ನವದೆಹಲಿ: ‘ಒನ್ ಡೈರೆಕ್ಷನ್’ ಬ್ಯಾಂಡ್ (One Direction Band) ಸದಸ್ಯ ಲಿಯಾಮ್ ಪೇನ್ ಹೋಟೆಲ್ ಬಾಲ್ಕನಿಯಿಂದ ಬಿದ್ದು ಮೃತಪಟ್ಟ (Liam Payne Death, Liam Payne Passed away) ಘಟನೆ ಅರ್ಜೆಂಟೀನಾದ ಬ್ಯೂನಸ್ ಐರಿಸ್‌ನಲ್ಲಿ ನಡೆದಿದೆ. ಬ್ಯೂನಸ್ ಐರಿಸ್‌ನ ಸಾರ್ವಜನಿಕ ತುರ್ತು ವೈದ್ಯಕೀಯ ಸೇವೆಗಳ ಮುಖ್ಯಸ್ಥರು ಪೇನ್ ಅವರ ಸಾವನ್ನು ದೃಢಪಡಿಸಿದ್ದಾರೆ.
ಅವರಿಗೆ 31 ವರ್ಷ ವಯಸ್ಸಾಗಿತ್ತು. ಇವರು ಒನ್ ಡೈರೆಕ್ಷನ್ ಬಾಯ್ಸ್‌ ಬ್ಯಾಂಡ್‌ನ ಗಾಯಕ-ಗೀತರಚನೆಕಾರರಾಗಿದ್ದರು. ಕಾಸಾ ಸುರ್ ಪಲೆರ್ಮೊ ಹೋಟೆಲ್‌ನ ಮೂರನೇ ಮಹಡಿಯಿಂದ ಬಿದ್ದಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ. ಸ್ಥಳೀಯ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
ಇದಕ್ಕೂ ಮುನ್ನ ಹೋಟೆಲ್ ಲಾಬಿಯಲ್ಲಿ ಪೇನ್ ವಿಲಕ್ಷಣವಾಗಿ ವರ್ತಿಸಿದ್ದರು ಎಂದು ತಿಳಿದುಬಂದಿದೆ. ಲಾಬಿಯಲ್ಲಿ ತನ್ನ ಲ್ಯಾಪ್ ಟಾಪ್ ಅನ್ನು ಈತ ಒಡೆದುಹಾಕಿದ್ದ. ನಂತರ ಆತನನ್ನು ಮತ್ತೆ ಹೋಟೆಲ್ ಕೋಣೆಗೆ ಕರೆದೊಯ್ದು ಬಿಡಲಾಗಿತ್ತು.
ಲಿಯಾಮ್ ಪೇನ್ ತನ್ನ ಮಾಜಿ ಬ್ಯಾಂಡ್ ಮೇಟ್ ನಿಯಾಲ್ ಹೊರನ್ ಅವರ ಸಂಗೀತ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಅರ್ಜೆಂಟೀನಾದಲ್ಲಿದ್ದರು. ಹದಿ ಹರೆಯದಲ್ಲಿಯೇ ಒನ್ ಡೈರೆಕ್ಷನ್‌ಗೆ ಸೇರಿದ್ದರು ಮತ್ತು ಗುಂಪಿನ ಪ್ರಮುಖ ಹಾಡು ಬರಹಗಾರರಲ್ಲಿ ಒಬ್ಬರೆಂದು ಪರಿಗಣಿಸಲ್ಪಟ್ಟರು. 2021ರಲ್ಲಿ ಬ್ಯಾಂಡ್‌ನ ಪ್ರವಾಸದ ಸಮಯದಲ್ಲಿ ಅನಧಿಕೃತ ಮಾದಕವಸ್ತುಗಳು ಮತ್ತು ಆಲ್ಕೋಹಾಲ್‌ನ ವ್ಯಸನಿಯಾಗಿದ್ದರು.
ನಂತರ ಪೇನ್ ಮಾದಕವಸ್ತು ವ್ಯಸನದಿಂದ ಬಿಡಿಸಿಕೊಳ್ಳಲು ಯತ್ನಿಸಿದರು. ಆಗಾಗ ಆತ್ಮಹತ್ಯೆಯ ಆಲೋಚನೆಗಳನ್ನು ವ್ಯಕ್ತಪಡಿಸುತ್ತಿದ್ದರು. ಈ ವಾರದ ಆರಂಭದಲ್ಲಿ, ಲಿಯಾಮ್ ಅವರ ಮಾಜಿ ಗೆಳತಿ ಮಾಯಾ ಹೆನ್ರಿ ಅವರ ಜೊತೆ ಗರ್ಭಪಾತಕ್ಕೆ ಸಂಬಂಧಿಸಿದಂತೆ ಜಗಳ ಮಾಡಿಕೊಂಡಿದ್ದರು ಎಂದು ಗೊತ್ತಾಗಿತ್ತು.
2010ರಲ್ಲಿ ಒನ್ ಡೈರೆಕ್ಷನ್ ಬ್ಯಾಂಡ್ ಶುರುವಾಗಿತ್ತು. ಅತ್ಯಂತ ಯಶಸ್ವಿ ಬ್ಯಾಂಡ್‌ಗಳಲ್ಲಿ ಒಂದಾಗಿದ್ದ ಇದನ್ನು 2016ರಲ್ಲಿ ವಿಸರ್ಜಿಸಲಾಗಿತ್ತು.ನಂತರ ಅವರು ಸೋಲೋ ಗಾಯಕ- ಪ್ರದರ್ಶಕ ಆಗಿ ಮುಂದುವರಿದಿದ್ದರು. ಮಾಜಿ ಸಂಗಾತಿ ಶೆರಿಲ್‌ ಅವರಲ್ಲಿ ಒಬ್ಬ 7 ವರ್ಷದ ಮಗನಿದ್ದಾನೆ.
ಇದನ್ನೂ ಓದಿ: Tahsildar Death: ಬೆಂಗಳೂರಿನ ಲಾಡ್ಜ್‌ನಲ್ಲಿ ತೀರ್ಥಹಳ್ಳಿ ತಹಶೀಲ್ದಾರ್ ನಿಗೂಢ ಸಾವು
