ಟೆಲ್ ಅವಿವ್(ಇಸ್ರೇಲ್): ಹಮಾಸ್ ಉಗ್ರರು ಎರಡನೇ ಹಂತದಲ್ಲಿ ತನ್ನಲ್ಲಿದ್ದ 17 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿದ್ದಾರೆ. ಇದರಲ್ಲಿ 13 ಇಸ್ರೇಲ್ ಮತ್ತು 4 ಥಾಯ್ಲೆಂಡ್ ನಾಗರಿಕರು ಸೇರಿದ್ದಾರೆ.
ಹಮಾಸ್-ಇಸ್ರೇಲ್ ನಡುವಿನ ತಾತ್ಕಾಲಿಕ ಕದನ ವಿರಾಮ ಒಪ್ಪಂದದ ಭಾಗವಾಗಿ ಈ ಒತ್ತೆಯಾಳುಗಳನ್ನು ಬಿಡುಗಡೆಗೊಳಿಸಲಾಗಿದ್ದು, ಈಜಿಪ್ಟ್‌ಗೆ ಕಳುಹಿಸಲಾಗಿದೆ ಎಂದು ಅಧಿಕೃತ ಮೂಲಗಳು ಮಾಹಿತಿ ನೀಡಿವೆ. ಹಮಾಸ್ ಈ ಒತ್ತೆಯಾಳುಗಳನ್ನು ಮೊದಲು ರೆಡ್‌ಕ್ರಾಸ್ ಸಂಸ್ಥೆಗೆ ಹಸ್ತಾಂತರಿಸಿದ್ದು ನಂತರ ಈಜಿಪ್ಟ್‌ಗೆ ಕರೆದೊಯ್ಯಲಾಗಿದೆ ಎಂದು ಇಸ್ರೇಲ್ ರಕ್ಷಣಾ ಪಡೆ (ಐಡಿಎಫ್) ತಿಳಿಸಿದೆ.
ಒತ್ತೆಯಾಳುಗಳನ್ನು ಕರೆದೊಯ್ಯುವ ಬೆಂಗಾವಲು ಪಡೆ ಕೆರೆಮ್ ಶಾಲೋಮ್ ಕ್ರಾಸಿಂಗ್‌ಗೆ ತೆರಳಿತು. ಅಲ್ಲಿ ಇಸ್ರೇಲ್ನ ಅಧಿಕಾರಿಗಳು ಹೆಸರುಗಳ ಪಟ್ಟಿ ಪರಿಶೀಲಿಸಿದ್ದಾರೆ. ಇಸ್ರೇಲ್ ರಕ್ಷಣಾ ಪಡೆ ಪ್ರತಿನಿಧಿಗಳು ತಮ್ಮವರ ಮಾಹಿತಿ ನಿಯಮಿತವಾಗಿ ನವೀಕರಿಸುತ್ತಿದ್ದಾರೆ. ಬಿಡುಗಡೆಯಾಗಿರುವ ಒತ್ತೆಯಾಳು ಗಳಲ್ಲಿ ಹಿಲಾ ರೋಟೆಮ್ ಎಂಬ 12 ವರ್ಷದ ಬಾಲಕಿಯೂ ಸೇರಿದ್ದಾಳೆ.
