ಚೆನ್ನೈ: ಕಾಲಿವುಡ್‌ ಲೇಡಿ ಸೂಪರ್‌ ಸ್ಟಾರ್‌ ನಯನತಾರಾ ಅವರಿಗಿಂದು (ನ. 18) ಹುಟ್ಟುಹಬ್ಬದ ಸಂಭ್ರಮ. ಕಳೆದ 2 ದಶಕಗಳಿಂದಲೂ ಚಿತ್ರರಂಗದಲ್ಲಿ ಸಕ್ರಿಯರಾಗಿರುವ ಅವರು 40ನೇ ವರ್ಷಕ್ಕೆ ಕಾಲಿಟ್ಟಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರ ಜೀವನದ ಮೇಲೆ ಬೆಳಕು ಚೆಲ್ಲುವ ಸಾಕ್ಷ್ಯ ಚಿತ್ರ ʼನಯನತಾರಾ: ಬಿಯಾಂಡ್‌ ದಿ ಫೇರ್‌ ಟೇಲ್‌ʼ (Nayanthara: Beyond The Fairy Tale) ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಿದೆ. ಜತೆಗೆ ಅವರ ಮುಂಬರುವ ಚಿತ್ರ ʼರಕ್ಕಯಿʼ (Rakkayie)ಯ ಟೈಟಲ್‌ ಟೀಸರ್‌ ರಿಲೀಸ್‌ ಆಗಿದೆ. ಟೀಸರ್‌ನಲ್ಲಿ ನಯನತಾರಾ ಆ್ಯಕ್ಷನ್‌ ಅವತಾರದಲ್ಲಿ ಮಿಂಚಿದ್ದಾರೆ.
ಸೆಂಥಿಲ್‌ ನಲ್ಲಸಾಮಿ ನಿರ್ದೇಶನದ ʼರಕ್ಕಯಿʼ ಮಹಿಳಾ ಪ್ರಧಾನ ಚಿತ್ರವಾಗಿದ್ದು, ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ತೆರೆಗೆ ಬರಲಿದೆ. ತಮಿಳು ಜತೆಗೆ ಕನ್ನಡ, ತೆಲುಗು, ಹಿಂದಿ ಮತ್ತು ಮಲಯಾಳಂನಲ್ಲಿ ಬಿಡುಗಡೆಯಾಗಲಿದೆ ಎಂದು ಚಿತ್ರತಂಡ ಘೋಷಿಸಿದೆ.
ಟೀಸರ್‌ನಲ್ಲಿ ಏನಿದೆ?
ಟೀಸರ್‌ನಲ್ಲಿ ನಯನತಾರಾ ಅವರ ಪಾತ್ರವನ್ನು ಶಕ್ತವಾಗಿ ಕಟ್ಟಿಕೊಡಲಾಗಿದೆ. ಕೈಯಲ್ಲಿ ಕತ್ತಿ ಹಿಡಿದು ಅವರು ಎದುರಾಳಿಗಳ ವಿರುದ್ಧ ಹೋರಾಡುವುದನ್ನು ಚಿತ್ರಿಸಲಾಗಿದೆ. ಅದೊಂದು ಒಂಟಿ ಗುಡಿಸಲು. ಸುತ್ತಲೂ ಗಾಢ ಕತ್ತಲು ಕವಿದಿದೆ. ಚಿಕ್ಕ ಮಗುವೊಂದರ ಅಳುವಿನ ಧ್ವನಿಯ ಮೂಲಕ ಟೀಸರ್‌ ತೆರೆದುಕೊಳ್ಳುತ್ತದೆ. ತಾಯಿ ಮಗುವನ್ನು ಸಮಾಧಾನ ಪಡಿಸಲು ಮುಂದಾಗುತ್ತಾಳೆ. ಇತ್ತ ಮನೆ ಮುಂದಿನ ಬಯಲಿನಲ್ಲಿ ಕೈಯಲ್ಲಿ ದೊಂದಿ, ಆಯುಧ ಹಿಡಿದು ಒಂದಷ್ಟು ಜನರ ಗುಂಪು ಅವರ ಮೇಲೆ ಮುತ್ತಿಗೆ ಹಾಕಲು ಸಜ್ಜಾಗಿ ನಿಂತಿದೆ. ತಾಯಿ ಹಾಲನ್ನು ಕಾಯಿಸಿ ಮಗುವಿಗೆ ಕುಡಿಯಲು ಕೊಟ್ಟು ಸೆರಗನ್ನು ಸೊಂಟಕ್ಕೆ ಸಿಕ್ಕಿಸಿ ಆಯುಧ ಹಿಡಿದು ಯುದ್ಧಕ್ಕೆ ಸಜ್ಜಾಗುತ್ತಾಳೆ.
ದಿಟ್ಟ ಮಹಿಳೆ ಧೈರ್ಯದಿಂದ ಹೊರಗೆ ಬರುತ್ತಾಳೆ. ಬಳಿಕ ಕಂಡುಬರುವುದೇ ಅವಳ ರೌದ್ರಾವತಾರ. ಪ್ರತಿಯೊಬ್ಬರನ್ನೂ ಎದುರಿಸುತ್ತಾಳೆ. ಕತ್ತಿ ಹಿಡಿದು ಹೋರಾಡುತ್ತಾಳೆ. ಶತ್ರುಗಳನ್ನು ಚಚ್ಚಿ ಬಿಸಾಡುತ್ತಾಳೆ, ರುಂಡ ಚೆಂಡಾಡುತ್ತಾಳೆ. ರಕ್ತದ ಹೊಳೆಯೇ ಹರಿಯುತ್ತದೆ. ಹೋರಾಟ ಮುಗಿಸಿ ಕೊನೆಗೆ ಮನೆಯೊಳಗೆ ಬಂದು ಮಗುವಿನ ತೊಟ್ಟಿಲು ತೂಗುತ್ತಾಳೆ. ಇಷ್ಟು ಈ ಟೀಸರ್‌ನಲ್ಲಿ ಕಂಡು ಬಂದಿದೆ. ದಿಟ್ಟ ಮಹಿಳೆಯ ಪಾತ್ರವನ್ನು ನಯನತಾರಾ ನಿರ್ವಹಿಸಿದ್ದಾರೆ. ಯಾವ ಮಾಸ್‌ ಹೀರೊಗೂ ಕಡಿಮೆ ಇಲ್ಲದಂತೆ ಫೈಟಿಂಗ್‌ ದೃಶ್ಯದಲ್ಲಿ ಕಾಣಿಸಿಕೊಂಡಿದ್ದಾರೆ. ಆ ಮೂಲಕ ಲೇಡಿ ಸೂಪರ್‌ ಸ್ಟಾರ್‌ ಪಟ್ಟವನ್ನು ಇನ್ನಷ್ಟು ಗಟ್ಟಿಗೊಳಿಸಿದ್ದಾರೆ.
ಹಾಗೆ ನೋಡಿದರೆ ನಯನತಾರಾ ಆ್ಯಕ್ಷನ್‌ ದೃಶ್ಯಗಳಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಇದು ಮೊದಲ ಸಲವೇನಲ್ಲ. ಈ ಹಿಂದೆ ತಮಿಳಿನ ʼಇಮೈಕ್ಕಾ ನೋಡಿಗಲ್‌ʼ, ಹಿಂದಿಯ ʼಜವಾನ್‌ʼ ಮುಂತಾದ ಚಿತ್ರಗಳಲ್ಲಿ ನಯನತಾರಾ ಭರ್ಜರಿ ಫೈಟಿಂಗ್‌ ದೃಶ್ಯಗಳಲ್ಲಿ ನಟಿಸಿದ್ದಾರೆ. ಅಲ್ಲೆಲ್ಲ ಗನ್‌ ಹಿಡಿದು ಅಬ್ಬರಿಸಿದರೆ ಈ ಬಾರಿ ಕತ್ತಿ ಹಿಡಿದು ಹೋರಾಡಿದ್ದಾರೆ. ತೊಟ್ಟಿಲು ತೂಗುವ ಕೈ ಯುದ್ಧವನ್ನೂ ಮಾಡಬಲ್ಲದು ಎನ್ನುವುದನ್ನು ಈ ಟೀಸರ್‌ ಮತ್ತೊಮ್ಮೆ ಸಾರಿ ಹೇಳಿದೆ. ಸದ್ಯ ಟೀಸರ್‌ ವೀಕ್ಷಿಸಿದ ಅಭಿಮಾನಿಗಳು ನಯನತಾರಾ ಅವರ ಪವರ್‌ಫುಲ್‌ ಪಾತ್ರಕ್ಕೆ ಫಿದಾ ಅಗಿದ್ದಾರೆ. ಈ ಮೂಲಕ ಚಿತ್ರದ ಮೇಲಿನ ನಿರೀಕ್ಷೆ ಇನ್ನಷ್ಟು ಹೆಚ್ಚಾಗಿದೆ. ಸದ್ಯ ಚಿತ್ರತಂಡ ಬಿಡುಗಡೆ ದಿನಾಂಕವನ್ನು ಘೋಷಿಸಿಲ್ಲ.
ಈ ಸುದ್ದಿಯನ್ನೂ ಓದಿ: Actress Nayanthara: ಧನುಷ್‌ ವಿರುದ್ಧ ಯುದ್ಧ ಸಾರಿದ್ರಾ ನಯನತಾರಾ? ಏನಾಗ್ತಿದೆ ಕಾಲಿವುಡ್‌ನಲ್ಲಿ?
