ಚೆನ್ನೈ: ದಕ್ಷಿಣ ಭಾರತೀಯ ಚಿತ್ರರಂಗದಲ್ಲಿ ಛಾಪು ಮೂಡಿಸಿದ ರಾಷ್ಟ್ರ ಪ್ರಶಸ್ತಿ ವಿಜೇತ ನಟಿ ಕೀರ್ತಿ ಸುರೇಶ್‌ (Keerthy Suresh) ಸದ್ಯ ಬಾಲಿವುಡ್‌ಗೂ ಕಾಲಿಟ್ಟಿದ್ದಾರೆ. ವರುಣ್‌ ಧವನ್‌ (Varun Dhawan) ಜತೆಗೆ ನಟಿಸಿರುವ ʼಬೇಬಿ ಜಾನ್‌ʼ (Baby John) ಬಿಡುಗಡೆಗೆ ಸಜ್ಜಾಗಿದೆ. ಈ ಮಧ್ಯೆ ಕೀರ್ತಿ ಸುರೇಶ್‌ ಮದುವೆ ಸುದ್ದಿಗೆ ಮತ್ತೆ ರೆಕ್ಕೆ-ಪುಕ್ಕ ಸಿಕ್ಕಿದೆ. ಈ ಹಿಂದೆಯೂ ಕೀರ್ತಿ ಸುರೇಶ್‌ ವಿವಾಹದ ಸುದ್ದಿ ಸಾಕಷ್ಟು ಸದ್ದು ಮಾಡಿತ್ತು. ಆದರೆ ಈ ಬಾರಿ ಹರಿದಾಡುತ್ತಿರುವ ಸುದ್ದಿ ನಿಜ ಎನ್ನಲಾಗಿದ್ದು, ಡಿಸೆಂಬರ್‌ನಲ್ಲಿ ವಿವಾಹ ನಡೆಯಲಿದೆಯಂತೆ. ಹಾಗಾದರೆ ವರನ್ಯಾರು? ಇಂಡಸ್ಟ್ರಿಯವರೆ? ಎನ್ನುವ ಕುತೂಹಲಕ್ಕೆ ಇಲ್ಲಿದೆ ಉತ್ತರ.
ಕೀರ್ತಿ ಸುರೇಶ್‌ ಕೈ ಹಿಡಿಯಲಿರುವ ವರನ ಹೆಸರು ಆಂಟೋನಿ ತಟ್ಟಿಲ್‌ (Antony Thattil). ಕೀರ್ತಿ ಮತ್ತು ಆಂಟೋನಿ ಬಾಲ್ಯ ಸ್ನೇಹಿತರು. ಹೀಗಾಗಿ ಇದು ಲವ್‌ ಕಂ ಆರೆಂಜ್ಡ್‌ ಮ್ಯಾರೇಜ್‌ ಎನ್ನಲಾಗಿದೆ. ಗೋವಾದಲ್ಲಿ ಇವರು ಹಸೆಮಣೆಗೇರಲಿದ್ದಾರೆ ಎಂದೂ ಕೆಲವು ಮಾಧ್ಯಮಗಳು ವರದಿ ಮಾಡಿವೆ.
ಆಂಟೋನಿ ತಟ್ಟಿಲ್‌ ಹಿನ್ನೆಲೆ
ಆಂಟೋನಿ ತಟ್ಟಿಲ್‌ಗೆ ಯಾವುದೇ ಸಿನಿಮಾ ಹಿನ್ನೆಲೆ ಇಲ್ಲ. ದುಬೈಯಲ್ಲಿ ಉದ್ಯಮಿಯಾಗಿರುವ ಅವರು ತಾಯ್ನಾಡಾದ ಕೊಚ್ಚಿಯಲ್ಲಿ ತಮ್ಮದೇ ಆದ ರೆಸಾರ್ಟ್‌ಗಳನ್ನು ಹೊಂದಿದ್ದಾರೆ. ಚೆನ್ನೈಯಲ್ಲಿಯೂ ಅವರದ್ದೇ 2 ಕಂಪೆನಿಗಳಿವೆ ಎಂದು ವರದಿಯೊಂದು ತಿಳಿಸಿದೆ. ಸುಮಾರು 15 ವರ್ಷಗಳಿಂದಲೂ ಕೀರ್ತಿ ಮತ್ತು ಆಂಟೋನಿ ಮಧ್ಯೆ ಗಾಢ ಗೆಳೆತನವಿದೆ. ಹದಿಹರೆಯದಿಂದಲೇ ಅವರು ಸ್ನೇಹ ಸಂಬಂಧ ಹೊಂದಿದ್ದಾರೆ ಎನ್ನಲಾಗಿದೆ. ಸದ್ಯ ಇವರ ಮದುವೆ ಬಗ್ಗೆ ಅಧಿಕೃತ ಘೋಷಣೆ ಇನ್ನೂ ಪ್ರಕಟವಾಗಿಲ್ಲ.
ಈ ಹಿಂದೆ ತಮಿಳಿನ ಜನಪ್ರಿಯ ಸಂಗೀತ ನಿರ್ದೇಶಕ ಅನಿರುದ್ಧ್‌ ರವಿಚಂದರ್‌ ಜತೆಗೆ ಕೀರ್ತಿ ಸುರೇಶ್‌ ಮದುವೆ ನೆರೆವೇರಲಿದೆ ಎನ್ನುವ ಸುದ್ದಿ ಹಬ್ಬಿತ್ತು. ಅದಾದ ಬಳಿಕ ದುಬೈ ಮೂಲದ ಉದ್ಯಮಿ ಫರ್ಹಾನ್‌ ಬಿನ್‌ ಅವರನ್ನು ಕೀರ್ತಿ ವರಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ ಕೆಲವು ದಿನಗಳ ಹಿಂದೆ ಕೀರ್ತಿ ಸುರೇಶ್‌ ಅವರ ತಂದೆ ಈ ವದಂತಿಗಳನ್ನು ತಳ್ಳಿ ಹಾಕಿದ್ದರು.
ಕನ್ನಡ ಹೊರತುಪಡಿಸಿ ದಕ್ಷಿಣ ಭಾರತದ ಉಳಿದೆಲ್ಲ ಚಿತ್ರರಂಗದಲ್ಲಿ ಮಿಂಚುತ್ತಿರುವ ಕೀರ್ತಿ ಸುರೇಶ್‌ ಸದ್ಯ ಹಿಂದಿಯ ʼಬೇಬಿ ಜಾನ್‌ʼ, ತಮಿಳಿನ ʼರಿವಾಲ್ವರ್‌ ರಿಟಾʼ, ʼಕನ್ನಿವೆಡಿʼ ಚಿತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಮೊದಲ ಹಿಂದಿ ಚಿತ್ರ ʼಬೇಬಿ ಜಾನ್‌ʼ ಡಿ. 25ರಂದು ತೆರೆಗೆ ಬರಲಿದೆ. ಕಾಲಿವುಡ್‌ ಸೂಪರ್‌ ಸ್ಟಾರ್‌ ವಿಜಯ್‌ (Vijay) ಅಭಿನಯದ ‘ತೆರಿ’ (Theri) ಚಿತ್ರದ ರಿಮೇಕ್‌ ಇದಾಗಿದ್ದು, ಟೀಸರ್‌ ಮೂಲಕವೇ ಕುತೂಹಲ ಮೂಡಿಸಿದೆ. ಇದೊಂದು ಮಾಸ್‌ ಚಿತ್ರ ಎನ್ನುವ ಸೂಚನೆ ಟೀಸರ್‌ ಮೂಲಕವೇ ಸಿಕ್ಕಿದ್ದು, ಕಲೀಸ್‌ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ವಾಮಿಕಾ ಗಬ್ಬಿ, ಜಾಕಿ ಶ್ರಾಫ್‌ ಮತ್ತಿತರರು ಚಿತ್ರದ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ದಕ್ಷಿಣ ಭಾರತದ ಜನಪ್ರಿಯ ಸಂಗೀತ ನಿರ್ದೇಶಕ ಎಸ್‌.ತಮನ್‌ ಬೇಬಿ ಜಾನ್‌ಗೆ ಮ್ಯೂಸಿಕ್‌ ಒದಗಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: Baby John Taster Cut: ಬಾಲಿವುಡ್‌ನಲ್ಲೂ ಮೋಡಿ ಮಾಡಲು ಸೌತ್‌ ಬ್ಯೂಟಿ ಕೀರ್ತಿ ಸುರೇಶ್‌ ಸಜ್ಜು; ‘ಬೇಬಿ ಜಾನ್‌’ ಟೀಸರ್‌ ಔಟ್‌
