ಬೆಂಗಳೂರು: ಒಟಿಟಿ, ಸಿನಿಮಾಗಳು ಪ್ರೇಕ್ಷಕರ ಗಮನ ಸೆಳೆಯಲು ನಾನಾ ಕಸರತ್ತು ನಡೆಸುವ ಮಧ್ಯೆ ಇಂದಿಗೂ ಕಿರಿತೆರೆಗೆ ಅದರದ್ದೇ ಆದ ವೀಕ್ಷಕ ವರ್ಗವಿದೆ. ಇಂದಿಗೂ ಧಾರಾವಾಹಿ ನೋಡುಗರ ಸಂಖ್ಯೆಯಲ್ಲಿ ಯಾವುದೇ ಕುಸಿತವಾಗಿಲ್ಲ. ಅದರ ಬದಲಾಗಿ ಕಿರುತೆರೆ ವಿಭಿನ್ನ ಕಾನ್ಸೆಪ್ಟ್‌ಗಳ ಧಾರಾವಾಹಿ ಮೂಲಕ ಇನ್ನೂ ಅಧಿಕ ಪ್ರಮಾಣದಲ್ಲಿ ವೀಕ್ಷಕರನ್ನು ಆಕರ್ಷಿಸುತ್ತಿದೆ. ಅದರಲ್ಲಿಯೂ ಕಿರುತೆರೆಯ ಸೀರಿಯಲ್‌ಗಳಿಗೆ ಅದರದ್ದೇ ಆದ ನೋಡುಗರಿದ್ದಾರೆ. ಸಾಮಾನ್ಯವಾಗಿ ಧಾರಾವಾಹಿಗಳು ಸೋಮವಾರದಿಂದ ಶುಕ್ರವಾರ ಅಥವಾ ಶನಿವಾರದವರೆಗೆ ಪ್ರಸಾರವಾಗುತ್ತವೆ. ಆದರೆ ಇದೀಗ ಕಲರ್ಸ್‌ ಕನ್ನಡ (Colors Kannada) ವಾಹಿನಿ ವಾರದ 7 ದಿನವೂ ಧಾರಾವಾಹಿ ಪ್ರಸಾರಕ್ಕೆ ಮುಂದಾಗಿದೆ.
ವಾರದ 7 ದಿನವೂ ಭರ್ತಿ ಮನರಂಜನೆ ನೀಡಲು ಕಲರ್ಸ್‌ ಕನ್ನಡದ ಆರು ಧಾರಾವಾಹಿಗಳು ಆಗಮಿಸುತ್ತಿವೆ. ಈ ಬಗ್ಗೆ ವಾಹಿನಿ ಹೊಸ ಪ್ರೊಮೋ ರಿಲೀಸ್‌ ಮಾಡಿದೆ.
ಪ್ರತಿದಿನ ಸೀರಿಯಲ್‌ ಎಂಟರ್‌ಟೈನ್‌ಮೆಂಟ್‌
ಪ್ರತಿದಿನ ಸೀರಿಯಲ್‌ ಎಂಟರ್‌ಟೈನ್‌ಮೆಂಟ್‌ ಹೆಸರಿನ ಈ ಪ್ರೋಮೊ ಸದ್ಯ ಕಿರುತೆರೆ ಪ್ರಿಯರ ಗಮನ ಸೆಳೆಯುತ್ತಿದೆ. ಸೋಮವಾರದಿಂದ ಶನಿವಾರದ ತನಕ ಕುತೂಹಲ ಕೆರಳಿಸುತ್ತಿದ್ದ ಧಾರಾವಾಹಿಗಳು ಇನ್ನುಮುಂದೆ ಭಾನುವಾರವೂ ಪ್ರಸಾರವಾಗಲಿರುವ ಸುದ್ದಿ ಕೇಳಿ ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ. ಪ್ರತಿ ಬಾರಿಯೂ ವಿಭಿನ್ನ ಪ್ರಯೋಗ ನಡೆಸುವ ಮೂಲಕ ಟಿಆರ್‌ಪಿಯಲ್ಲಿಯೂ ಮುಂಚೂಣಿಯಲ್ಲಿರುವ ಕಲರ್ಸ್‌ ಕನ್ನಡ ಇದೀಗ ಈ ಮೂಲಕ ಮತ್ತೊಂದು ಹೊಸ ಮೈಲಿಗಲ್ಲು ನಡೆಲು ಮುಂದಾಗಿದೆ. 6 ಧಾರಾವಾಹಿಗಳಾದ ʼಕರಿಮಣಿʼ, ʼದೃಷ್ಟಿಬೊಟ್ಟುʼ, ʼಭಾಗ್ಯ ಲಕ್ಷ್ಮೀʼ, ʼಲಕ್ಷ್ಮೀ ಬಾರಮ್ಮʼ, ʼನಿನಗಾಗಿʼ ಮತ್ತು ʼಶ್ರೀಗೌರಿʼ ಇನ್ನು ಮುಂದೆ ವಾರದ ಎಲ್ಲ ದಿನ ಪ್ರಸಾರವಾಗಲಿದೆ.
ʼಕರಿಮಣಿʼ: ಈ ಧಾರಾವಾಹಿ ವಾರದ 6 ದಿನ ಮಾತ್ರ ಪ್ರಸಾರ ಕಾಣುತ್ತಿತ್ತು. ಇದೀಗ ಈ ಸೀರಿಯಲ್‌ ವಾರದ 7 ದಿನವೂ ಪ್ರತಿ ದಿನ ಸಂಜೆ 6 ಗಂಟೆ ಎಂದಿನಂತೆ ಪ್ರಸಾರವಾಗಲಿದೆ. ಈ ಧಾರಾವಾಹಿಯಲ್ಲಿ ಅಶ್ವಿನ್ ಯಾದವ್, ಸ್ಪಂದನಾ ಸೋಮಣ್ಣ, ಹೇಮಾ ಪ್ರಭಾತ್, ನಾಗೇಂದ್ರ ಶಾ, ಪ್ರಥಮಾ ಪ್ರಸಾದ್, ರಜನೀಶ್ ಗೌಡ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ.
ʼದೃಷ್ಟಿಬೊಟ್ಟುʼ: ಇತ್ತೀಚೆಗೆ ಆರಂಭವಾದ ʼದೃಷ್ಟಿಬೊಟ್ಟುʼ ಸದ್ಯ ವೀಕ್ಷಕರ ಗಮನ ಸೆಳೆಯುತ್ತಿದೆ. ಸಂಜೆ 6:30ಕ್ಕೆ ಪ್ರಸಾರವಾಗುವ ಈ ಧಾರಾವಾಹಿಯಲ್ಲಿ ವಿಜಯ್ ಸೂರ್ಯ, ಅರ್ಪಿತಾ ಮೊಹಿತೆ, ಅಂಬಿಕಾ, ತನ್ಮಯಾ ಕಶ್ಯಪ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ʼಭಾಗ್ಯ ಲಕ್ಷ್ಮೀʼ: ಪ್ರಸಾರವಾದಾಗಿನಿಂದಲೂ ಗಮನ ಸೆಳೆಯುತ್ತಿರುವ ʼಭಾಗ್ಯ ಲಕ್ಷ್ಮೀʼಯನ್ನು ಇನ್ನುಮುಂದೆ ಪ್ರತಿ ದಿನ ಸಂಜೆ 7 ಗಂಟೆಗೆ ಕಣ್ತುಂಬಿಕೊಳ್ಳಬಹುದು. ಸುಷ್ಮಾ ಕೆ. ರಾವ್, ಪದ್ಮಜಾ ರಾವ್, ಸುದರ್ಶನ್‌ ರಂಗಪ್ರಸಾದ್‌, ಗೌತಮಿ ಗೌಡ, ಆಶಾ ಅಯ್ಯನರ್‌ ಮತ್ತಿತರರ ಅಭಿನಯಕ್ಕೆ ಪ್ರೇಕ್ಷಕರು ಜೈ ಎಂದಿದ್ದಾರೆ.
ʼಲಕ್ಷ್ಮೀ ಬಾರಮ್ಮʼ: ಮತ್ತೊಂದು ಜನಪ್ರಿಯ ಧಾರಾವಾಹಿ ʼಲಕ್ಷ್ಮೀ ಬಾರಮ್ಮʼ. ಇದು ಸಂಜೆ 7:30ಕ್ಕೆ ಪ್ರಸಾರವಾಗುತ್ತಿದೆ. ಭೂಮಿಕಾ ರಮೇಶ್, ಶಮಂತ್‌ ಗೌಡ, ತನ್ವಿ ರಾವ್, ಸುಷ್ಮಾ ನಾಣಯ್ಯ ಮತ್ತಿತರರು ಮುಖ್ಯ ಪಾತ್ರಗಳನ್ನು ನಿರ್ವಹಿಸುತ್ತಿದ್ದಾರೆ.
ʼನಿನಗಾಗಿʼ: ಇತ್ತೀಚೆಗೆ ಆರಂಭವಾಗಿ ಬಹುಬೇಗ ನೋಡುಗರನ್ನು ಹಿಡಿದಿಟ್ಟ ಈ ಧಾರಾವಾಹಿಯನ್ನು ಇನ್ನುಮುಂದೆ ಪ್ರತಿದಿನ ರಾತ್ರಿ 8 ಗಂಟೆಗೆ ವೀಕ್ಷಿಸಬಹುದು. ಋತ್ವಿಕ್ ಮಠದ್, ದಿವ್ಯಾ ಉರುಡುಗ, ಪ್ರಿಯಾಂಕ ಕಾಮತ್, ಕಿಶನ್ ಬೆಳಗಲಿ, ವಿಜಯ್ ಕೌಂಡಿನ್ಯ, ಸಿರಿ ಸಿಂಚನ ಮುಂತಾದವರು ನಟಿಸುತ್ತಿದ್ದಾರೆ.
ʼಶ್ರೀಗೌರಿʼ: ಇನ್ನುಮುಂದೆ ನೀವು ಪ್ರತಿ ದಿನ ರಾತ್ರಿ 8:30ಕ್ಕೆ ʼಶ್ರೀಗೌರಿʼ ಧಾರಾವಾಹಿಯನ್ನು ವೀಕ್ಷಿಸಬಹುದು. ಅಮೂಲ್ಯಾ ಗೌಡ, ಕಾರ್ತಿಕ್‌ ಅತ್ತಾವರ, ನಂದಿನಿ ಗೌಡ, ಸುನೀಲ್‌ ಗೌಡ ಮತ್ತಿತರರು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಈ ಸುದ್ದಿಯನ್ನೂ ಓದಿ: BBK 11: ಈ ವಾರ ಮನೆಯಿಂದ ಹೊರಹೋಗಲು ಬರೋಬ್ಬರಿ 10 ಮಂದಿ ನಾಮಿನೇಟ್: ಯಾರೆಲ್ಲ?
