ಚೆನ್ನೈ: ಸೂರರೈ ಪೊಟ್ರು ಚಿತ್ರದಲ್ಲಿನ ಅಭಿನಯಕ್ಕಾಗಿ ರಾಷ್ಟ್ರ ಚಲನಚಿತ್ರ ಪ್ರಶಸ್ತಿ ಮುಡಿಗೇರಿಸಿಕೊಂಡ ಕಾಲಿವುಡ್‌ ಸೂಪರ್‌ ಸ್ಟಾರ್‌ ಸೂರ್ಯ (Suriya) ಇದೀಗ ಬಹು ನಿರೀಕ್ಷಿತ ಪ್ಯಾನ್‌ ಇಂಡಿಯಾ ಚಿತ್ರ ʼಕಂಗುವಾʼ (Kanguva) ಮೂಲಕ ಮತ್ತೊಮ್ಮೆ ಬಾಕ್ಸ್‌ ಆಫೀಸ್‌ ಶೇಕ್‌ ಮಾಡಲು ಸಜ್ಜಾಗಿದ್ದಾರೆ. ನ. 14ರಂದು ಪ್ರಪಂಚದಾದ್ಯಂತ ʼಕಂಗುವಾʼ ಅದ್ಧೂರಿಯಾಗಿ ಬಿಡುಗಡೆಯಾಗುತ್ತಿದ್ದು, ಪ್ರಚಾರ ಕಾರ್ಯ ವೇಗ ಪಡೆದುಕೊಂಡಿದೆ. ಚಿತ್ರ ಬಿಡುಗಡೆಗೆ 3 ದಿನ ಬಾಕಿ ಇರುವಂತೆಯೇ ಸಿನಿಮಾ ತಂಡ ಮತ್ತೊಂದು ಟ್ರೈಲರ್‌ ರಿಲೀಸ್‌ ಮಾಡಿ ಕುತೂಹಲವನ್ನು ಇನ್ನಷ್ಟು ಹೆಚ್ಚಿಸಿದೆ (Kanguva Trailer).
ಸ್ಟುಡಿಯೋ ಗ್ರೀನ್ ಫಿಲಂಸ್ ಬಹು ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಿರುವ ʼಕಂಗುವಾʼ ಚಿತ್ರಕ್ಕೆ ಶಿವ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. 10 ಭಾಷೆಗಳಲ್ಲಿ ಈ ಸಿನಿಮಾ ರಿಲೀಸ್‌ ಆಗಲಿದೆ. ಕೆಲವು ತಿಂಗಳ ಹಿಂದೆ ರಿಲೀಸ್‌ ಆಗಿರುವ ಟ್ರೈಲರ್‌ ಮೂಲಕವೇ ಗಮನ ಸೆಳೆದಿದ್ದ ಈ ಚಿತ್ರ ಬಿಡುಗಡೆ ಹೊತ್ತಲ್ಲಿ ಮತ್ತೊಂದು ತುಣುಕು ರಿಲೀಸ್‌ ಮಾಡಿ ಅಭಿಮಾನಗಳನ್ನು ತುದಿಗಾಲಿನಲ್ಲಿ ನಿಲ್ಲಿಸಿದೆ. ಆಧುನಿಕ ಕಾಲಘಟ್ಟ ಮತ್ತು 700 ವರ್ಷದ ಹಿಂದಿನ ಜನಜೀವನವನ್ನು ಬೆರೆಸಿದ ಟ್ರೈಲರ್‌ ಇದಾಗಿದ್ದು ಎರಡೂ ಶೇಡ್‌ನಲ್ಲಿ ಸೂರ್ಯ ಮಿಂಚಿದ್ದಾರೆ. ಒಂದೆಡೆ ಸ್ಟೈಲಿಶ್‌ ಅವತಾರದಲ್ಲಿ ಕಂಡು ಬಂದರೆ ಮತ್ತೊಂದೆಡೆ ಕಾಡು ಜನಾಂಗದ ನಾಯಕನಾಗಿ ಭರ್ಜರಿ ಫೈಟ್‌ ಮಾಡಿದ್ದಾರೆ. ಸೂರ್ಯ ಈ ಬಾರಿ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಫ್ರಾನ್ಸಿಸ್ ಜತೆಗೆ ಕಂಗುವಾ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಚಿತ್ರ ತಯಾರಿಗೆ ತಂಡ ಸುಮಾರು ಎರಡೂವರೆ ವರ್ಷ ತೆಗೆದುಕೊಂಡಿದ್ದು, ಅವರ ಶ್ರಮ ಟ್ರೈಲರ್‌ನಲ್ಲಿ ಎದ್ದು ಕಾಣುತ್ತಿದೆ.
ವಿಶೇಷ ಎಂದರೆ ಬಾಲಿವುಡ್‌ ನಟ ಬಾಬ್ಬಿ ಡಿಯೋಲ್‌ ಈ ಚಿತ್ರದಲ್ಲಿ ವಿಲನ್‌ ಪಾತ್ರದಲ್ಲಿ ಅಬ್ಬರಿಸಿದ್ದಾರೆ. ನೋಟದಲ್ಲೇ ನಡುಕ ಹುಟ್ಟಿಸುವ ಖಳ ನಾಯಕನಾಗಿ ಅವರಲ್ಲಿ ಕಾಣಿಸಿಕೊಂಡಿದ್ದಾರೆ. ಹೊಸ ಟ್ರೈಲರ್‌ನಲ್ಲಿ ಸೂರ್ಯ ಮತ್ತು ಬಾಬ್ಬಿ ಡಿಯೋಲ್‌ ಮುಖಾಮುಖಿಯಾಗುವ ದೃಶ್ಯಗಳಿದ್ದು, ಭರ್ಜರಿ ಫೈಟಿಂಗ್‌ ದೃಶ್ಯಗಳಿರುವ ಸೂಚನೆ ನೀಡಿದೆ. ಜತೆಗೆ ಯುದ್ಧದ ದೃಶ್ಯಗಳು ʼಬಾಹುಬಲಿʼ ಚಿತ್ರವನ್ನು ನೆನಪಿಸುವಂತಿದೆ. ʼಕಂಗುವಾʼ ಈ ವರ್ಷದ ಬ್ಲಾಕ್‌ ಬ್ಲಸ್ಟರ್‌ ಹಿಟ್‌ ಆಗಲಿದೆ ಎಂದು ಸೂರ್ಯ ಅಭಿಮಾನಿಗಳು ಈಗಾಗಲೇ ಭವಿಷ್ಯ ನುಡಿದಿದ್ದಾರೆ.
ಸೂರ್ಯನಿಗೆ ನಾಯಕಿಯಾಗಿ ಬಾಲಿವುಡ್‌ ಬೆಡಗಿ ದಿಶಾ ಪಟಾನಿ ನಟಿಸಿದ್ದಾರೆ. ಈ ಮೂಲಕ ಕಾಲಿವುಡ್‌ಗೆ ಭರ್ಜರಿಯಾಗಿ ಎಂಟ್ರಿ ಕೊಟ್ಟಿದ್ದಾರೆ. ಯೋಗಿ ಬಾಬು, ಕೊವೈ ಸರಳಾ, ಆನಂದ್‌ರಾಜ್‌ ಮತ್ತಿತರರು ಪ್ರಮುಖ ಪಾತ್ರಗಲಲ್ಲಿ ಅಭಿನಯಿಸಿದ್ದಾರೆ. ಪ್ರೇಕ್ಷಕರನ್ನು 700 ವರ್ಷಗಳ ಹಿಂದಕ್ಕೆ ಕರೆದೊಯ್ಯಲಿರುವ ಈ ಸಿನಿಮಾ 3ಡಿ ಮತ್ತು 4ಡಿ ವರ್ಷನ್‍ಗಳಲ್ಲೂ ತೆರೆಗೆ ಬರಲಿದೆ.
ರಜನಿಕಾಂತ್‌ ಅಭಿನಯದ ʼಅಣ್ಣಾತೆʼ, ಅಜಿತ್‌ ನಟನೆಯ ʼವೀರಂʼ, ʼವೇದಾಲಂʼ, ʼವಿವೇಗಂʼ, ʼವಿಶ್ವಾಸಂʼ ಮೊದಲಾದ ಸೂಪರ್‌ ಹಿಟ್‌ ಚಿತ್ರಗಳನ್ನು ನಿರ್ದೇಶಿಸಿರುವ ಶಿವ ಇದೇ ಮೊದಲ ಬಾರಿಗೆ ಸೂರ್ಯನೊಂದಿಗೆ ಕೈ ಜೋಡಿಸಿರುವುದರಿಂದ ಸೆಟ್ಟೇರಿದಾಗಿನಿಂದಲೂ ಕಂಗುವ ನಿರೀಕ್ಷೆ ಮೂಡಿಸುವಲ್ಲಿ ಯಶಸ್ವಿಯಾಗಿತ್ತು. ಅದರಲ್ಲಿಯೂ ಮೊದಲ ಟ್ರೈಲರ್‌ನಲ್ಲಿ ಕಂಡು ಬಂದ ಸೂರ್ಯ ಮತ್ತು ಮೊಸಳೆಯ ಫೈಟಿಂಗ್‌ ದೃಶ್ಯ ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿತ್ತು. ಇದೀಗ ಕುತೂಹಲ ತಣಿಯಲು ಕೆಲವೇ ದಿನಗಳು ಬಾಕಿ ಉಳಿದಿವೆ.
ಈ ಸುದ್ದಿಯನ್ನೂ ಓದಿ: Kanguva First Review: ಬಿಡುಗಡೆ ಮುನ್ನವೇ ಹೊರಬಿತ್ತು ʼಕಂಗುವಾʼ ರಿವ್ಯೂ; ಹೇಗಿದೆ ಕಾಲಿವುಡ್‌ ಸ್ಟಾರ್‌ ಸೂರ್ಯ ಸಿನಿಮಾ?
