ವಾಷಿಂಗ್ಟನ್: ಅಮೆರಿಕಾದ ನಿಯೋಜಿತ ಅಧ್ಯಕ್ಷ ಜೋ ಬೈಡೆನ್ ಅವರ ರಕ್ಷಣಾ ಕಾರ್ಯದರ್ಶಿಯಾಗಿ ಲಾಯ್ಡ್ ಆಸ್ಟಿನ್ ಆಯ್ಕೆಯಾಗಿದ್ದಾರೆ.
ಲಾಯ್ಡ್ ಅವರು ಅಮೆರಿಕಾದ ರಕ್ಷಣಾ ಕಾರ್ಯದರ್ಶಿ ಹುದ್ದೆ ಅಲಂಕರಿಸಲಿರುವ ಮೊದಲ ಆಫ್ರಿಕನ್-ಅಮೆರಿಕನ್ ಆಗಲಿದ್ದಾರೆ. ಅಮೆರಿಕಾದ ಸೆಂಟ್ರಲ್ ಕಮಾಂಡ್ ನೇತೃತ್ವ ವಹಿಸಿದ ಅನುಭವ ಹೊಂದಿರುವ ಲಾಯ್ಡ್ ಆಸ್ಟಿನ್ ಅವರು ಬಾಗ್ದಾದ್‍ನಲ್ಲಿ 2003 ರಲ್ಲಿ ಅಮೆರಿಕಾದ ಸೇನಾ ಪಡೆಗಳನ್ನು ಮುನ್ನಡೆಸಿದವರು.
ಸೇವೆಯಿಂದ ನಿವೃತ್ತರಾಗಿರುವ 67 ವರ್ಷದ ಸೇನಾ ಜನರಲ್ ಲಾಯ್ಡ್ ಆಸ್ಟಿನ್ ಅವರ ಹೊರತಾಗಿ ಮಾಜಿ ರಕ್ಷಣಾ ಅಪರ-ಕಾರ್ಯ ದರ್ಶಿ ಮಿಷೆಲ್ ಫ್ಲೋರ್ನಿ ಕೂಡ ರಕ್ಷಣಾ ಕಾರ್ಯದರ್ಶಿ ಹುದ್ದೆಗೆ ಪೈಪೋಟಿಯಲ್ಲಿದ್ದರೂ, ಜನಾಂಗೀಯ ಅಲ್ಪಸಂಖ್ಯಾತರಿಗೆ ಹೆಚ್ಚಿನ ಸ್ಥಾನಮಾನ ನೀಡಬೇಕೆಂಬ ಒತ್ತಡದ ಹಿನ್ನೆಲೆಯಲ್ಲಿ ಬೈಡೆನ್ ಲಾಯ್ಡ್ ಆಸ್ಟಿನ್ ಅವರನ್ನು ಆರಿಸಿದ್ದಾರೆ.
