ಟೋಕಿಯೋ: ಕೆಲವೊಂದು ಪರಿಸ್ಥಿತಿಗಳು ಅನೇಕರನ್ನು ಇಷ್ಟವಿಲ್ಲದ ಕೆಲಸ ಮಾಡುವಂತೆ ಮಾಡುತ್ತದೆ. ಪರಿಸ್ಥಿತಿಯ ಕೈಗೊಂಬೆಯಾಗಿ ಅನೇಕ ಬಾಲಕಿಯರು, ಯುವತಿಯರು, ಮಹಿಳೆಯರು ವಿಶ್ವದ ವಿವಿಧೆಡೆ ಲೈಂಗಿಕ ವ್ಯಾಪಾರದಲ್ಲಿ ತೊಡಗುವಂತೆ ಮಾಡಿದೆ. ಅದರಲ್ಲೂ ಕೋವಿಡ್ ಸಾಂಕ್ರಾಮಿಕವು ಮಾಡಿಸಿದ ಸಾಲವನ್ನು ತೀರಿಸಲು ಅನೇಕ ಮಹಿಳೆಯರನ್ನು ಈ ವೃತ್ತಿಯತ್ತ ಸೆಳೆಯುವಂತೆ ಮಾಡಿದೆ. ಇದರಿಂದಾಗಿಯೇ ಈಗ ಏಷ್ಯಾದ ನಗರವೊಂದು ಸೆಕ್ಸ್ ಟೂರಿಸಂ ಕೇಂದ್ರವಾಗಿ (Sex Tourism Hub) ಬೆಳೆದಿದೆ.
ವಿಶ್ವದ ಅತ್ಯಂತ ವಾಸಯೋಗ್ಯ ನಗರಗಳಲ್ಲಿ ಒಂದಾಗಿರುವ ಈ ನಗರವು ಕಳೆದ ಕೆಲವು ವರ್ಷಗಳಿಂದ ಆರ್ಥಿಕವಾಗಿ ಹೆಚ್ಚಿನ ಅಭಿವೃದ್ಧಿಯನ್ನು ಕಾಣುತ್ತಿದೆ. ಇದಕ್ಕೆ ಮುಖ್ಯ ಕಾರಣ ಲೈಂಗಿಕ ಪ್ರವಾಸೋದ್ಯಮ. ಈ ನಗರದಲ್ಲಿ ಪುರುಷರು ಬೀದಿಗಳಲ್ಲಿ ಅಲೆದಾಡುತ್ತಾ ಮಹಿಳೆಯರನ್ನು ಹುಡುಕುತ್ತಾರೆ. ಲೈಂಗಿಕ ಪ್ರವಾಸೋದ್ಯಮದಲ್ಲಿ ಥಾಯ್ಲೆಂಡ್‌ನ ಬ್ಯಾಂಕಾಕ್‌ ಮಾತ್ರವಲ್ಲ ಜಪಾನ್ ನ ಟೋಕಿಯೋ ಕೂಡ ಪ್ರಮುಖ ಕೇಂದ್ರವಾಗಿ ಬೆಳೆಯುತ್ತಿದೆ. ಇದು ವಿದೇಶಿ ಪ್ರವಾಸಿಗರನ್ನೂ ಸೆಳೆಯುತ್ತಿದೆ.
ಕೋವಿಡ್ ಸಾಂಕ್ರಾಮಿಕದ ಬಳಿಕ ಬಡ ರಾಷ್ಟ್ರವಾಗಿರುವ ಜಪಾನ್‌ನ ಲೈಸನ್ ಕೌನ್ಸಿಲ್ ಪ್ರೊಟೆಕ್ಟಿಂಗ್ ಯೂತ್ಸ್ ಸೈಬೋರೆನ್ ಸಂಸ್ಥೆಯ ಪಕ್ಕದಲ್ಲಿರುವ ಉದ್ಯಾನವನವು ಲೈಂಗಿಕ ಚಟುವಟಿಕೆಯ ಕೇಂದ್ರವಾಗಿದೆ. ಕೋವಿಡ್ ಸಾಂಕ್ರಾಮಿಕದ ಬಳಿಕ ಈ ಉದ್ಯಾನವನಕ್ಕೆ ವಿದೇಶಿಯರ ಆಗಮನ ಹೆಚ್ಚಾಗುತ್ತಿದೆ ಎಂದು ಸೈಬೋರೆನ್ ಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಯೋಶಿಹಿಡೆ ತನಕಾ ಹೇಳಿದ್ದಾರೆ.
ಇಲ್ಲಿ ಹೆಚ್ಚಿನ ವಿದೇಶಿ ಪುರುಷರನ್ನು ಕಾಣುತ್ತಿದ್ದೇವೆ. ಇದರಲ್ಲಿ ಬಹುಪಾಲು ಚೈನೀಸ್. ಇದರಲ್ಲಿ ಹದಿಹರೆಯದವರು ಸೇರಿದ್ದಾರೆ. ಇಪ್ಪತ್ತರ ದಶಕದ ಆರಂಭದಲ್ಲಿ ಮಹಿಳೆಯರು ಬದುಕುಳಿಯಲು ಲೈಂಗಿಕ ಉದ್ಯಮದತ್ತ ಮುಖಮಾಡಿರುವುದು ಕಾಕತಾಳೀಯವಾಗಿದೆ ಎಂದು ತನಕಾ ತಿಳಿಸಿದ್ದಾರೆ. ವಿದೇಶಿ ಪುರುಷರು ಯುವತಿಯರನ್ನು ಪಡೆಯುವ ಮತ್ತು ಅವರಿಂದ ಲೈಂಗಿಕ ಸೇವೆಗಳನ್ನು ಖರೀದಿಸುವ ದೇಶವಾಗಿ ಜಪಾನ್ ಮಾರ್ಪಟ್ಟಿದೆ.
ಇದು ಕೇವಲ ದೇಶೀಯ ಸಮಸ್ಯೆಯಾಗಿ ಉಳಿದಿಲ್ಲ. ಅಂತಾರಾಷ್ಟ್ರೀಯ ಸಮುದಾಯದಲ್ಲಿ ಜಪಾನಿನ ಮಹಿಳೆಯರ ಗೌರವಕ್ಕೆ ಕುಂದು ಉಂಟು ಮಾಡುತ್ತಿದೆ. ಇದು ಗಂಭೀರ ಸಮಸ್ಯೆಯಾಗಿ ಬೆಳೆಯುತ್ತಿದೆ ಎಂದು ಜಪಾನ್ ನ ಪ್ರಮುಖ ವಿರೋಧ ಪಕ್ಷವಾದ ಕಾನ್ಸ್ ಟಿಟ್ಯೂಶನಲ್ ಡೆಮಾಕ್ರಟಿಕ್ ಪಾರ್ಟಿಯ ಕಝುನೋರಿ ಯಮನೋಯಿ ಹೇಳಿದ್ದಾರೆ.
ಇಂತಹ ಚಟುವಟಿಕೆಗಳಿಗೆ ಪೊಲೀಸರು ಕಡಿವಾಣ ಹಾಕಿದ್ದಾರೆ. ಈ ವಾರದ ಆರಂಭದಲ್ಲಿ ಜಪಾನ್‌ನ ಉದ್ಯೋಗ ಭದ್ರತಾ ಕಾಯ್ದೆಯನ್ನು ಉಲ್ಲಂಘಿಸಿದ ಶಂಕೆಯ ಮೇಲೆ ಟೋಕಿಯೊ ಮೆಟ್ರೋಪಾಲಿಟನ್ ಪೊಲೀಸರು ಐದು ಜನರನ್ನು ಬಂಧಿಸಿದ್ದಾರೆ. ಲೈಂಗಿಕ ಉದ್ಯಮದಲ್ಲಿ ಕೆಲಸ ಮಾಡಲು ಸಾಮಾಜಿಕ ಮಾಧ್ಯಮದ ಮೂಲಕ ಮಹಿಳೆಯರನ್ನು ನೇಮಿಸಿಕೊಳ್ಳಲು ಅವರು ಕಾರ್ಯಾಚರಣೆಯನ್ನು ನಡೆಸುತ್ತಿದ್ದರು. ಪೊಲೀಸರ ಪ್ರಕಾರ ಶಂಕಿತರ ಗುಂಪು ರಾಷ್ಟ್ರವ್ಯಾಪಿ ಸುಮಾರು 350 ಅಂಗಡಿಗಳೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಿದೆ ಮತ್ತು ಸಾಮಾಜಿಕ ಮಾಧ್ಯಮದ ಮೂಲಕ ಮಹಿಳೆಯರನ್ನು ನೇಮಿಸಿಕೊಂಡಿದೆ ಎಂದು ಅವರು ತಿಳಿಸಿದ್ದಾರೆ.
ಕೋವಿಡ್ -19 ಸಮಯದಲ್ಲಿ ಮಹಿಳೆಯರು ಅನುಭವಿಸಿದ ಆರ್ಥಿಕ ಸಂಕಷ್ಟವು ಅವರನ್ನು ಲೈಂಗಿಕ ವ್ಯಾಪಾರಕ್ಕೆ ತಳ್ಳಿದೆ. ಅನೇಕರು ತಮ್ಮ ಸಾಲವನ್ನು ತೀರಿಸಲು ಹೋಸ್ಟ್ ಕ್ಲಬ್‌ಗಳಲ್ಲಿ ಹಣವನ್ನು ಖರ್ಚು ಮಾಡಲು ಬಯಸುತ್ತಾರೆ ಎಂದು ಜಪಾನ್ ಟೈಮ್ಸ್ ವರದಿ ಮಾಡಿದೆ. ಮೆಟ್ರೋಪಾಲಿಟನ್ ಪೊಲೀಸ್ ಇಲಾಖೆ (MPD) ಪ್ರಕಾರ 2023ರಲ್ಲಿ ಬಂಧಿಸಲ್ಪಟ್ಟ ಸುಮಾರು ಶೇ. 43ರಷ್ಟು ಲೈಂಗಿಕ ವ್ಯಾಪಾರದಲ್ಲಿ ತೊಡಗಿದ್ದವರಲ್ಲಿ ಮಹಿಳೆಯರು ಹೋಸ್ಟ್ ಕ್ಲಬ್‌ಗಳಿಗೆ ಸೇರಿದ್ದವರು. ಬಂಧಿತರಲ್ಲಿ ಸುಮಾರು ಶೇ. 80ರಷ್ಟು ಮಂದಿ 20 ವರ್ಷ ವಯಸ್ಸಿನವರಾಗಿದ್ದರೆ, ಮೂವರು 19 ಅಥವಾ ಅದಕ್ಕಿಂತ ಕಡಿಮೆ ವಯಸ್ಸಿನವರು.
ಕಾನೂನಿನ ಅನುಷ್ಠಾನದಲ್ಲಿರುವ ಲೋಪದೋಷಗಳು ಮಹಿಳೆಯರನ್ನು ದುರ್ಬಲರನ್ನಾಗಿ ಮಾಡಿದೆ. ಇದು ಅವರನ್ನು ದೈಹಿಕ ಹಿಂಸೆ ಮತ್ತು ಲೈಂಗಿಕವಾಗಿ ಹರಡುವ ರೋಗಗಳಿಗೆ ತಮ್ಮನ್ನು ತಾವು ಒಡ್ಡಿಕೊಳ್ಳುವಂತೆ ಮಾಡಿದೆ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ.
ನೆದರ್‌ಲ್ಯಾಂಡ್ಸ್‌ನಂತಹ ದೇಶಗಳಲ್ಲಿ ವೇಶ್ಯಾವಾಟಿಕೆ ಕಾನೂನುಬದ್ಧವಾಗಿದೆ. ಇಲ್ಲಿ ಮಾನವ ಕಳ್ಳಸಾಗಣೆ ಮತ್ತು ಇತರ ರೀತಿಯ ಅಪರಾಧ ಚಟುವಟಿಕೆಗಳನ್ನು ಎದುರಿಸಲು ಮತ್ತು ಮಹಿಳೆಯರ ರಕ್ಷಣೆಯನ್ನು ಖಚಿತಪಡಿಸಿಕೊಳ್ಳಲು ಉದ್ಯಮವು ಕಾನೂನಿನ ಮೂಲಕ ನಿಯಂತ್ರಿಸಲ್ಪಡುತ್ತಿದೆ. ಆದರೂ ಲೈಂಗಿಕ ಕಳ್ಳಸಾಗಣೆಯು ದೇಶದಲ್ಲಿ ಒಂದು ಪ್ರಮುಖ ಸಮಸ್ಯೆಯಾಗಿ ಉಳಿದಿದೆ.
