ಹೈದರಾಬಾದ್‌: ಸದ್ಯ ಇಡೀ ಭಾರತೀಯ ಚಿತ್ರರಂಗವೇ ಕುತೂಹಲದಿಂದ ಕಾಯುತ್ತಿರುವ ಚಿತ್ರ ಅಲ್ಲು ಅರ್ಜುನ್‌ (Allu Arjun)-ರಶ್ಮಿಕಾ ಮಂದಣ್ಣ (Rashmika Mandanna)-ಸುಕುಮಾರ್ (Sukumar) ಕಾಂಬಿನೇಷನ್‌ನ ‘ಪುಷ್ಪ 2’ (Pushpa 2 Movie). ಅಲ್ಲು ಅರ್ಜುನ್‌ ಅವರ ವೃತ್ತಿ ಜೀವನಕ್ಕೆ ಹೊಸದೊಂದು ಮೈಲೇಜ್ ತಂದಿತ್ತ, ರಾಷ್ಟ್ರ ಪ್ರಶಸ್ತಿಯ ಕೊಡುಗೆ ನೀಡಿದ ʼಪುಷ್ಪʼ ಚಿಂತ್ರದ ಮುಂದುವರಿದ ಭಾಗ ಇದು. ತೆಲುಗಿನ ಕಮರ್ಷಿಯಲ್‌ ಚಿತ್ರಗಳ ನಿರ್ದೇಶಕ ಸುಕುಮಾರ್ ಅವರ ಕೈಯಲ್ಲಿ ಪಕ್ಕಾ ಮಾಸ್ ಆಗಿ ಸಿನಿಮಾ ಮೂಡಿಬಂದಿತ್ತು. ಪ್ರೇಕ್ಷಕರಿಗೆ ಅಗತ್ಯವಾದ ಆ್ಯಕ್ಷನ್‌, ಗ್ಲಾಮರ್, ರೊಮ್ಯಾನ್ಸ್, ಸಸ್ಪೆನ್ಸ್, ಸೆಂಟಿಮೆಂಟ್‌, ಹಾಡು ಹೀಗೆ ಎಲ್ಲ ಮಸಾಲೆಗಳು, ಕಮರ್ಷಿಯಲ್‌ ಅಂಶಗಳು ಅದರಲ್ಲಿದ್ದವು. ಸುದೀರ್ಘ ಕಥೆಯಾಗಿದ್ದರಿಂದ ನಿರ್ದೇಶಕ ಸುಕುಮಾರ್ 2 ಭಾಗಗಳಲ್ಲಿ ಚಿತ್ರ ತೆರೆಗೆ ತರುವುದಾಗಿ ಮೊದಲೇ ಘೋಷಿಸಿದ್ದರು. ಹೀಗಾಗಿ ಮೊದಲ ಭಾಗ ಕುತೂಹಲ ಘಟ್ಟದಲ್ಲಿ ಕೊನೆಯಾಗಿತ್ತು. ಅಂದಿನಿಂದ 2ನೇ ಭಾಗಕ್ಕಾಗಿ ಫ್ಯಾನ್ಸ್ ಕಾದು ಕುಳಿತಿದ್ದರು. ಸುಮಾರು 3 ವರ್ಷಗಳ ಕಾಯುವಿಕೆ ಕೊನೆಯಾಗುತ್ತ ಬಂದಿದ್ದು, ಡಿ. 5ರಂದು ಸಿನಿಮಾ ತೆರೆಗೆ ಅಪ್ಪಳಿಸಲಿದೆ.
ಹೀಗೆ ಚಿತ್ರ ಬಿಡುಗಡೆಗೆ ಸುಮಾರು 10 ದಿನ ಬಾಕಿ ಇರುವಾಗ ಚಿತ್ರತಂಡ ವಿಶೇಷ ಹಾಡನ್ನು ರಿಲೀಸ್ ಮಾಡಿದೆ. ಅಲ್ಲು ಅರ್ಜುನ್‌ ಮತ್ತು ಕನ್ನಡತಿ ಶ್ರೀಲೀಲಾ ಭರ್ಜರಿಯಾಗಿ ಹೆಜ್ಜೆ ಹಾಕಿರುವ ʼಕಿಸಿಕ್‌ʼ ಐಟಂ ಸಾಂಗ್ ಬಿಡುಗಡೆಯಾಗಿದ್ದು, ಇಂಟರ್‌ನೆಟ್‌ನಲ್ಲಿ ಭಾರಿ ಸದ್ದು ಮಾಡುತ್ತಿದೆ.
ದೇವಿಶ್ರೀ ಪ್ರಸಾದ್ ಸಂಗೀತ
ʼಪುಷ್ಪʼ ಚಿತ್ರದಲ್ಲಿ ಅದರ ಸಂಗೀತ ಕೂಡ ಗಮನ ಸೆಳೆದಿತ್ತು. ದೇವಿಶ್ರೀ ಪ್ರಸಾದ್ ನೀಡಿದ ಸಂಗೀತದ ಶಕ್ತಿಯೇ ಹಾಗಿತ್ತು. ಅದರ ಪ್ರತಿಯೊಂದು ಹಾಡು ಕೂಡ ಹಿಟ್ ಲಿಸ್ಟ್ ಸೇರಿತ್ತು. ಈಗಲೂ ಹಲವರ ಫೆವರೇಟ್ ಲಿಸ್ಟ್‌ನಲ್ಲಿ ಈ ಸಿನಿಮಾದ ಹಾಡುಗಳಿವೆ. ಅದರಲ್ಲಿಯೂ ಸಮಂತಾ ಕಾಣಿಸಿಕೊಂಡ ʼಊ ಅಂಟಾವಾʼ ಹಾಡು ಪಡ್ಡೆಗಳ ಮೋಸ್ಟ್ ಫೆವರೇಟ್ ಎನಿಸಿಕೊಂಡಿದೆ. ಕ್ಯಾಚಿ ಟ್ಯೂನ್‌ಗೆ ಸಮಂತಾ ಮಾದಕವಾಗಿ ಹೆಜ್ಜೆ ಹಾಕಿ ಈ ಹಾಡಿಗೆ ಗ್ಲಾಮರ್ ಟಚ್ ಕೊಟ್ಟಿದ್ದರು. ಹೀಗಾಗಿ ʼಪುಷ್ಪ 2ʼ ಚಿತ್ರದಲ್ಲಿಯೂ ಅಭಿಮಾನಿಗಳು ಇಂತಹ ಸ್ಪೆಷಲ್ ಸಾಂಗ್ ನಿರೀಕ್ಷಿಸಿದ್ದರು.
ಅಭಿಮಾನಿಗಳ ನಿರೀಕ್ಷೆಯನ್ನು ಹುಸಿಗೊಳಿಸದೆ ಈ ಸಿನಿಮಾದಲ್ಲಿಯೂ ವಿಶೇಷ ಹಾಡು ಇರಲಿದೆ ಎಂದು ನಿರ್ದೇಶಕ ಸುಕುಮಾರ್ ಆರಂಭದಲ್ಲಿಯೇ ಘೋಷಿಸಿದ್ದರು. ಅದಕ್ಕೆ ತಕ್ಕಂತೆ ಈ ಬಾರಿ ಹಾಡಿನಲ್ಲಿ ಯಾರು ಕಾಣಿಸಿಕೊಳ್ಳಲಿದ್ದಾರೆ ಎನ್ನುವ ಪ್ರಶ್ನೆ ಅಭಿಮಾನಿಗಳನ್ನು ಕಾಡುತ್ತಿತ್ತು. ವಿಶೇಷವಾಗಿ ಈ ಹಾಡಿನ ಬಗ್ಗೆಯೇ ನಿರೀಕ್ಷೆ ಹೆಚ್ಚೇ ಇರುವುದರಿಂದ ಚಿತ್ತತಂಡ ಅಳೆದೂ ತೂಗಿ ನಟಿಯನ್ನು ಆಯ್ಕೆ ಮಾಡಿದೆ. ಶ್ರೀಲೀಲಾ ಮೂಲತಃ ಡ್ಯಾನ್ಸರ್ ಆಗಿರುವುದರಿಂದ ದೇವಿಶ್ರೀ ಪ್ರಸಾದ್ ಅವರ ಭರ್ಜರಿ ಮ್ಯೂಸಿಕ್‌ಗೆ ಅಲ್ಲು ಅರ್ಜುನ್‌ ಜತೆ ಮೈಚಳಿ ಬಿಟ್ಟ ಕುಣಿದಿದ್ದಾರೆ.
ಈಗಾಗಲೇ ಈ ಹಾಡನ್ನು ಸಮಂತಾ ಕುಣಿದಿರುವ ʼಊ ಅಂಟಾವಾʼ ಹಾಡಿನೊಂದಿಗೆ ಹೋಲಿಕೆ ಮಾಡಲಾಗುತ್ತಿದೆ. ಕೆಲವರು ಸಮಂತಾ ಹಾಡೇ ಚೆನ್ನಾಗಿತ್ತು ಎಂದರೆ ಇನ್ನು ಕೆಲವರು ಶ್ರೀಲೀಲಾಗೆ ಫುಲ್ ಮಾರ್ಕ್ಸ್‌ ಕೊಟ್ಟಿದ್ದಾರೆ. ಒಟ್ಟಿನಲ್ಲಿ ಈ ಹಾಡು ಕೂಡ ಹಿಟ್ ಲಿಸ್ಟ್ ಸೇರುವುದಲ್ಲಿ ಸಂದೇಹವೇ ಇಲ್ಲ ಎಂದು ಸಿನಿಮಾ ವಿಶ್ಲೇಷಕರು ಭವಿಷ್ಯ ನುಡಿದಿದ್ದಾರೆ.
ಗಣೇಶ್ ಆಚಾರ್ಯ ಕೊರಿಯೋಗ್ರಾಫಿ
ಬಾಲಿವುಡ್‌ನ ʼಚಿಕ್ನಿ ಚಮೇಲಿʼ, ʼಪುಷ್ಪʼ ಚಿತ್ರದ ʼಊ ಅಂಟಾವಾʼ ಮುಂತಾದ ಸೂಪರ್ ಹಿಟ್ ಹಾಡುಗಳ ಕೊರಿಯೊಗ್ರಾಫರ್ ಗಣೇಶ್ ಆಚಾರ್ಯ ʼಕಿಸಕ್‌ʼಗೂ ನೃತ್ಯ ನಿರ್ದೇಶನ ಮಾಡಿದ್ದಾರೆ. ಸದ್ಯ ಅಲ್ಲು ಅರ್ಜುನ್‌ ಮತ್ತು ಶ್ರೀಲೀಲಾ ಅವರ ಈ ಹಾಡು ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.
ಈ ಸುದ್ದಿಯನ್ನೂ ಓದಿ: Pushpa 2 Trailer: ಮತ್ತೆ ರೂಲ್‌ ಮಾಡಲು ಅಲ್ಲು ಅರ್ಜುನ್‌-ರಶ್ಮಿಕಾ ರೆಡಿ; ‘ಪುಷ್ಪ 2’ ಪವರ್‌ಫುಲ್‌ ಟ್ರೈಲರ್‌ ಔಟ್‌
