೆ ಪ್ರಕರಣದ ತನಿಖೆಯನ್ನು ಎನ್‌ಐಎಗೆ ವಹಿಸಿದ ಕೇಂದ್ರ ಸರ್ಕಾರ
ಇದರ ನಡುವೆ ಆರೋಪಿಗಳು ಎನ್‌ಐಎ ಸುಳ್ಳು ಆರೋಪ ಮಾಡುತ್ತಿದೆ ಎಂದು ಹೇಳಿದ್ದಾರೆ. ಆರೋಪಿಗಳ ಪರ ವಕೀಲರು ಅರ್ಜಿದಾರರು ಮೂರು ವರ್ಷಗಳಿಗೂ ಹೆಚ್ಚು ಕಾಲ ಬಂಧನದಲ್ಲಿದ್ದಾರೆ ಮತ್ತು ತನಿಖೆ ಪೂರ್ಣಗೊಂಡಿದೆ. ಆದರೂ ಎನ್‌ಐಎ ಜಾಮೀನಿಗೆ ಆಕ್ಷೇಪ ವ್ಯಕ್ತಪಡಿಸುತ್ತಿದೆ ಎಂದು ಹೇಳಿದ್ದಾರೆ. ವಿಚಾರಣೆಯ ಸಮಯದಲ್ಲಿ, ಆರೋಪಿಗಳ ವಿರುದ್ಧದ ಆರೋಪಗಳು ಗಂಭೀರ ಸ್ವರೂಪದ್ದಾಗಿವೆ ಎಂದು NIA ವಾದಿಸಿತು. ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿದ ನಂತರ, ಎನ್‌ಐಎ ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಪಿ.ಕೆ. ಮೋಹನದಾಸ್, ಆರೋಪಿಗಳಾದ ಮುಹಮ್ಮದ್ ಬಿಲಾಲ್ ಮತ್ತು ರಿಯಾಸುದ್ದೀನ್‌ಗೆ ಜಾಮೀನು ನಿರಾಕರಿಸಿದ್ದಾರೆ. ಪ್ರಕರಣದ ಸಮಗ್ರ ತನಿಖೆಗೆ ಸೂಚನೆ ನೀಡಿದ್ದಾರೆ.