ಬೆಂಗಳೂರು: ಆ್ಯಕ್ಷನ್‌ ಪ್ರಿನ್ಸ್‌ ಧ್ರುವ ಸರ್ಜಾ (Dhruva Sarja) ಅಭಿಮಾನಿಗಳ 3 ವರ್ಷಗಳ ಕಾಯುವಿಕೆ ಕೊನೆಗೂ ಅಂತ್ಯಗೊಂಡಿದೆ. ಎ.ಪಿ.ಅರ್ಜುನ್‌ (A.P.Arjun) ನಿರ್ದೇಶನದ ʼಅದ್ಧೂರಿʼ ಚಿತ್ರದ ಬಳಿಕ ಧ್ರುವ ಸರ್ಜಾ ಮತ್ತೊಮ್ಮೆ ಅವರೊಂದಿಗೆ ಕೈಜೋಡಿಸಿದ ʼಮಾರ್ಟಿನ್‌ʼ ಸಿನಿಮಾ ತೆರೆಕಂಡಿದೆ. ದಸರಾ ಹಬ್ಬದ ಪ್ರಯುಕ್ತ ಅಕ್ಟೋಬರ್‌ 11ರಂದು ಸಿನಿಮಾ ತೆರೆಕಂಡಿದ್ದು, ಮೊದಲ ದಿನ ಗಳಿಸಿದ್ದೆಷ್ಟು? ಇಲ್ಲಿದೆ ವಿವರ (Martin Box Office Colletion).
ಬಹು ನಿರೀಕ್ಷಿತ ಚಿತ್ರವಾಗಿ ತೆರೆಕಂಡ ʼಮಾರ್ಟಿನ್‌ʼ ಪ್ರೇಕ್ಷಕರು ಮತ್ತು ವಿಮರ್ಶಕರಿಂದ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿದೆ. ಧ್ರುವ ಸರ್ಜಾ ಅಭಿಮಾನಿಗಳು ಹೊರತುಪಡಿಸಿ ಉಳಿದವರು ಅಷ್ಟಾಗಿ ಚಿತ್ರವನ್ನು ಮೆಚ್ಚಿಕೊಂಡಿಲ್ಲ. ಚಿತ್ರಕಥೆಯಲ್ಲಿ ಇನ್ನೋನೋ ಬೇಕಿತ್ತು ಎನ್ನುವುದು ಹಲವರ ಅಭಿಮತ. ಅದಾಗ್ಯೂ ಮೊದಲ ದಿನದ ಕಲೆಕ್ಷನ್‌ನಲ್ಲಿ ತೀರಾ ಹಿಂದೆ ಬಿದ್ದಿಲ್ಲ.
ವಿವಿಧ ಭಾಷೆಗಳಲ್ಲಿ ತೆರೆಕಂಡ ʼಮಾರ್ಟಿನ್‌ʼ ಸಿನಿಮಾದ ಮೊದಲ ದಿನದ ಗಳಿಕೆ ಸುಮಾರು 6.2 ಕೋಟಿ ರೂ. ಈ ಪೈಕಿ 5.5 ಕೋಟಿ ರೂ. ಕರ್ನಾಟಕವೊಂದರಿಂದಲೇ ಹರಿದು ಬಂದಿದೆ. ಹಿಂದಿ ಆವೃತ್ತಿ 25 ಲಕ್ಷ ರೂ., ತಮಿಳು ಆವೃತ್ತಿ 5 ಲಕ್ಷ ರೂ. ಮತ್ತು ತೆಲುಗು ಆವೃತ್ತಿ 4 ಲಕ್ಷ ರೂ. ಗಳಿಸಿದೆ. ಶನಿವಾರ ಮತ್ತು ಭಾನುವಾರ ರಜಾ ದಿನವಾಗಿರುವುದರಿಂದ ಸಿನಿಮಾದ ಕಲೆಕ್ಷನ್‌ ಹೆಚ್ಚಾಗುವ ನಿರೀಕ್ಷೆ ಇದೆ.
ʼಪೊಗರುʼ ಚಿತ್ರದಷ್ಟಿಲ್ಲ ಕಲೆಕ್ಷನ್‌
ಅದಾಗ್ಯೂ ʼಮಾರ್ಟಿನ್‌ʼ ಮೊದಲ ದಿನದ ಕಲೆಕ್ಷನ್‌ ವಿಚಾರದಲ್ಲಿ ʼಪೊಗರುʼ ಚಿತ್ರವನ್ನು ಮೀರಿಸುವಲ್ಲಿ ವಿಫಲವಾಗಿದೆ. ಧ್ರುವ ಸರ್ಜಾ-ರಶ್ಮಿಕಾ ಮಂದಣ್ಣ ಅಭಿನಯದ, 2021ರಲ್ಲಿ ತೆರೆಕಂಡ ʼಪೊಗರುʼ ಚಿತ್ರ ಮೊದಲ ದಿನವೇ 8.71ಕೋಟಿ ರೂ. ಬಾಚಿಕೊಂಡಿತ್ತು. ಆ ಮೂಲಕ ಧ್ರುವ ಸರ್ಜಾ ಅವರ ಕೆರಿಯರ್‌ನಲ್ಲಿ ಅತಿ ದೊಡ್ಡ ಓಪನರ್‌ ಎನಿಸಿಕೊಂಡಿದೆ. ʼಮಾರ್ಟಿನ್‌ʼಗೂ ಈ ದಾಖಲೆಯನ್ನು ಮೀರಲು ಸಾಧ್ಯವಾಗಿಲ್ಲ. ಆದರೆ ಈ ವರ್ಷ ತೆರೆಕಂಡ ದುನಿಯಾ ವಿಜಯ್‌ ಅಭಿನಯದ ʼಭೀಮʼ ಮತ್ತು ಗಣೇಶ್‌-ಮಾಳವಿಕಾ ನಾಯರ್‌ ನಟನೆಯ ʼಕೃಷ್ಣಂ ಪ್ರಣಯ ಸಖಿʼ ಚಿತ್ರದ ಮೊದಲ ದಿನದ ಕಲೆಕ್ಷನ್‌ ಅನ್ನು ಮೀರಿಸಿದೆ.
ʼಮಾರ್ಟಿನ್‌ʼ ಚಿತ್ರದಲ್ಲಿ ಧ್ರುವ ಸರ್ಜಾ ಅರ್ಜುನ್‌ ಸಕ್ಸೇನಾ ಮತ್ತು ಮಾರ್ಟಿನ್‌ ಎಂಬ ಎರಡು ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವೈಭವಿ ಶಾಂಡಿಲ್ಯ ನಾಯಕಿಯಾಗಿ ನಟಿಸಿದ್ದಾರೆ. ಅಚ್ಯುತ್‌ ಕುಮಾರ್‌, ಅನ್ವೇಷಿ ಜೈನ್‌, ಸುಕೃತಾ ವಾಗ್ಲೆ, ಚಿಕ್ಕಣ್ಣ, ಯೋಗೇಶ್‌, ಸಾಧು ಕೋಕಿಲ, ಮಾಳವಿಕಾ ಅವಿನಾಶ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಹಿರಿಯ ನಟ ಅರ್ಜುನ್‌ ಸರ್ಜಾ ಚಿತ್ರಕ್ಕೆ ಕಥೆ ಬರೆದಿದ್ದಾರೆ. ಉದಯ್‌ ಕೆ. ಮೆಹ್ತಾ ನಿರ್ಮಾಣದ ಈ ಚಿತ್ರಕ್ಕೆ ಮಣಿ ಶರ್ಮಾ ಸಂಗೀತ ನೀಡಿದ್ದು, ʼಕೆಜಿಎಫ್‌ʼ ಖ್ಯಾತಿಯ ರವಿ ಬಸ್ರೂರು ಹಿನ್ನೆಲೆ ಸಂಗೀತ ಒದಗಿಸಿದ್ದಾರೆ. ಚಿತ್ರದಲ್ಲಿನ ಆ್ಯಕ್ಷನ್‌ ದೃಶ್ಯಗಳಿಗೆ ಅಭಿಮಾನಿಗಳು ಮನ ಸೋತಿದ್ದು, ಮುಂದಿನ ದಿನಗಳಲ್ಲಿ ಎಷ್ಟು ಗಳಿಸಲಿದೆ ಎನ್ನುವ ಕುತೂಹಲ ಮೂಡಿದೆ. ರಜನಿಕಾಂತ್‌-ಅಮಿತಾಭ್‌ ಬಚ್ಚನ್‌ ಅಭಿನಯದ ತಮಿಳು ಚಿತ್ರ ʼವೆಟ್ಟೈಯಾನ್‌ʼ ಕೂಡ ತೆರೆಕಂಡಿದ್ದು, ಪ್ರಬಲ ಸ್ಪರ್ಧೆ ಒಡ್ಡಿದೆ.
ಈ ಸುದ್ದಿಯನ್ನೂ ಓದಿ: Vettaiyan Box Office: ಬಾಕ್ಸ್‌ ಆಫೀಸ್‌ನಲ್ಲಿ ರಜನಿಕಾಂತ್‌-ಬಿಗ್‌ ಬಿ ಮೋಡಿ ಹೇಗಿದೆ? ಇಲ್ಲಿದೆ ʼವೆಟ್ಟೈಯಾನ್‌ʼ ಕಲೆಕ್ಷನ್‌ ವಿವರ
