ಹೈದರಾಬಾದ್‌: ಗ್ಲೋಬಲ್‌ ಸ್ಟಾರ್‌ ರಾಮ್‌ ಚರಣ್‌ (Actor Ram Charan) ಅಭಿಮಾನಿಗಳ ಸುಮಾರು 2 ವರ್ಷಗಳ ಕಾಯುವಿಕೆ ಕೊನೆಗೂ ಅಂತ್ಯವಾಗಿದೆ. ಬಹು ನಿರೀಕ್ಷಿತ ಟಾಲಿವುಡ್‌ನ ʼಗೇಮ್‌ ಚೇಂಜರ್‌ʼ (Game Changer) ಚಿತ್ರದ ಟೀಸರ್‌ ನ. 9ರಂದು ರಿಲೀಸ್ ಆಗಿದೆ. ದಕ್ಷಿಣ ಭಾರತದ ಜನಪ್ರಿಯ ನಿರ್ದೇಶಕ ಎಸ್‌.ಶಂಕರ್‌ (S.Shankar) ಆ್ಯಕ್ಷನ್ ಕಟ್‌ ಹೇಳುತ್ತಿರುವ ಈ ಪಾಲಿಟಿಕಲ್‌ ಆ್ಯಕ್ಷನ್ ಡ್ರಾಮಾದಲ್ಲಿ ರಾಮ್‌ ಚರಣ್‌ ವಿವಿಧ ಪಾತ್ರಗಳಲ್ಲಿ ಮಿಂಚು ಹರಿಸಿದ್ದು, ಟೀಸರ್‌ ನೋಡಿ ಅಭಿಮಾನಿಗಳು ಹಚ್ಚೆದ್ದು ಕುಣಿದಿದ್ದಾರೆ.
2022ರಲ್ಲಿ ತೆರೆಕಂಡ ಕೊರಟಾಲ ಶವ ನಿರ್ದೇಶನದ ʼಆಚಾರ್ಯʼ ಸಿನಿಮಾದ ಬಳಿಕ ರಾಮ್‌ ಚರಣ್‌ ನಾಯಕನಾಗಿ ಕಾಣಿಸಿಕೊಂಡ ಯಾವ ಚಿತ್ರವೂ ತೆರೆಕಂಡಿಲ್ಲ. ಹಾಗೆ ನೋಡಿದರೆ ʼಆಚಾರ್ಯʼದಲ್ಲಿ ಅವರು ನಾಯಕನಾಗಿರಲಿಲ್ಲ. ತಮ್ಮ ತಂದೆ ಚಿರಂಜೀವಿ ನಾಯಕನಾಗಿ ನಟಿಸಿದ್ದ ಆ ಚಿತ್ರದ ಪ್ರಮುಖ ಪಾತ್ರವೊಂದರಲ್ಲಿ ನಟಿಸಿದ್ದರು. ಹೀಗಾಗಿ ರಾಮ್‌ ಚರಣ್‌ ಸಿನಿಮಾಕ್ಕಾಗಿ ಅಭಿಮಾನಿಗಳು ಕಣ್ಣಿಗೆ ಎಣ್ಣೆ ಬಿಟ್ಟು ಕಾಯುತ್ತಿದ್ದರು. ಅದರಲ್ಲಿಯೂ ಶಂಕರ್‌ ಅವರಂತಹ ಜನಪ್ರಿಯ ನಿರ್ದೇಶಕನ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ ಎನ್ನುವ ವಿಚಾರವೇ ಸಾಕಷ್ಟು ನಿರೀಕ್ಷೆಯನ್ನು ಹುಟ್ಟು ಹಾಕಿತ್ತು.
ʼಆರ್‌ಆರ್‌ಆರ್‌ʼ ಬಳಿಕ ರಾಮ್‌ ಚರಣ್‌ ಚಿತ್ರ
ಹಾಗೆ ನೋಡಿದರೆ ರಾಮ್‌ ಚರಣ್‌ ಪೂರ್ಣ ಪ್ರಮಾಣದ ನಾಯಕನಾಗಿ ಕೊನೆಯ ಬಾರಿ ಕಾಣಿಸಿಕೊಂಡ ಸಿನಿಮಾ ʼಆರ್‌ಆರ್‌ಆರ್‌ʼ. ಮ್ಯಾಜಿಕಲ್‌ ನಿರ್ದೇಶಕ ಎಸ್‌.ಎಸ್‌.ರಾಜಮೌಳಿ ನಿರ್ದೇಶನದ ಈ ಚಿತ್ರದಲ್ಲಿ ರಾಮ್‌ ಚರಣ್‌ ಮತ್ತು ಜೂ.ಎನ್‌ಟಿಆರ್‌ ನಾಯಕರಾಗಿ ಗಮನ ಸೆಳೆದಿದ್ದರು. ಇಬ್ಬರಿಗೂ ಸಮಾನ ಸ್ಕ್ರೀನ್‌ ಸ್ಪೇಸ್‌, ಅವಕಾಶ ಲಭಿಸಿದ್ದ ಈ ಸಿನಿಮಾ ಬಾಕ್ಸ್‌ ಆಫೀಸ್‌ ಕೊಳ್ಳೆ ಹೊಡೆದಿದ್ದು ಮಾತ್ರವಲ್ಲ ವಿಮರ್ಶಕರ ಗಮನವನ್ನೂ ಸೆಳೆದಿತ್ತು. ಸ್ವಾತಂತ್ರ್ಯ ಪೂರ್ವ ಕಾಲಘಟ್ಟದ ಕಥೆ ಹೇಳಿದ್ದ ʼಆರ್‌ಆರ್‌ಆರ್‌ʼ ಆಸ್ಕರ್‌, ರಾಷ್ಟ್ರ ಚಲನಚಿತ್ರ ಪ್ರಶಸ್ತಿಯನ್ನೂ ಪಡೆದು ಬೀಗಿದೆ. 550 ಕೋಟಿ ರೂ. ವೆಚ್ಚದಲ್ಲಿ ತಯಾರಾಗಿ ಜಾಗತಿಕವಾಗಿ 1,351 ಕೋಟಿ ರೂ. ಬಾಚಿಕೊಂಡಿದೆ. ಈ ಚಿತ್ರ ತೆರೆಕಂಡಿದ್ದು 2022ರಲ್ಲಿ. ಅದಾದ ಬಳಿಕ ರಾಮ್‌ ಚರಣ್‌ ʼಆಚಾರ್ಯʼ ಮತ್ತು ಕಳೆದ ವರ್ಷ ತೆರೆಕಂಡ ಬಾಲಿವುಡ್‌ನ ʼಕಿಸಿ ಕ ಭಾಯಿ ಕಿಸಿ ಕಿ ಜಾನ್ʼ ಸಿನಿಮಾದ ಅತಿಥಿ ಪಾತ್ರದಲ್ಲಿ ನಟಿಸಿದ್ದರು.
ಯಾವಾಗ ತೆರೆಗೆ?
ʼಆರ್‌ಆರ್‌ಆರ್‌ʼ ಸಿನಿಮಾದ ಬಳಿಕ ರಾಮ್‌ ಚರಣ್‌ ಯಾವ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಾರೆ ಎನ್ನುವ ಮಿಲಿಯನ್‌ ಡಾಲರ್‌ ಪ್ರಶ್ನೆಗೆ ʼಗೇಮ್‌ ಚೇಂಜರ್‌ʼ ರೂಪದಲ್ಲಿ ಉತ್ತರ ಸಿಕ್ಕಿತ್ತು. ʼಜಂಟಲ್‌ಮ್ಯಾನ್‌ʼ, ʼಇಂಡಿಯನ್‌ʼ, ʼಎಂಥಿರನ್‌ʼ ಮುಂತಾದ ಸೂಪರ್‌ ಹಿಟ್‌ ಚಿತ್ರಗಳ ನಿರ್ದೇಶಕ ಎಸ್‌.ಶಂಕರ್‌ ತಮ್ಮ ಮುಂದಿನ ಸಿನಿಮಾದ ನಾಯಕನನ್ನಾಗಿ ರಾಮ್‌ ಚರಣ್‌ ಅವರನ್ನು ಘೋಷಿಸಿದಾಗಲೇ ಇಡೀ ಭಾರತೀಯ ಚಿತ್ರರಂಗ ಇತ್ತ ತಿರುಗಿ ನೋಡಿತ್ತು. ಸೂಪರ್‌ ಸ್ಟಾರ್‌ ಮತ್ತು ಸೂಪರ್‌ ಹಿಟ್‌ ಚಿತ್ರಗಳ ನಿರ್ದೇಶಕನ ಕಾಂಬಿನೇಷನ್‌ ಮ್ಯಾಜಿಕ್‌ ಸೃಷ್ಟಿಸಲಿದೆ ಎನ್ನುವ ಮಾತು ಸೆಟ್ಟೇರಿದಾಗಿನಿಂದಲೇ ಕೇಳಿ ಬಂದಿತ್ತು.
ಈ ನಿರೀಕ್ಷೆಯನ್ನು ಹೆಚ್ಚಿಸುವಂತೆ ಟೀಸರ್‌ ಮೂಡಿ ಬಂದಿದೆ. ಈ 1.30 ನಿಮಿಷದ ಟೀಸರ್‌ನಲ್ಲಿ ರಾಮ್‌ ಚರಣ್‌ ವಿವಿಧ ಬಗೆಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಲವರ್‌ ಬಾಯ್‌ ಆಗಿ, ಐಎಎಸ್‌ ಅಧಿಕಾರಿಯಾಗಿ, ರಾಜಕೀಯ ನಾಯಕನಾಗಿ ಹೀಗೆ ಹಲವು ರೂಪ ತಾಳಿದ್ದಾರೆ. ಈ ಮೂಲಕ ಅಭಿಮಾನಿಗಳ ಕುತೂಹಲ ಇನ್ನಷ್ಟು ಹೆಚ್ಚಿಸಿದ್ದಾರೆ. ಐಎಎಸ್‌ ಅಧಿಕಾರಿಯೊಬ್ಬರು ಭ್ರಷ್ಟಾಚಾರ ತುಂಬಿದ ರಾಜಕೀಯ ವ್ಯವಸ್ಥೆಯನ್ನು ಬದಲಾಯಿಸುವ ಕಥೆಯನ್ನು ಇದು ಒಳಗೊಂಡಿದೆ. ʼಗೇಮ್‌ ಚೇಂಜರ್‌ʼ 2025ರ ಜ. 10ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲಿದೆ. ಎಸ್‌.ಜೆ.ಸೂರ್ಯ, ಅಂಜಲಿ, ಕಿಯಾರಾ ಅಡ್ವಾಣಿ, ಸಮುದ್ರಖನಿ, ಜಯರಾಮ್‌ ಮತ್ತಿತರರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ಈ ಸುದ್ದಿಯನ್ನೂ ಓದಿ: Pushpa 2: ಅಲ್ಲು ಅರ್ಜುನ್‌ ಜತೆ ಸೊಂಟ ಬಳುಕಿಸಿದ ಶ್ರೀಲೀಲಾ; ‘ಪುಷ್ಪ 2’ ಚಿತ್ರದ ವಿಶೇಷ ಹಾಡಿನ ಫೋಟೊ ಲೀಕ್‌
