Viral News: ಒಂದಲ್ಲ, ಎರಡಲ್ಲ...90 ಸಂಸಾರಗಳನ್ನು ಸರಿ ಮಾಡಿದ ಪೊಲೀಸರು; ಏನಿದು ಪ್ರಕರಣ?

ಲಖನೌ: ಇತ್ತೀಚಿನ ದಿನಗಳಲ್ಲಿ ಡಿವೋರ್ಸ್‌ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಉತ್ತರ ಪ್ರದೇಶದ ಶಹಜಹಾನ್‌ಪುರದ ಪೊಲೀಸರು ಕಳೆದ ಆರು ತಿಂಗಳಲ್ಲಿ ಕೌನ್ಸೆಲಿಂಗ್ ಮೂಲಕ 90 ವಿವಾಹಿತ ಜೋಡಿಗಳನ್ನು ಯಶಸ್ವಿಯಾಗಿ ಮತ್ತೆ ಒಂದುಗೂಡಿಸಿದ್ದಾರೆ. ಈ ಕುಟುಂಬಗಳು ದೀರ್ಘಕಾಲ ಗಟ್ಟಿಯಾಗಿರಲು ಪೊಲೀಸ್ ಇಲಾಖೆ ಈಗ ಒಂದು ವಿಶಿಷ್ಟವಾದ ಅನುಸರಣಾ ಕಾರ್ಯಕ್ರಮವನ್ನು ಶುರುಮಾಡಿದೆ. ಪೊಲೀಸ್ ಮಾರ್ಗಗಳಲ್ಲಿರುವ ಪರಿವಾರ್ ಪರಮರ್ಷ ಕೇಂದ್ರವು ಕಳೆದ ಆರು ತಿಂಗಳಲ್ಲಿ 265 ವೈವಾಹಿಕ ಕಲಹ ಪ್ರಕರಣಗಳನ್ನು ಸ್ವೀಕರಿಸಿದ್ದು, ಅವುಗಳಲ್ಲಿ 90 ಪ್ರಕರಣಗಳನ್ನು ಕೌನ್ಸೆಲಿಂಗ್ ಮೂಲಕ ಪರಿಹರಿಸಲಾಗಿದೆ ಎಂದು ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ದ್ವಿವೇದಿ ತಿಳಿಸಿದ್ದಾರೆ. ಸದ್ಯ ಈ ಸುದ್ದಿ ಗಮನ ಸೆಳೆದಿದೆ.

ಈ ಕಾರ್ಯವಿಧಾನದ ಪ್ರಕಾರ, ಕೌಟುಂಬಿಕ ಹಿಂಸೆ, ವರದಕ್ಷಿಣೆ ಕಿರುಕುಳ ಅಥವಾ ಸಾಮಾನ್ಯ ವಿವಾದಗಳು ಸೇರಿದಂತೆ ವಿವಾಹ ಸಂಬಂಧಿತ ದೂರುಗಳೊಂದಿಗೆ ಪೊಲೀಸರನ್ನು ಸಂಪರ್ಕಿಸುವವರನ್ನು ಮೊದಲು ಕೌನ್ಸಲಿಂಗ್‍ ಕೇಂದ್ರಕ್ಕೆ ಕಳುಹಿಸಲಾಗುತ್ತದೆ ಎಂದು ಅವರು ಹೇಳಿದ್ದಾರೆ.

ಇತ್ಯರ್ಥಗೊಂಡ ಪ್ರಕರಣಗಳಲ್ಲಿ ಅರ್ಧದಷ್ಟು ಕುಡಿದು ಪತ್ನಿಗೆ ಹಿಂಸಿಸುವ ಪ್ರವೃತ್ತಿಗೆ ಸಂಬಂಧಿಸಿದ್ದಾದರೆ, ಇನ್ನು ಕೆಲವು ವಿವಾಹೇತರ ಸಂಬಂಧಗಳು, ಕುಟುಂಬದ ಜವಾಬ್ದಾರಿಗಳ ನಿರ್ಲಕ್ಷ್ಯ, ಅನುಮಾನ, ಅತ್ತೆ-ಮಾವನ ಕಿರಿಕಿರಿ ಮತ್ತು ವರದಕ್ಷಿಣೆ ಸಂಬಂಧಿತ ಸಮಸ್ಯೆಗಳಿಗೆ ಸಂಬಂಧಿಸಿವೆ. ಈ ಸಮಯದಲ್ಲಿ ಕೇವಲ ಒಂದು ಪ್ರಕರಣದ ಬಗ್ಗೆ ಮಾತ್ರ ಎಫ್‌ಐಆರ್‌ ದಾಖಲಿಸಲಾಗಿದೆ ಎಂದು ದ್ವಿವೇದಿ ಹೇಳಿದ್ದಾರೆ.

ಈ ಉಪಕ್ರಮದ ಪ್ರಕಾರ, ಸಮಸ್ಯೆಗಳನ್ನು ಪರಿಹರಿಸಿದ ನಂತರ ಒಂದು ತಿಂಗಳ ಕಾಲ ಆ ಕುಟುಂಬಗಳಿಗೆ ಕರೆ ಮಾಡಿ ವಿಚಾರಿಸಲಾಗುತ್ತದೆ. ನಂತರ ಮುಂದಿನ ಆರು ತಿಂಗಳು ಅಥವಾ ಅದಕ್ಕಿಂತ ಹೆಚ್ಚಿನ ಕಾಲ ಸ್ಥಳೀಯ ಪೊಲೀಸರು ನಿಯತಕಾಲಿಕವಾಗಿ ಮನೆಗಳಿಗೆ ಭೇಟಿ ನೀಡುತ್ತಾರೆ.

ಕೌನ್ಸಲಿಂಗ್ ಸೆಂಟರ್‌ ಒಂದು ದಶಕಕ್ಕೂ ಹೆಚ್ಚು ಕಾಲ ಅಸ್ತಿತ್ವದಲ್ಲಿದ್ದರೂ, ಇತ್ತೀಚಿನ ವರ್ಷಗಳಲ್ಲಿ ಮನಶಾಸ್ತ್ರಜ್ಞರು ಮತ್ತು ತರಬೇತಿ ಪಡೆದ ಸಲಹೆಗಾರರು ಸೇರಿದ್ದರಿಂದ ಅದರ ಪ್ರಭಾವ ಇನ್ನಷ್ಟು ಹೆಚ್ಚಾಗಿದೆ. ಕೆಲವೊಮ್ಮೆ, ಕೌನ್ಸಲಿಂಗ್‍ ತಂಡಕ್ಕೆ ಸಮಸ್ಯೆಯನ್ನು ಪರಿಹರಿಸಲು ಕಷ್ಟವಾದರೆ ಅಂತಹ ಸಂದರ್ಭಗಳಲ್ಲಿ, ಇಬ್ಬರೂ ಸಂಗಾತಿಗಳಿಗೆ ಸಲಹೆ ನೀಡಲು ಅವರು ಮನಶಾಸ್ತ್ರಜ್ಞರ ಸಹಾಯ ಪಡೆಯುತ್ತಾರೆ ಎಂದು ಅವರು ತಿಳಿಸಿದ್ದಾರೆ.

ಕೇಂದ್ರದ ಮುಖ್ಯಸ್ಥ ಮಧು ಯಾದವ್ ಒಂದಷ್ಟು ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಒಂದು ಪ್ರಕರಣದಲ್ಲಿ 35 ವರ್ಷದ ಮಹಿಳೆಯೊಬ್ಬಳು ತನ್ನ ಪತಿ ತನ್ನನ್ನು ತಾಯಿಯ ಮನೆಯಿಂದ ವಾಪಾಸ್ ಕರೆತರಲು ನಿರಾಕರಿಸಿದ್ದ ಎಂದು ಆರೋಪಿಸಿದ್ದಳು. ಕೌನ್ಸೆಲಿಂಗ್ ನಂತರ, ಅವಳು ವಿವಾಹೇತರ ಸಂಬಂಧದಲ್ಲಿದ್ದಾಳೆಂಬ ಸತ್ಯ ತಿಳಿದುಬಂದಿದೆ. ಕೊನೆಗೆ ಅವಳು ಆ ಸಂಬಂಧವನ್ನು ಬಿಟ್ಟುಬಿಡಲು ಒಪ್ಪಿಕೊಂಡಿದ್ದಾಳೆ. ಮತ್ತೀಗ ಪತಿಯ ಜತೆ ಸಂತೋಷದಿಂದ ಬದುಕು ನಡೆಸುತ್ತಿದ್ದಾಳೆ ಎಂದು ಹೇಳಿದ್ದಾರೆ.

ಹಾಗೇ ಇನ್ನೊಂದು ಪ್ರಕರಣದಲ್ಲಿ, 25 ವರ್ಷದ ಮಹಿಳೆಯೊಬ್ಬಳು, ಪತಿ ಪ್ರತಿದಿನ ಮದ್ಯಪಾನ ಮಾಡಿಕೊಂಡು ಬಂದು ತನ್ನ ಹಾಗೂ ಮಕ್ಕಳ ಮೇಲೆ ದೌರ್ಜನ್ಯ ನಡೆಸುತ್ತಿದ್ದಾರೆ ಎಂದು ಆರೋಪಿಸಿದ್ದಳು. ಕೊನೆಗೆ ಪೊಲೀಸರ ಅವನ ಜತೆ ಸಮಾಲೋಚನೆ ನಡೆಸಿ ಮದ್ಯಪಾನವನ್ನು ನಿಲ್ಲಿಸಿದ್ದಾರೆ ಮತ್ತು ಅವರ ಕುಟುಂಬ ಜೀವನವು ಸುಧಾರಿಸಿದೆ ಎಂದು ತಿಳಿಸಿದ್ದಾರೆ.

ಈ ಸುದ್ದಿಯನ್ನೂ ಓದಿ:Viral Video: ಚಲಿಸುತ್ತಿರುವ ಬೈಕ್‌ನಲ್ಲಿ ಫುಲ್‌ ಮೂಡ್‌ನಲ್ಲಿ ಜೋಡಿಯ ರೊಮ್ಯಾನ್ಸ್! ವಿಡಿಯೊ ವೈರಲ್‌

ಶಹಜಹಾನ್‌ಪುರ ಪೊಲೀಸರ ಈ ಪ್ರಯತ್ನವು ಸಾಕಷ್ಟು ದಂಪತಿಯ ಜೀವನವನ್ನು ಸುಧಾರಿಸಿ ಅವರು ಒಟ್ಟಾಗಿ ಬದುಕುವಂತೆ ಮಾಡಿದೆ. ಎಲ್ಲದಕ್ಕೂ ಡಿವೋರ್ಸ್‌ ಒಂದೇ ಪರಿಹಾರವಲ್ಲ ಎಂಬುದನ್ನು ಇವರು ತೋರಿಸಿಕೊಟ್ಟಿದ್ದಾರೆ.