ಮುಂಬೈ: ದೀಪಾವಳಿ (Deepavali) ಪ್ರಯುಕ್ತ ಬಾಲಿವುಡ್‌ನ ಬಹು ನಿರೀಕ್ಷಿತ, ಬಹು ತಾರಾಗಣದ ‘ಸಿಂಗಂ ಅಗೈನ್‌’ (Singham Again) ಚಿತ್ರ ಇಂದು (ನ. 1) ತೆರೆಕಂಡಿದೆ. ಟ್ರೈಲರ್‌ನಿಂದಲೇ ಗಮನ ಸೆಳೆದ ಈ ಚಿತ್ರಕ್ಕೆ ರೋಹಿತ್‌ ಶೆಟ್ಟಿ (Rohit Shetty) ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ‘ರಾಮಾಯಣ’ಕ್ಕೆ ಆಧುನಿಕ ಸ್ಪರ್ಶ ನೀಡಿ ರೋಹಿತ್‌ ಶೆಟ್ಟಿ ಈ ಸಿನಿಮಾವನ್ನು ಕಟ್ಟಿಕೊಟ್ಟ ರೀತಿಗೆ ಪ್ರೇಕ್ಷಕರು ಜೈ ಎಂದಿದ್ದಾರೆ. ಅಜಯ್‌ ದೇವಗನ್‌, ಅಕ್ಷಯ್‌ ಕುಮಾರ್, ರಣವೀರ್‌ ಸಿಂಗ್‌, ದೀಪಿಕಾ ಪಡುಕೋಣೆ, ಕರೀನಾ ಕಪೂರ್‌, ಟೈಗರ್‌ ಶ್ರಾಪ್‌, ಅರ್ಜುನ್‌ ಕಪೂರ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿರುವ, ಸಲ್ಮಾನ್‌ ಖಾನ್‌ ಅತಿಥಿಯಾಗಿ ಕಾಣಿಸಿಕೊಂಡಿರುವ ಈ ಚಿತ್ರ ಹೇಗಿದೆ? ಇಲ್ಲಿದೆ ವಿವರ.
ಮಹಾಕಾವ್ಯ ರಾಮಾಯಣ ಎಂದಿಗೂ ಅಜರಾಮರ. ಇದರಲ್ಲಿನ ಸಂದೇಶ ಎಲ್ಲ ಕಾಲಕ್ಕೂ ಪ್ರಸ್ತುತ ಎನಿಸಿಕೊಳ್ಳುತ್ತದೆ. ಇದೇ ಎಳೆಯನ್ನು ಇಟ್ಟುಕೊಂಡು ರೋಹಿತ್‌ ಶೆಟ್ಟಿ ತಮ್ಮ ಕಾಪ್ ಯೂನಿವರ್ಸ್‌ ಸರಣಿಯ 5ನೇ ಚಿತ್ರವಾಗಿ ಇದನ್ನು ತೆರೆಗೆ ತಂದಿದ್ದಾರೆ. ಭರ್ಜರಿ ಆ್ಯಕ್ಷನ್‌ ದೃಶ್ಯಕ್ಕೆ ಅಭಿಮಾನಿಗಳಿಂದ ಭರಪೂರ ಮೆಚ್ಚುಗೆ ವ್ಯಕ್ತವಾಗಿದೆ.
ಕಥೆ ಏನು?
ಸಿಂಗಂ ಆಲಿಯಾಸ್‌ ಅಜಯ್‌ ದೇವಗನ್‌ ರಾಮನ ಪಾತ್ರದಲ್ಲಿ ಕಾಣಿಸಿಕೊಂಡರೆ ಅವರ ಪತ್ನಿ ಅನ್ವಿ ಕಾಮತ್‌ ಆಲಿಯಾಸ್‌ ಸೀತೆ ಪಾತ್ರದಲ್ಲಿ ಕರೀನಾ ಕಪೂರ್‌ ಅಭಿನಯಿಸಿದ್ದಾರೆ. ಅವ್ನಿ ಭಯೋತ್ಪಾದಕ ಡೇಂಜರ್‌ ಲಂಕ/ಝುಬೈರ್‌ ಹಫೀಝ್‌ (ಅರ್ಜುನ್‌ ಕಪೂರ್‌-ರಾವಣ) ಅಪಹರಿಸಿಕೊಂಡು ಹೋಗುತ್ತಾನೆ. ಆಕೆಯನ್ನು ಸುರಕ್ಷಿತವಾಗಿ ಕರೆದುಕೊಂಡು ಬರುವ ಕಥೆಯೇ ʼಸಿಂಗಂ ಎಗೈನ್‌ʼ. ಆಕೆಯನ್ನು ಕಾಪಾಡಲು ಪೊಲೀಸ್‌ ರೂಪದಲ್ಲಿ ಹನುಮಂತ ಅಗಿ ರಣವೀರ್‌ ಸಿಂಗ್‌, ಗರುಡ ಆಗಿ ಅಕ್ಷಯ್‌ ಕುಮಾರ್ ಮತ್ತು ಎಸ್‌ಪಿ ಶಕ್ತಿ ಶೆಟ್ಟಿಯಾಗಿ ದೀಪಿಕಾ ಪಡುಕೋಣೆ ಕೈಜೋಡಿಸುತ್ತಾರೆ. ಟೈಗರ್‌ ಶ್ರಾಫ್‌ ಪಾತ್ರ ರಾಮಾಯಣದ ಲಕ್ಷ್ಮಣನನ್ನು ಹೋಲುತ್ತಾರೆ.
ಕಥೆ ಏನು ಎನ್ನುವುದು ಎಲ್ಲರಿಗೂ ಗೊತ್ತಿರುವಂತಹದ್ದೆ. ಆದರೆ ಅದನ್ನು ರೋಹಿತ್‌ ಶೆಟ್ಟಿ ಪ್ರಸ್ತುಪಡಿಸಿರುವ ರೀತಿ ಗಮನ ಸೆಳೆಯುವಂತಿದೆ. ಪೌರಾಣಿಕ ಕಥೆಯನ್ನು ಆಧುನಿಕ ಜಗತ್ತಿನೊಂದಿಗೆ ಹದವಾಗಿ ಬೆರೆಸಿರುವ ರೀತಿಗೆ ಮೆಚ್ಚುಗೆ ವ್ಯಕ್ತವಾಗಿದೆ. ಇದೇ ವೇಳೆ ಹಿನ್ನೆಲೆ ಸಂಗೀತವೂ ಗಮನ ಸೆಳೆಯುತ್ತದೆ.
ಅಭಿನಯ ಹೇಗಿದೆ?
ಬಾಜಿರಾವ್‌ ಸಿಂಗಂ ಆಗಿ ಅಜಯ್‌ ದೇವಗನ್‌ ಗಮನ ಸೆಳೆಯುತ್ತಾರೆ. ಆ್ಯಕ್ಷನ್‌, ಭಾವನಾತ್ಮಕ ದೃಶ್ಯಗಳಲ್ಲಿ ಮೋಡಿ ಮಾಡುತ್ತಾರೆ. ಅವ್ನಿಯಾಗಿ ಕರೀನಾ ಕಪೂರ್‌ ಪಾತ್ರದಲ್ಲೇ ಜೀವಿಸಿದ್ದಾರೆ. ಎಸಿಪಿ ಸಂಗ್ರಾಮ್‌ ಭಲೆರಾವ್‌ ಆಲಿಯಾಸ್‌ ಸಿಂಬಾ ಆಗಿ ರಣವೀರ್‌ ಸಿಂಗ್‌ ಕೊಟ್ಟ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ. ಚಿಕ್ಕ ಪಾತ್ರವಾದರೂ ಸೂರ್ಯವಂಶಿಯಾಗಿ ಅಕ್ಷಯ್‌ ಕುಮಾರ್ ಇಂಪ್ರೆಸ್‌ ಮಾಡುತ್ತಾರೆ. ಲೇಡಿ ಸಿಂಗಂ ದೀಪಿಕಾ ಪಡುಕೋಣೆ ಶಕ್ತಿ ಶೆಟ್ಟಿಯಾಗಿ ತೆರೆ ಮೇಲೆ ಅಬ್ಬರಿಸಿದ್ದಾರೆ. ಅವರ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಟೈಗರ್‌ ಶ್ರಾಫ್‌ ಕೆಲವೇ ಹೊತ್ತು ತೆರೆಮೇಲೆ ಕಾಣಿಸಿಕೊಳ್ಳುತ್ತಾರೆ. ಅರ್ಜುನ್‌ ಕಪೂರ್‌ ನಿಜಕ್ಕೂ ಅಚ್ಚರಿ ಮೂಡಿಸುತ್ತಾರೆ. ವಿಲನ್‌ ಪಾತ್ರವನ್ನು ಅವರು ಆವಾಹಿಸಿಕೊಂಡಿದ್ದಾರೆ.
ನೋಡುಗರು ಹೇಳಿದ್ದೇನು?
ಚಿತ್ರ ನೋಡಿದ ಬಹುತೇಕರು ಸಾಹಸ ದೃಶ್ಯಗಳಿಗೆ ಮನ ಸೋತಿದ್ದಾರೆ. ʼʼಅಜಯ್‌ ದೇವಗನ್‌ ಮತ್ತು ರೋಹಿತ್‌ ಶೆಟ್ಟಿ ಮತ್ತೊಮ್ಮೆ ಮೋಡಿ ಮಾಡಿದ್ದಾರೆʼʼ ಎಂದು ನೋಡುಗರೊಬ್ಬರು ಹೇಳಿದ್ದಾರೆ. ʼʼಸಾಹಸಭರಿತ ಚಿತ್ರ ಪ್ರೇಮಿ ನೀವಾಗಿದ್ದರೆ ʼಸಿಂಗಂ ಎಗೈನ್‌ʼ ಮಿಸ್‌ ಮಾಡಬೇಡಿʼʼ ಎಂದು ಇನ್ನೊಬ್ಬರು ತಿಳಿಸಿದ್ದಾರೆ. ʼʼಫಸ್ಟ್‌ ಆಫ್‌ ಬೋರ್‌. ಅಕ್ಷಯ್‌ ಕುಮಾರ್ ಎಂಟ್ರಿಯಾದ ಬಳಿಕ ಚಿತ್ರ ಇನ್ನೊಂದು ಹಂತಕ್ಕೆ ಹೋಗುತ್ತದೆʼʼ ಎಂದು ಮತ್ತೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ. ಕೆಲವರು ಚಿತ್ರದಲ್ಲಿ ಹೊಸತನವೇನಿಲ್ಲ. ಅದೇ ರೋಹಿತ್‌ ಶೆಟ್ಟಿ ಅವರ ಸಿದ್ಧ ಸೂತ್ರ ಇಲ್ಲೂ ಮುಂದುವರಿದಿದೆ ಎಂದು ಹಲವರು ತಿಳಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: Singham Again: ‘ಸಿಂಗಂ ಅಗೇನ್’ ಸಿನಿಮಾದ ಮೊದಲ ಹಾಡು ರಿಲೀಸ್‌; ಹನುಮಂತನಾಗಿ ಮಿಂಚು ಹರಿಸಿದ ರಣವೀರ್‌ ಸಿಂಗ್‌
