ಮುಂಬೈ: ಸಿನಿ ಪ್ರಿಯರ ಬಹು ದಿನಗಳ ಕಾತುರಕ್ಕೆ ಬ್ರೇಕ್‌ ಹಾಕಿ ಕೊನೆಗೂ ಬಾಲಿವುಡ್‌ನ ಬಹು ನಿರೀಕ್ಷಿತ, ಬಹು ತಾರಾಗಣದ ‘ಸಿಂಗಂ ಅಗೈನ್‌’ (Singham Again) ಚಿತ್ರ ನ. 1ರಂದು ತೆರೆಕಂಡಿದೆ. ರೋಹಿತ್‌ ಶೆಟ್ಟಿ (Rohit Shetty) ಆ್ಯಕ್ಷನ್‌ ಕಟ್‌ ಹೇಳಿರುವ ಈ ಆಧುನಿಕ ‘ರಾಮಾಯಣ’ಕ್ಕೆ ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಹೀಗಾಗಿ ಬಾಕ್ಸ್‌ ಆಫೀಸ್‌ನಲ್ಲಿ ಕಮಾಲ್‌ ಮಾಡಿದೆ. ಅಜಯ್‌ ದೇವಗನ್‌, ಅಕ್ಷಯ್‌ ಕುಮಾರ್‌, ರಣವೀರ್‌ ಸಿಂಗ್‌, ದೀಪಿಕಾ ಪಡುಕೋಣೆ, ಕರೀನಾ ಕಪೂರ್‌, ಟೈಗರ್‌ ಶ್ರಾಪ್‌, ಅರ್ಜುನ್‌ ಕಪೂರ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿರುವ ಈ ಚಿತ್ರದ 4 ದಿನಗಳ ಒಟ್ಟು ಕಲೆಕ್ಷನ್‌ ಎಷ್ಟು ಎನ್ನುವ ವಿವರ ಇಲ್ಲಿದೆ (Singham Again Box Office).
ತೆರೆಕಂಡ ಮೊದಲ ದಿನವೇ ಭಾರತದಲ್ಲಿ ಬರೋಬ್ಬರಿ 43.5 ಕೋಟಿ ರೂ. ಬಾಚಿಕೊಂಡ ʼಸಿಂಗಂ ಎಗೈನ್‌ʼ ಚಿತ್ರದ 4 ದಿನಗಳ ಕಲೆಕ್ಷನ್‌ 130 ಕೋಟಿ ರೂ. ದಾಟಿದೆ. ಚಿತ್ರ ತೆರೆಕಂಡ 4ನೇ ದಿನವಾದ ಸೋಮವಾರ (ನ. 4) ಅಂದಾಜು 16.24 ಕೋಟಿ ರೂ. ಹರಿದು ಬಂದಿದೆ. ಮೊದಲ 3 ದಿನದಲ್ಲೇ 100 ಕೋಟಿ ರೂ. ಕ್ಲಬ್‌ ಸೇರಿದ ಹೆಗ್ಗಳಿಕೆಗೆ ಪಾತ್ರವಾಗಿರುವ ಈ ಸಿನಿಮಾ 2ನೇ ದಿನ 42.5 ಕೋಟಿ ರೂ. ಗಳಿಸಿದೆ. ಇನ್ನು 3ನೇ ದಿನ ನಿರ್ಮಾಪಕರ ಜೇಬಿಗೆ ಸೇರಿದ್ದು 35.75 ಕೋಟಿ ರೂ. ಆ ಮೂಲಕ ಭಾರತದಲ್ಲಿ ಒಟ್ಟು ಕಲೆಕ್ಷನ್‌ 137.99 ಕೋಟಿ ರೂ.. ಇನ್ನು ಜಾಗತಿಕವಾಗಿ 4 ದಿನಗಳಲ್ಲಿ 189 ಕೋಟಿ ರೂ. ಬಾಚಿಕೊಂಡಿದೆ.
Thank you 🙏🏼#SinghamAgain pic.twitter.com/C0x6Y7le7N
— Ajay Devgn (@ajaydevgn) November 4, 2024
ಸಾಲು ಸಾಲು ರಜಾ ದಿನಗಳು ಪ್ಲಸ್‌ ಪಾಯಿಂಟ್‌
ದೀಪಾವಳಿ ಹಬ್ಬದ ಪ್ರಯುಕ್ತ ಸಾಲು ಸಾಲು ರಜಾ ದಿನ ಇದ್ದುದು ಚಿತ್ರತಂಡಕ್ಕೆ ಪ್ಲಸ್‌ ಪಾಯಿಂಟ್‌ ಆಗಿತ್ತು. ಈ ಚಿತ್ರದ ಒಟಿಟಿ ಹಕ್ಕನ್ನು ಅಮೆಜಾನ್‌ ಪ್ರೈಂ ವಿಡಿಯೊ ಬರೋಬ್ಬರಿ 130 ಕೋಟಿ ರೂ.ಗೆ ಪಡೆದುಕೊಂಡಿದೆ. ಡಿಸೆಂಬರ್‌ ಅಂತ್ಯಕ್ಕೆ ಇದು ಸ್ಟ್ರೀಮಿಂಗ್‌ ಆಗಲಿದೆ ಎನ್ನಲಾಗುತ್ತದೆ. ಈ ಬಹು ತಾರಾಗಣದ ಚಿತ್ರ ಬರೋಬ್ಬರಿ 350 ಕೋಟಿ ರೂ. ವೆಚ್ಚದಲ್ಲಿ ತಯಾರಾಗಿದೆ.
‘ಭೂಲ್ ಭುಲಯ್ಯ 3’ ಚಿತ್ರದ ಕಲೆಕ್ಷನ್‌ ಹೇಗಿದೆ?
ನ. 1ರಂದೇ ತೆರೆಕಂಡ ಮತ್ತೊಂದು ಬಾಲಿವುಡ್‌ ಚಿತ್ರ ‘ಭೂಲ್ ಭುಲಯ್ಯ 3’ ಕೂಡ ಬಾಕ್ಸ್‌ ಅಫೀಸ್‌ನಲ್ಲಿ ಉತ್ತಮ ಕಲೆಕ್ಷನ್‌ ಮಾಡುತ್ತಿದೆ. ಕಾರ್ತಿಕ್‌ ಆರ್ಯನ್‌, ವಿದ್ಯಾ ಬಾಲನ್‌, ಮಾಧುರಿ ದೀಕ್ಷಿತ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿರುವ ಈ ಚಿತ್ರವನ್ನು ಅನೀಸ್‌ ಬಜ್ಮಿ ನಿರ್ದೇಶಿಸಿದ್ದಾರೆ. ಈ ಚಿತ್ರವೂ ಈಗಾಗಲೇ ಜಾಗತಿಕ ಬಾಕ್ಸ್‌ ಆಫೀಸ್‌ನಲ್ಲಿ 100 ಕೋಟಿ ರೂ. ಕಲೆಕ್ಷನ್‌ ಮಾಡಿದೆ. 4ನೇ ದಿನವಾದ ಸೋಮವಾರ 17.5 ಕೋಟಿ ರೂ. ಗಳಿಸಿದ ಚಿತ್ರದ ಒಟ್ಟು ಕಲೆಕ್ಷನ್‌ ಭಾರತದಲ್ಲಿ 123.5 ಕೋಟಿ ರೂ. ಜಾಗತಿಕವಾಗಿ 166 ಕೋಟಿ ರೂ. ತನ್ನದಾಗಿಸಿಕೊಂಡಿದೆ ಎನ್ನಲಾಗಿದೆ. ಈ ಚಿತ್ರದ ಬಜೆಟ್‌ 150 ಕೋಟಿ ರೂ.
ಈ ಸುದ್ದಿಯನ್ನೂ ಓದಿ: Singham Again Review: ತೆರೆ ಮೇಲೆ ಮತ್ತೊಮ್ಮೆ ಸಿಂಗಂ ಆಗಿ ಅಬ್ಬರಿಸಿದ ಅಜಯ್‌ ದೇವಗನ್‌; ‘ಸಿಂಗಂ ಅಗೈನ್‌’ ಚಿತ್ರ ಹೇಗಿದೆ?
