Kanguva Box Office Collection: ಬಾಕ್ಸ್‌ ಆಫೀಸ್‌ನಲ್ಲಿ ಮ್ಯಾಜಿಕ್‌ ಮಾಡದ ʼಕಂಗುವʼ; ಸೂರ್ಯ ಅಭಿನಯದ ಚಿತ್ರ ಡಲ್‌ ಆಗಿದ್ದೇಕೆ?

ಚೆನ್ನೈ: ಹಲವು ಕಾರಣಗಳಿಂದ ಗಮನ ಸೆಳೆದಿದ್ದ ತಮಿಳು ಸೂಪರ್‌ ಸ್ಟಾರ್‌ ಸೂರ್ಯ (Suriya)  ಅಭಿನಯದ ʼಕಂಗುವʼ (Kanguva) ಚಿತ್ರ ಕೊನೆಗೂ ತೆರೆ ಕಂಡಿದೆ. ಹಲವು ಕಾರಣಗಳಿಂದ ಬಿಡುಗಡೆ ಮುಂದೂಡಲ್ಪಟ್ಟ ಸಿನಿಮಾ ನ. 14ರಂದು ವಿಶ್ವಾದ್ಯಂತ ವಿವಿಧ ಭಾಷೆಗಳಲ್ಲಿ ರಿಲೀಸ್‌ ಆಗಿದೆ. ಈ ಫ್ಯಾಂಟಸಿ, ಆ್ಯಕ್ಷನ್‌ ಚಿತ್ರವನ್ನು ಶಿವ (Siva) ನಿರ್ದೇಶಿಸಿದ್ದು, ಪ್ರೇಕ್ಷಕರಿಂದ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಪರಿಣಾಮ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಕುಂಟುತ್ತಾ ಸಾಗಿದೆ. ಗಮನ ಸೆಳೆಯದ ಚಿತ್ರಕಥೆ, ಕಿರಿಕಿರಿ ಎನಿಸುವ ಸೌಂಡ್‌ ಎಫೆಕ್ಟ್‌ ಮುಂತಾದ ಕಾರಣಗಳಿಂದ ʼಕಂಗುವʼ ನೋಡುಗರ ಅಸಮಾಧಾನಕ್ಕೆ ತುತ್ತಾಗಿದೆ. ಹೀಗಾಗಿ ಬಿಗ್‌ ಬಜೆಟ್‌ನ ಈ ಚಿತ್ರ ಹೀನಾಯವಾಗಿ ಸೋಲಲಿದೆ ಎಂದು ತಜ್ಞರು ಭವಿಷ್ಯ ನುಡಿದಿದ್ದಾರೆ. ಹಾಗಾದರೆ ಚಿತ್ರ 2 ದಿನಗಳಲ್ಲಿ ಗಳಿಸಿದ್ದೆಷ್ಟು ಎನ್ನುವ ವಿವರ ಇಲ್ಲಿದೆ (Kanguva Box Office Collection).

ʼಕಂಗುವʼ ಚಿತ್ರದ ಕಥೆ 2 ಕಾಲಘಟ್ಟದಲ್ಲಿ ನಡೆಯುತ್ತಿದೆ. ಕಂಗುವ ಮತ್ತು ಫ್ರಾನ್ಸಿಸ್‌ ಎನ್ನುವ 2 ತದ್ವಿರುದ್ಧ ಪಾತ್ರದಲ್ಲಿ ಸೂರ್ಯ ಗಮನ ಸೆಳೆದಿದ್ದಾರೆ. ಮೈ ನವಿರೇಳಿಸುವ ಸಾಹಸ, ಕುತೂಹಲ ಭರಿತ ಕಥೆಯ ಹೊರತಾಗಿಯೂ ಚಿತ್ರವನ್ನು ಜನ ಮೆಚ್ಚಿಕೊಂಡಿಲ್ಲ. ಚಿತ್ರದ ನಿರೂಪಣೆ ನಿಧಾನವಾಗಿದೆ ಎಂದು ಹಲವರು ದೂರಿದ್ದಾರೆ. ಇಷ್ಟಾಗಿಯೂ ಸೂರ್ಯ ಅಭಿನಯವನ್ನು ಚಿತ್ರ ನೋಡಿದ ಪ್ರತಿಯೊಬ್ಬರು ಹೊಗಳಿದ್ದಾರೆ. ದ್ವಿಪಾತ್ರದಲ್ಲಿ ಸೂರ್ಯ ಪೂರ್ಣಾಂಕ ಗಿಟ್ಟಿಸಿಕೊಂಡಿದ್ದಾರೆ.

#Kanguva – Day 2 WOM > Day 1 WOM..

Family audience are enjoying the movie..

Chennai weekend bookings are looking good..#KanguvaRunningSuccessfully 🗡 pic.twitter.com/MkZBrKDTPY

— Ramesh Bala (@rameshlaus) November 16, 2024

ಕಲೆಕ್ಷನ್‌ ಎಷ್ಟು?

ಸುಮಾರು 300–350 ಕೋಟಿ ರೂ. ಬಜೆಟ್‌ನಲ್ಲಿ ತಯಾರಾದ ʼಕಂಗುವʼ 2 ದಿನ ವಿಶ್ವಾದ್ಯಂತ 59 ಕೋಟಿ ರೂ. ಕಲೆಕ್ಷನ್‌ ಮಾಡಿದೆ. ಈ ಪೈಕಿ ಭಾರತದಲ್ಲಿ ಗಳಿಸಿದ್ದು ಕೇವಲ 33 ಕೋಟಿ. ರೂ. ಮೊದಲ ದಿನ ದೇಶದಾದ್ಯಂತ 24 ಕೋಟಿ ರೂ. ಬಾಚಿಕೊಂಡ ಚಿತ್ರದ ಗಳಿಕೆ 2ನೇ ದಿನ ತೀವ್ರವಾಗಿ ಕುಸಿದಿದೆ. 2ನೇ ದಿನವಾದ ಶುಕ್ರವಾರ ʼಕಂಗುವʼ ಕೇವಲ 9 ಕೋಟಿ ರೂ. ಕಲೆಕ್ಟ್‌ ಮಾಡುವಲ್ಲಿ ಸುಸ್ತು ಹೊಡೆದಿದೆ. ಬಾಬ್ಬಿ ಡಿಯೋಲ್‌ ವಿಲನ್‌ ಪಾತ್ರದಲ್ಲಿ ಅಬ್ಬರಿಸಿರುವ ಈ ಸಿನಿಮಾ ಮೂಲಕ ಬಾಲಿವುಡ್‌ ಬೆಡಗಿ ದಿಶಾ ಪಟಾಣಿ ಕಾಲಿವುಡ್‌ಗೆ ಕಾಲಿಟ್ಟಿದ್ದಾರೆ. ಹಾಡೊಂದರಲ್ಲಿ ಸಖತ್‌ ಗ್ಲಾಮರ್‌ ಆಗಿ ದಿಶಾ ಕಾಣಿಸಿಕೊಂಡಿದ್ದಾರೆ.

ಶನಿವಾರ, ಭಾನುವಾರ ಚಿತ್ರದ ಕಲೆಕ್ಷನ್‌ ಹೆಚ್ಚಾಗುವ ನಿರೀಕ್ಷೆಯಲ್ಲಿದೆ ಚಿತ್ರತಂಡ. ವೀಕೆಂಡ್‌ನಲ್ಲಿ 100 ಕೋಟಿ ರೂ. ಕ್ಲಬ್‌ ಸೇರಿದರೆ ಸಿನಿಮಾ ಸ್ವಲ್ಪ ಮಟ್ಟಿಗೆ ಚೇತರಿಸಿಕೊಳ್ಳಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಸದ್ಯ 3ನೇ ವಾರ ಪೂರೈಸಿಯೂ ಶಿವ ಕಾರ್ತಿಕೇಯನ್‌ ಅಭಿನಯದ ಪ್ಯಾನ್‌ ಇಂಡಿಯಾ ಚಿತ್ರ ʼಅಮರನ್‌ʼ ಥಿಯೇಟರ್‌ಗಳಲ್ಲಿ ಅಬ್ಬರಿಸುತ್ತಿರುವುದು ʼಕಂಗುವʼ ಓಟಕ್ಕೆ ಹೊಡೆತ ನೀಡಿದೆ. ಇನ್ನು ಕರ್ನಾಟಕದಲ್ಲಿ ಶಿವ ರಾಜ್‌ಕುಮಾರ್‌ ಅವರ ʼಭೈರತಿ ರಣಗಲ್‌ʼ ಅದ್ಧೂರಿಯಾಗಿ ಬಿಡುಗಡೆಯಾಗಿದ್ದು, ಇದು ಕೂಡ ʼಕಂಗುವʼ ಕಲೆಕ್ಷನ್‌ ಮೇಲೆ ಪರಿಣಾಮ ಬೀರಿದೆ. ಮುಂದಿನ ದಿನಗಳಲ್ಲಿ ಕಂಗುವ ಎಷ್ಟು ಕಲೆಕ್ಷನ್‌ ಮಾಡಲಿದೆ ಎನ್ನುವುದನ್ನು ಕಾದು ನೀಡಬೇಕಿದೆ.

ಈ ಸುದ್ದಿಯನ್ನೂ ಓದಿ: Kanguva Trailer: ಸೂರ್ಯ ನಟನೆಯ ‘ಕಂಗುವಾ’ ರಿಲೀಸ್‌ಗೆ ದಿನಗಣನೆ; ಮತ್ತೊಂದು ಟ್ರೈಲರ್‌ ಮೂಲಕ ಅಭಿಮಾನಿಗಳ ನಿದ್ದೆಗೆಡಿಸಿದ ಚಿತ್ರತಂಡ