ಮುಂಬೈ: ದಕ್ಷಿಣ ಭಾರತೀಯ ಚಿತ್ರರಂಗದಲ್ಲಿ ಛಾಪು ಮೂಡಿಸಿದ ರಾಷ್ಟ್ರ ಪ್ರಶಸ್ತಿ ವಿಜೇತ ನಟಿ ಕೀರ್ತಿ ಸುರೇಶ್‌ (Keerthy Suresh) ಇದೀಗ ಭರ್ಜರಿಯಾಗಿಯೇ ಬಾಲಿವುಡ್‌ ಪಾದರ್ಪಣೆ ಮಾಡಿದ್ದು, ವರುಣ್‌ ಧವನ್‌ (Varun Dhawan) ಜತೆ ತೆರೆ ಹಂಚಿಕೊಳ್ಳುತ್ತಿರುವ ʼಬೇಬಿ ಜಾನ್‌ʼ ಸಿನಿಮಾದ ಟೀಸರ್‌ ರಿಲೀಸ್‌ ಆಗಿದೆ (Baby John Taster Cut). ಕಾಲಿವುಡ್‌ ಸೂಪರ್‌ ಸ್ಟಾರ್‌ ವಿಜಯ್‌ (Vijay) ಅಭಿನಯದ ‘ತೆರಿ’ (Theri) ಚಿತ್ರದ ರಿಮೇಕ್‌ ಇದಾಗಿದ್ದು, ಇದುವರೆಗೆ ಕಾಣಿಸದ ಪಾತ್ರದಲ್ಲಿ ವರುಣ್‌ ಧವನ್‌ ಮಿಂಚು ಹರಿಸಿದ್ದಾರೆ. ಸದ್ಯ ರಿಲೀಸ್‌ ಆಗಿರುವ ಟೀಸರ್‌ನಲ್ಲಿ ಭರಪೂರ ಆ್ಯಕ್ಷನ್‌ ದೃಶ್ಯಗಳಿದ್ದು, ನೋಡುಗರ ಗಮನ ಸೆಳೆಯುತ್ತಿದೆ.
ʼಬೇಬಿ ಜಾನ್‌ʼಗೆ ಕಲೀಸ್‌ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ವರುಣ್‌ ಧವನ್‌ ಮಗಳ ಪಾತ್ರ ಮಾಡಿರುವ ಬಾಲ ಕಲಾವಿದೆಯ ಸಂಭಾಷಣೆಯ ಮೂಲಕ ಟೀಸರ್‌ ತೆರೆದುಕೊಳ್ಳುತ್ತದೆ. ತಮ್ಮ ಮೇಲೆ ದಾಳಿ ನಡೆಸಲು ಬರುವ ಗುಂಪನ್ನು ಚದರಿಸುತ್ತ ಪೊಲೀಸ್‌ ವೇಷದಲ್ಲಿ ವರುಣ್‌ ಧವನ್‌ ಎಂಟ್ರಿ ಕೊಡುತ್ತಾರೆ. ಒಂದು ಕಡೆ ಮಗಳಿಗೆ ಒಂದೊಳ್ಳೆ ಅಪ್ಪನಾಗಿ ಅವಳೊಂದಿಗೆ ವರಣ್‌ ಆಟವಾಡುತ್ತಿದ್ದರೆ ಮತ್ತೊಂಡು ಕಡೆ ರೌಡಿಗಳ ಪಡೆಗಳಿಗೆ ಭರ್ಜರಿ ಪಂಜ್‌ ಕೊಡುತ್ತಿರುವುದು ಕಂಡು ಬಂದಿದೆ. ಜತೆಗೆ ಮಾಸ್‌ ಡೈಲಾಗ್‌ಗಳೂ ಗಮನ ಸೆಳೆಯುತ್ತಿವೆ. ʼʼನನಗಿಂತ ಮೊದಲು ಇಲ್ಲಿಗೆ ಅನೇಕ ಮಂದಿ ಬಂದಿರಬಹುದು. ಆದರೆ ನಾನು ಮೊದಲ ಬಾರಿ ಬರುತ್ತಿರುವುದುʼʼ ಮುಂತಾದ ಡೈಲಾಗ್‌ ಟೀಸರ್‌ನ ತೂಕ ಹೆಚ್ಚಿಸಿದೆ. ಈ ಮೂಲಕ ಇದು ಮಾಸ್‌ ಅಂಶಗಳಿರುವ ಕಮರ್ಷಿಯಲ್‌ ಸಿನಿಮಾ ಎನ್ನುವ ಸೂಚನೆ ನೀಡಿದೆ.
VARUN DHAWAN: ‘BABY JOHN’ TASTER CUT IS HERE… 25 DEC RELEASE *CHRISTMAS*… This is hardcore MASSY… #BabyJohnTasterCut hits all the right notes… Am confident, #BabyJohn will be a game-changer for #VarunDhawan.#BabyJohnTasterCut 🔗: https://t.co/1MM8AMYZbH
— taran adarsh (@taran_adarsh) November 4, 2024
In *cinemas*… pic.twitter.com/K7UHHEru8U
ಬಾಲಿವುಡ್‌ಗೆ ಕಾಲಿಟ್ಟ ಕೀರ್ತಿ ಸುರೇಶ್‌
ಕನ್ನಡ ಹೊರತುಪಡಿಸಿ ದಕ್ಷಿಣ ಭಾರತದ ಉಳಿದೆಲ್ಲ ಚಿತ್ರರಂಗದಲ್ಲಿ ಮಿಂಚುತ್ತಿರುವ ಕೀರ್ತಿ ಸುರೇಶ್‌ ಮೊದಲ ಬಾರಿಗೆ ಹಿಂದಿ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವಧುವಿನ ಅಲಂಕಾರದಲ್ಲಿ ಅವರು ಮದುವೆ ಮಂಟಪಕ್ಕೆ ನಡೆದು ಬರುತ್ತಿರುವುದು ಟೀಸರ್‌ನಲ್ಲಿ ಕಂಡು ಬಂದಿದೆ. ಸಹಜಾಭಿನಯದಿಂದಲೇ ಪ್ರೇಕ್ಷಕರ ಗಮನ ಸೆಳೆದ ಅವರು ಬಾಲಿವುಡ್‌ನಲ್ಲೂ ಮೋಡಿ ಮಾಡಲು ಸಜ್ಜಾಗಿದ್ದಾರೆ. ಇದೇ ಮೊದಲ ಬಾರಿಗೆ ಅವರು ʼಬೇಬಿ ಜಾನ್‌ʼ ಚಿತ್ರದ ಮೂಲಕ ಗ್ಲ್ಯಾಮರ್‌ ಅವತಾರ ತಾಳಿದ್ದಾರೆ ಎನ್ನಲಾಗಿದ್ದು, ಈ ಬಗ್ಗೆ ಟೀಸರ್‌ನಲ್ಲಿ ಯಾವುದೇ ಸೂಚನೆ ಸಿಕ್ಕದಿರುವುದು ಅಭಿಮಾನಿಗಳಿಗೆ ಕೊಂಚ ಬೇಸರ ಮೂಡಿಸಿದೆ. ವಾಮಿಕಾ ಗಬ್ಬಿ, ಜಾಕಿ ಶ್ರಾಫ್‌ ಮತ್ತಿತರರು ಚಿತ್ರದ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ.
2016ರಲ್ಲಿ ತೆರೆಕಂಡ ತಮಿಳಿನ ʼತೆರಿʼ ಸಿನಿಮಾವನ್ನು ಅಟ್ಲಿ ನಿರ್ದೇಶಿಸಿದ್ದರು. ಈ ಚಿತ್ರದಲ್ಲಿ ದಳಪತಿ ವಿಜಯ್‌ ಜತೆಗೆ ಸಮಂತಾ ರುತ್‌ಪ್ರಭು, ಆ್ಯಮಿ ಜಾಕ್ಸನ್‌, ನೈನಿಕಾ, ರಾಧಿಕಾ ಶರತ್‌ ಕುಮಾರ್‌ ಮತ್ತಿತರರು ಮುಖ್ಯ ಪಾತ್ರದಲ್ಲಿ ನಟಿಸಿದ್ದರು. ವಿಜಯ್‌ ವೃತ್ತಿ ಬದುಕಿನ ಅತ್ಯಂತ ಯಶಸ್ವಿ ಚಿತ್ರದಲ್ಲಿ ಇದೂ ಒಂದು ಎನಿಸಿಕೊಂಡಿತ್ತು. ಬಾಕ್ಸ್‌ ಆಫೀಸ್‌ನಲ್ಲಿ ಸುಮಾರು 150 ಕೋಟಿ ರೂ. ಗಳಿಸಿತ್ತು. ದಕ್ಷಿಣ ಭಾರತದ ಜನಪ್ರಿಯ ಸಂಗೀತ ನಿರ್ದೇಶಕ ಎಸ್‌.ತಮನ್‌ ಬೇಬಿ ಜಾನ್‌ಗೆ ಮ್ಯೂಸಿಕ್‌ ಒದಗಿಸಿದ್ದಾರೆ. ಸಿನಿಮಾ ಡಿ. 25ರಂದು ವಿಶ್ವಾದ್ಯಂತ ತೆರೆಗೆ ಬರಲಿದೆ.
ಈ ಸುದ್ದಿಯನ್ನೂ ಓದಿ: Keerthy Suresh: ಹೊಂಬಾಳೆ ಫಿಲ್ಮ್ಸ್‌ನ ಮೊದಲ ತಮಿಳು ಚಿತ್ರ ಒಟಿಟಿಗೆ ಲಗ್ಗೆ ಇಡಲು ಸಜ್ಜು; ಕೀರ್ತಿ ಸುರೇಶ್‌ ಸಿನಿಮಾ ಸ್ಟ್ರೀಮಿಂಗ್‌ ಯಾವಾಗ?
