ಚೆನ್ನೈ: ಪರಭಾಷೆಯಲ್ಲಿ ಮಿಂಚುತ್ತಿರುವ ಕನ್ನಡ ಮೂಲದ ಕಲಾವಿದರ ಸಂಖ್ಯೆ ದೊಡ್ಡದಿದೆ. ಈ ಪೈಕಿ ಆಶಿಕಾ ರಂಗನಾಥ್‌ (Ashika Ranganath) ಕೂಡ ಒಬ್ಬರು. ಈಗಾಲೇ ತೆಲುಗಿನಲ್ಲಿ ಮೋಡಿ ಮಾಡಿರುವ ಈ ಚೆಲುವೆ ಇದೀಗ ತಮಿಳಿನಲ್ಲಿ ಗಮನ ಸೆಳೆಯಲು ಸಜ್ಜಾಗಿದ್ದಾರೆ. ಕಾಲಿವುಡ್‌ ನಟ ಸಿದ್ಧಾರ್ಥ್ (Siddharth) ಜತೆ ಮೊದಲ ಬಾರಿಗೆ ಆಶಿಕಾ ನಟಿಸಿರುವ ‘ಮಿಸ್‌ ಯೂ’ ತಮಿಳು ಚಿತ್ರದ ಟೀಸರ್‌ ರಿಲೀಸ್‌ ಆಗಿದೆ. ಸಿದ್ಧಾರ್ಥ್-ಆಶಿಕಾ ಜೋಡಿಯ ಈ ಭಾವನಾತ್ಮಕ ಜರ್ನಿ ಸಿನಿ ಪ್ರೇಕ್ಷಕರನ್ನು ಆಕರ್ಷಿಸಿದೆ. ಈ ಮೂಲಕ ಆಶಿಕಾ ತಮಿಳಿನಲ್ಲಿ ಗಟ್ಟಿಯಾಗಿ ನೆಲೆಯೂರುವ ಲಕ್ಷಣ ಗೋಚರಿಸುತ್ತಿದೆ (Miss You Teaser).
ʼಚಿತ್ತಾʼ ಮತ್ತು ಕಮಲ್‌ ಹಾಸನ್‌ ಅಭಿನಯದ ʼಇಂಡಿಯನ್‌ 2ʼ ಚಿತ್ರಗಳಲ್ಲಿ ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಂಡು ಗಮನ ಸೆಳೆದಿದ್ದ ಸಿದ್ಧಾರ್ಥ್ ಮತ್ತೊಮ್ಮೆ ಲವರ್‌ ಬಾಯ್‌ ಆಗಿ ʼಮಿಸ್‌ ಯೂʼ ಸಿನಿಮಾದಲ್ಲಿ ಅಭಿನಯಿಸಿದ್ದಾರೆ. ರೊಮ್ಯಾಂಟಿಕ್‌ ಪಾತ್ರಗಳ ಮೂಲಕವೇ ಜನಪ್ರಿಯರಾಗಿದ್ದ ಸಿದ್ಧಾರ್ಥ್ ಮತ್ತೊಮ್ಮೆ ಅದೇ ಜಾನರ್‌ನ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇನ್ನು ಈ ಟೀಸರ್‌ನಲ್ಲಿ ಆಶಿಕಾ ರಂಗನಾಥ್‌ ಪಕ್ಕದ್ಮನೆ ಹುಡುಗಿಯಂತೆ ಕಾಣಿಸಿಕೊಂಡಿದ್ದು, ಅವರ ಸರಳತೆಗೆ ಹಲವರು ಜೈ ಎಂದಿದ್ದಾರೆ. ಟೀಸರ್‌ ಮೂಲಕ ಇದೊಂದು ಔಟ್‌ ಆ್ಯಂಡ್‌ ಔಟ್‌ ಲವ್‌ ಸ್ಟೋರಿ ಎನ್ನುವುದು ಸಾಬೀತಾಗಿದೆ.
ʼಮಿಸ್‌ ಯೂʼ ಚಿತ್ರಕ್ಕೆ ಎನ್‌.ರಾಜಶೇಖರ್‌ ಆ್ಯಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಇವರು ಈ ಹಿಂದೆ ʼಮಾಪ್ಲ ಸಿಂಗಂʼ ಮತ್ತು ʼಕಳತ್ತಿಲ್‌ ಸಂದಿಪ್ಪೊಂʼ ಸಿನಿಮಾಗಳನ್ನು ನಿರ್ದೇಶಿಸಿದ್ದಾರೆ. ಕರುಣಾಕರನ್‌, ಮಾರನ್‌, ಬಾಲ ಸರವಣನ್‌, ಅನುಪಮಾ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ನ. 29ರಂದು ಚಿತ್ರ ತೆರೆಗೆ ಬರಲಿದೆ.
ಆಶಿಕಾ ಅಭಿನಯದ 2ನೇ ತಮಿಳು ಚಿತ್ರ
2016ರಲ್ಲಿ ಬಿಡುಗಡೆಯಾದ ʼಕ್ರೇಜಿ ಬಾಯ್‌ʼ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟ ಆಶಿಕಾ 2022ರಲ್ಲಿ ತೆರೆಕಂಡ ʼಪಟ್ಟತು ಅರಸನ್‌ʼ ಸಿನಿಮಾದಲ್ಲಿ ಮೂಲಕ ಕಾಲಿವುಡ್‌ಗೆ ಎಂಟ್ರಿ ನೀಡಿದ್ದರು. ಅಥರ್ವ ನಾಯಕನಾಗಿ ಕಾಣಿಸಿಕೊಂಡಿದ್ದ ಈ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಅಷ್ಟೇನೂ ಸದ್ದು ಮಾಡದಿದ್ದರೂ ಆಶಿಕಾ ಸಿನಿಪ್ರಿಯರ ಗಮನ ಸೆಳೆದಿದ್ದರು. 2023ರಲ್ಲಿ ತೆರೆಕಂಡ ʼಅಮಿಗೋಸ್‌ʼ ಆಶಿಕಾ ನಟನೆಯ ಮೊದಲ ತೆಲುಗು ಚಿತ್ರ. ಈ ವರ್ಷ ನಾಗಾರ್ಜುನ ನಟನೆಯ ʼನಾ ಸಾಮಿ ರಂಗʼ ತೆಲುಗು ಚಿತ್ರದಲ್ಲಿ ಅಭಿನಯಿಸಿದ್ದರು. ಇದೀಗ 2ನೇ ತಮಿಳು ಚಿತ್ರ ʼಮಿಸ್‌ ಯೂʼ ಮೂಲಕ ಕಾಲಿವುಡ್‌ನಲ್ಲಿ ಛಾಪು ಮೂಡಿಸಲು ಮುಂದಾಗಿದ್ದಾರೆ. ಸದ್ಯ ಅವರು ಸಿಂಪಲ್‌ ಸುನಿ ನಿರ್ದೇಶನದ ಕನ್ನಡದ ʼಗತ ವೈಭವʼ, ತಮಿಳಿನಲ್ಲಿ ಕಾರ್ತಿ ನಟನೆಯ ʼಸರ್ದಾರ್‌ 2ʼ ಮತ್ತು ಚಿರಂಜೀವಿ ಜತೆ ತೆಲುಗಿನ ʼವಿಶ್ವಂಭರʼ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಸಿದ್ಧಾರ್ಥ್ ಪ್ರಸ್ತುತ ಶಶಿಕಾಂತ್‌ ನಿರ್ದೇಶನದ ತಮಿಳು ಚಿತ್ರದ ʼದಿ ಟೆಸ್ಟ್‌ʼನಲ್ಲಿ ನಟಿಸುತ್ತಿದ್ದಾರೆ. ಆರ್‌. ಮಾಧವನ್‌ ಮತ್ತು ನಯನತಾರಾ ಇದರ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಇನ್ನು ಶ್ರೀ ಗಣೇಶ್‌ ಅವರ ಮುಂದಿನ ಸಿನಿಮಾಕ್ಕೂ ಸಿದ್ಧಾರ್ಥ್ ನಾಯಕ.
ಈ ಸುದ್ದಿಯನ್ನೂ ಓದಿ: Pushpa 2: ಅಲ್ಲು ಅರ್ಜುನ್‌ ಜತೆ ಸೊಂಟ ಬಳುಕಿಸಿದ ಶ್ರೀಲೀಲಾ; ‘ಪುಷ್ಪ 2’ ಚಿತ್ರದ ವಿಶೇಷ ಹಾಡಿನ ಫೋಟೊ ಲೀಕ್‌
