ಚೆನ್ನೈ: ಈ ವರ್ಷದ ಬಹು ನಿರೀಕ್ಷಿತ ಕಾಲಿವುಡ್‌ನ ʼಕಂಗುವʼ ಚಿತ್ರ (Kanguva Movie) ವಿಶ್ವಾದ್ಯಂತ ಗುರುವಾರ (ನ. 14) ತೆರೆ ಕಂಡಿದೆ. ತಮಿಳು ಸೂಪರ್‌ ಸ್ಟಾರ್‌ ಸೂರ್ಯ (Suriya) ಅಭಿನಯದ ಈ ಫ್ಯಾಂಟಸಿ, ಆ್ಯಕ್ಷನ್‌ ಚಿತ್ರವನ್ನು ಶಿವ (Siva) ನಿರ್ದೇಶಿಸಿದ್ದಾರೆ. ಇಬ್ಬರ ಮೊದಲ ಕಾಂಬಿನೇಷನ್‌ನ ಚಿತ್ರವಾಗಿರುವ ಹಿನ್ನೆಲೆಯಲ್ಲಿ ʼಕಂಗುವʼ ಸೆಟ್ಟೇರಿದಾಗಿನಿಂದಲೇ ಸದ್ದು ಮಾಡಿತ್ತು. ಸೂರ್ಯ ಅಭಿಮಾನಿಗಳು ಕಣ್ಣಿಗೆ ಎಣ್ಣೆ ಬಿಟ್ಟು ಕಾಯುತ್ತಿದ್ದ ಈ ಚಿತ್ರ ಕೊನೆಗೂ ರಿಲೀಸ್‌ ಆಗಿದ್ದು ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. 3ಡಿ, ಐಮ್ಯಾಕ್ಸ್‌ ಮಾದರಿಯಲ್ಲಿಯೂ ಬಿಡುಗಡೆಯಾದ ʼಕಂಗುವʼ ಚಿತ್ರ ಆನ್‌ಲೈನ್‌ನಲ್ಲಿ ಸೋರಿಕೆಯಾಗಿರುವುದು ಚಿತ್ರತಂಡದ ನಿದ್ದೆಗೆಡಿಸಿದೆ.
ಭರ್ಜರಿ ಆ್ಯಕ್ಷನ್‌ ದೃಶ್ಯ, ದ್ವಿಪಾತ್ರದಲ್ಲಿ ಸೂರ್ಯ ಅವರ ಅಭಿನಯಕ್ಕೆ ಪ್ರೇಕ್ಷಕರು ಜೈ ಎಂದಿದ್ದಾರೆ. ಅದಾಗ್ಯೂ ಚಿತ್ರಕಥೆ ಹಲವರಿಗೆ ಬೋರ್‌ ಎನಿಸಿದೆ. ಜತೆಗೆ ಚಿತ್ರದ ನಿರೂಪಣೆ ನಿಧಾನವಾಗಿದೆ ಎಂದೂ ಕೆಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಕಂಗುವ ಮತ್ತು ಫ್ರಾನ್ಸಿಸ್‌ ಎನ್ನುವ 2 ತದ್ವಿರುದ್ಧ ಪಾತ್ರದಲ್ಲಿ ಸೂರ್ಯ ಗಮನ ಸೆಳೆದಿದ್ದಾರೆ. ಇಡೀ ಚಿತ್ರವನ್ನು ಅವರು ಹೆಗಲ ಮೇಲೆ ಹೊತ್ತುಕೊಂಡು ಸಾಗಿದ್ದಾರೆ. ಅದಾಗ್ಯೂ ಚಿತ್ರದಲ್ಲಿ ಇನ್ನೇನೋ ಬೇಕಿತ್ತು ಎನಿಸುವುದು ಸುಳ್ಳಲ್ಲ ಎಂದು ವೀಕ್ಷಕರು ಸೋಷಿಯಲ್‌ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.
Stunning Visuals… Superb Stunts… @directorsiva sir's unique Tribal World Building , Technical & VFX Brilliance with @Suriya_offl Sir's awesome Fiery Performamce 🔥🔥 makes #Kanguva an Exciting Theatrical experience with lot of High moments…. 👏👏 Kudos to whole team for… pic.twitter.com/bPVGIR7FC8
— karthik subbaraj (@karthiksubbaraj) November 14, 2024
ಆನ್‌ಲೈನ್‌ನಲ್ಲಿ ಸೋರಿಕೆ
ಸುಮಾರು 300–350 ಕೋಟಿ ರೂ. ಬಜೆಟ್‌ನಲ್ಲಿ ತಯಾರಾದ ʼಕಂಗುವʼ ಚಿತ್ರದ ಎಚ್‌ಡಿ ಪ್ರಿಂಟ್‌ ಆನ್‌ಲೈನ್‌ನಲ್ಲಿ ಲೀಕಾಗಿರುವುದು ನಿರ್ಮಾಪಕರ ಚಿಂತೆಗೆ ಕಾರಣವಾಗಿದೆ. ಇಬೋಬ್ಬಾ, ಮೂವಿರೂಲ್ಸ್‌, ತಮಿಳ್‌ರಾಕರ್ಸ್‌, ಫಿಲ್ಮಿಝಿಲ್ಲಾ, ತಮಿಳ್‌ಯೋಗಿ, ತಮಿಳ್‌ಬ್ಲಾಸ್ಟರ್ಸ್‌ ಮೊದಲಾದ ವೆಬ್‌ಸೈಟ್‌ಗಳಲ್ಲಿ ಈ ಚಿತ್ರ ಸೋರಿಕೆಯಾಗಿದೆ. ಇದು ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಮೇಲೆ ಪರಿಣಾಮ ಬೀರುವ ಆತಂಕ ಎದುರಾಗಿದೆ.
ಒಟಿಟಿಗೆ ಯಾವಾಗ?
ಥಿಯೇಟರ್‌ಗಳಿಗೆ ಲಗ್ಗೆ ಇಟ್ಟ ʼಕಂಗುವʼ ಒಟಿಟಿಯಲ್ಲಿ ಯಾವಾಗ ಪ್ರಸಾರವಾಗಲಿದೆ ಎನ್ನುವ ಬಗ್ಗೆ ಸದ್ಯ ಚರ್ಚೆ ಆರಂಭವಾಗಿದೆ. ಸಾಮಾನ್ಯವಾಗಿ ಥಿಯೇಟರ್‌ಗಳಲ್ಲಿ ಬಿಡುಗಡೆಯಾದ 8 ವಾರಗಳ ಬಳಿಕ ಸಿನಿಮಾ ಒಟಿಟಿಯಲ್ಲಿ ಕಾಣಿಸಿಕೊಳ್ಳುತ್ತದೆ. ಅದರ ಪ್ರಕಾರ ʼಕಂಗುವʼ ಜ. 14ರಿಂದ ಒಟಿಟಿಯಲ್ಲಿ ಸ್ಟ್ರೀಮಿಂಗ್‌ ಆಗುವ ಸಾಧ್ಯತೆ ಇದೆ. ಪೊಂಗಲ್‌ ಹಬ್ಬದ ನಿಮಿತ್ತ ಒಟಿಟಿಯಲ್ಲಿ ಪ್ರಸಾರ ಮಾಡಲು ಚಿತ್ರತಂಡ ಚಿಂತನೆ ನಡೆಸಿದೆ ಎನ್ನಲಾಗುತ್ತಿದೆ. ಓ ಬಗ್ಗೆ ಅಧಿಕೃತ ಮಾಹಿತಿ ಇನ್ನಷ್ಟೇ ಹೊರ ಬರಬೇಕಿದೆ. ಮೂಲಗಳ ಪ್ರಕಾರ ʼಕಂಗುವʼ ಒಟಿಟಿ ಹಕ್ಕು ಅಮೆಜಾನ್‌ ಪ್ರೈಂ ವಿಡಿಯೊಕ್ಕೆ ಬರೋಬ್ಬರಿ 100 ಕೋಟಿ ರೂ.ಗೆ ಮಾರಾಟವಾಗಿದೆಯಂತೆ.
ಕಲೆಕ್ಷನ್‌ ಎಷ್ಟು?
ಮೊದಲ ದಿನ ಈ ಚಿತ್ರ 22-25 ಕೋಟಿ ರೂ. ಕಲೆಕ್ಷನ್‌ ಮಾಡುವ ನಿರೀಕ್ಷೆ ಇದೆ. ಅದಾಗ್ಯೂ ಮಿಶ್ರ ಪ್ರತಿಕ್ರಿಯೆ ದೊರೆತಿರುವುದರಿಂದ ಗಳಿಕೆ ಎಷ್ಟಾಗಲಿದೆ ಎನ್ನುವ ಪ್ರಶ್ನೆ ಮೂಡಿದೆ. ಈ ಚಿತ್ರದಲ್ಲಿ ವಿಲನ್‌ ಆಗಿ ಬಾಬ್ಬಿ ಡಿಯೋಲ್‌ ಕಾಣಿಸಿಕೊಂಡಿದ್ದು, ದಿಶಾ ಪಟಾಣಿ ನಾಯಕಿಯಾಗಿ ಮೊದಲ ಬಾರಿಗೆ ಕಾಲಿವುಡ್‌ಗೆ ಕಾಲಿಟ್ಟಿದ್ದಾರೆ. ನಟರಾಜನ್‌ ಸುಬ್ರಮಣಿಯನ್‌, ಕೆ.ಎಸ್‌.ರವಿ ಕುಮಾರ್‌, ಯೋಗಿ ಬಾಬು, ಕೊವೈ ಸರಳಾ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: Kanguva Trailer: ಸೂರ್ಯ ನಟನೆಯ ‘ಕಂಗುವಾ’ ರಿಲೀಸ್‌ಗೆ ದಿನಗಣನೆ; ಮತ್ತೊಂದು ಟ್ರೈಲರ್‌ ಮೂಲಕ ಅಭಿಮಾನಿಗಳ ನಿದ್ದೆಗೆಡಿಸಿದ ಚಿತ್ರತಂಡ
