Shiva Rajkumar: ಮತ್ತೊಂದು ತಮಿಳು ಚಿತ್ರದಲ್ಲಿ ಶಿವಣ್ಣ; ದಳಪತಿ ವಿಜಯ್‌ ಕೊನೆಯ ಸಿನಿಮಾದಲ್ಲಿ ನಟನೆ

ಚೆನ್ನೈ: ಕರುನಾಡ ಚಕ್ರವರ್ತಿ ಡಾ. ಶಿವ ರಾಜ್‌ಕುಮಾರ್‌ (Shiva Rajkumar) ಸದ್ಯ ಬ್ಯಾಕ್‌ ಬ್ಯಾಕ್‌ ಟು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಜತೆಗೆ ಅವರು ʼಭೈರತಿ ರಣಗಲ್‌ʼ (Bhairathi Ranagal) ಸಿನಿಮಾದ ಪ್ರಚಾರದಲ್ಲಿ ತೊಡಗಿಸಿಕೊಂಡಿದ್ದಾರೆ. 2017ರಲ್ಲಿ ತೆರೆಕಂಡ ʼಮಫ್ತಿʼ ಚಿತ್ರದ ಪ್ರೀಕ್ವೆಲ್‌ ಆಗಿರುವ ಇದು ಈಗಾಗಲೇ ನಿರೀಕ್ಷೆ ಮೂಡಿಸಿದೆ. ಟ್ರೈಲರ್‌ ಮೂಲಕವೇ ಸಿನಿಪ್ರಿಯರ ಗಮನ ಸೆಳೆದ ʼಭೈರತಿ ರಣಗಲ್‌ʼ ನ. 15ರಂದು ತೆರೆಗೆ ಬರಲಿದೆ. ಈ ಮಧ್ಯೆ ಶಿವಣ್ಣ ತಮಿಳಿನ ಬಹು ದೊಡ್ಡ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ.

ಕಾಲಿವುಡ್‌ ಸೂಪರ್‌ ಸ್ಟಾರ್‌ ದಳಪತಿ ವಿಜಯ್‌ ವೆಟ್ರಿ ಕಝಗಂ ಪಾರ್ಟಿ (Vettri Kazhagam party) ಎಂಬ ಪಕ್ಷ ಹುಟ್ಟುಹಾಕಿ ಸಕ್ರಿಯ ರಾಜಕಾರಣಕ್ಕೆ ಧುಮುಕಿದ್ದಾರೆ. 2026ರಲ್ಲಿತಮಿಳುನಾಡಿನಲ್ಲಿ ನಡೆಯುವ ವಿಧಾನಸಭಾ ಚುನಾವಣೆಯಲ್ಲಿ ಅವರ ಪಕ್ಷ ಸ್ಪರ್ಧಿಸಲಿದೆ. ಹೀಗಾಗಿ ಅವರು ಸಿನಿಮಾರಂಗ ತೊರೆಯಲು ಸಜ್ಜಾಗಿದ್ದಾರೆ. ಸದ್ಯ ಅವರ ಕೊನೆಯ ಚಿತ್ರದ ಶೂಟಿಂಗ್‌ ನಡೆಯುತ್ತಿದೆ. ಈ ಚಿತ್ರಕ್ಕೆ ತಾತ್ಕಾಲಿಕವಾಗಿ ʼದಳಪತಿ 69ʼ (Thalapathy 69) ಎನ್ನುವ ಟೈಟಲ್‌ ಇದಲಾಗಿದೆ. ಎಚ್‌. ವಿನೋದ್‌ ನಿರ್ದೇಶನದ ಈ ಚಿತ್ರವನ್ನು ಬೆಂಗಳೂರು ಮೂಲದ ಕೆವಿಎನ್‌ ಪ್ರೊಡಕ್ಷನ್ಸ್‌ ಅದ್ಧೂರಿಯಾಗಿ ನಿರ್ಮಿಸುತ್ತಿದೆ. ಈ ಚಿತ್ರದಲ್ಲಿ ಶಿವ ರಾಜ್‌ಕುಮಾರ್‌ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.

#DrShivarajKumar is playing a beautiful character in #Thalapathy69
Vijay is a fantastic actor, good human being. The ambition he has is fantastic. I respect him for that 💥 pic.twitter.com/wVTmITK9I0

— Sumi (@sumitmikm) November 12, 2024

ಶಿವಣ್ಣ ಹೇಳಿದ್ದೇನು?

ಈ ಬಗ್ಗೆ ಸ್ವತಃ ಶಿವಣ್ಣ ಅವರೇ ಮಾತನಾಡಿದ್ದಾರೆ. ʼʼವಿಜಯ್‌ ಅವರ ಮುಂದಿನ ತಮಿಳು ಚಿತ್ರದಲ್ಲಿ ನಟಿಸಲಿದ್ದೇನೆ. ಅದೊಂದು ಸುಂದರ ಪಾತ್ರ. ವಿಜಯ್‌ ಒಬ್ಬ ಅದ್ಭುತ ನಟ. ಇದು ಅವರ ಕೊನೆಯ ಚಿತ್ರವೆಂದು ಹೇಳಲಾಗುತ್ತಿದೆ. ಆದರೆ ಅವರು ಚಿತ್ರರಂಗ ತೊರೆಯಬಾರದು ಎಂದು ನಾನು ಸಲಹೆ ನೀಡುತ್ತೇನೆ. ಅವರು ಉತ್ತಮ ನಟ ಮಾತ್ರವಲ್ಲ ಒಳ್ಳೆಯ ವ್ಯಕ್ತಿ ಕೂಡ ಹೌದು. ಅವರ ಚಿತ್ರದ ಭಾಗವಾಗಲು ಬಯಸುತ್ತೇನೆʼʼ ಎಂದು ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.

ಸದ್ಯ ಶಿವಣ್ಣ ಹಲವು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಜತೆಗೆ ಚಿಕಿತ್ಸೆಗಾಗಿ ಅಮೆರಿಕಕ್ಕೆ ತೆರಳಲು ಸಜ್ಜಾಗಿದ್ದಾರೆ. ಹೀಗಾಗಿ ಅವರು ʼದಳಪತಿ 69ʼ ನಟಿಸಲು ಸಾಧ್ಯವೆ? ಎನ್ನುವ ಬಗ್ಗೆಯೂ ಪ್ರಶ್ನೆ ಮೂಡಿದೆ. ಚಿತ್ರತಂಡದ ಡೇಟ್‌ ಮತ್ತು ನನ್ನ ಡೇಟ್‌ ಹೊಂದಾಣಿಕೆಯಾದರೆ ಖಂಡಿತವಾಗಿಯೂ ಈ ಸಿನಿಮಾ ಮಾಡುವುದಾಗಿ ಅವರು ಭರವಸೆ ನೀಡಿದ್ದಾರೆ.

ಬಹುತಾರಾಗಣ

ಬಹುತಾರಾಗಣದ ಕಾರಣಕ್ಕೆ ʼದಳಪತಿ 69ʼ ಈಗಾಗಲೇ ಅಕುತೂಹಲ ಕೆರಳಿಸಿದೆ. ವಿಜಯ್‌ಗೆ ನಾಯಕಿಯಾಗಿ ಪೂಜಾ ಹೆಗ್ಡೆ ಮತ್ತೊಮ್ಮೆ ಕಾಣಿಸಿಕೊಳ್ಳುತ್ತಿದ್ದಾರೆ. ಜತೆಗೆ ಮಮಿತಾ ಬೈಜು, ಪ್ರಿಯಾಮಣಿ, ಬಾಬ್ಬಿ ಡಿಯೋಲ್‌, ಪ್ರಕಾಶ್‌ ರಾಜ್‌, ಗೌತಮ್‌ ವಾಸುದೇವ್‌ ಮೆನನ್‌, ನರೇನ್‌ ಮತ್ತಿತರರು ನಟಿಸಿದ್ದಾರೆ. ಸದ್ಯ ಚಿತ್ರೀಕರಣ ನಡೆಯುತ್ತಿದೆ.

ಶಿವಣ್ಣ ಅವರ ಸದ್ಯದ ಪ್ರಾಜೆಕ್ಟ್‌

ಪ್ರಸ್ತುತ ಶಿವ ರಾಜ್‌ಕುಮಾರ್‌ ʼಉತ್ತರಾಕಾಂಡʼ, ʼ45ʼ, ʼಭೈರವನ ಕೊನೆ ಪಾಠʼ, ʼಆರ್‌ಸಿ 16ʼ ಮುಂತಾದ ಚಿತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಜತೆಗೆ ಚಿಕಿತ್ಸೆಗಾಗಿ ಒಂದಷ್ಟು ದಿನ ಬ್ರೇಕ್‌ ತೆಗೆದುಕೊಳ್ಳಲಿದ್ದಾರೆ. ಹೀಗಾಗಿ ಈ ಸಿನಿಮಾಗಳ ಜತೆಗೆ ಸಮಯ ಹೊಂದಿಸಿಕೊಂಡು ʼದಳಪತಿ 69ʼ ಚಿತ್ರ ಕೈಗೆತ್ತಿಕೊಳ್ಳಬೇಕಿದೆ. 2023ರಲ್ಲಿ ತೆರೆಕಂಡ ತಮಿಳಿನ ʼಜೈಲರ್‌ʼ ಚಿತ್ರದಲ್ಲಿನ ಪಾತ್ರದ ಮೂಲಕ ಶಿವಣ್ಣ ಅಲ್ಲಿನ ಪ್ರೇಕ್ಷಕರ ಗಮನ ಸೆಳೆದಿದ್ದರು. ರಜನಿಕಾಂತ್‌ ನಟನೆಯ ಈ ಸಿನಿಮಾದಲ್ಲಿ ಶಿವಣ್ಣ ಅತಿಥಿ ಪಾತ್ರ ಮಾಡಿದ್ದರೂ ಸಿನಿ ರಸಿಕರ ಮೆಚ್ಚುಗೆ ಪಡೆದಿದ್ದರು.

ಈ ಸುದ್ದಿಯನ್ನೂ ಓದಿ: Bhairathi Ranagal Movie: ಶಿವಣ್ಣ ಅಭಿಮಾನಿಗಳನ್ನು ರಂಜಿಸಿದ ‘ಭೈರತಿ ರಣಗಲ್ʼ ಚಿತ್ರದ ಪ್ರೀ-ರಿಲೀಸ್ ಇವೆಂಟ್!