ನವದೆಹಲಿ: ಇನ್ನು ಮುಂದೆ ರೈಲಿನಲ್ಲಿಯೂ ಮಹಿಳೆಯರಿಗೆ ಎಂದು ಇಷ್ಟು ಸೀಟು ಮೀಸಲಾಗಿರಲಿವೆ. ಮಹಿಳೆಯರ ಸುರಕ್ಷತೆ ಯನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ರೈಲ್ವೆ ಇಲಾಖೆ ಈ ನಿರ್ಧಾರ ಕೈಗೊಂಡಿದೆ.
ಇದುವರೆಗೆ ರೈಲಿನಲ್ಲಿ ಹಾಗೂ ಮೆಟ್ರೋ ರೈಲಿನಲ್ಲಿ ಮಹಿಳೆಯರಿಗೆ ಅಂತ ಒಂದು ಬೋಗಿಯನ್ನೇ ಮೀಸಲಿಡಲಾಗಿತ್ತು. ಮಹಿಳೆಯರಿಗೆ ಮೀಸಲಿರುವ ವಿಶೇಷ ಬೋಗಿ ಯಲ್ಲದೇ ಈಗ ಎಲ್ಲಾ ಕಂಪಾರ್ಟ್‌ಮೆಂಟ್‌ಗಳಲ್ಲಿ ಇಷ್ಟು ಸೀಟು ಮಹಿಳೆಯರಿಗೆ ಎಂದು ರೈಲ್ವೆ ಮೀಸಲಿರಿಸಿದೆ.
ದೂರ ಪ್ರಯಾಣದ ರೈಲುಗಳಲ್ಲಿ ಮಹಿಳಾ ಪ್ರಯಾಣಿಕರಿಗಾಗಿ ಕೆಲವು ಸೀಟುಗಳನ್ನು ಕಾಯ್ದಿರಿಸುವ ಅವಕಾಶ ನೀಡಿದೆ. ದೂರ ತೆರಳುವ ರೈಲುಗಳಲ್ಲಿ ಮಹಿಳೆಯರ ಕ್ಷೇಮ ಸುರಕ್ಷತೆಯ ಸಲುವಾಗಿ ಯೋಜನೆಯೊಂದನ್ನು ಸಿದ್ಧಪಡಿಸಿದ್ದು, ಮಹಿಳೆಯರಿಗಾಗಿ ಮೀಸಲು ಬರ್ತ್‌ಗಳನ್ನು ಕಾಯ್ದಿರಿಸಲಿದೆ ಎಂದು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಹೇಳಿದ್ದಾರೆ.
ಎಕ್ಸ್ಪ್ರೆಸ್ ರೈಲಿನ ಸ್ಲೀಪರ್ ಕೋಚ್‌ನಲ್ಲಿ ಆರು ಸೀಟುಗಳನ್ನು ಮೀಸಲಿಡಲಿದೆ. ಹಾಗೆಯೇ ಗರೀಬ್ ರಥ್, ರಾಜಧಾನಿ ದುರಂತೋ ಸೇರಿದಂತೆ ಹಲವು ಹವಾನಿಯಂತ್ರಿತ ರೈಲುಗಳ ಮೂರನೇ ಎಸಿಕೋಚ್‌ನಲ್ಲಿಯೂ ಆರು ಬರ್ತ್‌ಗಳನ್ನು ಮಹಿಳಾ ಪ್ರಯಾಣಿಕರಿಗೆ ಮೀಸಲಿಡಲಾಗಿದೆ. ಇದರ ಜೊತೆ 45 ವರ್ಷ ಹಾಗೂ ಅದಕ್ಕಿಂತ ಹೆಚ್ಚಿನ ಪ್ರಾಯದ ಮಹಿಳೆಯರಿಗೂ ಸೀಟು ಮೀಸಲಿಡಲಾಗಿದೆ.
ಮಹಿಳೆಯರು ಗರ್ಭಿಣಿಯರು, ವಯಸ್ಸಾದ ಮಹಿಳೆಯರಿಗಾಗಿ ಪ್ರತಿ ಸ್ಲೀಪರ್ ಕೋಚ್‌ನ ಆರರಿಂದ ಏಳು ಕೆಳಭಾಗದ ಸೀಟುಗಳು ಎಸಿ 3 ಟೈರ್ ಬೋಗಿಯಲ್ಲಿ ನಾಲ್ಕರಿಂದ ಐದು ಕೆಳಭಾಗದ ಸೀಟುಗಳು ಹಾಗೆಯೇ ಎಸಿ2 ಟೈರ್ ಬೋಗಿಗಳಲ್ಲಿ 3 ರಿಂದ 4 ಲೋವರ್ ಬರ್ತ್‌ಗಳನ್ನು ಮೀಸಲಿಡಲಾಗಿದೆ.
