Singham Again On OTT: ಬಾಕ್ಸ್‌ ಆಫೀಸ್‌ ಕೊಳ್ಳೆ ಹೊಡೆಯುತ್ತಿರುವ ‘ಸಿಂಗಂ ಎಗೈನ್‌’ ಒಟಿಟಿಗೆ ಯಾವಾಗ?

ಮುಂಬೈ: ಸಿನಿ ಪ್ರಿಯರಿಗೆ ದೀಪಾವಳಿ (Deepavali) ಉಡುಗೊರೆಯಾಗಿ ಬಾಲಿವುಡ್‌ನ ಬಹು ನಿರೀಕ್ಷಿತ, ಬಹು ತಾರಾಗಣದ ‘ಸಿಂಗಂ ಅಗೈನ್‌’ (Singham Again) ಚಿತ್ರ ನ. 1ರಂದು ತೆರೆಕಂಡಿದೆ. ಟ್ರೈಲರ್‌ನಿಂದಲೇ ಗಮನ ಸೆಳೆದ ಈ ಚಿತ್ರಕ್ಕೆ ರೋಹಿತ್‌ ಶೆಟ್ಟಿ (Rohit Shetty) ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಭಾರತದ ಮಹಾಕಾವ್ಯ ‘ರಾಮಾಯಣ’ಕ್ಕೆ ಆಧುನಿಕ ಸ್ಪರ್ಶ ನೀಡಿ ರೋಹಿತ್‌ ಶೆಟ್ಟಿ ಈ ಸಿನಿಮಾವನ್ನು ಕಟ್ಟಿಕೊಟ್ಟ ರೀತಿಗೆ ಪ್ರೇಕ್ಷಕ ಪ್ರಭು ಜೈ ಎಂದಿದ್ದಾರೆ. ಅಜಯ್‌ ದೇವಗನ್‌, ಅಕ್ಷಯ್‌ ಕುಮಾರ್‌, ರಣವೀರ್‌ ಸಿಂಗ್‌, ದೀಪಿಕಾ ಪಡುಕೋಣೆ, ಕರೀನಾ ಕಪೂರ್‌, ಟೈಗರ್‌ ಶ್ರಾಪ್‌, ಅರ್ಜುನ್‌ ಕಪೂರ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಜತೆಗೆ ಸಲ್ಮಾನ್‌ ಖಾನ್‌ ಅತಿಥಿ ಪಾತ್ರದಲ್ಲಿ ಮೋಡಿ ಮಾಡಿದ್ದಾರೆ. ಬಾಕ್ಸ್‌ ಆಫೀಸ್‌ನಲ್ಲಿ ದಾಖಲೆಯ ಕಲೆಕ್ಷನ್‌ ಮಾಡುತ್ತಿರುವ ‘ಸಿಂಗಂ ಎಗೈನ್‌’ ಒಟಿಟಿಗೆ ಯಾವಾಗ ಬರಲಿದೆ ಎನ್ನುವ ಚರ್ಚೆ ಆರಂಭವಾಗಿದೆ (Singham Again On OTT).

‘ಸಿಂಗಂ ಎಗೈನ್‌’ ಕಲೆಕ್ಷನ್‌ ಎಷ್ಟು?

ಬಾಲಿವುಡ್‌ನ ಸೂಪರ್‌ ಸ್ಟಾರ್‌ಗಳು ತೆರೆ ಮೇಲೆ ಒಂದಾಗುತ್ತಾರೆ ಎನ್ನುವ ಕಾರಣಕ್ಕೆ ‘ಸಿಂಗಂ ಎಗೈನ್‌’ ಸೆಟ್ಟೇರಿದಾಗಲೇ ಕುತೂಹಲ ಕೆರಳಿಸಿತ್ತು. ಜತೆಗೆ ಚಿತ್ರ ರಿಲೀಸ್‌ ಆದ ಬಳಿಕ ಪ್ರೇಕ್ಷಕರಿಂದ ಪಾಸಿಟಿವ್‌ ಪ್ರತಿಕ್ರಿಯೆ ಕಂಡುಬಂದ ಕಾರಣ ಜನರು ಥಿಯೇಟರ್‌ನತ್ತ ನುಗ್ಗುತ್ತಿದ್ದಾರೆ. ಜತೆಗೆ ಸಾಲು ಸಾಲು ರಜೆ ಕೂಡ ಚಿತ್ರತಂಡಕ್ಕೆ ಪ್ಲಸ್‌ ಪಾಯಿಂಟ್‌ ಆಗಿದೆ. ಪರಿಣಾಮ ಬಾಕ್ಸ್‌ ಆಫೀಸ್‌ನಲ್ಲಿ ದಾಖಲೆಯ ಗಳಿಕೆ ಕಂಡು ಬಂದಿದೆ. ʼಸಿಂಗಂ ಎಗೈನ್‌ʼ ಚಿತ್ರ ರಿಲೀಸ್‌ ಆದ ಮೊದಲ ದಿನ ಭಾರತದಲ್ಲಿ ಗಳಿಸಿದ್ದು ಬರೋಬ್ಬರಿ 43.5 ಕೋಟಿ ರೂ. ಇನ್ನು 2ನೇ ದಿನ 41.50 ಕೋಟಿ ರೂ. ಹರಿದು ಬಂದಿದೆ. ಹೀಗೆ ಒಟ್ಟು 2 ದಿನಗಳಲ್ಲಿ ಒಟ್ಟು 85 ಕೋಟಿ ರೂ. ಗಳಿಸಿದೆ. 3ನೇ ದಿನವಾದ ಭಾನುವಾರ ಕೂಡ ಉತ್ತಮ ಕಲೆಕ್ಷನ್‌ ಕಂಡು ಬಂದಿದ್ದು, ಭಾರತದಲ್ಲಿ ನಿರಾಯಾಸವಾಗಿ 100 ಕೋಟಿ ರೂ. ಕ್ಲಬ್‌ ದಾಟಿ ಮುನ್ನುಗ್ಗುತ್ತಿದೆ. ಜಾಗತಿಕ ಬಾಕ್ಸ್‌ ಆಫೀಸ್‌ ಗಳಿಕೆ 2 ದಿನಗಳಲ್ಲಿ125.20 ಕೋಟಿ ರೂ. ದಾಟಿದೆ.

#Diwali Dhamaka at the #Boxoffice… *Combined* Day 1 biz: ₹ 80.30 cr 🔥🔥🔥…
⭐️ #SinghamAgain: ₹ 43.70 cr
⭐️ #BhoolBhulaiyaa3: ₹ 36.60 cr#India biz | Nett BOC pic.twitter.com/arsDeW0Mw9

— taran adarsh (@taran_adarsh) November 2, 2024

ಒಟಿಟಿಗೆ ಯಾವಾಗ?

ಬಾಕ್ಸ್‌ ಆಫೀಸ್‌ನಲ್ಲಿ ದಾಖಲೆ ಮೇಲೆ ದಾಖಲೆ ಬರೆಯುತ್ತಿರುವ ʼಸಿಂಗಂ ಎಗೈನ್‌ʼ ಸದ್ಯಕ್ಕಂತೂ ಒಟಿಟಿಗೆ ಲಗ್ಗೆ ಇಡುವ ಸಾಧ್ಯತೆ ಇಲ್ಲ. ವರದಿಗಳ ಪ್ರಕಾರ ಈ ಚಿತ್ರದ ಒಟಿಟಿ ಪ್ರಸಾರದ ಹಕ್ಕು ದುಬಾರಿ ಮೊತ್ತಕ್ಕೆ ಅಮೆಜಾನ್‌ ಪ್ರೈಮ್‌ ವಿಡಿಯೊ ಪಾಲಾಗಿದೆ. ಡಿಸೆಂಬರ್‌ ಕೊನೆಗೆ ಪ್ರಸಾರವಾಗುವ ಸಾಧ್ಯತೆ ಇದೆ. ಈ ಬಗ್ಗೆ ಅಧಿಕೃತ ಘೋಷಣೆ ಇನ್ನಷ್ಟೇ ಬರಬೇಕಿದೆ.

‘ಭೂಲ್​ ಭುಲಯ್ಯ 3’ ಚಿತ್ರದಿಂದಲೂ ಉತ್ತಮ ಕಲೆಕ್ಷನ್‌

ನ. 1ರಂದೇ ತೆರೆಕಂಡ ಮತ್ತೊಂದು ಬಾಲಿವುಡ್‌ ಚಿತ್ರ ‘ಭೂಲ್​ ಭುಲಯ್ಯ 3’ ಕೂಡ ಬಾಕ್ಸ್‌ ಅಫೀಸ್‌ನಲ್ಲಿ ಉತ್ತಮ ಕಲೆಕ್ಷನ್‌ ಮಾಡುತ್ತಿದೆ. ಕಾರ್ತಿಕ್‌ ಆರ್ಯನ್‌, ವಿದ್ಯಾ ಬಾಲನ್‌, ಮಾಧುರಿ ದೀಕ್ಷಿತ್‌ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿರುವ ಈ ಚಿತ್ರವನ್ನು ಅನೀಸ್‌ ಬಜ್ಮಿ ನಿರ್ದೇಶಿಸಿದ್ದಾರೆ. ಈ ಚಿತ್ರವೂ ಈಗಾಗಲೇ ಜಾಗತಿಕ ಬಾಕ್ಸ್‌ ಆಫೀಸ್‌ನಲ್ಲಿ 100 ಕೋಟಿ ರೂ. ಕಲೆಕ್ಷನ್‌ ಮಾಡಿದೆ.

ಈ ಸುದ್ದಿಯನ್ನೂ ಓದಿ: Singham Again Review: ತೆರೆ ಮೇಲೆ ಮತ್ತೊಮ್ಮೆ ಸಿಂಗಂ ಆಗಿ ಅಬ್ಬರಿಸಿದ ಅಜಯ್‌ ದೇವಗನ್‌; ‘ಸಿಂಗಂ ಅಗೈನ್‌’ ಚಿತ್ರ ಹೇಗಿದೆ?