ಮುಂಬೈ: ಅಭಿಷೇಕ್‌ ಬಚ್ಚನ್‌ ಮತ್ತು ಐಶ್ವರ್ಯಾ ರೈ ಬಾಲಿವುಡ್‌ನ ಜನಪ್ರಿಯ ರಿಯಲ್‌ ಮತ್ತು ರೀಲ್‌ ಜೋಡಿ. ಇವರ ದಾಂಪತ್ಯ ಜೀವನಕ್ಕೆ ಈಗ 17 ವರ್ಷ. ಆದರೆ ಇದೀಗ ಇವರ ಮಧ್ಯೆ ಎಲ್ಲವೂ ಸರಿ ಇಲ್ಲ, ವೈಮನಸ್ಸು ಮೂಡಿದೆ, ಶ್ರೀಘ್ರದಲ್ಲಿಯೇ ಇವರು ವಿಚ್ಛೇದನ ಪಡೆದು ದೂರ ಆಗಲಿದ್ದಾರೆ ಎಂಬೆಲ್ಲ ವದಂತಿ ಹರಿಡಿದೆ. ಈ ಬಗ್ಗೆ ಇಬ್ಬರೂ ಇದುವರೆಗೆ ತುಟಿ ಬಿಚ್ಚಿಲ್ಲ. ಈ ವದಂತಿಯನ್ನು ಒಪ್ಪಿಕೊಂಡಿಲ್ಲ, ನಿರಾಕರಿಸಲೂ ಇಲ್ಲ. ಈ ಎಲ್ಲ ಗೊಂದಲದ ಮಧ್ಯೆ ಅಭಿಮಾನಿಗಳಿಗೆ ಗುಡ್‌ನ್ಯೂಸ್‌ ಹೊರ ಬಿದ್ದಿದೆ. ಈ ಜನಪ್ರಿಯ ಜೋಡಿ ಮತ್ತೆ ತೆರೆ ಮೇಲೆ ಒಂದಾಗಲಿದೆ ಎನ್ನುವ ಸುದ್ದಿ ಹರಿದಾಡುತ್ತಿದ್ದು, ಕುತೂಹಲ ಮೂಡಿದೆ (Abhishek-Aishwarya).
ವರದಿಯೊಂದರ ಪ್ರಕಾರ ರಾಷ್ಟ್ರ ಚಲನಚಿತ್ರ ಪ್ರಶಸ್ತಿ ಪುರಸ್ಕೃತ, ಹಿರಿಯ ನಿರ್ದೇಶಕ ಮಣಿರತ್ನಂ (Mani Ratnam) ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ಮುಂದಿನ ಚಿತ್ರಕ್ಕೆ ಅಭಿಷೇಕ್‌ ಬಚ್ಚನ್‌ ಮತ್ತು ಐಶ್ವರ್ಯಾ ರೈ ಅವರನ್ನು ನಾಯಕ-ನಾಯಕಿಯನ್ನಾಗಿಸಿದ್ದಾರಂತೆ.
ತೆರೆ ಮೇಲೆ ಮಾಡುತ್ತಾ ಮೋಡಿ ?
ಸದ್ಯ ಮಣಿರತ್ನಂ ಅವರು ಕಮಲ್‌ ಹಾಸನ್‌ ಅವರ ʼಥಗ್‌ ಲೈಫ್‌ʼ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಸುಮಾರು 37 ವರ್ಷಗಳ ಬಳಿಕ ಮಣಿರತ್ನಂ ಮತ್ತು ಕಮಲ್‌ ಹಾಸನ್‌ ಒಂದಾಗುತ್ತಿರುವ ʼಥಗ್‌ ಲೈಫ್‌ʼ ಈಗಾಗಲೇ ಕುತೂಹಲ ಕೆರಳಿಸಿದೆ. ಮುಂದಿನ ವರ್ಷ ಜೂ. 5ರಂದು ಈ ಸಿನಿಮಾ ತೆರೆಗೆ ಬರಲಿದೆ. ಇದಾದ ಬಳಿಕ ಮಣಿರತ್ನಂ ಅವರು ಬಾಲಿವುಡ್‌ ಚಿತ್ರವನ್ನು ಕೈಗೆತ್ತಿಕೊಳ್ಳಲಿದ್ದು, ಇದರಲ್ಲಿ ಅಭಿನಯಿಸುವಂತೆ ಅಭಿಷೇಕ್‌ ಬಚ್ಚನ್‌ ಮತ್ತು ಐಶ್ವರ್ಯಾ ರೈಗೆ ಆಫರ್‌ ನೀಡಿದ್ದಾರೆ ಎನ್ನಲಾಗಿದೆ.
ಹಿಟ್‌ ಜೋಡಿ
ಮಣಿರತ್ನಂ ಅವರ ಚಿತ್ರದಲ್ಲಿ ಅಭಿಷೇಕ್‌ ಬಚ್ಚನ್‌ ಮತ್ತು ಐಶ್ವರ್ಯಾ ರೈ ಕಾಣಿಸಿಕೊಳ್ಳುತ್ತಿರುವುದು ಇದು ಮೊದಲ ಸಲವೇನಲ್ಲ. ಹಾಗೆ ನೋಡಿದರೆ ಈ ಜೋಡಿ ತೆರೆ ಮೇಲೆ ಹೆಚ್ಚು ಜನಪ್ರಿಯವಾಗಿದ್ದೇ ಮಣಿರತ್ನಂ ಅವರ ಚಿತ್ರದ ಮೂಲಕ ಎನ್ನುವುದು ವಿಶೇಷ. 2007ರಲ್ಲಿ ಬಿಡುಗಡೆಯಾದ ʼಗುರುʼ ಸಿನಿಮಾದಲ್ಲಿ ಅಭಿಷೇಕ್‌ ಬಚ್ಚನ್‌ ಮತ್ತು ಐಶ್ವರ್ಯಾ ರೈ ಮಿಂಚಿದ್ದರು. ಮಣಿರತ್ನಂ ನಿರ್ದೇಶನದ ಈ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಮ್ಯಾಜಿಕ್‌ ಮಾಡಿತ್ತು. ಧೀರೂಭಾಯಿ ಅಂಬಾನಿ ಅವರ ಬಯೋಪಿಕ್‌ ಆಗಿದ್ದ ಈ ಸಿನಿಮಾ ವಿಮರ್ಶಕರ ಗಮನವನ್ನೂ ಸೆಳೆದಿತ್ತು. ಈ ಯಶಸ್ಸಿನಿಂತ ಪ್ರೇರಿತರಾದ ಮಣಿರತ್ನಂ ಮತ್ತೊಮ್ಮೆ 2010ರಲ್ಲಿ ʼರಾವಣ್‌ʼ ಚಿತ್ರದ ಮೂಲಕ ಈ ಜೋಡಿಯನ್ನು ಮತ್ತೆ ತೆರೆ ಮೇಲೆ ತಂದರು. ಬಾಕ್ಸ್‌ ಆಫೀಸ್‌ನಲ್ಲಿ ಈ ಚಿತ್ರ ಅಷ್ಟೇನೂ ಸದ್ದು ಮಾಡದಿದ್ದರೂ ಅಭಿಷೇಕ್‌-ಐಶ್ವರ್ಯಾ ಸಿನಿಪ್ರಿಯರ ಗಮನ ಸೆಳೆದಿತ್ತು.
ಇದೀಗ 3ನೇ ಬಾರಿ ಮಣಿರತ್ನಂ ಈ ಜೋಡಿಯನ್ನು ಮತ್ತೆ ಒಂದಾಗಿಸುತ್ತಿದ್ದಾರೆ. ಈ ಮೂಲಕ 4ನೇ ಬಾರಿ ಮಣಿರತ್ನಂ ಚಿತ್ರದಲ್ಲಿ ನಟಿಸಲು ಅಭಿಷೇಕ್‌ ಬಚ್ಚನ್‌ ಸಜ್ಜಾಗುತ್ತಿದ್ದಾರೆ. ಮೊದಲ ಬಾರಿಗೆ ಅಭಿಷೇಕ್‌ ಮತ್ತು ಮಣಿರತ್ನಂ 2004ರಲ್ಲಿ ರಿಲೀಸ್‌ ಆದ ʼಯುವʼ ಚಿತ್ರದಲ್ಲಿ ಒಂದಾಗಿದ್ದರು. ಇನ್ನು ತಮಿಳಿನ ʼಪೊನ್ನಿಯಿನ್‌ ಸೆಲ್ವಂ: Iʼ ಮತ್ತು ʼಪೊನ್ನಿಯಿನ್‌ ಸೆಲ್ವಂ: IIʼ ಚಿತ್ರಗಳಲ್ಲಿ ನಟಿಸಿದ್ದಾರೆ. ಸದ್ಯ ಈ ತ್ರಿವಳಿ ಸ್ಟಾರ್‌ಗಳು ಮತ್ತೊಮ್ಮೆ ಒಂದಾಗುತ್ತಿದ್ದಾರೆ ಎನ್ನುವ ಸುದ್ದಿ ಕೇಳಿಯೇ ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ.
ಈ ಸುದ್ದಿಯನ್ನೂ ಓದಿ: Aishwarya Rai: ಬಚ್ಚನ್‌ ಕುಟುಂಬದೊಂದಿಗಿನ ವೈಮನಸ್ಸಿನ ವದಂತಿಗೆ ತೆರೆ ಎಳೆದ ಐಶ್ವರ್ಯಾ ರೈ ಪೋಸ್ಟ್‌
