ನವದೆಹಲಿ: ಶಂಕರಾಚಾರ್ಯ ಸ್ವಾಮಿ ಅವಿಮುಕ್ತೇಶ್ವರಾನಂದ ಸರಸ್ವತಿ ಮಹಾರಾಜ್ (Shankaracharya Swami) ನಡೆಸುತ್ತಿರುವ ಗೋಹತ್ಯೆ ನಿಷೇಧವನ್ನು ಪ್ರತಿಪಾದಿಸುವ ‘ಗೋಧ್ವಜ ಸ್ಥಾಪನಾ ಭಾರತ ಯಾತ್ರೆ’ಗೆ ಅರುಣಾಚಲ ಪ್ರದೇಶ ಮತ್ತು ನಾಗಾಲ್ಯಾಂಡ್‌ನಲ್ಲಿ ವಿರೋಧ ವ್ಯಕ್ತವಾಗಿದೆ. ಅಂತೆಯೇ ಅವರಿಗೆ ಮೇಘಾಲಯದಲ್ಲಿ ಇಳಿಯಲು ಅವಕಾಶ ನಿರಾಕರಿಸಲಾಗಿದೆ. ಶಂಕರಾಚಾರ್ಯರು ಶನಿವಾರ ಮೇಘಾಲಯವನ್ನು ತಲುಪುವ ನಿರೀಕ್ಷೆಯಿತ್ತು, ಆದರೆ ಅವರ ಖಾಸಗಿ ವಿಮಾನವನ್ನು ಇಳಿಯಲು ಅವಕಾಶ ನೀಡದಂತೆ ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರಕ್ಕೆ ತಿಳಿಸಲು ರಾಜ್ಯ ಸರ್ಕಾರ ನಿರ್ಧರಿಸಿದೆ. ಶಂಕರಾಚಾರ್ಯರು ಶನಿವಾರ ಇಳಿಯಲಿದ್ದಾರೆ ಎಂಬ ಸುದ್ದಿ ತಿಳಿದ ನಂತರ ಹಲವಾರು ಗುಂಪುಗಳ ಸದಸ್ಯರು ಶುಕ್ರವಾರ ಶಿಲ್ಲಾಂಗ್ ವಿಮಾನ ನಿಲ್ದಾಣದಲ್ಲಿ ಜಮಾಯಿಸಿದ್ದಾರೆ. .
ಮಾಧ್ಯಮಗಳೊಂದಿಗೆ ಮಾತನಾಡಿದ ಗುಂಪುಗಳ ಸದಸ್ಯರು, ಅಸ್ಸಾಂ ಹೊರತುಪಡಿಸಿ ಈಶಾನ್ಯದ ಎಲ್ಲಾ ಭಾಗಗಳಲ್ಲಿ ಗೋಮಾಂಸ ಸೇವನೆಯು ಪ್ರಧಾನ ಆಹಾರದ ಭಾಗವಾಗಿದೆ. ಏನು ತಿನ್ನಬೇಕು ಮತ್ತು ಏನು ತಿನ್ನಬಾರದು ಎಂದು ಹೇಳಲು ಯಾರಾದರೂ ಒತ್ತಾಯ ಮಾಡುವುದು ಸರಿಯಲ್ಲ ಎಂದು ಹೇಳಿದರು.
ಉತ್ತರಾಖಂಡದ ಜ್ಯೋತಿರ್ ಮಠ ಪೀಠದ ಶಂಕರಾಚಾರ್ಯ ಅವಿಮುಕ್ತೇಶ್ವರಾನಂದ ಸರಸ್ವತಿ ಅವರ ಚಾರ್ಟರ್ಡ್ ವಿಮಾನವನ್ನು ಅರುಣಾಚಲ ಪ್ರದೇಶ ಮತ್ತು ನಾಗಾಲ್ಯಾಂಡ್‌ನಲ್ಲಿ ಇಳಿಯಲು ಅನುಮತಿ ನೀಡಲಾಗಿತ್ತು. ಆದರೆ ಅಧಿಕಾರಿಗಳ ಮನವಿಯ ನಂತರ ವಿಮಾನ ನಿಲ್ದಾಣದಿಂದ ಹೊರಬರಲಿಲ್ಲ.
ಇದನ್ನೂ ಓದಿ: Ujjain Mahakal Temple : ಉಜ್ಜಯಿನಿ ಮಹಾಕಾಳ ದೇಗುಲದ ಗೋಡೆ ಕುಸಿತ; ಇಬ್ಬರು ಸಾವು, ಕಾಲ್ತುಳಿತ
ಹೊಲ್ಲೊಂಗಿಯ ಡೊನಿ ಪೋಲೊ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ ನಂತರ, ಶಂಕರಾಚಾರ್ಯರು ಅಖಿಲ ಅರುಣಾಚಲ ಪ್ರದೇಶ ವಿದ್ಯಾರ್ಥಿ ಒಕ್ಕೂಟದ (ಎಎಪಿಎಸ್ಯು) ಸದಸ್ಯರಿಂದ ವಿರೋಧ ಎದುರಿಸಿದರು. ನಂತರ ಅವರು ದಿಮಾಪುರಕ್ಕೆ ತೆರಳಿ ಶನಿವಾರ ಕೊಹಿಮಾದಲ್ಲಿ ಗೋರಕ್ಷಣಾ ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಬೇಕಿತ್ತು. ಆದರೆ, ವಿರೋಧದ ಕಾರಣಕ್ಕೆ ಅಲ್ಲಿಂದ ಹಿಂತಿರುಗಬೇಕಾಯಿತು
“ಗೋಹತ್ಯೆಯನ್ನು ನಿಲ್ಲಿಸಬೇಕು ಮತ್ತು ಈ ಬಗ್ಗೆ ಕಾನೂನು ರೂಪಿಸಬೇಕು ಎಂದು ನಾವು 100 ಕೋಟಿ ಹಿಂದೂಗಳ ಪರವಾಗಿ ಸರ್ಕಾರಕ್ಕೆ ಹೇಳಲು ಬಯಸುತ್ತೇವೆ” ಎಂದು ಶಂಕರಾಚಾರ್ಯರು ಈ ತಿಂಗಳ ಆರಂಭದಲ್ಲಿ ಗೋರಕ್ಷಣಾ ಕಾರ್ಯಾಚರಣೆಗಾಗಿ 35 ರಾಜ್ಯಗಳಿಗೆ ಹೋಗುವುದಾಗಿ ಪ್ರತಿಜ್ಞೆ ಮಾಡಿದ್ದರು.
