ಹೈದರಾಬಾದ್‌: ʼಪುಷ್ಪ 2ʼ (Pushpa 2). ಸದ್ಯ ಎಲ್ಲಿ ನೋಡಿದರೂ ಅಲ್ಲು ಅಲ್ಲು ಅರ್ಜುನ್‌ (Allu Arjun) ಮತ್ತು ಕನ್ನಡತಿ ರಶ್ಮಿಕಾ ಮಂದಣ್ಣ (Rashmika Mandanna) ಅಭಿನಯದ ಈ ಚಿತ್ರದ್ದೇ ಸುದ್ದಿ. ಈ ವರ್ಷದ ಬಹು ನಿರೀಕ್ಷಿತ ಚಿತ್ರಗಳಲ್ಲಿ ಒಂದಾಗಿರುವ ಟಾಲಿವುಡ್‌ನ ‘ಪುಷ್ಪ 2’ ಬಿಡುಗಡೆಗೆ ಸಜ್ಜಾಗಿದೆ. ಡಿ. 5ರಂದು ವಿವಿಧ ಭಾಷೆಗಳಲ್ಲಿ ಅದ್ಧೂರಿಯಾಗಿ ಸಿನಿಮಾ ತೆರೆಗೆ ಬರಲಿದೆ. ಈ ಚಿತ್ರದ ಜತೆಗೆ ಹೆಚ್ಚು ಚರ್ಚೆಯಾಗುತ್ತಿರುವುದು ಇದರಲ್ಲಿನ ಹಾಡುಗಳು. ಅದರಲ್ಲಿಯೂ ಐಟಂ ಸಾಂಗ್‌ ಹಲವು ದಿನಗಳಿಂದ ಹಾಟ್‌ ಟಾಪಿಕ್‌ ಆಗಿದೆ. ಯಾರು ಈ ವಿಶೇಷ ಹಾಡಿನಲ್ಲಿ ಅಲ್ಲು ಅರ್ಜುನ್‌ ಜತೆ ಕಾಣಿಸಿಕೊಳ್ಳಲಿದ್ದಾರೆ ಎನ್ನುವ ಮಿಲಿಯನ್‌ ಡಾಲರ್‌ ಪ್ರಶ್ನೆಗೆ ಸದ್ಯ ಉತ್ತರ ಸಿಕ್ಕಿದೆ.
ಕನ್ನಡತಿ ಶ್ರೀಲೀಲಾ (Sreeleela) ʼಪುಷ್ಪ 2ʼ ಚಿತ್ರದ ವಿಶೇಷ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಸದ್ಯ ಚಿತ್ರೀಕರಣದ ಫೋಟೊ ಲೀಕ್ ಆಗಿದ್ದು, ಇಂಟರ್‌ನೆಟ್‌ನಲ್ಲಿ ಸದ್ದು ಮಾಡುತ್ತಿದೆ. ಶ್ರೀಲೀಲಾ ಅವರ ಲುಕ್‌ಗೆ ಫ್ಯಾನ್ಸ್‌ ಫಿದಾ ಆಗಿದ್ದಾರೆ. ಕಪ್ಪು ಬಣ್ಣದ ಬಟ್ಟೆ ತೊಟ್ಟು ಶ್ರೀಲೀಲಾ ಗಮನ ಸೆಳೆದರೆ, ಅಲ್ಲು ಅರ್ಜುನ್‌ ಕೇಸರಿ ಬಣ್ಣದ ಪ್ಯಾಂಟ್‌-ಷರ್ಟ್‌ ತೊಟ್ಟು ಗಮನ ಮಿಂಚಿದ್ದಾರೆ. ಈ ಹಾಡು ಬ್ಲಾಕ್‌ ಬಸ್ಟರ್‌ ಹಿಟ್‌ ಆಗಲಿದೆ ಎಂದು ಅಭಿಮಾನಿಗಳು ಈಗಾಗಲೇ ಭವಿಷ್ಯ ನುಡಿದಿದ್ದಾರೆ. ಸ್ಯಾಂಡಲ್‌ವುಡ್‌ನಿಂದ ಟಾಲಿವುಡ್‌ಗೆ ಹಾರಿ ಬಂಪರ್‌ ಅವಕಾಶಗಳನ್ನು ಬಾಚಿಕೊಳ್ಳುತ್ತಿರುವ ಶ್ರೀಲೀಲಾ ಮತ್ತು ಅಲ್ಲು ಅರ್ಜುನ್‌ ಇದೇ ಮೊದಲ ಬಾರಿಗೆ ತೆರೆ ಹಂಚಿಕೊಳ್ಳುತ್ತಿದ್ದಾರೆ. ಇಬ್ಬರೂ ಉತ್ತಮ ಡ್ಯಾನ್ಸರ್‌ ಆಗಿರುವುದರಿಂದ ನಿರೀಕ್ಷೆ ಹೆಚ್ಚೇ ಇದೆ. ವಿಶೇಷ ಎಂದರೆ ಈ ಚಿತ್ರದಲ್ಲಿ ನಾಯಕಿಯಾಗಿ ಮತ್ತೊಬ್ಬ ಕನ್ನಡತಿ ರಶ್ಮಿಕಾ ಮಂದಣ್ಣ ಮುಂದುವರಿದಿದ್ದಾರೆ.
Leaked pic from pushpa2 item song #Pushpa2TheRuleTrailer#AlluArjun𓃵 and #sreeleela pic.twitter.com/MI5HLv9eQ0
— Asha (@I_am_Asha16) November 8, 2024
ಹಲವು ನಟಿಯರ ಹೆಸರು ಕೇಳಿ ಬಂದಿತ್ತು
2021ರಲ್ಲಿ ತೆರೆಕಂಡ ʼಪುಷ್ಪʼ ಸಿನಿಮಾದ ಗೆಲುವಿನಲ್ಲಿ ಅದರ ಸಂಗೀತವೂ ಪ್ರಧಾನ ಪಾತ್ರ ವಹಿಸಿತ್ತು. ಚಿತ್ರದ ಎಲ್ಲ ಹಾಡುಗಳೂ ಹಿಟ್‌ ಆಗಿದ್ದವು. ದೇವಿಶ್ರೀ ಪ್ರಸಾದ್‌ ಅವರ ಸಂಗೀತದ ಮ್ಯಾಜಿಕ್‌ ಅಂತಹದ್ದೊಂದು ಮೋಡಿ ಮಾಡಿತ್ತು. ಅದರಲ್ಲಿಯೂ ಸಮಂತಾ ಕಾಣಿಸಿಕೊಂಡಿದ್ದ ʼಊ ಅಂಟಾಮʼ ಐಟಂ ಹಾಡು ಇಂದಿಗೂ ಪಡ್ಡೆಗಳ ಹಾಟ್‌ ಫೆವರೇಟ್‌ ಎನಿಸಿಕೊಂಡಿದೆ. ಇದೇ ಕಾರಣಕ್ಕೆ ʼಪುಷ್ಪʼದ ಸೀಕ್ವೆಲ್‌ ಆಗಿರುವ ʼಪುಷ್ಪ 2ʼ ಸಿನಿಮಾದ ಸ್ಪೆಷಲ್‌ ಹಾಡು ಆರಂಭದಲ್ಲಿಯೇ ಕುತೂಹಲ ಕೆರಳಿಸಿತ್ತು.
ಆರಂಭದಲ್ಲಿ ಈ ಐಟಂ ಸಾಂಗ್‌ನಲ್ಲಿ ಬಾಲಿವುಡ್‌ ನಟಿಯರಾದ ಶ್ರದ್ಧಾ ಕಪೂರ್‌, ತೃಪ್ತಿ ಡಿಮ್ರಿ, ನೋರಾ ಫತೇಹಿ, ದಿಶಾ ಪಠಾಣಿ ಪೈಕಿ ಒಬ್ಬರು ಹೆಜ್ಜೆ ಹಾಕಲಿದ್ದಾರೆ ಎನ್ನಲಾಗಿತ್ತು. ಮಾತ್ರವಲ್ಲ ಸಮಂತಾ ಕೂಡ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿತ್ತು. ಇದೀಗ ಈ ಗೊಂದಲಗಳೆಲ್ಲ ನಿವಾರಣೆಯಾಗಿದೆ. ಬೆಂಗಳೂರು ಹುಡುಗಿ ಶ್ರೀಲೀಲಾಗೆ ಈ ಚಾನ್ಸ್‌ ಒಲಿದಿದೆ. ಈ ಹಿಂದೆ ಸಂದರ್ಶನವೊಂದರಲ್ಲಿ ಶ್ರೀಲೀಲಾ ಐಟಂ ಸಾಂಗ್‌ ಮಾಡುವುದಿಲ್ಲ ಎಂದಿದ್ದರು. ಆದರೆ ದಿಢೀರ್‌ ಆಗಿ ಮನಸ್ಸು ಬದಲಾಯಿಸಿದ್ದು ಏಕೆ ಎನ್ನುವ ಪ್ರಶ್ನೆಗೆ ಇನ್ನೂ ಉತ್ತರ ಸಿಕ್ಕಿಲ್ಲ.
ಸುಕುಮಾರ್ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ʼಪುಷ್ಪ 2ʼ ಸಿನಿಮಾದ ಬಹುತೇಕ ಚಿತ್ರೀಕರಣ ಪೂರ್ಣಗೊಂಡಿದೆ. ಈ ಸಿನಿಮಾದ ಮುಖ್ಯ ಪಾತ್ರಗಳಲ್ಲಿ ಫಹದ್ ಫಾಸಿಲ್, ಡಾಲಿ ಧನಂಜಯ್, ಜಗಪತಿ ಬಾಬು, ಪ್ರಕಾಶ್ ರಾಜ್, ಸುನೀಲ್ ಮತ್ತು ಅನಸೂಯಾ ನಟಿಸುತ್ತಿದ್ದಾರೆ.
ಟ್ರೈಲರ್‌ ಯಾವಾಗ?
ಸದ್ಯದಲ್ಲೇ ಚಿತ್ರದ ಟ್ರೈಲರ್‌ ರಿಲೀಸ್ ಆಗಲಿದೆ. ಈ ಹಿಂದೆ ದೀಪಾವಳಿ ವೇಳೆ ಟ್ರೈಲರ್‌ ಹೊರ ಬರಲಿದೆ ಎನ್ನಲಾಗಿತ್ತು. ನ. 17ರಂದು ‘ಪುಷ್ಪ 2’ ಟ್ರೈಲರ್‌ ರಿಲೀಸ್ ಆಗುವ ಸಾಧ್ಯತೆ ಇದೆಯಂತೆ. ಈ ಬಗ್ಗೆ ಶೀಘ್ರವೇ ತಂಡ ಘೋಷಣೆ ಮಾಡಲಿದೆ.
ಈ ಸುದ್ದಿಯನ್ನೂ ಓದಿ: Pushpa 2: ʼಪುಷ್ಪ 2ʼ ಚಿತ್ರತಂಡದಿಂದ ಫ್ಯಾನ್ಸ್‌ಗೆ ದೀಪಾವಳಿ ಗಿಫ್ಟ್‌; ಹೊಸ ಪೋಸ್ಟರ್‌ನಲ್ಲಿ ಮಿಂಚಿದ ಅಲ್ಲು ಅರ್ಜುನ್‌-ರಶ್ಮಿಕಾ ಮಂದಣ್ಣ
