ಅಮರಾವತಿ: ರಾಜಕೀಯ ನಾಯಕರಿಗೂ ಅಭಿಮಾನಿಗಳಿದ್ದಾರೆ. ಅವರನ್ನು ಒಮ್ಮೆ ಮುಟ್ಟಬೇಕು, ಅವರ ಜತೆಗೆ ಫೋಟೊ ತೆಗೆಸಿಕೊಳ್ಳಬೇಕು ಎಂದು ಹಾತೊರೆಯುತ್ತಿರುತ್ತಾರೆ. ಅಂಥದ್ದೇ ಸನ್ನಿವೇಶವೊಂದು ಆಂಧ್ರಪ್ರದೇಶದ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು (Chandrababu Naidu) ಅವರಿಗೆ ಎದುರಾಗಿದೆ. ಅವರಿಗೆ ಮಹಿಳೆಯೊಬ್ಬರು ಕಿಸ್ ಕೊಡಲು ಯತ್ನಿಸುತ್ತಿರುವ ವಿಡಿಯೊ (Viral Video) ಇದೀಗ ಸೋಷಿಯಲ್ ಮಿಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ (Viral News).
ಸಾರ್ವಜನಿಕ ಸಮಾರಂಭವೊಂದರಲ್ಲಿ ಈ ಘಟನೆ ನಡೆದಿದ್ದು, ನಾಯ್ಡು ಅಭಿಮಾನಿ ಮಹಿಳೆಯೊಬ್ಬರು ಇದ್ದಕ್ಕಿದ್ದಂತೆ ಅವರ ಗಲ್ಲಕ್ಕೆ ಮುತ್ತೊಂದನ್ನು ನೀಡಲು ಮುಂದಾಗಿದ್ದಾರೆ. ಆದರೆ ಮಹಿಳೆಯ ಈ ಪ್ರಯತ್ನವನ್ನು ನಾಯ್ಡು ಅವರು ಮಧ್ಯದಲ್ಲೇ ತಡೆದಿದ್ದಾರೆ. ಈ ಘಟನೆಯ ಬಳಿಕ ಅಲ್ಲಿದ್ದವರೆಲ್ಲರೂ ಕೆಲಕಾಲ ನಗುವಿನಲೆಯಲ್ಲಿ ತೇಲಿದ್ದಾರೆ. ಸದ್ಯಕ್ಕೆ ಈ ಒಂದು ವಿಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ.
ಸುದೀರ್ಘ ಕಾಲ ಸಿಎಂ ಆಗಿರುವ ಚಂದ್ರಬಾಬು ಅಭಿಮಾನಿಗಳಿರುವುದು ಸಹಜ. ಚಂದ್ರಬಾಬು ನಾಯ್ಡುಗೆ ಝಡ್ಪ್ಲಸ್ ಭದ್ರತೆ ಇದೆ. ಅನಕಾಪಲ್ಲಿಯಲ್ಲಿ ನಡೆದ ಘಟನೆ ಇದು. ಪ್ರವಾಸದ ಅಂಗವಾಗಿ ಹಲವು ಟಿಡಿಪಿ ಕಾರ್ಯಕರ್ತರು ಹಾಗೂ ಅವರ ಅಭಿಮಾನಿಗಳು ಚಂದ್ರಬಾಬು ನಾಯ್ಡು ಅವರನ್ನು ನೋಡಲು ಬಂದಿದ್ದರು. ಅವರಿಗೆ ಭವ್ಯ ಸ್ವಾಗತ ನೀಡಲಾಯಿತು. ಮಹಿಳಾ ಅಭಿಮಾನಿಯೊಬ್ಬರು ಬಾಬು ಭೇಟಿಗೆ ಯತ್ನಿಸಿದ್ದಾರೆ. ಚಂದ್ರಬಾಬುವನ್ನು ಭೇಟಿಯಾಗಲು ಸುತ್ತಲಿನ ಸೆಕ್ಯುರಿಟಿಯನ್ನು ತಪ್ಪಿಸಿ ಅವರ ಬಳಿಗೆ ಬಂದಿದ್ದರು.
ಆಕೆಗೆ ಮುತ್ತು ಕೊಡುವ ಯತ್ನಿಸಿದ್ದರಲ್ಲಿ ಯಾವುದೇ ದುರುದ್ದೇಶವಿಲ್ಲ, ತನ್ನ ನೆಚ್ಚಿನ ನಾಯಕನ ಮೇಲಿನ ಪ್ರೀತಿ ಅಭಿಮಾನ ತೋರುವ ಪ್ರಯತ್ನ ಇದಾಗಿದೆ ಎಂದು ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ. ಈ ವಿಚಾರವಾಗಿ ಮಹಿಳೆ ಮಾತನಾಡಿ, ʼʼಈ ದಿನವನ್ನು ಜೀವನದಲ್ಲಿ ಮರೆಯಲು ಸಾಧ್ಯವಿಲ್ಲ. ಟಿವಿಯಲ್ಲಿ ನೆಚ್ಚಿನ ನಾಯಕನನ್ನು ನೋಡುತ್ತಿದ್ದೆ, ಅವರನ್ನು ಖುದ್ದಾಗಿ ಕಂಡರೆ ಸಾಕು ಎಂದು ಅಂದುಕೊಂಡಿದ್ದೆ. ಈ ಅವಕಾಶ ಸಿಕ್ಕಿದ್ದು ನನ್ನ ಅದೃಷ್ಟʼʼ ಎಂದಿದ್ದಾರೆ.
ರಾಜಕಾರಣಿಗಳಿಗೆ ಸಾರ್ವಜನಿಕ ಸಭೆ ಸಮಾರಂಭಗಳಲ್ಲಿ ಮಹಿಳೆಯರು ಮುತ್ತು ನೀಡುವುದು ಅಥವಾ ಮುತ್ತು ನೀಡಲು ಯತ್ನಿಸುವುದು ಹೊಸತೇನಲ್ಲ. ನಮ್ಮ ಕರ್ನಾಟಕದ ರಾಜಕಾರಣಿಗಳ ಬಗ್ಗೆ ಹೇಳುವುದಾದರೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರಿಗೆ ಹೆಚ್ಚಿನ ಕಡೆಗಳಲ್ಲಿ ಸಾರ್ವಜನಿಕ ಸಮಾರಂಭಗಳಲ್ಲಿ ಮಹಿಳೆಯರು ಮುತ್ತು ನೀಡಿರುವುದು ಆಗಾಗ್ಗೆ ವೈರಲ್ ಆಗುತ್ತಿರುತ್ತದೆ. ಹಿರಿಯರಾದ ಸಿದ್ದರಾಮಯ್ಯ ಅವರು ಸಹ ಇದಕ್ಕೆ ಪ್ರತಿಯಾಡದೆ ಅದನ್ನೊಂದು ಸಾಮಾನ್ಯ ವಿಷಯವೆಂಬಂತೆ ಸ್ವೀಕರಿಸುತ್ತಾರೆ.
ಈ ಸುದ್ದಿಯನ್ನೂ ಓದಿ: Viral Video: ವೈದ್ಯರು, ಲ್ಯಾಬ್‌ ಸಿಬ್ಬಂದಿಗಳೆಲ್ಲಾ ರಜೆ… ಯುಟ್ಯೂಬ್‌ ನೋಡಿ ಇಸಿಜಿ ಮಾಡಿದ ಅಟೆಂಡರ್‌! ಇಲ್ಲಿದೆ ವಿಡಿಯೋ
ಇನ್ನು ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರಿಗೂ ಮಹಿಳೆಯರು ಮುತ್ತು ನೀಡಿರುವ ಘಟನೆ ಈ ಹಿಂದೆ ವರದಿಯಾಗಿ ವಿಡಿಯೊ ಸಹ ವೈರಲ್ ಆಗಿತ್ತು. ಇನ್ನು ರಾಷ್ಟ್ರಮಟ್ಟದ ಜನಪ್ರಿಯ ರಾಜಕಾರಣಿಗಳಿಗೂ ಸಹ ಈ ಬಹಿರಂಗ ‘ಮುತ್ತಿನ ಕಾಟ’ ತಪ್ಪಿಲ್ಲ. ಕೆಲವೊಂದು ಸಲ ಈ ಮುತ್ತು ಅವರ ಇಮೇಜಿಗೆ ಜಾಸ್ತಿ ಕುತ್ತು ತರದೇ ಇದ್ದರೂ, ಇನ್ನು ಕೆಲವು ಸಂದರ್ಭಗಳಲ್ಲಿ ಇಂತಹ ಮುತ್ತಿನ ಘಟನೆಗಳು ತೀರಾ ಅನಪೇಕ್ಷಿತ ಮಟ್ಟವನ್ನು ಮುಟ್ಟಿ ಆಭಾಸಗಳಿಗೆ ಕಾರಣವಾಗುವುದೂ ಇದೆ.
