ಹಾವು ಎಂದರೆ ಎಲ್ಲರೂ ಬೆಚ್ಚಿ ಬೀಳುತ್ತಾರೆ. ಅಂತಹದರಲ್ಲಿ ಇಲ್ಲೊಬ್ಬ ವ್ಯಕ್ತಿ ವಿಶ್ವದ ಅತಿ ಭಾರವಾದ ಹಾವು, ಬೃಹತ್ ಹಸಿರು ಅನಕೊಂಡವನ್ನು ಸಲೀಸಾಗಿ ತಮ್ಮ ಭುಜದ ಮೇಲೆ ಎತ್ತಿಕೊಂಡಿದ್ದಾರೆ. ಇದಕ್ಕೆ ಸಂಬಂಧಪಟ್ಟ ವಿಡಿಯೊ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್(Viral Video) ಆಗಿದ್ದು, ಅನೇಕರನ್ನು ಬೆಚ್ಚಿಬೀಳಿಸಿದೆ.
ಈ ವೈರಲ್ ವಿಡಿಯೊದಲ್ಲಿರುವ ವ್ಯಕ್ತಿ ಮೈಕ್ ಹಾಲ್ಸ್‌ಟನ್‌. ವಿಡಿಯೊದಲ್ಲಿ ಅವರು ಬೃಹದಾಕಾರದ ಹಸಿರು ಅನಕೊಂಡವನ್ನು ಯಾವುದೇ ಭಯವಿಲ್ಲದೇ ಮೈಮೇಲೆ ಎತ್ತಿಕೊಂಡಿದ್ದಾರೆ. ಅಷ್ಟುದೊಡ್ಡ ಹಾವನ್ನು ಎತ್ತುವ ಅವರ ಶಕ್ತಿ ಕಂಡು ವೀಕ್ಷಕರು ಬೆರಗಾಗಿದ್ದಾರೆ. ಈ ವೈರಲ್ ವಿಡಿಯೊವನ್ನು @therealtarzann ಇನ್ಸ್ಟಾಗ್ರಾಂನಲ್ಲಿ ಪೋಸ್ಟ್ ಮಾಡಿದ್ದಾರೆ. ಇದು ಸಿಕ್ಕಾಪಟ್ಟೆ ವೈರಲ್ ಆಗಿದೆ.
ಮೈಕ್ ಹಾಲ್ಸ್‌ಟನ್‌ ಎಂದು ಕರೆಯಲ್ಪಡುವ ಮೈಕೆಲ್ ಆಂಥೋನಿ ಹಾಲ್ಸ್‌ಟನ್‌ ಒಬ್ಬ ಮಾಜಿ ಅಮೆರಿಕನ್ ಫುಟ್ಬಾಲ್ ಆಟಗಾರ, ಇವರು ಎನ್ಎಫ್ಎಲ್ (ನ್ಯಾಷನಲ್ ಫುಟ್ಬಾಲ್ ಲೀಗ್) ನಲ್ಲಿ ವೈಡ್ ರಿಸೀವರ್ ಆಗಿ ಆಡಿದ್ದರು. ಪ್ರಾಣಿಗಳ ಮೇಲೆ ಅಪಾರವಾದ ಪ್ರೀತಿಯನ್ನು ಹೊಂದಿದ್ದಾರೆ. ಹಾಗಾಗಿ ಇತ್ತೀಚಿನ ಪೋಸ್ಟ್‌ನಲ್ಲಿ ಹಾಲ್ಸ್‌ಟನ್‌ ಹಸಿರು ಅನಕೊಂಡವನ್ನು ನಿರ್ಭಿತಿಯಿಂದ ಎತ್ತಿಕೊಂಡ ವಿಡಿಯೊವನ್ನು ಹಂಚಿಕೊಂಡಿದ್ದಾರೆ. ಇವರ ಈ ನಿರ್ಭೀತಿಯ ನಡೆ ಎಲ್ಲರನ್ನು ಅಚ್ಚರಿಗೊಳಿಸಿದೆ.
ಈ ವೈರಲ್ ವಿಡಿಯೊಗೆ ಅನೇಕರು ಪ್ರತಿಕ್ರಿಯಿಸಿದ್ದಾರೆ. ಒಬ್ಬ ಬಳಕೆದಾರ, “ಇದನ್ನು ನೋಡಿದರೆ ನನಗೆ ಹೆದರಿಕೆಯಾಗುತ್ತಿದೆ. ನೀವು ಏನು ಮಾಡುತ್ತಿದ್ದೀರಿ ಎಂದು ನಿಮಗೆ ತಿಳಿದಿದೆ ಎಂದು ನನಗೆ ಗೊತ್ತು, ಆದರೆ ನಾನು ಹಾವುಗಳಿಗೆ ತುಂಬಾ ಹೆದರುತ್ತೇನೆ ” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ:ಹೆರಿಗೆಯಾಗಿ 18 ವರ್ಷಗಳಾದರೂ ಮಹಿಳೆಗೆ ತಪ್ಪದ ನರಕಯಾತನೆ- ನರ್ಸ್‌ ಮಾಡಿದ ಎಡವಟ್ಟು ಕೇಳಿದ್ರೆ ಶಾಕ್‌ ಆಗ್ತೀರಾ!
ಹಾಲ್ಸ್‌ಟನ್‌ ಪ್ರಾಣಿಗಳ ಮೇಲಿನ ಪ್ರೀತಿ ಮತ್ತು ಅವುಗಳನ್ನು ನೋಡಿಕೊಳ್ಳುವ ಅದ್ಭುತ ವಿಧಾನದಿಂದಾಗಿ ಸೋಶಿಯಲ್ ಮೀಡಿಯಾಗಳಲ್ಲಿ ‘ದಿ ರಿಯಲ್ ಟಾರ್ಜಾನ್’ ಎಂಬ ಬಿರುದನ್ನು ಗಳಿಸಿದ್ದಾರೆ. ಅವರ ಶೌರ್ಯ ಮತ್ತು ವನ್ಯಜೀವಿಗಳೊಂದಿಗಿನ ಸಂಪರ್ಕವು ಪ್ರಪಂಚದಾದ್ಯಂತ ಅನೇಕ ಜನರಿಗೆ ಸ್ಫೂರ್ತಿ ನೀಡುತ್ತಲೇ ಇದೆ ಎನ್ನಲಾಗಿದೆ.
