Yearender 2024: ಈ ವರ್ಷ ಡಿವೋರ್ಸ್ ಪಡೆದು ನಾನೊಂದು ತೀರ, ನೀನೊಂದು ತೀರ ಎಂತಾದ ಸೆಲೆಬ್ರಿಟಿಗಳಿವರು
Yearender 2024: 2024(Yearender) ಇನ್ನೇನು ಮುಗಿಯಲಿದೆ. 2025ರ(New Year) ಆರಂಭಕ್ಕೆ ದಿನಗಣನೆ ಶುರುವಾಗಿದೆ. ಹೊಸ ವರ್ಷ(New Year)ವನ್ನ ಹೊಸ ಹರುಷದಿಂದ ಸ್ವಾಗತ ಮಾಡುವ ಮುನ್ನ.. ಒಂದ್ಸಲಿ 2024ರತ್ತ ಹಿಂದಿರುಗಿ ನೋಡೋಣ.
Sushmitha Jain
Dec 21, 2024 7:10 AM
Yearender 2024: 2024(Yearender) ಇನ್ನೇನು ಮುಗಿಯಲಿದೆ. 2025ರ(New Year) ಆರಂಭಕ್ಕೆ ದಿನಗಣನೆ ಶುರುವಾಗಿದೆ. ಹೊಸ ವರ್ಷವನ್ನು ಹೊಸ ಹರುಷದಿಂದ ಸ್ವಾಗತ ಮಾಡುವ ಮುನ್ನ 2024ರತ್ತ ಹಿಂದಿರುಗಿ ನೋಡೋಣ. 2024ರಲ್ಲಿ ಅನೇಕ ತಾರೆಯರು ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಹಲವು ತಾರೆಯರು ಈ ವರ್ಷ ಪೋಷಕರಾಗಿಯೂ ಬಡ್ತಿ ಪಡೆದಿದ್ದಾರೆ. ಈ ನಡುವೆ ಈ ವರ್ಷ ಕೆಲ ತಾರೆಯರು ತಮ್ಮ ವೈವಾಹಿಕ ಬದುಕನ್ನ ಅಂತ್ಯಗೊಳಿಸಿದರು.
ವೈಯಕ್ತಿಕ ಕಾರಣಗಳಿಂದ ಕೆಲ ತಾರೆಯರು ಈ ವರ್ಷ ವಿಚ್ಛೇದನ ಪಡೆದಿದ್ದಾರೆ. ಪರಸ್ಪರ ಒಪ್ಪಿಗೆ ಮೇರೆಗೆ ಡಿವೋರ್ಸ್(Divorce) ಪಡೆದು ನಾನೊಂದು ತೀರಾ, ನೀನೊಂದು ತೀರಾ ಎಂತಾಗಿದ್ದಾರೆ. ತಮ್ಮ ದಾಂಪತ್ಯ ಜೀವನಕ್ಕೆ ಈ ವರ್ಷ ಪೂರ್ಣವಿರಾಮವಿಟ್ಟ ಪ್ರಮುಖ ತಾರೆಯರ ಪಟ್ಟಿ ಇಲ್ಲಿದೆ ನೋಡಿ.
ಸೂಪರ್ ಸ್ಟಾರ್ ರಜನಿಕಾಂತ್ ಪುತ್ರಿ ಐಶ್ವರ್ಯಾ ಮತ್ತು ನಟ ಧನುಷ್ ಇತ್ತೀಚೆಗೆ ಅಧಿಕೃತವಾಗಿ ಬೇರ್ಪಟ್ಟಿದ್ದಾರೆ. 2004ರಲ್ಲಿ ಐಶ್ವರ್ಯಾ ಹಾಗೂ ಧನುಷ್ ವಿವಾಹವಾಗಿದ್ದರು. ಈ ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ. 18 ವರ್ಷಗಳ ಕಾಲ ಒಟ್ಟಿಗೆ ಇದ್ದ ಈ ಜೋಡಿ 2022ರಲ್ಲಿ ತಮ್ಮ ವಿಚ್ಛೇದನವನ್ನು ಘೋಷಿಸಿತ್ತು. ಪ್ರತ್ಯೇಕವಾಗಿ ವಾಸ ಮಾಡುತ್ತಿದ್ದರು. 2024ರಲ್ಲಿ ಇಬ್ಬರು ವಿಚ್ಛೇದನ ಪಡೆದು ದೂರವಾಗಿದ್ದಾರೆ.
ಸಂಗೀತ ಮಾಂತ್ರಿಕ ಎ.ಆರ್.ರೆಹಮಾನ್ ಮತ್ತು ಸೈರಾ ಬಾನು ಅವರ ವಿಚ್ಛೇದನ ಸುದ್ದಿ ಕೇಳಿ ಅನೇಕರು ಶಾಕ್‌ಗೆ ಒಳಗಾಗಿದ್ದಾರೆ. ಈ ಜೋಡಿ ಗ್ರೇ ಡಿವೋರ್ಸ್ ಪಡೆದಿದೆ. ಎ.ಆರ್. ರೆಹಮಾನ್ ಇಬ್ಬರೂ 1995ರಲ್ಲಿ ವಿವಾಹವಾದರು. ಈ ದಂಪತಿಗೆ ಖತೀಜಾ, ರಹೀಮಾ ಮತ್ತು ಅಮೀನ್ ಎಂಬ ಮೂವರು ಮಕ್ಕಳಿದ್ದಾರೆ. 29 ವರ್ಷಗಳ ಬಳಿಕ ಎ.ಆರ್. ರೆಹಮಾನ್ ದಂಪತಿ ವಿಚ್ಛೇದನ ಪಡೆದು ದೂರವಾಗಿದ್ದಾರೆ. ಸೈರಾ ಬಾನು ಹಾಗೂ ಎ.ಆರ್. ರೆಹಮಾನ್ ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ವಿಚ್ಛೇದನ ಘೋಷಿಸಿದರು.
ಕ್ರಿಕೆಟಿಗ ಹಾರ್ದಿಕ್ ಪಾಂಡ್ಯ ಮತ್ತು ಬಾಲಿವುಡ್ ನಟಿ ನತಾಶಾ ಸ್ಟಾಂಕೋವಿಕ್ ವಿಚ್ಛೇದನದ ಬಗ್ಗೆ ವದಂತಿಗಳು ಈ ವರ್ಷದ ಐಪಿಎಲ್ ಸಮಯದಿಂದಲೂ ಇತ್ತು. ಅದಾದ ಬಳಿಕ ಟಿ20 ವಿಶ್ವಕಪ್ ವೇಳೆ ಈ ವದಂತಿಗಳಿಗೆ ತಾತ್ಕಾಲಿಕ ಬ್ರೇಕ್ ಬಿದ್ದಿತ್ತು. ಆದರೆ ವಿಶ್ವಕಪ್ ಬಳಿಕ ಇಬ್ಬರು ವಿಚ್ಛೇದನ ಘೋಷಿಸಿದರು. ಕೆಲವು ವರ್ಷಗಳ ಕಾಲ ಡೇಟಿಂಗ್ ಮಾಡಿದ ನಂತರ 2020ರಲ್ಲಿ ಇಬ್ಬರೂ ವಿವಾಹವಾದರು. ಅದೇ ವರ್ಷದಲ್ಲಿ ಮಗ ಅಗಸ್ತ್ಯನಿಗೆ ನತಾಶಾ ಜನ್ಮ ನೀಡಿದರು. ಮದುವೆಯಾದ 4 ವರ್ಷಕ್ಕೆ ಈ ಜೋಡಿ ದಾಂಪತ್ಯ ಕೊನೆಗೊಳಿಸಿ ದೂರವಾದರು.
ಭಾರತದ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ಮತ್ತು ಪಾಕಿಸ್ತಾನಿ ಕ್ರಿಕೆಟಿಗ ಶೋಯೆಬ್ ಮಲಿಕ್ ಅವರ ವಿವಾಹ ಆ ಸಮಯದಲ್ಲೇ ಭಾರೀ ಚರ್ಚೆಯ ವಿಷಯವಾಗಿತ್ತು. 14 ವರ್ಷಗಳ ನಂತರ, ದಂಪತಿ ನಡುವೆ ಬಿರುಕು ಕಾಣಿಸಿಕೊಂಡಿತು. ಶೋಯೆಬ್ ಈ ವರ್ಷದ ಆರಂಭದಲ್ಲಿ ಪಾಕಿಸ್ತಾನಿ ನಟಿ ಸನಾ ಜಾವೇದ್ ಅವರನ್ನು ವಿವಾಹವಾದರು. ಸಾನಿಯಾ ವಿಚ್ಛೇದನದ ನಂತರವೇ ಶೋಯೆಬ್ ಮದುವೆಯಾದರು ಎಂದು ಸಾನಿಯಾ ತಂದೆ ಹೇಳಿದರು. ಸಾನಿಯಾ ಮತ್ತು ಶೋಯೆಬ್‌ಗೆ ಇಜಾನ್ ಎಂಬ ಮಗನಿದ್ದಾನೆ.
ಬಾಲಿವುಡ್ ನಟಿ ಹೇಮಾ ಮಾಲಿನಿ ಪುತ್ರಿ ಹಾಗೂ ನಟಿ ಇಶಾ ಡಿಯೋಲ್-ಭರತ್ ತಕ್ತಾನಿ ದಂಪತಿ ಈ ವರ್ಷ ತಮ್ಮ ವಿಚ್ಛೇದನ ಘೋಷಿಸಿದ್ದಾರೆ. ಆ ಮೂಲಕ 11 ವರ್ಷಗಳ ದಾಂಪತ್ಯಕ್ಕೆ ನಟಿ ತೆರೆ ಎಳೆದಿದ್ದಾರೆ. ಈ ದಂಪತಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ.
ಬಾಲಿವುಡ್ ನಟಿ ಊರ್ಮಿಳಾ-ಮೋಶಿನ್ ಅಖ್ತರ್ ಮಿರ್ 2016ರಲ್ಲಿ ವಿವಾಹವಾಗಿದ್ದರು. ಈ ಬಾಲಿವುಡ್ ನಟಿಯ ಮದುವೆ ಕೂಡ ಬಹುಕಾಲ ಉಳಿಯಲಿಲ್ಲ. 8 ವರ್ಷಗಳ ಇಬ್ಬರು ವಿಚ್ಚೇದನ ಪಡೆದು ದೂರ ದೂರ ಆಗಿದ್ದಾರೆ.
ಹಾಲಿವುಡ್ ನಟರಾದ ಜೆನ್ನಿಫರ್ ಲೋಪೆಜ್-ಬೆನ್ ಅಫ್ಲೆಕ್ ಬೇರ್ಪಟ್ಟು ಅಭಿಮಾನಿಗಳಿಗೆ ಶಾಕ್ ನೀಡಿದ್ದಾರೆ. ಈ ವರ್ಷ ನ್ಯಾಯಾಲಯದಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ ಅವರು ಪ್ರಸ್ತುತ ಪ್ರತ್ಯೇಕವಾಗಿ ವಾಸಿಸುತ್ತಿದ್ದಾರೆ.
ಸ್ಯಾಂಡಲ್ವುಡ್ನ ಕ್ಯೂಟ್ ಕಪಲ್ ಆಗಿದ್ದ ರ‍್ಯಾಪರ್ ಚಂದನ್ ಶೆಟ್ಟಿ ಹಾಗೂ ನಿವೇದಿತಾ ಗೌಡ ವಿಚ್ಛೇದನ ಪಡೆಯುವ ಮೂಲಕ ತಮ್ಮ 4 ವರ್ಷಗಳ ದಾಂಪತ್ಯಕ್ಕೆ ಅಂತ್ಯ ಹಾಡಿದ್ದಾರೆ. ಪರಸ್ಪರ ಒಪ್ಪಿಗೆ ಮೇರೆಗೆ ಡಿವೋರ್ಸ್ ಪಡೆದು ದೂರವಾಗಿದ್ದಾರೆ.