ಬೆಂಗಳೂರು: ನವರಾತ್ರಿ ವೇಳೆಗೆ ತೆರೆಕಂಡ ʼಭೈರಾದೇವಿʼ (Bhairadevi) ಚಿತ್ರದ ಮೂಲಕ ಗಮನ ಸೆಳೆದ ಸ್ಯಾಂಡಲ್‌ವುಡ್‌ನ ಸ್ವೀಟಿ ರಾಧಿಕಾ ಕುಮಾರಸ್ವಾಮಿ (Radhika Kumaraswamy) ಇತ್ತೀಚೆಗೆ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ. ನೆಚ್ಚಿನ ಶ್ವಾನದೊಂದಿಗೆ ಅವರು ಈ ವಿಶೇಷ ದಿನವನ್ನು ಇನ್ನಷ್ಟು ಸ್ಮರಣೀಯವಾಗಿಸಿದ್ದಾರೆ. ಅದಕ್ಕೆ ಕೇಕ್‌ ತಿನ್ನಿಸಿ ಸಂಭ್ರಮಿಸಿದ್ದಾರೆ.
ಪಿಂಕ್‌ ಥೀಮ್‌ ಹಿನ್ನೆಲೆಯಲ್ಲಿ ಪಿಂಕ್‌ ಬಟ್ಟೆ ತೊಟ್ಟು ರಾಧಿಕಾ ಮಿಂಚಿದ್ದಾರೆ. ವಿಶೇಷ ಎಂದರೆ ಅವರು ಮತ್ತು ನೆಚ್ಚಿನ ಶ್ವಾನ ಬಿಟ್ಟು ಬೇರೆ ಯಾರೂ ವಿಡಿಯೊದಲ್ಲಿ ಕಂಡುಬಂದಿಲ್ಲ. ಅವರು ತಮ್ಮ ಬರ್ತ್‌ ಡೇ ಸೆಲೆಬ್ರೇಷನ್‌ನ ವಿಡಿಯೊವನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದು ವೈರಲ್‌ ಆಗಿದೆ. ಹಲವರು ಕಾಮೆಂಟ್‌ ಮೂಲಕ ಶುಭಾಶಯ ತಿಳಿಸಿದ್ದಾರೆ. ಯಾಕೆ ಒಬ್ಬರೇ ಬರ್ತಡೇ ಆಚರಿಸ್ತಾ ಇದ್ದೀರಾ? ಎಂದೂ ಕೆಲವರು ಪ್ರಶ್ನಿಸಿದ್ದಾರೆ.
ನಟಿ ಜತೆಗೆ ನಿರ್ಮಾಪಕಿ
ಮಂಗಳೂರು ಮೂಲದ ರಾಧಿಕಾ ಸ್ಯಾಂಡಲ್‌ವುಡ್‌ನಲ್ಲಿ ಕಳೆದ 22 ವರ್ಷಗಳಿಂದಲೂ ಸಕ್ರಿಯರಾಗಿದ್ದಾರೆ. ನಟಿಯಾಗಿ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ಅವರು ಈ ನಿರ್ಮಾಪಕಿಯಾಗಿಯೂ ಗುರುತಿಸಿಕೊಂಡಿದ್ದಾರೆ. ಯಾವುದೇ ಸಿನಿಮಾ ಬ್ಯಾಕ್‌ಗ್ರೌಂಡ್‌ ಇಲ್ಲದೆ ಚಿತ್ರರಂಗಕ್ಕೆ ಬಂದು 2 ದಶಕಗಳಿಂದಲೂ ಹೆಚ್ಚು ಕಾಲ ನಾಯಕಿಯಾಗಿ ಗುರುತಿಸಿಕೊಂಡಿರುವುದು ಅವರ ಹೆಗ್ಗಳಿಕೆ. ಭಾವನಾತ್ಮಕ ಪಾತ್ರಗಳ ಜತೆಗೆ ಗ್ಲಾಮರ್‌ ಪಾತ್ರಗಳಲ್ಲಿಯೂ ಅವರು ಮಿಂಚಿದ್ದಾರೆ.
2002ರಲ್ಲಿ ಬಿಡುಗಡೆಯಾದ ʼನಿನಗಾಗಿʼ ಚಿತ್ರದ ಮೂಲಕ ಅವರು ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟರು. ವಿಜಯ್‌ ರಾಘವೇಂದ್ರ ನಾಯಕನಾಗಿ ಕಾಣಿಸಿಕೊಂಡಿದ್ದ ಈ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಯಶಸ್ಸು ಗಳಿಸಿತು. ಅಲ್ಲಿಂದ ಬಳಿಕ ರಾಧಿಕಾ ಹಿಂದಿರುಗಿ ನೋಡಲೇ ಇಲ್ಲ. 2003ರಲ್ಲಿ ಬಿಡುಗಡೆಯಾದ ʼತಾಯಿ ಇಲ್ಲದ ತಬ್ಬಲಿʼ ಸಿನಿಮಾದ ಮನೋಜ್ಞ ಅಭಿನಯಕ್ಕಾಗಿ ಕರ್ನಾಟಕ ರಾಜ್ಯ ಚಲನಚಿತ್ರ ಪ್ರಶಸ್ತಿ ಮುಡಿಗೇರಿಸಿಕೊಂಡರು. ಅದೇ ವರ್ಷ ʼಇಯರ್‌ಕೈʼ ಚಿತ್ರದ ಮೂಲಕ ಕಾಲಿವುಡ್‌ಗೆ ಕಾಲಿಟ್ಟರು. 2004ರಲ್ಲಿ ʼಬದ್ರಾದ್ರಿ ರಾಮುಡುʼ ಮೂಲಕ ತೆಲುಗು ಚಿತ್ರರಂಗಕ್ಕೂ ಪ್ರವೇಶಿಸಿದರು.
ಅಣ್ಣ-ತಂಗಿ ಜೋಡಿ
ರಾಧಿಕಾಗೆ ಅಪಾರ ಜನಪ್ರಿಯತರೆ ತಂದುಕೊಟ್ಟ ಚಿತ್ರ 2002ರಲ್ಲಿ ತೆರೆಕಂಡ ʼತವರಿಗೆ ಬಾ ತಂಗಿʼ. ಓಂ ಸಾಯಿ ಪ್ರಕಾಶ್‌ ನಿರ್ದೇಶನದ ಈ ಸಿನಿಮಾದಲ್ಲಿ ಶಿವ ರಾಜ್‌ಕುಮಾರ್‌ ಮತ್ತು ರಾಧಿಕಾ ಅಣ್ಣ ತಂಗಿಯರಾಗಿ ಕಾಣಿಸಿಕೊಂಡರು. ಬಳಿಕ ಇವರು ಅಣ್ಣ ತಂಗಿ ಎಂದೇ ಗುರುತಿಸಲ್ಪಡುತ್ತಿದ್ದಾರೆ. ಇದೇ ಚಿತ್ರದ ಯಶಸ್ಸಿನ ಬಳಿಕ 2005ರಲ್ಲಿ ಮತ್ತೆ ಇವರು ʼಅಣ್ಣ-ತಂಗಿʼ ಸಿನಿಮಾ ಮೂಲಕ ಮತ್ತೆ ಪ್ರೇಕ್ಷಕರ ಮನ ಗೆದ್ದರು.
2008ರ ಬಳಿಕ ಸ್ವಲ್ಪ ವರ್ಷಗಳ ಕಾಲ ಬ್ರೇಕ್‌ ತೆಗೆದುಕೊಂಡಿದ್ದ ರಾಧಿಕಾ 2012ರಲ್ಲಿ ʼಲಕ್ಕಿʼ ಚಿತ್ರ ನಿರ್ಮಿಸುವ ಮೂಲಕ ಕಂಬ್ಯಾಕ್‌ ಮಾಡಿದರು. ಯಶ್‌ ಮತ್ತು ರಮ್ಯಾ ಈ ಸಿನಿಮಾದಲ್ಲಿ ನಟಿಸಿದರು. 2013ರಲ್ಲಿ ರಾಧಿಕಾ ತಾವೇ ನಿರ್ಮಿಸಿದ ʼಸ್ವೀಟಿ ನನ್ನ ಜೋಡಿʼ ಸಿನಿಮಾದಲ್ಲಿ ನಾಯಕಿಯಾದರು. ಇತ್ತೀಚೆಗೆ ಅವರದ್ದೇ ನಿರ್ಮಾಣದ ʼಭೈರಾದೇವಿʼ ತೆರೆಕಂಡಿದೆ. ಬಾಕ್ಸ್‌ ಆಫೀಸ್‌ನಲ್ಲಿ ಚಿತ್ರ ಸಾಧಾರಣ ಯಶಸ್ಸು ಕಂಡಿದ್ದರೂ ರಾಧಿಕಾ ಅವರ ಪಾತ್ರ ಗಮನ ಸೆಳೆದಿದೆ. ಅವರ ಅಭಿನಯಕ್ಕೆ ಪ್ರೇಕ್ಷಕರು ಜೈ ಎಂದಿದ್ದಾರೆ. ಸದ್ಯ ಅವರು ಬಹು ಭಾಷೆಯ ʼಅಜಾಗ್ರತಾʼ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.
ಈ ಸುದ್ದಿಯನ್ನೂ ಓದಿ: Haridasara Dinachari Movie: ʼಹರಿದಾಸರ ದಿನಚರಿʼ ಚಿತ್ರದ ಟ್ರೇಲರ್ ಔಟ್‌
