ಮಿಣುಕು ಹುಳಗಳ ಬೆಳಕಿನ ಪರಿಷೆ…

ಶಶಾಂಕಣ

shashidhara.halady@gmail.com

ಮಿಣುಕು ಹುಳಗಳ ಮಾಯಾಲೋಕದ ರಹಸ್ಯಗಳನ್ನು ಪೂರ್ತಿಯಾಗಿ ಮಾನವನು ಇನ್ನೂ ಅರಿತಿಲ್ಲ ಎಂದೇ ಹೇಳಬಹುದು. ಮಿಣುಕು ಹುಳಗಳು ಒಂದಿಷ್ಟೂ ಬಿಸಿಯನ್ನು ತೋರದೆ, ಬೆಳಕನ್ನು ತಮ್ಮ ದೇಹದಲ್ಲಿ ಉತ್ಪತ್ತಿ ಮಾಡುವುದು ಹೇಗೆ ಎಂಬ ರಹಸ್ಯವನ್ನು ನಮ್ಮ ವಿಜ್ಞಾನವಿನ್ನೂ ಪೂರ್ತಿಯಾಗಿ ಭೇದಿಸಿಲ್ಲ.

ಭಾವಜೀವಿಗಳ ಮನದ ತುಂಬಾ ಬೆಳಕನ್ನು ತುಂಬಬಲ್ಲ ಮಿಣುಕು ಹುಳಗಳ ಮಾಯಾಲೋಕದ ಬೆರಗನ್ನು ಪೂರ್ತಿಯಾಗಿ ಅನುಭವಿಸಬೇಕಾದರೆ, ನೀವೊಮ್ಮೆ ಅವುಗಳನ್ನು ನೋಡಲೇಬೇಕು ಹೊರತು ಅಕ್ಷರದಲ್ಲಿ ವರ್ಣಿಸುವುದು ಕಷ್ಟ. ಅದರಲ್ಲೂ, ಮಿಣುಕು ಹುಳಗಳ ಬೆಳಕಿನ ಸಭೆಯಂತೂ, ಈ ನಿಸರ್ಗಲೋಕದ ಅದ್ಭುತ ದೃಶ್ಯಗಳಲ್ಲಿ ಒಂದು ಮತ್ತು ಅದೊಂದು ವಿಸ್ಮಯಕಾರಿ ವಿದ್ಯಮಾನ.

ಮಿಣುಕು ಹುಳಗಳ ವಿಚಾರವನ್ನು ಬರೆಯುವಾಗ, ಬಹುಶಃ ಅವುಗಳ ‘ಬೆಳಕಿನ ಪರಿಷೆ’ಯ ವಿವರ ದಿಂದಲೇ ಆರಂಭಿಸುವುದು ವಿಹಿತ. ಮಳೆಗಾಲದ ಒಂದು ದಿನ, ನಮ್ಮ ಹಳ್ಳಿಮನೆಯ ಮುಂಭಾಗದಲ್ಲಿರುವ ಪೋರ್ಟಿಕೋದಂಥ ರಚನೆ ಯಲ್ಲಿ ಕುಳಿತಿದ್ದೆ. ಹಗಲು ಒಂದೆರಡು ಗಂಟೆ ಮಳೆ ಸುರಿದು, ಸಂಜೆ ಹೊಳವಾಗಿತ್ತು. ಮನೆ ಎದುರಿನ ಗದ್ದೆಗಳಲ್ಲಿ ನೀರು ತುಂಬಿದ್ದು, ಕೆಲವೇ ದಿನಗಳ ಹಿಂದೆ ಬತ್ತದ ನಾಟಿ ಮಾಡಿದ್ದರು. ಗದ್ದೆಬೈಲಿನ ಒಂದಂಚಿನಲ್ಲಿ, ಮನೆಯಿಂದ ಸುಮಾರು ೧೦೦ ಅಡಿಗಳ ದೂರದಲ್ಲಿ, ನೀರು ಹರಿಯುವ ತೋಡು. ಅದರ ದಡದಲ್ಲಿ ಮುಂಡುಕನ ಹಿಂಡಲಿನ ಜತೆಯಲ್ಲೇ, ಸಳ್ಳೆ, ನೇರಳೆ, ಕಾಡುಮಾವು ಮೊದಲಾದ ಪೊದೆಗಿಡಗಳು ಪುಟ್ಟ ಮರದ ಗಾತ್ರಕ್ಕೆ ಬೆಳೆದಿದ್ದವು.

ಒಮ್ಮೆಗೇ, ಆ ಪ್ರದೇಶದಲ್ಲಿದ್ದ ಸಾವಿರಾರು ಮಿಣುಕು ಹುಳಗಳು, ‘ಈಗ ಒಂದು ಬೆಳಕಿನ ಸಭೆ ನಡೆಸುವಾ!’ ಎಂದು ನಿರ್ಧರಿಸಿರಬೇಕು. ಸಂಜೆ ಗತ್ತಲಿನಲ್ಲಿ ಬೈಲಿನುದ್ದಕ್ಕೂ ಅಲ್ಲಲ್ಲಿ ಹಾರಾಡುತ್ತಿದ್ದ ಪುಟಾಣಿ ಮಿಣುಕು ಹುಳಗಳೆಲ್ಲವೂ, ನಿಧಾನವಾಗಿ, ತೋಡಿನಂಚಿನ ಒಂದು ಮರದತ್ತ ಧಾವಿಸಿ, ಆ ಮರವನ್ನು ಮುತ್ತಿ ಕುಳಿತವು. ಮಬ್ಬುಗತ್ತಲಿನಲ್ಲಿ ಅವು ಹಾರಾಡುವುದನ್ನು, ಅವುಗಳ ಬೆಳಕಿನ ದಾರಿಯಿಂದಲೇ ಗುರುತಿಸಬಹುದಿತ್ತು. ಕತ್ತಲು ತುಂಬಿದ ಗದ್ದೆ ಬಯಲಿನಲ್ಲಿ, ನೆಲಮಟ್ಟದಿಂದ ಸುಮಾರು ಮೂರರಿಂದ ಆರು ಅಡಿಗಳ ಎತ್ತರದಲ್ಲಿ, ಬೆಳಕನ್ನು ಮಿನುಗಿಸುತ್ತಾ ಆ ಮಿಣುಕು ಹುಳಗಳು ಹಾರಾಡುವ ಪರಿಯೇ ಒಂದು ದೃಶ್ಯಕಾವ್ಯ.

ಮಿಣುಕು ಮಿಣುಕು ಎಂದು ನಿಧಾನವಾಗಿ ಹಾರಾಡುತ್ತಾ, ಒಂದೊಂದೇ ಮಿಣುಕು ಹುಳವು ಆ ಮರದಲ್ಲಿ ಸೇರಿಕೊಳ್ಳುವ ನೋಟವು, ದೃಶ್ಯಕಾವ್ಯಕ್ಕೂ ಮಿಗಿಲು. ಅಷ್ಟು ಹೊತ್ತಿಗೆ ಅಲ್ಲೆಲ್ಲಾ ಕತ್ತಲು ಪೂರ್ತಿ ಆವರಿಸಿರುತ್ತದೆ. ಆ ಮಧ್ಯಮಗಾತ್ರದ ಮರದ ತುಂಬಾ ಮಿಣುಕು ಹುಳಗಳು ಸಭೆ ನಡೆಸಲು
ಆರಂಭಿಸಿದವು. ಮನುಷ್ಯರ ಸಭೆಯಾದರೆ ಸಾಕಷ್ಟು ಸದ್ದು-ಗದ್ದಲ; ಆದರೆ, ಮಿಣುಕು ಹುಳಗಳ ಸಭೆ ಯಲ್ಲಿ ಸದ್ದು-ಗದ್ದಲವಿಲ್ಲ, ಬೆಳಕಿನದ್ದೇ ರಾಜ್ಯ ಭಾರ.

ಎಲ್ಲಾ ಮಿಣುಕು ಹುಳಗಳು ಮಿಣುಕು ಮಿಣುಕು ಬೆಳಕನ್ನು ಬೀರುತ್ತಾ, ಪರಸ್ಪರ ಸಂಭಾಷಿಸುತ್ತಿದ್ದವು! ಅವು ಮಿನುಗುವ ರೀತಿಯಲ್ಲೂ ಒಂದು ಶಿಸ್ತು
ಇರುತ್ತದೆ. ಮರದ ಒಂದು ಭಾಗದ ನೂರಾರು ಹುಳಗಳು ಝಗ್ ಎಂದು ಮಿನುಗಿದರೆ, ಅದಾಗಿ ಒಂದೆರಡು ಸೆಕೆಂಡುಗಳ ಅಂತರದಲ್ಲಿ ಇನ್ನೊಂದು
ಭಾಗದಲ್ಲಿ ಕುಳಿತ ಮಿಣುಕು ಹುಳಗಳು ಬೆಳಕು ಬೀರಬಹುದು. ಅಥವಾ ಒಮ್ಮೊಮ್ಮೆ ಎಲ್ಲಾ ಹುಳಗಳೂ ಒಮ್ಮೆಗೇ ಝಗ್ ಎಂದು ಬೆಳಕನ್ನು ಬೀರಿ, ಆ
ಕತ್ತಲ ರಾತ್ರಿಯ ಬಯಲಿಗೆ ಬೆಳಕಿನ ಸರಮಾಲೆಯನ್ನೇ ತೊಡಿಸುತ್ತವೆ. ನಮ್ಮೂರಿಗೆ ಆಗಿನ್ನೂ ವಿದ್ಯುತ್ ಸಂಪರ್ಕ ಬಂದಿರಲಿಲ್ಲ; ಅಂಥ ಕತ್ತಲ ರಾತ್ರಿ ಯಲ್ಲಿ ಈ ರೀತಿ ಸಾವಿರಾರು ಮಿಣುಕು ಹುಳ ಗಳು, ಒಂದು ಮರದ ಮೇಲೆ ಕುಳಿತು, ಪರಸ್ಪರ ಸಂದೇಶ ಪಡೆದವರಂತೆ ಒಮ್ಮೆಗೇ ಎಲ್ಲವೂ ಬೆಳಕನ್ನು
ಬೀರಿದಾಗ, ಝಗಮಗಿಸುವ ಬೆಳಕಿನ ಸ್ವರೂಪವು ನೋಡುಗರ ಮೇಲೆ ಮಾಡುವ ಮೋಡಿಯನ್ನು ನೀವೇ ಊಹಿಸಿ.

ಸಂಜೆ ಏಳು ಅಥವಾ ಎಂಟು ಗಂಟೆಯ ಸಮಯ ದಲ್ಲಿ ಈ ರೀತಿ ಸಾವಿರಾರು ಮಿಣುಕು ಹುಳಗಳು, ಮರವೊಂದರ ಮೇಲೆ ಕುಳಿತು ಬೆಳಕಿನ ಪರಿಷೆಯನ್ನು ನಡೆಸುವ ವಿದ್ಯಮಾನವು, ಸಾಮಾನ್ಯವಾಗಿ ಮಳೆಗಾಲದ ಮೊದಲ ಕೆಲವು ವಾರಗಳಲ್ಲಿ ಕಾಣಸಿಗುತ್ತದೆ. ಜೂನ್ ಎರಡನೆಯ ವಾರದ ನಂತರ, ಅಂದರೆ
ಆ ಪ್ರದೇಶದಲ್ಲಿ ಸಾಕಷ್ಟು ಮಳೆಯಾದ ನಂತರವಷ್ಟೇ ಮಿಣುಕು ಹುಳಗಳ ಪರಿಷೆಯನ್ನು ಕಾಣಬಹುದು. ಒಂದು ಮರದಲ್ಲಿ ಈ ರೀತಿ ಸಾವಿರಾರು ಮಿಣುಕು ಹುಳಗಳು ಗುಂಪಾಗಿ ಕುಳಿತು, ಸುಮಾರು ಒಂದು ಗಂಟೆಯ ತನಕ ಕತ್ತಲಿನಲ್ಲೇ ಬೆಳಕಿನ ಪರಿಷೆಯನ್ನು ನಡೆಸಿ, ಕ್ರಮೇಣ ಒಂದೊಂದಾಗಿ ಚದುರುತ್ತವೆ.

ಒಮ್ಮೊಮ್ಮೆ, ಮಿಣುಕು ಹುಳಗಳ ಬೆಳಕಿನ ಸಭೆಯ ನಡುವೆಯೇ, ಮಳೆರಾಯನು ಕರಡಿಯ ರೀತಿ ಪ್ರವೇಶ ನೀಡುವುದುಂಟು; ಸಾವಿರಾರು ಬೆಳಕುಗಳ
ಮಿನುಗುಗಳ ನಡುವೆ, ಸದ್ದು ಮಾಡುತ್ತಾ ಸುರಿವ ಮಳೆಯ ನೋಟವು, ನೋಡುಗರ ಮನದಲ್ಲೇ ಬೇರೊಂದೇ ಅಮೂರ್ತ ಭಾವನೆಗಳನ್ನು ಮೂಡಿಸ
ಬಲ್ಲದು. ಸಣ್ಣಗೆ ಮಳೆ ಸುರಿದರೆ ಮಿಣುಕು ಹುಳಗಳ ಬೆಳಕಿನ ಪರಿಷೆ ಮುಂದುವರಿದೀತು; ದಬದಬನೆ ಸುರಿವ ಮಳೆಯನ್ನು ಕಂಡು, ಅವು ತಮ್ಮ ಬೆಳಕಿನ
ಸಭೆಯನ್ನು ಬರಖಾಸ್ತು ಮಾಡುತ್ತವೋ ಏನೋ. ಹೆಚ್ಚು ಮಳೆ ಸುರಿದರೆ, ಅವುಗಳ ಬೆಳಕಿನ ಪರಿಷೆಯ ನೋಟವು, ತುಸು ದೂರದಲ್ಲಿದ್ದ ನಮ್ಮ ಮನೆಗೆ
ಕಾಣಿಸಲಾರದು.

ಅದೇನೇ ಇದ್ದರೂ, ಮಳೆ ಬಾರದೇ ಇದ್ದ ಸಂಜೆ ಗಳಲ್ಲಿ, ಸುಮಾರು ಅರ್ಧ ಗಂಟೆಯಿಂದ ಒಂದು ಗಂಟೆಯ ತನಕ ಬೆಳಕಿನ ಪರಿಷೆಯನ್ನು ನಡೆಸಿದ
ಮಿಣುಕು ಹುಳಗಳು, ಒಂದೊಂದಾಗಿ ಚದುರುತ್ತವೆ. ಕತ್ತಲಿನ ಆ ರಾತ್ರಿಯಲ್ಲಿ, ಗದ್ದೆ ಬಯಲಿನುದ್ದಕ್ಕೂ ಚಲಿಸುತ್ತಾ, ಮಿಣುಕು ಮಿಣುಕು ಎಂದು ತಮ್ಮ
ಹಿಂಭಾಗದಿಂದ ಬೆಳಕು ಮಾಡುತ್ತ, ತಮ್ಮ ದಿನಚರಿ ಯಲ್ಲಿ ವ್ಯಸ್ತವಾಗುತ್ತವೆ. ಮಿಣುಕು ಹುಳಗಳ ದಿನಚರಿ ಎಂದರೇನು? ಬಾಲದಂಥ ಭಾಗದಿಂದ
ಮಿಣುಕು ಮಿಣುಕು ಎಂದು ಬೆಳಕು ಮಾಡುತ್ತಾ ಅತ್ತಿಂದಿತ್ತ ಹಾರಾಡುವುದು!

ಅಷ್ಟೇ ತಾನೆ ನಮಗೆ ಗ್ರಾಹ್ಯವಾಗುವುದು. ಆದರೆ, ಅವುಗಳ ಲೋಕವೇ ವಿಭಿನ್ನ. ಒಂದು ಮರದಲ್ಲಿ ಸಾವಿರಾರು ಮಿಣುಕು ಹುಳಗಳು ಸಭೆ ಸೇರಿದಂತೆ ಕುಳಿತು, ಒಮ್ಮೆಗೇ ಝಗ್ ಎಂದು ಬೆಳಕು ಮಾಡುವ ಕ್ರಿಯೆಯನ್ನು ಅವುಗಳ ಸಂತಾನೋತ್ಪತ್ತಿ ಪ್ರಕ್ರಿಯೆಯ ಭಾಗ ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ಆದರೆ, ಮಿಣುಕು ಹುಳಗಳ ಮಾಯಾಲೋಕದ ರಹಸ್ಯಗಳನ್ನು ಪೂರ್ತಿ ಯಾಗಿ ಮಾನವನು ಇನ್ನೂ ಅರಿತಿಲ್ಲ ಎಂದೇ ಹೇಳ ಬಹುದು. ಈ ಆಧುನಿಕ ಯುಗದಲ್ಲೂ ಮಿಣುಕು ಹುಳಗಳ ಬದುಕು ಮನುಷ್ಯನಿಗೆ ಒಂದು ವಿಸ್ಮಯ, ರಹಸ್ಯ ಎನಿಸಿದೆ. ಉದಾಹರಣೆಗೆ, ಮಿಣುಕು ಹುಳ ಗಳು ಒಂದಿಷ್ಟೂ ಬಿಸಿಯನ್ನು ತೋರದೆ, ಬೆಳಕನ್ನು ತಮ್ಮ ದೇಹದಲ್ಲಿ ಉತ್ಪತ್ತಿ ಮಾಡುವುದು ಹೇಗೆ ಎಂಬ ರಹಸ್ಯವನ್ನು ನಮ್ಮ ವಿಜ್ಞಾನವಿನ್ನೂ ಪೂರ್ತಿಯಾಗಿ
ಭೇದಿಸಿಲ್ಲ.

ನಮ್ಮ ಹಳ್ಳಿಮನೆಯ ಅನತಿ ದೂರದಲ್ಲಿ, ಆ ರಾತ್ರಿ ಬೆಳಕಿನ ಪರಿಷೆಯನ್ನು ನಡೆಸಿದ ಮಿಣುಕು ಹುಳ ಗಳು, ಒಂದೊಂದಾಗಿ ಹಾರಾಡುತ್ತಾ ಚದುರಿದವು
ಎಂದೆನಲ್ಲ, ಅವು ಪುನಃ ಮರುದಿನವೂ ಅದೇ ಮರದಲ್ಲಿ ಬೆಳಕಿನ ಸಭೆಯನ್ನು ನಡೆಸುತ್ತವೆಯೇ ಎಂದು ನೀವು ಕೇಳಬಹುದು. ಮಳೆಗಾಲದ ಮೊದಲ
ಕೆಲವು ವಾರಗಳಲ್ಲಿ, ಒಂದೊಂದು ದಿನ ಮಾತ್ರ ಈ ರೀತಿಯ ಬೆಳಕಿನ ಸಭೆ, ಅಂದರೆ, ಒಂದೇ ಮರದಲ್ಲಿ ಸಾವಿರಾರು ಮಿಣುಕು ಹುಳಗಳು ಸೇರಿ, ಬೆಳಕನ್ನು ಒಮ್ಮೆಗೇ ಉತ್ಪತ್ತಿ ಮಾಡುವ ಚಟುವಟಿಕೆಯನ್ನು ನಡೆಸುತ್ತವೆ. ಮಳೆಗಾಲ ಮುಂದುವರಿದಂತೆ, ಅಂದರೆ, ಮಳೆ ಬೀಳುವುದು ಆರಂಭವಾಗಿ
ನಾಲ್ಕಾರು ವಾರಗಳ ನಂತರ, ಅವುಗಳ ಬೆಳಕಿನ ಸಭೆ ನಡೆಸುವುದಿಲ್ಲ.

ಬದಲಿಗೆ, ತಮ್ಮ ಬಾಲದಂಥ ಭಾಗದಲ್ಲಿ ಬೆಳಕನ್ನು ಉತ್ಪಾದಿಸುತ್ತ, ಹಾರಾಡುತ್ತಾ ಇರುತ್ತವೆ. ಈ ರೀತಿ ಹಾರಾಡುವಾಗ, ಒಮ್ಮೊಮ್ಮೆ ಮನೆಯೊಳಗೂ ಬರುವುದುಂಟು. ಮನೆಯೊಳಗೆ ಬರುವ ಮಿಣುಕು ಹುಳಗಳು, ಆ ಮನೆಯಲ್ಲಿ ಹಿಂದೆ ವಾಸವಾಗಿದ್ದ ಹಿರಿಯರ ಆತ್ಮ ಎಂದೂ ತಿಳಿಯುವುದುಂಟು. ಮನುಷ್ಯನ ಬೆರಗಿಗೆ ಗ್ರಾಸ ವಾದ ಮಿಣುಕು ಹುಳಗಳ ಮಾಯಾಲೋಕವು, ಪುರಾತನ ಕಾಲದಿಂದಲೂ ಮಾನವ ಸಂಸ್ಕೃತಿಯ ಭಾಗವಾಗಿರುವುದನ್ನು ಜಗತ್ತಿನ ಬೇರೆ ಬೇರೆ ಕಡೆ ಗುರುತಿಸಿದ್ದಾರೆ.

ಜಗತ್ತಿನಲ್ಲಿ ಸುಮಾರು ೨೨೦೦ ಮಿಣುಕು ಹುಳಗಳ ಪ್ರಭೇದಗಳನ್ನು ಗುರುತಿಸಿದ್ದಾರೆ. ನಮ್ಮ ದೇಶದಲ್ಲಿ ಸುಮಾರು ೫೦ ಪ್ರಭೇದದ ಮಿಣುಕು ಹುಳಗಳಿವೆ.
ವಿಶೇಷವೆಂದರೆ, ನಾನು ಈಗ ತಾನೆ ಬೆರಗಿನಿಂದ ಹೇಳಿದ ಮಿಣುಕು ಹುಳಗಳ ಪರಿಷೆಯನ್ನು ನಡೆಸುವವು, ಗಂಡು ಮಿಣುಕು ಹುಳಗಳು. ಹೆಣ್ಣು ಮಿಣುಕು ಹುಳಗಳು, ನೆಲದ ಮೇಲೆ ತೆವಳುವ ಸಹಸ್ರಪದಿಗಳನ್ನು ಹೋಲುತ್ತವೆ ಮತ್ತು ಅವು ಕೂಡ ಬೆಳಕನ್ನು ಬೀರುತ್ತವೆ. ಗಂಡು ಹುಳಗಳು ಮಿಣುಕು ಮಿಣುಕು ಎಂದು ಬೆಳಕು ಮಾಡಿದರೆ, ಹೆಣ್ಣು ಹುಳಗಳು ನಿರಂತರ ಬೆಳಕನ್ನು ಬೀರುವುದುಂಟು.

ಬಯೋಲ್ಯೂಮಿನೆಸೆನ್ಸ್ ಎಂಬ ಪ್ರಕ್ರಿಯೆಯ ಮೂಲಕ ಮಿಣುಕು ಹುಳಗಳು ತಮ್ಮ ದೇಹದಲ್ಲಿ ಬೆಳಕನ್ನು ಉಂಟು ಮಾಡುತ್ತವೆ ಎನ್ನಬಹುದು. ಇಷ್ಟು ಹೇಳಿದ ಮಾತ್ರಕ್ಕೆ, ಏನನ್ನೂ ಹೇಳಿದಂತಾಗುವುದಿಲ್ಲ. ಏಕೆಂದರೆ, ಈ ರೀತಿ ಬೆಳಕನ್ನು ಉಂಟು ಮಾಡುವ ಸಾವಿರಾರು ಪ್ರಭೇದದ ಜೀವಿಗಳು ಈ
ಜಗತ್ತಿನಲ್ಲಿವೆ; ಕೆಲವು ಪ್ರಭೇದದ ಮೀನುಗಳು ಸಹ ಬೆಳಕನ್ನು ಬೀರುವುದುಂಟು. ಅಷ್ಟೇಕೆ, ಕೊಳೆತು ಕುಂಬಾದ ಮರದ ಮೇಲೆ ಬೆಳೆಯುವ ಕೆಲವು
ಅಣಬೆಗಳು ಸಹ ರಾತ್ರಿಹೊತ್ತಿನಲ್ಲಿ ಬೆಳಗುತ್ತವೆ- ಇಡೀ ಮರದ ತುಂಬಾ ಬೆಳೆದ ಅಣಬೆಗಳು ಕತ್ತಲಿನಲ್ಲಿ ಹೊಳೆಯುವುದನ್ನು ಕಂಡು, ಹಿಂದಿನ ಕಾಲ
ದಲ್ಲಿ ಅದನ್ನೊಂದು ಕೊಳ್ಳಿದೆವ್ವ ಎಂದು ಮನುಷ್ಯ ತಿಳಿದಿದ್ದರೂ ಇರಬಹುದು!

ನಮ್ಮ ಹಳ್ಳಿಯ ಗದ್ದೆ ಬಯಲಿನ ಅಂಚಿನಲ್ಲಿ, ತನ್ನಷ್ಟಕ್ಕೆ ಬೆಳೆದ ಕಾಡುಮರವೊಂದರ ಮೇಲೆ ನಡೆಯುತ್ತಿದ್ದ ಮಿಣುಕು ಹುಳಗಳ ಬೆಳಕಿನ ಪರಿಷೆ
ಯನ್ನು ನಾನಿಲ್ಲಿ ವಿವರಿಸಿದ್ದು, ಅದನ್ನು ಬಾಲ್ಯದಲ್ಲಿ ಕಂಡ ನೆನಪಿನ ಮೇಲೆ. ಆಗಿನ ದಿನಗಳಲ್ಲಿ, ನಮ್ಮ ಹಳ್ಳಿಯಲ್ಲಿ ಸಹಸ್ರ ಸಹಸ್ರ ಸಂಖ್ಯೆಯಲ್ಲಿ ಮಿಣುಕು ಹುಳಗಳಿದ್ದವು. ಜೂನ್-ಜುಲೈನಲ್ಲಿ ಈ ರೀತಿ ಬೆಳಕಿನ ಪರಿಷೆ ನಡೆಸಿದ ನಂತರವೂ, ನವೆಂಬರ್ -ಡಿಸೆಂಬರ್ ತಿಂಗಳುಗಳಲ್ಲೂ ಅವು ಅಲ್ಲಲ್ಲಿ
ಏಕಾಂಗಿಯಾಗಿ ಹಾರಾಡುವುದನ್ನು ಕಾಣಬಹುದಿತ್ತು. ಆದರೆ, ಈಚಿನ ದಶಕಗಳಲ್ಲಿ, ಮಿಣುಕು ಹುಳ ಗಳ ಸಂತತಿಯ ಮೇಲೆ ಮನುಷ್ಯನ ಜೀವನ
ಪದ್ಧತಿಯ ಹಸ್ತಕ್ಷೇಪವುಂಟಾಗಿ, ಅವುಗಳ ಸಂತತಿಯು ಕ್ಷೀಣಿಸುತ್ತಿದೆ ಎಂದು ಜಗತ್ತಿನ ವಿವಿಧ ಭಾಗಗಳ ವೈಜ್ಞಾನಿಕ ಅಧ್ಯಯನವು ಹೇಳಿದೆ.

ಮುಖ್ಯವಾಗಿ, ಕೀಟನಾಶಕಗಳ ಬಳಕೆಯಿಂದಾಗಿ, ಮಿಣುಕು ಹುಳಗಳು ಕೆಲವು ಪ್ರದೇಶಗಳಲ್ಲಿ ಅಪಾಯಕ್ಕೆ ಸಿಲುಕಿವೆ ಎಂದಿದ್ದಾರೆ. ನಮ್ಮೂರಿನಲ್ಲೂ
ಈಚಿನ ದಶಕಗಳಲ್ಲಿ, ಗದ್ದೆ ಮತ್ತು ಅಡಕೆಯಂಥ ಬೆಳೆಗಳಿಗೆ ವಿವಿಧ ರೀತಿಯ ಕೀಟನಾಶಕಗಳನ್ನು ಸಿಂಪಡಿಸುವ ಪದ್ಧತಿಯು ಸಾರ್ವತ್ರಿಕವಾಗಿರುವುದ
ರಿಂದ, ಸಹಜವಾಗಿ ಮತ್ತು ಅವಶ್ಯವಾಗಿ ಅದು ಮಿಣುಕು ಹುಳಗಳ ಬದುಕಿನ ಮೇಲೆ, ಜೀವನ ಚಕ್ರದ ಮೇಲೆ ದುಷ್ಪರಿಣಾಮವನ್ನು ಬೀರಿರಲೇ
ಬೇಕು. ಆದರೆ, ಕೀಟನಾಶಕಗಳಿಂದಾಗಿ ಮಿಣುಕು ಹುಳಗಳ ಸಂತತಿ ಅಪಾಯಕ್ಕೆ ಸಿಲುಕಿರುವ ಕುರಿತಾಗಿ ನಮ್ಮ ರಾಜ್ಯದಲ್ಲಿ ಅಧ್ಯಯನ ನಡೆದ ವಿವರಗಳು
ಹೆಚ್ಚು ಪ್ರಚುರಗೊಂಡಿಲ್ಲ.

ನಮ್ಮ ದೇಶದ ಹಲವು ಕಡೆ ಮಿಣುಕು ಹುಳಗಳ ಸಂತತಿ ಇದೆ. ಮುಖ್ಯವಾಗಿ ಹೆಚ್ಚು ಗಿಡಮರಗಳಿರುವ ಸಹ್ಯಾದ್ರಿಯ ಕಾಡುಗಳಲ್ಲಿ, ಹಿಮಾಲಯದ
ಕಾಡಿನಲ್ಲಿ, ಕಾಡಿನಂಚಿನ ಹಳ್ಳಿಗಳಲ್ಲಿ ಇವುಗಳನ್ನು ಕಾಣಬಹುದು. ಮಹಾರಾಷ್ಟ್ರದಲ್ಲಿ ೨೦೨೩ರಲ್ಲಿ ಮಿಣುಕು ಹುಳಗಳನ್ನು ವೀಕ್ಷಿಸುವ ಪ್ರವಾಸ ಮತ್ತು ಚಾರಣದ ಚಟುವಟಿಕೆ ನಡೆದ ವರದಿಯಾಗಿದೆ; ಅಮೆರಿಕ ಮೊದಲಾದ ಮುಂದುವರಿದ ದೇಶಗಳಲ್ಲಿ ಮಿಣುಕು ಹುಳಗಳ ವೀಕ್ಷಣೆಯು ಒಂದು ಪ್ರಮುಖ ಪ್ರವಾಸ ಚಟುವಟಿಕೆಯಾಗಿ ಮತ್ತು ವಿದ್ಯಾರ್ಥಿಗಳ ಅಧ್ಯಯನದ ವಿಷಯವಾಗಿಯೂ ಪ್ರಚಾರದಲ್ಲಿದೆ. ಅಂಥದ್ದೇ ಚಟುವಟಿಕೆಯನ್ನು ನಮ್ಮ ದೇಶದಲ್ಲೂ ಈಚಿನ ವರ್ಷಗಳಲ್ಲಿ ನಡೆಸುವ ಪ್ರಯತ್ನಗಳು ಅಲ್ಲಲ್ಲಿ ನಡೆದಿರುವುದನ್ನು ಕಾಣಬಹುದು.

ಆದರೆ, ಇಂಥ ಚಟುವಟಿಕೆಗಳಿಂದಲೂ ಮಿಣುಕು ಹುಳಗಳ ಜೀವನಪದ್ಧತಿಗೆ ತೊಂದರೆಯಾಗಬಹುದೆಂದು ಪರಿಸರ ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ. ಪರಸ್ಪರ ಬೆಳಕಿನ ಸಂಭಾಷಣೆಯ ಮೂಲಕ ಸಂತಾನೋತ್ಪತ್ತಿಗೆ ಸಂಗಾತಿಯನ್ನು ಹುಡುಕುವ ಮಿಣುಕು ಹುಳಗಳಿಗೆ, ಟಾರ್ಚ್ ಬೆಳಕು, ಹೋಂಸ್ಟೇಗಳ ಪ್ರಖರ ಬೆಳಕು ಗೊಂದಲ ಉಂಟುಮಾಡಲೂಬಹುದು ಎಂಬ ಕಳವಳವನ್ನು ಸಹ ವ್ಯಕ್ತಪಡಿಸಲಾಗಿದೆ. ಸಾವಿರಾರು ಮಿಣುಕು ಹುಳಗಳು ಒಂದೆಡೆ ಸೇರಿ ಮಳೆಗಾಲದಲ್ಲಿ ನಡೆಸುವ ಬೆಳಕಿನ ಪರಿಷೆಯನ್ನು ನೋಡಲು ಬಯಸುವವರು, ಬಹುಶಃ ಇದನ್ನು ಸಹ ನೆನಪಿನಲ್ಲಿಟ್ಟುಕೊಳ್ಳಬೇಕಾದೀತು.

ನಮ್ಮ ರಾಜ್ಯದ ಮಟ್ಟಿಗೆ ಹೇಳುವುದಾದರೆ, ಹೆಚ್ಚು ಮರಗಿಡಗಳಿರುವ ಎಲ್ಲಾ ಊರುಗಳಲ್ಲೂ ಮಿಣುಕು ಹುಳಗಳನ್ನು ಕಾಣಬಹುದು. ಬೆಂಗಳೂರು ನಗರದ ಅಂಚಿನಲ್ಲಿರುವ ಕೆಂಗೇರಿಯಂಥ ಪ್ರದೇಶಗಳಲ್ಲೂ ಮಿಣುಕು ಹುಳಗಳನ್ನು ಈ ಲೇಖಕ ಕಂಡಿದ್ದಾನೆ. ನಿಮ್ಮೂರಿನಲ್ಲೂ ಮಿಣುಕು ಹುಳಗಳಿರ ಬಹುದು; ಕತ್ತಲ ರಾತ್ರಿಯಲ್ಲಿ ಆ ವಿಶಿಷ್ಟ ಕೀಟಗಳನ್ನು ಗುರುತಿ ಸುವ ಪ್ರಯತ್ನ ಮಾಡಿ, ನಿಸರ್ಗದ ವಿಸ್ಮಯಕಾರಿ ಬೆಳಕಿನ ಕಾವ್ಯಕ್ಕೆ ಸಾಕ್ಷಿಯಾಗಿ!