ಹೊಸದಿಲ್ಲಿ: ಬಾಲಿವುಡ್‌ನಲ್ಲಿ (Bollywood) ಸಾವಿನ ಸುದ್ದಿಯೊಂದು ಸಿಕ್ಕಾಪಟ್ಟೆ ಗೊಂದಲ ಸೃಷ್ಟಿಸಿದೆ. ನಟ ಮತ್ತು ಮಾಡೆಲ್‌ ಆಗಿರುವ ನಿತಿನ್‌ ಚೌಹಾಣ್‌ (Nitin Chauhan) ತನ್ನ ಸಾವಿನ ಬಗ್ಗೆ ಹಬ್ಬಿರುವ ವದಂತಿಗಳಿಗೆ ತೆರೆ ಎಳೆದಿದ್ದಾರೆ. ಎಂಟಿವಿ ಸ್ಲಿಟ್ಸ್‌ ವಿಲ್ಲಾ ಖ್ಯಾತಿಯ ನಿತಿನ್‌ ಚೌಹಾಣ್‌ ಆತ್ಮಹತ್ಯೆಗೆ (Suicide) ಶರಣಾಗಿದ್ದರು (Viral News). ಆದರೆ ಆ ನಿತಿನ್‌ ಚೌಹಾಣ್‌ ಬೇರೆ. ಇಬ್ಬರ ಹೆಸರು ಒಂದೇ ಆಗಿದ್ದ ಕಾರಣ ಗೊಂದಲ ಸೃಷ್ಟಿಯಾಗಿತ್ತು.
ಅದಕ್ಕೀಗ ಸ್ಪಷ್ಟನೆ ನೀಡಿರುವ ನಟ ನಿತಿನ್‌ ಚೌಹಾಣ್‌, ಆತ್ಮಹತ್ಯೆ ಮಾಡಿಕೊಂಡಿರುವ ನಿತಿನ್‌ ಅವರ ಕುಟುಂಬಕ್ಕೆ ಸಂತಾಪಗಳನ್ನು ಸೂಚಿಸಿ, ಹೆಸರಿನಲ್ಲಿ ಉಂಟಾಗಿರುವ ಗೊಂದಲದಿಂದ ಈ ರೀತಿಯಾಗಿದ್ದು, ನಾನಿನ್ನೂ ಜೀವಂತವಾಗಿದ್ದೇನೆ ಎಂದು ತನ್ನ ಇನ್‌ಸ್ಟಾಗ್ರಾಮ್‌ನಲ್ಲಿ ಬರೆದುಕೊಂಡಿದ್ದಾರೆ.
ಈ ಕುರಿತಾಗಿ ತನ್ನ ಅಭಿಮಾನಿಗಳನ್ನುದ್ದೇಶಿಸಿ ಒಂದು ವಿಡಿಯೊ ಸಂದೇಶವನ್ನು ಮಾಡಿರುವ ನಿತಿನ್‌ ಚೌಹಾಣ್‌, ʼʼತನ್ನ ಫೊಟೋದೊಂದಿಗೆ ಬರುತ್ತಿರುವ ರೆಸ್ಟ್‌ ಇನ್‌ ಪೀಸ್‌ ಸಂದೇಶಗಳನ್ನು ನೋಡಿ ತಾಯಿ ಒಂದೇ ಸಮನೆ ಅಳುತ್ತಿದ್ದಾರೆʼʼ ಎಂದು ಬರೆದುಕೊಂಡಿದ್ದಾರೆ.
ʼʼನಿತಿನ್‌ ಚೌಹಾಣ್‌ ಅವರ ಗೆಳೆಯರು ಮತ್ತು ಕುಟುಂಬ ಸದಸ್ಯರಿಗೆ ನನ್ನ ಸಂತಾಪಗಳು. ನಿತಿನ್‌ ಆತ್ಮಕ್ಕೆ ಶಾಂತಿ ಸಿಗಲಿ ಮತ್ತು ಆತನ ಸಾವಿನ ಸುದ್ದಿಯನ್ನು ಸಹಿಸುವ ಶಕ್ತಿ ಆತನ ಕುಟುಂಬಸ್ಥರಿಗೆ ಸಿಗಲಿʼʼ ಎಂದೂ ನಟ ನಿತಿನ್‌ ಬರೆದುಕೊಂಡಿದ್ದಾರೆ.
ʼʼಸಾಮಾಜಿಕ ಜಾಲತಾಣಗಳು ಮತ್ತು ಮಾಧ್ಯಮಗಳು ತಪ್ಪು ಸಂದೇಶಗಳನ್ನು ಹರಡುತ್ತಿರುವುದಕ್ಕೆ ಜವಾಬ್ದಾರಿಯನ್ನು ಹೊರಬೇಕು. ಒಂದೇ ಹೆಸರಿನ ಇಬ್ಬರು ವ್ಯಕ್ತಿಗಳನ್ನು ಒಬ್ಬರೇ ಎಂದು ಗುರುತಿಸುವುದು ಬೇಜವಾಬ್ದಾರಿತನದ ಪರಮಾವಧಿಯಾಗಿದೆ. ಇದರಿಂದಾಗಿ ಎರಡೂ ಕುಟುಂಬಗಳ ಮೇಲೆ ನೆಗೆಟಿವ್‌ ಪರಿಣಾಮ ಬೀರುತ್ತದೆ. ನನ್ನ ಭಾವಚಿತ್ರವನ್ನು ಹಾಕಿ ʼರಿಪ್‌ʼ ಎಂದು ಪ್ರಕಟಿಸಿರುವ ಎಲ್ಲ ಪೋಸ್ಟ್‌ಗಳು ಮತ್ತು ಮಾಧ್ಯಮ ವರದಿಗಳು ಸುಳ್ಳು. ಯಾಕೆಂದರೆ ನಾನಿನ್ನೂ ಜೀವಂತವಾಗಿದ್ದೇನೆʼʼ ಎಂದು ಅವರು ಮಾಧ್ಯಮಗಳ ಮತ್ತು ಸಾಮಾಜಿಕ ಜಾಲತಾಣಗಳ ವಿರುದ್ಧ ಆಕ್ರೋಶವನ್ನು ಹೊರ ಹಾಕಿದ್ದಾರೆ.
ಇದನ್ನೂ ಓದಿ: Viral Video: ಆಗ್ರಾದಲ್ಲಿ ನೋಡಲೇಬೇಕಾದ ಸ್ಥಳ ತಾಜ್ ಮಹಲ್‌ ಅಲ್ಲ ಎಂದ ಯೂಟ್ಯೂಬರ್; ಮತ್ಯಾವುದು?
ʼʼಈಗಾಗಲೇ ಹರಡಿರುವ ತಪ್ಪು ಮಾಹಿತಿಯನ್ನು ಸರಿಪಡಿಸಲು ದಯವಿಟ್ಟು ಈ ವಿಡಿಯೊವನ್ನು ಸಾಧ್ಯವಾದಷ್ಟು ಶೇರ್‌ ಮಾಡಿ. ನಾನು ಸತ್ತಿದ್ದೇನೆಂದು ಸುದ್ದಿ ಪ್ರಕಟಿಸಿರುವ ಎಲ್ಲ ಸುದ್ದಿಗಳನ್ನು ಮೀಡಿಯಾಗಳು ಹಿಂತೆಗೆದುಕೊಳ್ಳಬೇಕುʼʼ ಎಂದು ನಿತಿನ್‌ ವಿನಂತಿಸಿಕೊಂಡಿದ್ದಾರೆ.
ಇದೇ ಸಂದರ್ಭದಲ್ಲಿ ಎಂಟಿವಿ ಸ್ಪಿಟ್ಸ್‌ ವಿಲ್ಲಾ 5, ತೇರಾ ಯಾರ್‌ ಹೂನ್‌ ಮೈ, ಕ್ರೈಂ ಪ್ಯಾಟ್ರೋಲ್‌ ಮತ್ತಿತರ ಟಿವಿ ಶೋಗಳಲ್ಲಿ ಕಾಣಿಸಿಕೊಂಡು ಪ್ರಸಿದ್ಧಿ ಪಡೆದಿದ್ದ ನಿತಿನ್‌ ಚೌಹಾಣ್‌ ನ. 7ರಂದು ತನ್ನ 35ನೇ ವಯಸ್ಸಿನಲ್ಲಿ ಮುಂಬೈನಲ್ಲಿ ಸಾವನ್ನಪ್ಪಿದ್ದರು. ಪೊಲೀಸರು ಇದನ್ನು ಆತ್ಮಹತ್ಯೆ ಎಂದು ಶಂಕಿಸಿದ್ದಾರೆ ಮತ್ತು ಇದಕ್ಕೆ ಸಂಬಂಧಿಸಿದಂತೆ ತನಿಖೆಯನ್ನೂ ಪ್ರಾರಂಭಿಸಿದ್ದಾರೆ.
ನಿತಿನ್‌ ಸಾವಿನ ಸುದ್ದಿಯನ್ನು ನಟಿ ಸಯಾಂತಾನಿ ಘೋಷ್‌ ಮತ್ತು ನಿತಿನ್‌ ಅವರ ಸಹ-ನಟ ಸುದೀಪ್‌ ಸಾಹಿರ್‌ ಖಚಿತಪಡಿಸಿದ್ದು, ನಿತಿನ್‌ ಸರಿಯಾದ ಕೆಲಸಗಳಿಲ್ಲದೇ ಇದ್ದ ಕಾರಣದಿಂದ ಕೆಲ ಸಮಯಗಳಿಂದ ಮಾನಸಿಕ ಖಿನ್ನತೆಗೆ ಒಳಗಾಗಿದ್ದರು ಎಂಬ ಮಾಹಿಯೂ ಲಭ್ಯವಾಗಿದೆ.
ನಿಮಗೆ ಗೊತ್ತಿರುವ ಯಾರೇ ಆತ್ಮಹತ್ಯೆಯಂತಹ ಯೋಚನೆಗಳಿಂದ ಬಳಲುತ್ತಿದ್ದರೆ, ಇವರ ಸಹಾಯವನ್ನು ಪಡೆಯಿರಿ:
