ಹೈದರಾಬಾದ್‌: ದಕ್ಷಿಣ ಭಾರತ ಮಾತ್ರವಲ್ಲ ಇಡೀ ಭಾರತೀಯ ಚಿತ್ರರಂಗವೇ ನಿರೀಕ್ಷೆಯಿಂದ ಕಾದು ಕುಳಿತಿರುವ ಚಿತ್ರ ಅಲ್ಲು ಅರ್ಜುನ್‌ (Allu Arjun) ಅವರ ʼಪುಷ್ಪ 2ʼ. ತೆಲುಗಿನ ಈ ಪ್ಯಾನ್ ಇಂಡಿಯಾ ಚಿತ್ರದ ಟ್ರೈಲರ್‌ ಇದೀಗ ರಿಲೀಸ್ ಆಗಿದೆ (Pushpa 2 Trailer). ಇದಕ್ಕಾಗಿ ಕಣ್ಣಿಗೆ ಎಣ್ಣೆ ಬಿಟ್ಟುಕೊಂಡು ಕಾದು ಕುಳಿತ ಅಭಿಮಾನಿಗಳಿಗೆ ಪುಷ್ಪ ಚಿತ್ರತಂಡ ಭರ್ಜರಿ ಉಡುಗೊರೆ ನೀಡಿದೆ. ಬಿಹಾರದ ಪಾಟ್ನಾದಲ್ಲಿಆಯೋಜಿಸಿದ್ದ ಅದ್ಧೂರಿ ಕಾರ್ಯಕ್ರಮದಲ್ಲಿ ಸಿನಿಮಾ ತಂಡ ಹಾಜರಿದ್ದು, ಟ್ರೈಲರ್‌ ಬಿಡುಗಡೆಗೊಳಿಸಿದೆ. ಟ್ರೈಲರ್‌ನಲ್ಲಿ ಭರಪೂರ ಆ್ಯಕ್ಷನ್‌ ದೃಶ್ಯಗಳು ಕಾಣಿಸಿಕೊಂಡಿದ್ದು, ಮತ್ತೊಮ್ಮೆ ಅಲ್ಲು ಅರ್ಜುನ್‌ ಮಾಸ್ ಮಹಾರಾಜನಾಗಿ ಅಬ್ಬರಿಸಿದ್ದಾರೆ. ರಶ್ಮಿಕಾ ಮಂದಣ್ಣ (Rashmika Mandanna) ಶ್ರೀವಲ್ಲಿಯಾಗಿ ಮೋಡಿ ಮಾಡಿದ್ದಾರೆ. ಈ ಬಾರಿ ಡಬಲ್‌ ಮಾಸ್ ಆಗಿ ಕಂಡು ಬಂದಿರುವ ಪುಷ್ಪ ಬೆಂಕಿಯಲ್ಲ ಬದಲಾಗಿ ಕಾಡಿನ ಬೆಂಕಿಯಾಗಿ ಪ್ರಜ್ವಲಿಸಿದ್ದಾನೆ.
ಇದುವೆರೆಗಿನ ನಿರೀಕ್ಷೆಯನ್ನು ದುಪ್ಪಟ್ಟುಗೊಳಿಸುವಂತೆ ಟ್ರೈಲರ್‌ ಮೂಡಿ ಬಂದಿದೆ. ಡಿ. 5ರಂದು ತೆರೆ ಕಾಣಲಿರುವ ಚಿತ್ರದ ಮೇಲಿನ ಕೂತೂಹಲ ಇನ್ನಷ್ಟು ಹೆಚ್ಚಾಗಿದೆ. 2021ರಲ್ಲಿ ತೆರೆಕಂಡ ʼಪುಷ್ಪʼ ಚಿತ್ರದ ಸೀಕ್ವೆಲ್ ಆಗಿರುವ ಇದರಲ್ಲಿ ಬಹುತೇಕ ಅದೇ ಕಲಾವಿದರು ಮುಂದುವರಿದಿದ್ದಾರೆ. ಫಹದ್ ಫಾಸಿಲ್ ಟ್ರೈಲರ್‌ನಲ್ಲಿ ಗಮನ ಸೆಳೆದಿದ್ದಾರೆ. ಅಲ್ಲು ಅರ್ಜುನ್‌ ಹೇಳಿರುವ ʼʼಪುಷ್ಪರಾಜ್‌ನ ಖದರು ನ್ಯಾಷನಲ್‌ ಅಲ್ಲ, ಇಂಟರ್‌ನ್ಯಾಷನಲ್‌ʼʼ ಮುಂತಾದ ಪವರ್‌ಫುಲ್‌ ಡೈಲಾಗ್‌ ಕೇಳಿ ಪಡ್ಡೆ ಹೈದರು ಹುಚ್ಚೆದ್ದು ಕುಣಿದಿದ್ದಾರೆ.
ರಕ್ತ ಚಂದನ ಕಳ್ಳ ಸಾಗಣೆಯ ಕಥೆ ಹೊಂದಿರುವ ʼಪುಷ್ಪʼ ಮೈನವಿರೇಳಿಸುವ ಸಾಹಸ ದೃಶ್ಯ, ಕಾಡಿನಲ್ಲಿ ನಡೆಯುವ ಸನ್ನಿವೇಶ, ದ್ವೇಷ, ಪಿತೂರಿ ಇತ್ಯಾದಿ ಕಾರಣಗಳಿಂದ ಗಮನ ಸೆಳೆದಿತ್ತು. ನಿರ್ದೇಶಕ ಸುಕುಮಾರ್ ಮಾಸ್ ಆಗಿಯೇ ಚಿತ್ರವನ್ನು ಕಟ್ಟಿಕೊಟ್ಟಿದ್ದರು. ಹೀಗಾಗಿ ʼಪುಷ್ಪ 2ʼ ಚಿತ್ರದಲ್ಲಿ ಮಾಸ್ ಅಂಶ ದುಪ್ಪಟ್ಟು ಆಗಲಿದೆ ಎಂದೇ ಊಹಿಸಲಾಗಿತ್ತು. ಅದರಂತೆ ಫ್ಯಾನ್ಸ್‌ಗೆ ಮೋಸ ಮಾಡದಂತೆ ಟ್ರೈಲರ್‌ ಮೂಡಿ ಬಂದಿದೆ. ಮೊದಲ ಭಾಗದಲ್ಲಿ ʼಊ ಅಂತಾವಾʼ ಎಂದು ಸಮಂತಾ ರುತ್ ಪ್ರಭು ಮಾದಕವಾಗಿ ಹೆಜ್ಜೆ ಹಾಕಿದ್ದರೆ, ಇಲ್ಲಿ ಶ್ರೀಲೀಲಾ ಡ್ಯಾನ್ಸ್ ಪ್ರೇಕ್ಷಕರನ್ನು ಮತ್ತೊಂದು ಲೋಕಕ್ಕೆ ಕರೆದೊಯ್ಯಲಿದೆ.
ಇಷ್ಟು ದಿನ ಟ್ರೈಲರ್‌ಗಾಗಿ ಕಾದು ಕುಳಿತಿದ್ದವರಿಗೆ ಇದೀಗ ಚಿತ್ರವನ್ನು ಕಣ್ತುಂಬಿಕೊಳ್ಳುವ ಕಾತುರ ಆರಂಭವಾಗಿದೆ. ಚಿತ್ರ ಬಿಡುಗಡೆ ಮುನ್ನವೇ 1,000 ಕೋಟಿ ರೂ. ಬ್ಯುಸಿನೆಸ್ ಮಾಡಿದೆ ಎನ್ನಲಾಗಿದ್ದು, ರಿಲೀಸ್ ಆದ ಬಳಿಕ ಅತೀ ಹೆಚ್ಚು ಗಳಿಸಿದ ಸಿನಿಮಾದ ಪಟ್ಟಿಯಲ್ಲಿ ʼಪುಷ್ಪ 2ʼಗೆ ಒಂದು ಸ್ಥಾನ ಖಚಿತ ಎಂದು ಅಲ್ಲು ಅರ್ಜುನ್‌ ಅಭಿಮಾನಿಗಳು ಭವಿಷ್ಯ ನುಡಿದಿದ್ದಾರೆ. ಪುಷ್ಪರಾಜ್ ಅಬ್ಬರಕ್ಕೆ ಬಾಕ್ಸ್ ಆಫೀಸ್ ಶೇಕ್ ಆಗಲಿದೆ ಎನ್ನುವ ಸೂಚನೆ ಟ್ರೈಲರ್‌ ಮೂಲಕವೇ ಸಿಕ್ಕಿದೆ.
ʼಪುಷ್ಪʼ ಚಿತ್ರದ ಹಾಡಿನ ಮೂಲಕ ಗಮನ ಸೆಳೆದ ದೇವಿಶ್ರೀ ಪ್ರಸಾದ್ ಅವರೇ ಈ ಚಿತ್ರಕ್ಕೂ ಸಂಗೀತ ಸಂಯೋಜಿಸಿದ್ದಾರೆ. ಈಗಾಗಲೇ ರಿಲೀಸ್ ಆಗಿರುವ 2 ಹಾಡುಗಳು ಹಿಟ್ ಲಿಸ್ಟ್ ಸೇರಿವೆ. ಮೊದಲ ಭಾಗದಲ್ಲಿ ರಶ್ಮಿಕಾ ಹಾಡಿನಲ್ಲಿ ಗ್ಲಾಮರಸ್ ಆಗಿ ಕಾಣಿಸಿಕೊಂಡಿದ್ದರು. ಅಲ್ಲು ಅರ್ಜುನ್‌ ಜತೆಗೆ ಮಾದಕವಾಗಿ ಕುಣಿಸಿದ್ದರು. ಈ ಚಿತ್ರದಲ್ಲಿಯೂ ಹಾಡು ಮತ್ತಷ್ಟು ಕಿಕ್ ಕೊಡಲಿದೆ ಎನ್ನಲಾಗುತ್ತಿದೆ. ಡಾಲಿ ಧನಂಜಯ್, ಜಗಪತಿ ಬಾಬು, ಪ್ರಕಾಶ್ ರಾಜ್, ಸುನೀಲ್ ಮತ್ತು ಅನಸೂಯಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ರಾಷ್ಟ್ರ ಪ್ರಶಸ್ತಿ ಗರಿ
ವಿಶೇಷ ಎಂದರೆ ಅಲ್ಲು ಅರ್ಜುನ್‌ ಅವರಿಗೆ ʼಪುಷ್ಪʼ ರಾಷ್ಟ್ರ ಪ್ರಶಸ್ತಿ ಗರಿ ತಂದುಕೊಟ್ಟಿದೆ. ಅದುವರೆಗೆ ಸ್ಟೈಲಿಶ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಅಲ್ಲು ಅರ್ಜುನ್‌ ಈ ಚಿತ್ರದಲ್ಲಿ ಹಳ್ಳಿ ಹೈದನಾಗಿ ವಿಶೇಷ ಪಾತ್ರದಲ್ಲಿ ಮೋಡಿ ಮಾಡಿದ್ದರು. ʼಪುಷ್ಪ 2ʼ ಕೂಡ ಅವರ ವೃತ್ತಿ ಜೀವನದಲ್ಲಿ ಹೊಸ ಮೈಲಿಗಲ್ಲಾಗುವ ಎಲ್ಲ ಲಕ್ಷಣಗಳಿವೆ.
ಈ ಸುದ್ದಿಯನ್ನೂ ಓದಿ: Pushpa 2: ಅಲ್ಲು ಅರ್ಜುನ್‌-ರಶ್ಮಿಕಾ ಅಭಿನಯದ ʼಪುಷ್ಪ 2ʼ ಚಿತ್ರದ ಟ್ರೈಲರ್‌ ರಿಲೀಸ್‌ಗೆ ದಿನಗಣನೆ
