Balvinder Singh: 844 ಕೋಟಿ ರೂ. ಮೊತ್ತದ ಮನೆ, 85ಕೋಟಿ ನಂಬರ್‌ ಪ್ಲೇಟ್‌... ಬಲ್ವಿಂದರ್‌ ಸಿಂಗ್‌ ಐಷಾರಾಮಿ ಬದುಕು ಹೇಗಿತ್ತು ಗೊತ್ತಾ?

ದುಬೈ: ಅಬು ಸಬಾ (Abu Sabah) ಎಂದುಕರೆಯುವ ದುಬೈ ಮೂಲದ ಭಾರತೀಯ ಉದ್ಯಮಿ (Dubai-based Indian Businessman) ಬಲ್ವಿಂದರ್‌ ಸಿಂಗ್ ಸಾಹ್ನಿ (Balvinder Singh Sahni) ಅವರಿಗೆ ಐದು ವರ್ಷಗಳ ಜೈಲು ಶಿಕ್ಷೆ ಮತ್ತು ದೇಶಭ್ರಷ್ಟತೆಯ ಶಿಕ್ಷೆ ವಿಧಿಸಲಾಗಿದೆ. ದುಬೈ ನ್ಯಾಯಾಲಯವು ಸಹಾನಿಗೆ 500,000 ದಿರ್ಹಾಮ್ (ಸುಮಾರು 1.15 ಕೋಟಿ ರೂ.) ದಂಡ ವಿಧಿಸಿದ್ದು, ದೇಶದಿಂದ ಗಡಿಪಾರು ಮಾಡುವ ಮೊದಲು 150 ಮಿಲಿಯನ್ ದಿರ್ಹಾಮ್ (ಸುಮಾರು 3446 ಕೋಟಿ ರೂ.) ಮೌಲ್ಯದ ಆಸ್ತಿಯನ್ನು ವಶಪಡಿಸಿಕೊಳ್ಳುವಂತೆ ಆದೇಶಿಸಿದೆ.

ಗಲ್ಫ್ ನ್ಯೂಸ್ ವರದಿಯ ಪ್ರಕಾರ, ದುಬೈನ ಉನ್ನತ ವರ್ಗದಲ್ಲಿ ಪ್ರಸಿದ್ಧರಾದ ಸಾಹ್ನಿ, ಶೆಲ್ ಕಂಪನಿಗಳ ಜಾಲ ಮತ್ತು ನಕಲಿ ಇನ್‌ವಾಯ್ಸ್‌ಗಳ ಮೂಲಕ 150 ಮಿಲಿಯನ್ ದಿರ್ಹಾಮ್ ಅಕ್ರಮ ಹಣ ವರ್ಗಾವಣೆ ಆರೋಪದಲ್ಲಿ ದೋಷಿಯಾಗಿದ್ದಾರೆ. ಸಾಹ್ನಿ ಜೊತೆಗೆ ಅವರ ಮಗ ಸೇರಿದಂತೆ 33 ಜನರನ್ನು ದೋಷಿಗಳೆಂದು ಘೋಷಿಸಲಾಗಿದೆ.

ಬಲ್ವಿಂದರ್‌ ಸಿಂಗ್ ಸಾಹ್ನಿ ಯಾರು?

53 ವರ್ಷ ವಯಸ್ಸಿನ ಸಾಹ್ನಿ, ರಾಜ್ ಸಾಹ್ನಿ ಗ್ರೂಪ್ (ಆರ್‌ಎಸ್‌ಜಿ) ಎಂಬ ರಿಯಲ್ ಎಸ್ಟೇಟ್ ಕಂಪನಿಯ ಸಂಸ್ಥಾಪಕ ಮತ್ತು ಅಧ್ಯಕ್ಷರಾಗಿದ್ದಾರೆ. ಈ ಕಂಪನಿಯು ಯುಎಇ, ಅಮೆರಿಕ, ಭಾರತ ಮತ್ತು ಇತರ ದೇಶಗಳಲ್ಲಿ ಕಾರ್ಯನಿರ್ವಹಿಸುತ್ತದೆ. ವರದಿಗಳ ಪ್ರಕಾರ, ಸಾಹ್ನಿಯ ದುಬೈ ಆಸ್ತಿಗಳಲ್ಲಿ ದುಬೈ ಸ್ಪೋರ್ಟ್ಸ್ ಸಿಟಿಯ ಕಸರ್ ಸಬಾದ ವಸತಿ ಕಟ್ಟಡಗಳು, ಜುಮೇರಾ ವಿಲೇಜ್ ಸರ್ಕಲ್‌ನ 24 ಅಂತಸ್ತಿನ ಬುರ್ಜ್ ಸಬಾ ಅಪಾರ್ಟ್‌ಮೆಂಟ್, ಬ್ಯುಸಿನೆಸ್ ಬೇಯ ಬೇ ಸ್ಕ್ವೇರ್‌ನ ವಾಣಿಜ್ಯ ಆಸ್ತಿ ಮತ್ತು ಸಬಾ ದುಬೈ ಎಂಬ ಫೈವ್ ಸ್ಟಾರ್ ಹೋಟೆಲ್ ಸೇರಿವೆ.

ದುಬೈನ ಉನ್ನತ ವರ್ಗದಲ್ಲಿ ಸಂಪರ್ಕ ಹೊಂದಿರುವ ಸಾಹ್ನಿ, ಐಷಾರಾಮಿ ಕಾರುಗಳನ್ನು ಹೊಂದಿದ್ದಾರೆ, ತಮ್ಮ ದುಬಾರಿ ವಾಹನಗಳ ಚಿತ್ರಗಳನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳುತ್ತಾರೆ. 2016ರಲ್ಲಿ ತಮ್ಮ ರೋಲ್ಸ್-ರಾಯ್ಸ್ ಕಾರಿಗಾಗಿ D5 ನಂಬರ್ ಪ್ಲೇಟ್ ಅನ್ನು 33 ಮಿಲಿಯನ್ ದಿರ್ಹಾಮ್ (ಆಗಿನ 9 ಮಿಲಿಯನ್ ಡಾಲರ್)ಗೆ ಖರೀದಿಸಿದ್ದು ಸುದ್ದಿಯಾಗಿತ್ತು. ಇವರು ಇನ್‌ಸ್ಟಾಗ್ರಾಮ್‌ನಲ್ಲಿ ಸುಮಾರು 33 ಲಕ್ಷ ಫಾಲೋವರ್ಸ್‌ಗಳನ್ನು ಹೊಂದಿದ್ದಾರೆ.

844ಕೋಟಿ ರೂ. ಮೊತ್ತದ ಭವ್ಯ ಬಂಗಲೆ

ಬಲ್ವಿಂದರ್‌ ಸಿಂಗ್‌ ಸಾಹ್ನಿ ಅವರಿಗೆ 9 ನೇ ಸಂಖ್ಯೆ, ನೀಲಿ ಬಣ್ಣ, ಐಷಾರಾಮಿ ಕಾರುಗಳು ಮತ್ತು ಅಪರೂಪದ ಪರವಾನಗಿ ಫಲಕಗಳಂದ್ರೆ ಬಹಳ ಅಚ್ಚುಮೆಚ್ಚು. ಅದಕ್ಕಾಗಿ ಎಷ್ಟು ಬೇಕಾದ್ರು ಖರ್ಚು ಮಾಡಲು ತಯಾರಿರುತ್ತಿದ್ದರು. ಇದೇ ವಿಚಾರಕ್ಕೆ ಅವರು ಆಗಾಗ ಮಾಧ್ಯಮಗಳಲ್ಲಿ ಸುದ್ದಿಯಾಗುತ್ತಿದ್ದರು.

ನನಗೆ ವಿಶಿಷ್ಟ ನಂಬರ್ ಪ್ಲೇಟ್‌ಗಳನ್ನು ಸಂಗ್ರಹಿಸುವುದು ಇಷ್ಟ ಮತ್ತು ಈ ಸಂಖ್ಯೆಯನ್ನು ಪಡೆದಿದ್ದಕ್ಕೆ ನನಗೆ ಹೆಮ್ಮೆ ಇದೆ. ನನಗೆ ಒಂಬತ್ತನೇ ಸಂಖ್ಯೆ ಇಷ್ಟ ಮತ್ತು D5 ಕೂಡಿದರೆ ಒಂಬತ್ತಾಗುತ್ತದೆ, ಆದ್ದರಿಂದ ನಾನು ಅದನ್ನು ಆರಿಸಿಕೊಂಡೆ ಎಂದು ಸಾಹ್ನಿ "ಮೊ ವ್ಲಾಗ್ಸ್" ಚಾನೆಲ್‌ನಲ್ಲಿ ಯೂಟ್ಯೂಬ್ ವೀಡಿಯೊದಲ್ಲಿ ಹೇಳಿಕೊಂಡಿದ್ದರು. ಅವರು ದುಬೈನಲ್ಲಿ ಐಷಾರಾಮಿ ಮತ್ತು ಭವ್ಯವಾದ $100 ಮಿಲಿಯನ್ ಭವನದಲ್ಲಿ ವಾಸಿಸುತ್ತಿದ್ದಾರೆ. ಸಾಹ್ನಿ AED 4.5 ಮಿಲಿಯನ್‌ಗೆ ಮೊಬೈಲ್ ಸಂಖ್ಯೆಯನ್ನು (058-8888888) ಖರೀದಿಸಿದ್ದರು.

ಈ ಸುದ್ದಿಯನ್ನು ಓದಿ: Viral Video: ರೈಲ್ವೆ ನಿಲ್ದಾಣದ ಮೆಟ್ಟಿಲುಗಳಲ್ಲಿ ಅಂಟಿಸಿದ ಪಾಕ್ ಧ್ವಜ ತೆಗೆದ ಮಹಿಳೆ; ಕಿಡಿಕಾರಿದ ನೆಟ್ಟಿಗರು ಹೇಳಿದ್ದೇನು?

ಸಾಹ್ನಿ ಅರೆಸ್ಟ್‌ ಆಗಿರೋದ್ಯಾಕೆ?

ಸಾಹ್ನಿ ಮತ್ತು ಇತರ ಆರೋಪಿಗಳ ವಿರುದ್ಧ 2024ರಲ್ಲಿ ಬುರ್ ದುಬೈ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು. ನಂತರ ಸಾರ್ವಜನಿಕ ಪ್ರಾಸಿಕ್ಯೂಷನ್‌ಗೆ ವರ್ಗಾಯಿಸಲಾಯಿತು. ತನಿಖೆಯಲ್ಲಿ ಯುಎಇ ಮತ್ತು ವಿದೇಶಗಳಲ್ಲಿ ವ್ಯಾಪಕ ಆರ್ಥಿಕ ಡೇಟಾ ಮತ್ತು ವ್ಯಾಪಾರ ಸಂಪರ್ಕಗಳು ಕಂಡುಬಂದಿವೆ. ಕಳೆದ ಶುಕ್ರವಾರ ತೀರ್ಪು ನೀಡಿದ ದುಬೈನ ನಾಲ್ಕನೇ ಕ್ರಿಮಿನಲ್ ಕೋರ್ಟ್, ಸಾಹ್ನಿ ಸೇರಿದಂತೆ ಇತರ ಆರೋಪಿಗಳನ್ನು ಶೆಲ್ ಕಂಪನಿಗಳು ಮತ್ತು ಅನುಮಾನಾಸ್ಪದ ಆರ್ಥಿಕ ವಹಿವಾಟುಗಳನ್ನು ಬಳಸಿಕೊಂಡು ಸಂಕೀರ್ಣ ಅಕ್ರಮ ಹಣ ವರ್ಗಾವಣೆ ಜಾಲವನ್ನು ನಿರ್ವಹಿಸಿದ್ದಕ್ಕಾಗಿ ದೋಷಿಗಳೆಂದು ಘೋಷಿಸಿತು. ನ್ಯಾಯಾಲಯವು ಸಾಹ್ನಿಗೆ 5,00,000 ದಿರ್ಹಾಮ್ ದಂಡ, 150 ಮಿಲಿಯನ್ ದಿರ್ಹಾಮ್ ಮೌಲ್ಯದ ಆಸ್ತಿಯನ್ನು ವಶಪಡಿಸಿಕೊಳ್ಳುವ ಆದೇಶ, ಮತ್ತು ಶಿಕ್ಷೆ ಪೂರ್ಣಗೊಂಡ ನಂತರ ದೇಶಭ್ರಷ್ಟಗೊಳಿಸುವ ಆದೇಶ ನೀಡಿತು.