ಬೆಂಗಳೂರು: ರಾಕಿಂಗ್‌ ಸ್ಟಾರ್‌ ಯಶ್ (Actor Yash) ಮತ್ತು ಸ್ಯಾಂಡಲ್‌ವುಡ್‌ ಸಿಂಡ್ರೆಲ್ಲಾ ರಾಧಿಕಾ ಪಂಡಿತ್‌ (Radhika Pandit) ದಂಪತಿಯ ಪುತ್ರ ಯಥರ್ವ್‌ 5ನೇ ವರ್ಷಕ್ಕೆ ಕಾಲಿಟ್ಟಿದ್ದಾನೆ. ಅ. 30ರಂದು ಆತನ ಹುಟ್ಟುಹಬ್ಬವನ್ನು ಆಚರಿಸಲಾಗಿದೆ. ಈ ಪ್ರಯುಕ್ತ ಅದ್ಧೂರಿಯಾಗಿ ಪಾರ್ಟಿ ಆಯೋಜಿಸಲಾಗಿತ್ತು. ಸದ್ಯ ಈ ಸೆಲೆಬ್ರೇಷನ್‌ ವಿಡಿಯೊವನ್ನು ರಾಧಿಕಾ ಪಂಡಿತ್‌ ಹಂಚಿಕೊಂಡಿದ್ದು ವೈರಲ್‌ ಆಗಿದೆ. ವಿಡಿಯೊ ಪೋಸ್ಟ್‌ ಮಾಡಿದ್ದಕ್ಕಾಗಿ ಅಭಿಮಾನಿಗಳು ರಾಧಿಕಾ ಪಂಡಿತ್‌ಗೆ ಧನ್ಯವಾದ ತಿಳಿಸುತ್ತಿದ್ದಾರೆ.
ಕಾರ್‌ ರೇಸ್‌ ಥೀಮ್‌ ಇಟ್ಟುಕೊಂಡು ಈ ಪಾರ್ಟಿಯನ್ನು ಆಯೋಜಿಸಲಾಗಿತ್ತು. ಹೀಗಾಗಿ ಯಥರ್ವ್‌ ಕಾರ್‌ ರೇಸರ್ಸ್‌ ತೊಡುವ ಜೆರ್ಸಿಯಂತಹ ಉಡುಪು ಧರಿಸಿ ಎಂಟ್ರಿ ಕೊಟ್ಟಿದ್ದಾನೆ. ಆತನ ವಿಶಿಷ್ಟ ರೀತಿಯ ಹೇರ್‌ ಸ್ಟೈಲ್‌ ಕೂಡ ಗಮನ ಸೆಳೆದಿದೆ.
5ನೇ ಬರ್ತ್‌ ಡೇ ಹಿನ್ನೆಲೆಯಲ್ಲಿ ಎಲ್ಲೆಡೆ Y 5 ಕಟೌಟ್‌ ರಾರಾಜಿಸಿದೆ. ಅಲ್ಲದೆ ಕಾರ್‌ ರೇಸ್‌ಗೆ ಸಂಬಂಧಿಸಿದ ಫ್ಲ್ಯಾಗ್‌, ಟೈರ್‌, ಕೀ, ಟ್ಯಾಗ್‌, ಸ್ಪೀಡ್‌ ಮೀಟರ್‌, ಕ್ಯಾಪ್‌, ಕಾರ್‌ ರೇಸ್‌ನಲ್ಲಿ ವಿಜೇತರಿಗೆ ಪ್ರದಾನ ಮಾಡಲಾಗುವ ಟ್ರೋಫಿ ಇತ್ಯಾದಿ ಕಂಡು ಬಂದಿದೆ. ವಿಶೇಷ ಎಂದರೆ ಯಥರ್ವ್‌ ಪುಟಾಣಿ ಕಾರಿನಲ್ಲಿ ಗ್ರ್ಯಾಂಡ್‌ ಎಂಟ್ರಿ ಕೊಟ್ಟಿದ್ದಾನೆ. ಸೆಲೆಬ್ರೇಷನ್‌ನಲ್ಲಿ ಯಶ್-ರಾಧಿಕಾ ಕುಟುಂಬಸ್ಥರು, ಸ್ನೇಹಿತರು ಪಾಲ್ಗೊಂಡಿದ್ದರು.
ಗಮನ ಸೆಳೆದ ಯಶ್ ಡ್ಯಾನ್ಸ್‌
ಈ ವೇಳೆ ರಾಕಿಂಗ್‌ ಸ್ಟಾರ್‌ ತಮ್ಮ ಮಗಳು ಆಯ್ರಾ ಜತೆ ಡ್ಯಾನ್ಸ್‌ ಮಾಡಿರುವ ವಿಡಿಯೊ ಇತ್ತೀಚೆಗೆ ವೈರಲ್‌ ಆಗಿತ್ತು. ಡಾ. ಶಿವರಾಜ್‌ ಕುಮಾರ್‌ ಅಭಿನಯದ ‘ಟಗರು’ ಚಿತ್ರದ ಟೈಟಲ್‌ ಟ್ರ್ಯಾಕ್‌ಗೆ ಯಶ್ ಸಖತ್‌ ಆಗಿ ಸ್ಟೆಪ್‌ ಹಾಕಿದ್ದರು. ಡ್ಯಾನ್ಸ್‌ನಲ್ಲಿ ಭಾಗಿಯಾಗುಂತೆ ಮಗಳು ಆಯ್ರಾಳನ್ನೂ ಆಹ್ವಾನಿಸಿದ್ದರು. ಮೊದಲು ನಾಚಿ ನೀರಾದ ಬಳಿಕ ಅವಳೂ ಹೆಜ್ಜೆ ಹಾಕಿದ್ದಳು. ಅಪ್ಪ-ಮಗಳ ಜೋಡಿ ಭರ್ಜರಿಯಾಗಿ ಸ್ಟೆಪ್‌ ಹಾಕಿದ್ದು ನೋಡಿ ಫ್ಯಾನ್ಸ್‌ ಶಿಳ್ಳೆ ಹೊಡೆದಿದ್ದರು. ಆಗಿನಿಂದಲೇ ಕೆಲವರು ಸೆಲೆಬ್ರೇಷನ್‌ನ ಪೂರ್ತಿ ವಿಡಿಯೊ ಅಪ್‌ಲೋಡ್‌ ಮಾಡುವಂತೆ ಆಗ್ರಹಿಸಿದ್ದರು.
ಯೂಟ್ಯೂಬ್‌ ಚಾನಲ್‌ ಆರಂಭಿಸಿದ ರಾಧಿಕಾ ಪಂಡಿತ್‌
ವಿಶೇಷ ಎಂದರೆ ಇದುವರೆಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಸಕ್ರಿಯರಾಗಿದ್ದ ರಾಧಿಕಾ ಪಂಡಿತ್‌ ಇದೀಗ ಅವರದ್ದೇ ಹೆಸರಿನಲ್ಲಿ ಯೂಟ್ಯೂಬ್‌ ಚಾನಲ್‌ ಒಂದನ್ನು ಆರಂಭಿಸಿದ್ದಾರೆ. ನ. 8ರಂದು ಆರಂಭಿಸಲಾದ ಈ ಚಾನಲ್‌ನಲ್ಲಿ ಯರ್ಥವ್‌ನ ಬರ್ತ್‌ಡೇ ಸೆಲೆಬ್ರೇಷನ್‌ ವಿಡಿಯೊ ಹಂಚಿಕೊಂಡಿದ್ದಾರೆ.
ಮುಂಬೈಯಲ್ಲಿ ʼಟಾಕ್ಸಿಕ್‌ʼ ಶೂಟಿಂಗ್‌ ಆರಂಭಿಸಿದ ಯಶ್
ಯಶ್ ಸದ್ಯ ಬಹು ನಿರೀಕ್ಷಿತ ʼಟಾಕ್ಸಿಕ್‌ʼ ಚಿತ್ರದ ಶೂಟಿಂಗ್‌ನಲ್ಲಿ ನಿರತರಾಗಿದ್ದಾರೆ. ಬೆಂಗಳೂರಿನಲ್ಲಿ ಚಿತ್ರೀಕರಣ ಪೂರೈಸಿದ ಚಿತ್ರತಂಡ ಸದ್ಯ ಮುಂಬೈಯಲ್ಲಿ ಬೀಡು ಬಿಟ್ಟಿದೆ. ಮಲಯಾಳಂ ನಟಿ, ನಿರ್ದೇಶಕಿ ಗೀತು ಮೋಹನ್‌ದಾಸ್‌ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ಈ ಪ್ಯಾನ್‌ ಇಂಡಿಯಾ ಚಿತ್ರ ಈಗಾಗಲೇ ದೇಶಾದ್ಯಂತ ಕುತೂಹಲ ಕೆರಳಿಸಿದೆ. ಚಿತ್ರೀಕರಣಕ್ಕಾಗಿ ಯಶ್ ತೆರಳುತ್ತಿರುವ ವಿಡಿಯೊ ಸದ್ಯ ಇಂಟರ್‌ನೆಟ್‌ನಲ್ಲಿ ಹರಿದಾಡುತ್ತಿದೆ. ಜತೆಗೆ ಚಿತ್ರೀಕರಣದಲ್ಲಿ ಬಾಲಿವುಡ್‌ ನಟಿ ಕಿಯಾರಾ ಅಡ್ವಾಣಿ ಕೂಡ ಭಾಗಿಯಾಗಿದ್ದಾರೆ.
ಈ ಸುದ್ದಿಯನ್ನೂ ಓದಿ: Actor Yash: ʼರಾಮಾಯಣʼದಲ್ಲಿ ಅಭಿನಯಿಸುತ್ತಿದ್ದಾರಾ ಯಶ್? ಕೊನೆಗೂ ಮೌನ ಮುರಿದ ರಾಕಿಂಗ್‌ ಸ್ಟಾರ್‌ ಹೇಳಿದ್ದೇನು?
