ತಿರುವನಂತಪುರಂ : ಮಲಯಾಳಂ (Mollywood) ಚಿತ್ರರಂಗದ ಹಿರಿಯ ನಟಿ ಮೀನಾ ಗಣೇಶ್ (Meena Ganesh ) ಗುರುವಾರ ನಿಧನರಾಗಿದ್ದಾರೆ. ಕಳೆದ ಐದು ದಿನಗಳಿಂದ ಸೆರೆಬ್ರಲ್ ಸ್ಟ್ರೋಕ್‌ನಿಂದ ಚಿಕಿತ್ಸೆ ಪಡೆಯುತ್ತಿದ್ದ ಅವರನ್ನು ಶೋರ್‌ನೂರ್‌ನ ಪಿಕೆ ದಾಸ್ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ 81ನೇ ವಯಸ್ಸಿನಲ್ಲಿ ಇಂದು ಕೊನೆಯುಸಿರೆಳೆದಿದ್ದಾರೆ. ಗುರುವಾರ ಸಂಜೆ ಪಾಲಕ್ಕಾಡ್‌ನ ಶೋರನೂರಿನಲ್ಲಿರುವ ಶಾಂತಿತೀರದಲ್ಲಿ ಅಂತ್ಯಕ್ರಿಯೆ ನಡೆಯಲಿದೆ ಎಂದು ತಿಳಿದು ಬಂದಿದೆ.
1976ರಲ್ಲಿ ಮಣಿಮುಳಕಂ ಚಿತ್ರದ ಮೂಲಕ ಚಿತ್ರರಂಗವನ್ನು ಪ್ರವೇಶಿಸಿದ ಮೀನಾ ಅವರಿಗೆ 1991ರಲ್ಲಿ ಬಂದ ಮುಖಚಿತ್ರಂ ಅಪಾರ ಹೆಸರನ್ನು ತಂದು ಕೊಟ್ಟಿತ್ತು. ಅವರು ನೂರಕ್ಕೂ ಹೆಚ್ಚು ಮಲಯಾಳಂ ಚಿತ್ರಗಳು , ಹಲವಾರು ಧಾರಾವಾಹಿಗಳು ಮತ್ತು ನಾಟಕಗಳಲ್ಲಿ ನಟಿಸಿದ್ದಾರೆ. ಮಲಯಾಳಂ ಚಲನಚಿತ್ರಗಳಾದ ವಸಂತಿಯುಂ ಲಕ್ಷ್ಮಿಯುಂ ಪಿನ್ನೆ ನಂಜುಂ, ಮೀಶಾ ಮಾಧವನ್, ನಂದನಂ, ಪುನರಾಧಿವಾಸಂ ಮತ್ತು ಕರುಮಡಿಕುಟ್ಟನ್‌ನಲ್ಲಿ ಗಮನಾರ್ಹ ಪಾತ್ರಗಳಲ್ಲಿ ನಟಿಸಿದ್ದರು.
ಅವರು 1942 ರಲ್ಲಿ ಪಾಲಕ್ಕಾಡ್‌ನ ಕಲ್ಲೆಕುಲಂಗರಾದಲ್ಲಿ ತಮಿಳು ಚಲನಚಿತ್ರ ನಟ ಕೆಪಿ ಕೇಶವನ್ ಅವರ ಮಗಳಾಗಿ ಜನಿಸಿದ ಮೀನಾ, ತಮ್ಮ ಶಾಲಾ ದಿನಗಳಲ್ಲಿ ಕೊಪ್ಪಂ ಬ್ರದರ್ಸ್ ಆರ್ಟ್ಸ್ ಕ್ಲಬ್ ಮೂಲಕ ರಂಗಭೂಮಿಗೆ ಪ್ರವೇಶಿಸಿದರು ಮತ್ತು ನಂತರ ರಂಗಭೂಮಿಯಲ್ಲಿ ಸಕ್ರಿಯರಾದರು. ಕೊಯಮತ್ತೂರು, ಈರೋಡ್, ಸೇಲಂ ಮತ್ತು ತಮಿಳುನಾಡಿನ ಇತರ ಸ್ಥಳಗಳಲ್ಲಿ ಪ್ರದರ್ಶನ ನೀಡಿದ್ದರು.
1971 ರಲ್ಲಿ, ಅವರು ಪ್ರಸಿದ್ಧ ನಾಟಕಕಾರ, ನಿರ್ದೇಶಕ ಮತ್ತು ನಟ ಎಎನ್ ಗಣೇಶ್ ಅವರನ್ನು ವಿವಾಹವಾದರು. ಮದುವೆಯ ನಂತರ ಮೀನಾ ಮತ್ತು ಗಣೇಶ್ ಶೋರ್ನೂರಿನಲ್ಲಿ ಪೌರ್ಣಮಿ ಕಲಾಮಂದಿರ ಎಂಬ ನಾಟಕ ತಂಡವನ್ನು ಪ್ರಾರಂಭಿಸಿದರು. ಆದರೆ, ಹಣಕಾಸಿನ ತೊಂದರೆಯಿಂದಾಗಿ ಮೂರು ವರ್ಷಗಳಲ್ಲಿ ತಂಡವನ್ನು ವಿಸರ್ಜಿಸಲಾಯಿತು. ನಂತರ ಅವಳು ಇತರ ಗುಂಪುಗಳೊಂದಿಗೆ ನಾಟಕಗಳಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದ್ದರು.
ಕೆಲವು ಪ್ರಸಿದ್ಧ ನಾಟಕಗಳಾದ ಪಾಂಚಜನ್ಯಂ, ಫಸಾ, ಮಯೂಖಂ, ಸಿಂಹಾಸನಂ, ಸ್ವರ್ಣಮಯೂರಂ, ಇತ್ಯಾದಿಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ನಟ ತಿಲಕನ್ ಅವರು ಚಾಲಕುಡಿ ಸಾರಥಿ ಥಿಯೇಟರ್‌ಗಳಿಗಾಗಿ ನಿರ್ದೇಶಿಸಿದ “ಫಸಾ” ನಾಟಕದಲ್ಲಿ ಮೀನಾ ಗಣೇಶ್ ನಿರ್ವಹಿಸಿದ ‘ಕುಲ್ಸುಂಬಿ’ ಪಾತ್ರವು ಉತ್ತಮ ಪ್ರತಿಕ್ರಿಯೆಯನ್ನು ಪಡೆಯಿತು. ಮೀನಾ ಮತ್ತು ಗಣೇಶ್ ಸುಮಾರು 20 ನಾಟಕಗಳಲ್ಲಿ ಒಟ್ಟಿಗೆ ನಟಿಸಿದ್ದಾರೆ. ಇದೀಗ ಮೀನಾ ಕೊನೆಯುಸಿರೆಳೆದಿದ್ದು, ತಮ್ಮ ಮಗ ಮತ್ತು ನಿರ್ದೇಶಕ ಮನೋಜ್ ಗಣೇಶ್ ಮತ್ತು ಮಗಳು ಸಂಗೀತಾ ಅವರನ್ನು ಅಗಲಿದ್ದಾರೆ .
ಈ ಸುದ್ದಿಯನ್ನೂ ಓದಿ : Actor Meghanathan: ಮಲಯಾಳಂನ ಖ್ಯಾತ ಖಳ ನಟ ಮೇಘನಾಥನ್‌ ಇನ್ನಿಲ್ಲ
