Ravi Sajangadde Column: ಅಂಚೆಗೂ ಸ್ಮಾರ್ಟ್ ಯೋಗ, ಬಂತು ಡಿಜಿಪಿನ್ ಯುಗ!
ಅಂಚೆ ಮತ್ತು ಸರಕುಗಳನ್ನು ದೇಶಾದ್ಯಂತ ತಲುಪಿಸುವ ಸದ್ಯದ ಆಧಾರಸ್ತಂಭವಾಗಿದ್ದು 1972 ರಿಂದ ಜಾರಿಯಲ್ಲಿರುವ ಆರು ಅಂಕಿಗಳ ಪಿನ್‌ಕೋಡ್ ಮುಂದಿನ ದಿನಗಳಲ್ಲಿ ಬದಲಾಗಿ, 10 ವಿಶಿಷ್ಟ ಸಂಖ್ಯಾಕ್ಷರಗಳ ( alpha numeric) ‘ಡಿಜಿಪಿನ್’ ತಂತ್ರಜ್ಞಾನ ವ್ಯವಸ್ಥೆ ರಾಷ್ಟ್ರಾದ್ಯಂತ ಹಂತಹಂತ ವಾಗಿ ಜಾರಿಯಾಗಲಿದೆ.
Ashok Nayak
Jun 21, 2025 11:31 AM
ಯುಗಾಂತರ
ರವೀ ಸಜಂಗದ್ದೆ
21ನೇ ಶತಮಾನವು ‘ತಂತ್ರಜ್ಞಾನ ಯುಗ’. ದೈನಂದಿನ ಜೀವನದಲ್ಲಿ ಉಪಯೋಗಿಸುವ ಬಹುತೇಕ ವಸ್ತುಗಳು, ಸೇವೆಗಳು ಮತ್ತು ಪಾವತಿ ವಿಧಾನಗಳು ತಂತ್ರಜ್ಞಾನದ ಒತ್ತಾಸೆಯೊಂದಿಗೆ ‘ಸ್ಮಾರ್ಟ್’ ಆಗುತ್ತಿವೆ. ಈಗ ಮನೆಯಲ್ಲೇ ಕುಳಿತಿದ್ದು ಆಧುನಿಕ ತಂತ್ರಜ್ಞಾನದ ನೆರವಿನಿಂದ ದೇಶ-ವಿದೇಶದ ಯಾವುದೇ ಮೂಲೆಯಲ್ಲಿರುವವರಿಗೆ ಹಣ, ಆಡಿಯೋ-ವಿಡಿಯೋ ಕಳಿಸಬಹುದಾಗಿದೆ, ಸಂವಹಿಸ ಬಹುದಾಗಿದೆ.
ಅಮೆಜಾನ್, ಫ್ಲಿಪ್‌ಕಾರ್ಟ್ ಮುಂತಾದ ಆನ್‌ಲೈನ್ ಮಳಿಗೆಗಳಿಂದ ಬೇಕಾದುದನ್ನು ಖರೀದಿಸಿ ಮನೆಗೆ ಬರುವಂತೆ ಮಾಡಬಹುದಾಗಿದೆ. ನಗರವಾಸಿಗಳಾಗಿದ್ದರಂತೂ ತಿಂಡಿ-ತಿನಿಸುಗಳನ್ನೂ ಆರ್ಡರ್ ಮಾಡಬಹುದು. ಅಷ್ಟರಮಟ್ಟಿಗೆ ತಂತ್ರಜ್ಞಾನವು ನಮ್ಮ ಬದುಕಲ್ಲಿ ‘ಸ್ಮಾರ್ಟ್’ ಆಗಿ ಹಾಸುಹೊಕ್ಕಾಗಿದೆ.
ಈ ಅಂಶಗಳ ಜತೆಗಿನ ಮತ್ತೊಂದು ತಂತ್ರಜ್ಞಾನ ಆಧರಿತ, ಜನೋಪಯೋಗಿ ‘ಸ್ಮಾರ್ಟ್’ ವಿಚಾರ ವೆಂದರೆ ‘ಡಿಜಿಪಿನ್’ (ಡಿಜಿಟಲ್ ಪೋಸ್ಟಲ್ ಇಂಡೆಕ್ಸ್ ನಂಬರ್). ಈ ವಿನೂತನ ‘ವಿಳಾಸ ಕ್ರಾಂತಿ’ ಯನ್ನು ಆರಂಭಿಸುವುದರೊಂದಿಗೆ ಭಾರತವು ಸ್ಮಾರ್ಟ್ ವಿಳಾಸಗಳತ್ತ ಕ್ರಾಂತಿಕಾರಿ ಹೆಜ್ಜೆಯಿಟ್ಟಿದೆ. ಈ ನಿಖರ ಡಿಜಿಟಲ್ ವಿಳಾಸ ವ್ಯವಸ್ಥೆಯನ್ನು ಭಾರತೀಯ ಅಂಚೆ ವಿಭಾಗವು ಇತ್ತೀಚೆಗೆ ಆರಂಭಿಸಿದೆ.
ಇದನ್ನೂ ಓದಿ: Ravi Sajangadde Column: ರಾಷ್ಟ್ರೋತ್ಥಾನ @60: ವಿದ್ಯಯಾ ವಿಂದತೇ ಅಮೃತಂ !
ಅಂಚೆ ಮತ್ತು ಸರಕುಗಳನ್ನು ದೇಶಾದ್ಯಂತ ತಲುಪಿಸುವ ಸದ್ಯದ ಆಧಾರಸ್ತಂಭವಾಗಿದ್ದು 1972 ರಿಂದ ಜಾರಿಯಲ್ಲಿರುವ ಆರು ಅಂಕಿಗಳ ಪಿನ್‌ಕೋಡ್ ಮುಂದಿನ ದಿನಗಳಲ್ಲಿ ಬದಲಾಗಿ, 10 ವಿಶಿಷ್ಟ ಸಂಖ್ಯಾಕ್ಷರಗಳ ( alpha numeric) ‘ಡಿಜಿಪಿನ್’ ತಂತ್ರಜ್ಞಾನ ವ್ಯವಸ್ಥೆ ರಾಷ್ಟ್ರಾದ್ಯಂತ ಹಂತಹಂತ ವಾಗಿ ಜಾರಿಯಾಗಲಿದೆ.
ಐಐಟಿ ಹೈದರಾಬಾದ್ ಮತ್ತು ಇಸ್ರೋದ ‘ನ್ಯಾಷನಲ್ ರಿಮೋಟ್ ಸೆನ್ಸಿಂಗ್ ಸೆಂಟರ್’ (NRSC) ಸಂಸ್ಥೆಗಳು ಒಟ್ಟಾಗಿ ‘ಜಿಯೋ ಕೋಡ್ ಗ್ರಿಡ್’ ಆಧರಿತ ಡಿಜಿಪಿನ್ ಉಪಕ್ರಮವನ್ನು ಅಭಿವೃದ್ಧಿ ಪಡಿಸಿವೆ. ಇದು ಜಿಪಿಎಸ್ ಮತ್ತು ಜಿಎನ್‌ಎಸ್‌ಎಸ್ (ಗ್ಲೋಬಲ್ ನ್ಯಾವಿಗೇಷನ್ ಸೆಟಲೈಟ್ ಸಿಸ್ಟಮ್) ತಂತ್ರಜ್ಞಾನ ವ್ಯವಸ್ಥೆ ನೀಡುವ ವಿವರಗಳನ್ನು ಬಳಸಿ ಕಾರ್ಯನಿರ್ವಹಿಸುತ್ತದೆ. ಮೂಲಸೌಕರ್ಯ ಮತ್ತು ಅಂಚೆ ವ್ಯವಸ್ಥೆಯನ್ನು ಕರಾರುವಾಕ್ಕಾಗಿ ನಿರ್ವಹಿಸುವಲ್ಲಿ ಇದು ಮಹತ್ತರ ಪಾತ್ರ ವಹಿಸಲಿದೆ.
ಏನಿದು ಡಿಜಿಪಿನ್?: ಡಿಜಿಪಿನ್ ರಚನೆಯೇ ಒಂದು ವಿಶಿಷ್ಟ ವಿಚಾರ. ಇದರಲ್ಲಿ ದೇಶದ ಭೂಪ್ರದೇಶ ವನ್ನು 3.8 ಮೀ. ಉದ್ದ ಮತ್ತು 3.8 ಮೀ. ಅಗಲದ ಲಕ್ಷಾಂತರ ಚೌಕಗಳಾಗಿ ವಿಭಜಿಸಿ ಅಂಥ ಪ್ರತಿ ಚೌಕಕ್ಕೂ ಒಂದೊಂದು ವಿಶಿಷ್ಟ ಕ್ರಮಸಂಖ್ಯೆ ನೀಡಲಾಗಿದೆ. ಉದಾಹರಣೆಗೆ, ನಾವು ವಾಸವಿರುವ ಸ್ಥಳ/ಕಟ್ಟಡದ ಸುತ್ತಲಿನ ಕೆಲವಷ್ಟು ಅಡಿ ಜಾಗವನ್ನು ಹತ್ತನೆಯ ಅಂಕಿಯು ಸೂಚಿಸುತ್ತದೆ. ಈ ಹತ್ತು ಅಂಕಿಗಳು 2, 3, 4, 5, 6, 7, 8, 9, C, J, K, L, M, P, F, T ಎಂಬ 16 ಸಂಖ್ಯಾಕ್ಷರಗಳ ಪೈಕಿ ಯಾವುದಾದರೊಂದು ಆಗಿರುತ್ತದೆ.
ಮೊದಲಿಗೆ ಭಾರತ ದೇಶದ ಭೂಭಾಗವನ್ನು 16 ವಿವಿಧ ವಿಭಾಗಗಳಾಗಿ ವಿಂಗಡಿಸಿ, ಒಂದೊಂದು ಭಾಗವನ್ನೂ ಮತ್ತೊಮ್ಮೆ ಇದೇ 16 ಸಂಖ್ಯೆಗಳ ವಿಭಾಗಗಳನ್ನಾಗಿ ವಿಭಜಿಸಲಾಗುತ್ತದೆ. ಹೀಗೆ ನಿರಂತರ ಹತ್ತು ಬಾರಿ ಮಾಡಿ ಒಂದೊಂದು ನಿಗದಿತ ಸಂಖ್ಯೆಯನ್ನು ಆ ಸ್ಥಳಕ್ಕೆ ನೀಡಿದಾಗ, ಸಂಖ್ಯಾಕ್ಷರಗಳು ಒಂದೊಕ್ಕೊಂದು ಸೇರುತ್ತಾ ಹೋಗುತ್ತವೆ. ಮೊದಲ ಅಂಕಿ 1000 ಕಿ.ಮೀ. ವ್ಯಾಪ್ತಿ ಯಷ್ಟು ಪ್ರದೇಶವನ್ನು ಸೂಚಿಸಿದರೆ, 2ನೇ ಅಂಕಿ 250 ಕಿ.ಮೀ. ವ್ಯಾಪ್ತಿಗೆ ನಿಯೋಜಿತವಾಗಿರುತ್ತವೆ.
ಇದೇ ರೀತಿ 3ನೇ (62.5 ಕಿ.ಮೀ.), 4ನೇ (15.6 ಕಿ.ಮೀ.), 5ನೇ (3.9 ಕಿ.ಮೀ.), 6ನೇ (1 ಕಿ.ಮೀ.), ೭ನೇ (250 ಮೀ.), 8ನೇ (60 ಮೀ.), -9ನೇ (15 ಮೀ.) ಹಾಗೂ 10ನೇ (3.58 ಮೀ) ಅಂಕಿಗಳು ಪೂರ್ವ ನಿಯೋಜಿತ ವ್ಯಾಪ್ತಿಯನ್ನು ಸೂಚಿ ಸುತ್ತವೆ. ಉದಾಹರಣೆಗೆ ನಮ್ಮ ನೆಲೆಯು 4 ಮೀ. ವ್ಯಾಪ್ತಿಯಲ್ಲಿ ಇದ್ದರೆ, ಪಕ್ಕದ ಮನೆಯ ವಿಳಾಸದ ಡಿಜಿಪಿನ್‌ನ ಮೊದಲ 9 ಮತ್ತು ನಮ್ಮ ನೆಲೆಯ ಡಿಜಿಪಿನ್‌ನಲ್ಲಿನ ಮೊದಲ 9 ಸಂಖ್ಯಾಕ್ಷರಗಳು ಒಂದೇ ಆಗಿದ್ದು, ಕೊನೆಯ ಸಂಖ್ಯಾಕ್ಷರ ಮಾತ್ರ ಭಿನ್ನವಾಗಿರುತ್ತದೆ.
ಈ ಅಂಕಿಗಳು ಕೂಡ ಒಂದು ವಿಭಾಗದ ಮಧ್ಯಮ ಕ್ರಮಾಂಕದಿಂದ ಮೊದಲ್ಗೊಂಡು ಅಪ್ರದಕ್ಷಿಣಾ ಕಾರವಾಗಿ ಸಾಗುತ್ತವೆ. ಹೀಗೆ ನಿರ್ಧರಿತವಾದ ಸಂಖ್ಯಾಕ್ಷರಗಳು ಒಂದು ಪ್ರದೇಶದ ‘ಜಿಯೋ ಲೊಕೇ ಶನ್’ ಅನ್ನು ನಿಖರವಾಗಿ ಹೇಳುತ್ತವೆ. ಹಿಂದೆ ಕೂಡ ಇಂಥ ಕೆಲವು ಯತ್ನಗಳು ಖಾಸಗಿ ವಲಯ ದಿಂದ ನಡೆದಿದ್ದವು; ಆದರೆ ಅವ್ಯಾವುವೂ ಯಶಸ್ವಿಯಾಗಲಿಲ್ಲ ಮತ್ತು ಅವನ್ನು ಸಾರ್ವಜನಿಕ ಬಳಕೆಗೆ ತೆರೆದಿರಲಿಲ್ಲ.
ಸದ್ಯ ಇರುವ ಪಿನ್‌ಕೋಡ್, ದೊಡ್ಡದೊಂದು ಭೂಪ್ರದೇಶಕ್ಕೆ/ಆ ಭಾಗದಲ್ಲಿ ಕಾರ್ಯನಿರ್ವಹಿಸುವ ಅಂಚೆ ಕಚೇರಿಯ ವ್ಯಾಪ್ತಿಗೆ ಮೀಸಲಾಗಿದೆ. ಮೊದಮೊದಲು ಪಿನ್‌ಕೋಡ್, ಬೀದಿಸಂಖ್ಯೆಯ ವಿವರಗಳಿದ್ದರೆ ಅಂಚೆ/ಪಾರ್ಸಲ್ ತಲುಪಿಸಲು ಸಾಕಾಗುತ್ತಿತ್ತು. ದಿನಗಳೆದಂತೆ ನಗರಗಳು ವಿಸ್ತಾರ ವಾಗಿ ಬೀದಿಗಳು ಹೆಚ್ಚಾದವು. ಲೇಔಟ್‌ಗಳ ಹೆಸರುಗಳು, ರಸ್ತೆಯ ಹೆಸರು, ಮುಖ್ಯರಸ್ತೆ/ಅಡ್ಡರಸ್ತೆ ಸಂಖ್ಯೆ, ಅಂತಸ್ತಿನ ವಿವರ ಎಲ್ಲವನ್ನೂ ಪಿನ್‌ಕೋಡ್ ಜತೆಗೆ ವಿಳಾಸದಲ್ಲಿ ಸೇರಿಸಬೇಕಾದ ಅನಿವಾರ್ಯತೆ ಎದುರಾಯಿತು.
ಇಷ್ಟಿದ್ದೂ ಕೆಲವೊಂದು ಪ್ರದೇಶ ಮತ್ತು ವಿಳಾಸಗಳನ್ನು ನಿಖರವಾಗಿ ತಲುಪಲಾಗದೆ, ಹಲವಾರು ಅಂಚೆ/ಪಾರ್ಸಲ್‌ಗಳು ವಿತರಣೆಯಾಗದೇ ಅಂಚೆ ಕಚೇರಿಗಳಲ್ಲಿ ಧೂಳು ತಿನ್ನುತ್ತಿವೆ. ವಿಳಾಸ ಸಿಗದ ಕಾರಣಕ್ಕೆ ಅವು ಮೂಲವಿಳಾಸಕ್ಕೆ ಮರಳಿಸಲ್ಪಡುವ ಪ್ರಕ್ರಿಯೆ ಈಗಿನ ನಮ್ಮ ಅಂಚೆ ವ್ಯವಸ್ಥೆಯಲ್ಲಿ ಸ್ವಾಭಾವಿಕ. ಡಿಜಿಪಿನ್ ವ್ಯವಸ್ಥೆಯು ಇಂಥ ಅವ್ಯವಸ್ಥೆಯನ್ನು ಸಂಪೂರ್ಣ ಹೋಗಲಾಡಿಸುವ ವಿಶ್ವಾಸವಿದೆ.
ಹೀಗೆ ದಕ್ಕುತ್ತೆ ಡಿಜಿಪಿನ್
ನಾವಿರುವ ಪ್ರದೇಶದ ಡಿಜಿಪಿನ್ ಅರಿಯಲು/ಪಡೆಯಲು ಕೇಂದ್ರ ಸರಕಾರವು https://dac.indiapost.gov.in/ mydigipin/home ಎಂಬ ಜಾಲತಾಣವನ್ನು ಸಿದ್ಧಪಡಿಸಿದೆ. ಇದಲ್ಲದೆ Know Your DIGIPIN ಮತ್ತು Know Your PINCODE ಎಂಬ ಎರಡು ಡಿಜಿಟಲ್ ಪ್ಲಾಟ್ ಫಾರ್ಮ್‌ಗಳನ್ನು ಬಿಡುಗಡೆ ಮಾಡಿದೆ. ಈ ಪೈಕಿ ಯಾವುದೇ ಮಾರ್ಗದಲ್ಲಿ ನಮ್ಮ ಪ್ರದೇಶದ ಡಿಜಿಪಿನ್ ಪಡೆಯಬಹುದು. ಯಾವುದೇ ಸ್ಪಷ್ಟ ವಿಳಾಸವಿಲ್ಲದ ಮನೆ/ಪ್ರದೇಶಗಳೂ ಈ ತಂತ್ರಜ್ಞಾನ ದಿಂದ ನಿಖರ ವಿಳಾಸವನ್ನು ಹೊಂದಬಹುದು.
ದೇಶಾದ್ಯಂತ ಲೊಕೇಶನ್ ಆಧರಿತ ಸೇವೆಗಳು ಮತ್ತಷ್ಟು ಸ್ಮಾರ್ಟ್ ಆಗಿ ಸುಲಭಗೊಳ್ಳಲು ಡಿಜಿಪಿನ್ ನೆರವಾಗಲಿದೆ. ಡಿಜಿಪಿನ್ ಸಹಾಯದಿಂದ ಇನ್ನು ಮುಂದೆ ತುರ್ತು ಸೇವೆಗಳು, ಆಂಬುಲೆನ್ಸ್, ಅಗ್ನಿಶಾಮಕ ಮತ್ತು ಪೊಲೀಸ್ ವ್ಯವಸ್ಥೆಗಳು ತ್ವರಿತವಾಗಿ, ನಿಖರವಾಗಿ ನಿರ್ದಿಷ್ಟ ವಿಳಾಸಗಳನ್ನು ತಲುಪಬಹುದು.
ವಿವಿಧ ಯೋಜನೆಗಳ ಅನುಷ್ಠಾನಕ್ಕೆ, ಪರಿಹಾರ ಕಾರ್ಯಾಚರಣೆಗಳಿಗೆ ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಡಿಜಿಪಿನ್ ವ್ಯವಸ್ಥೆಯನ್ನು ಪರಿಣಾಮ ಕಾರಿಯಾಗಿ ಬಳಸಬಹುದು. ಡಿಜಿಪಿನ್ ಪಡೆಯಲು ನಾವು ನೀಡುವ ಮಾಹಿತಿಯು ಗೌಪ್ಯವಾಗಿರಲಿದ್ದು, ನೀಡಿದ ವಿವರಗಳಲ್ಲಿ ಜಿಪಿಎಸ್ ಲೊಕೇಶನ್ ಮಾತ್ರ ವಿವಿಧೆಡೆ ಬಳಕೆಯಾಗಲಿದೆ.
“ಹೆಸರು/ಸಂಪರ್ಕ ಸಂಖ್ಯೆಯನ್ನು ಸಾರ್ವಜನಿಕವಾಗಿ ಬಳಸುವುದಿಲ್ಲ, ಆ ಮಾಹಿತಿ ಸೋರಿಕೆ ಯಾಗಲಾರದು" ಎಂಬ ಭರವಸೆಯನ್ನು ಕೇಂದ್ರ ಸರಕಾರ ನೀಡಿದೆ. ಇಷ್ಟೆಲ್ಲಾ ಗೌಪ್ಯತಾ ಒಪ್ಪಂದದ ಅಂಶಗಳಿದ್ದರೂ ಡಿಜಿಪಿನ್ ಎಂಬುದು ‘ಓಪನ್ ಸೋರ್ಸ್’ ವ್ಯವಸ್ಥೆಯ ತಂತ್ರಜ್ಞಾನ. ಹಾಗಾಗಿ ಇಲ್ಲಿರುವ ಅಂಕಿ-ಅಂಶಗಳನ್ನು ಯಾರು ಬೇಕಾದರೂ ಬಳಸಿ ಒಂದಷ್ಟು ಕೆಡಿಸುವ, ಮಾಹಿತಿ ಸೋರಿಕೆಯಾಗುವ ಆತಂಕ ಇದ್ದೇ ಇದೆ.
ಹಾಗಾಗಿ ಗೌಪ್ಯತೆ ಕಾಪಾಡುವ ನಿಟ್ಟಿನಲ್ಲಿನ ಸೂಕ್ತ ಮಾರ್ಗಸೂಚಿಗಳನ್ನು ಹೊರತರುವ ಕೆಲಸಕ್ಕೂ ಸರಕಾರ ಮುಂದಾಗಬೇಕು. ಮುಂದೇನಾಗಬಹುದು?: ದೇಶದ ಯಾವುದೇ ಮೂಲೆಗೆ, ಸಾಗರದಷ್ಟಿ ರುವ ನಗರಗಳ ಮನೆಗಳು ಮತ್ತು ಕಚೇರಿ ಕಟ್ಟಡಗಳಿಗೆ ಅಂಚೆ ಮತ್ತಿತರ ಪಾರ್ಸೆಲ್‌ಗಳನ್ನು ನಿಖರವಾಗಿ ತಲುಪಿಸುವಲ್ಲಿ ಈ ವ್ಯವಸ್ಥೆ ಖಂಡಿತ ನೆರವಾಗಲಿದೆ.
ಲಭ್ಯ ಮಾಹಿತಿಗಳ ಪ್ರಕಾರ, ಈ ವ್ಯವಸ್ಥೆಯು ಈಗಿರುವ ಆರು ಅಂಕಿಗಳ ಪಿನ್‌ಕೋಡ್ ವ್ಯವಸ್ಥೆ ಯನ್ನು ಬದಲಿಸುವುದಿಲ್ಲ ಅಥವಾ ಮೂಲೆಗುಂಪಾಗಿಸುವುದಿಲ್ಲ; ಬದಲಿಗೆ ದೇಶದೊಳಗಿನ ಅಷ್ಟೂ ವಿಳಾಸಗಳಿಗೆ ನಿಖರ ವಿವರಗಳನ್ನು ಸೇರಿಸಿ ವಿಳಾಸಗಳನ್ನು ಮತ್ತಷ್ಟು ಸ್ಪಷ್ಟವಾಗಿಸಲಿದೆ. ತನ್ಮೂಲಕ ಗ್ರಾಹಕರು ತಮ್ಮ ಅಂಚೆ/ಪಾರ್ಸಲ್/ ಸರಕುಗಳನ್ನು ಕ್ಲುಪ್ತ ಸಮಯಕ್ಕೆ ಕಳುಹಿಸಲು/ಸ್ವೀಕರಿಸಲು ಸಾಧ್ಯವಾಗಲಿದೆ.
ನಮ್ಮ ಬಂಧು-ಮಿತ್ರರ ಮೊಬೈಲ್ ಸಂಖ್ಯೆಯನ್ನು ನೆನಪಿಟ್ಟುಕೊಳ್ಳುವಂತೆಯೇ, ನಮ್ಮ ನೆಲೆಯ ಡಿಜಿಪಿನ್ ಅನ್ನು ನಾವು ಸರಿಯಾಗಿ, ಸದಾಕಾಲ ನೆನಪಿಟ್ಟುಕೊಳ್ಳಬಹುದು. ನಮ್ಮ ನೆಚ್ಚಿನ ಸ್ಥಳಗಳ ಬಗ್ಗೆ ನಮಗಿರುವ ಬಾಂಧವ್ಯವನ್ನು ಈ ಡಿಜಿಪಿನ್ ಜತೆಗೆ ಬೆಳೆಸಬಹುದು. ಇನ್ಯಾಕೆ ತಡ? ನಿಮ್ಮ ನಿಮ್ಮ ಪ್ರದೇಶಗಳ ಡಿಜಿಪಿನ್ ತಿಳಿದುಕೊಂಡು ಬಳಸಲು ಶುರು ಮಾಡಿ.
(ಲೇಖಕರು ಪ್ರಚಲಿತ ವಿದ್ಯಮಾನಗಳ ವಿಶ್ಲೇಷಕರು)