ಟೆಕ್‌ ಸೈನ್ಸ್ ಎಲ್‌.ಪಿ.ಕುಲಕರ್ಣಿ ಅತಿ ಕಡಿಮೆ ಬೆಲೆಯ ಪ್ಲಾಸ್ಟಿಕ್ ನಿಂದ ವಜ್ರವನ್ನು ತಯಾರಿಸುವ ತಂತ್ರಜ್ಞಾನವನ್ನು ಅಭಿವೃದ್ಧಿ ಪಡಿಸುವಲ್ಲಿ ವಿಜ್ಞಾನಿಗಳು ತೊಡಗಿಕೊಂಡಿದ್ದಾರೆ. ಒಂದು ಸಾಧಾರಣ ವಜ್ರದ ಹರಳೇ ಲಕ್ಷಗಟ್ಟಲೇ ಬೆಲೆಬಾಳುತ್ತದೆ. ಅಂತಹ ವಜ್ರವನ್ನು ಪ್ಲಾಸ್ಟಿಕಿನಿಂದ ತಯಾರಿಸಿದರೆ ಹೇಗಿರುತ್ತದೆ? ಶಕ್ತಿಶಾಲಿ ಲೇಸರ್ (ಲೈಟ್ ಅಂಪ್ಲಿಫಿಕೇಷನ್ ಬೈ ಸ್ಟಿಮ್ಯೂಲೇಟೆಡ್ ಎಮೀಷನ್ ಆಫ್ ರೇಡಿಯೇಷನ್) ಅರ್ಥಾತ್ ವಿಕಿರಣ ಚೋದಿತ ಉತ್ಸರ್ಜನೆಯಿಂದ ಬೆಳೆಕಿನ ವರ್ಧನೆ ಎಂಬ ಚದುರದ ಬೆಳಕಿನ ಸಹಾಯದಿಂದ ಸಾಮಾನ್ಯ ಪ್ಲಾಸ್ಟಿಕನ್ನು ತುಂಡರಿಸಿ ಪುಟ್ಟ ಪುಟ್ಟ ವಜ್ರದ ಹರಳುಗಳನ್ನಾಗಿ ತಯಾರಿಸಬಹುದಂತೆ ಎಂದು ಹೇಳುತ್ತಿದೆ ಇಂದು ಸಂಶೋಧನೆ. ಸರಳವಾದ ಪ್ಲಾಸ್ಟಿಕ್‌ ಗಳನ್ನು ಲೇಸರ್ ಬೆಳಕಿನ ಪಲ್ಸ್ ನೊಂದಿಗೆ ಸಣ್ಣ ವಜ್ರಗಳಾಗಿ ಪರಿವರ್ತಿಸಬಹುದು. ಶಕ್ತಿಯುತವಾದ ಲೇಸರ್ ಗಳೊಂದಿಗೆ ಪ್ಲಾಸ್ಟಿಕ್ ಅನ್ನು ಸ್ಪೋಟಿಸುವ ಪರಿಣಾಮದಿಂದ ಸಣ್ಣ ವಜ್ರಗಳನ್ನು ರಚಿಸಬಹುದು, ಗ್ರಹಗಳಲ್ಲಿ ಕಂಡುಬರುವ ಹೆಚ್ಚಿನ ತಾಪಮಾನ ಮತ್ತು ಒತ್ತಡಗಳಲ್ಲಿ ಇದೇ ರೀತಿಯ ಪ್ರಕ್ರಿಯೆಗಳು ಸಂಭವಿಸುತ್ತವೆ. ಯುರೇನಸ್ ಮತ್ತು ನೆಪ್ಚೂನ್ ಏಕೆ ವಿಭಿನ್ನವಾಗಿವೆ ಎಂಬೆ ಅಂಶಗಳನ್ನು ಈ ಸಂಶೋಧನೆ ವಿವರಿಸಲು ಸಹಾಯ ಮಾಡುತ್ತದೆ ಎನ್ನುತ್ತಿದ್ದಾರೆ ಸಂಶೋಧಕರು. ಇಂಗಾಲ ಮತ್ತು ಹೈಡ್ರೋಜನ್ ಮಿಶ್ರಣದಲ್ಲಿ ಲೇಸರ್‌ಗಳು ಹೊಳೆಯುವ ಮೂಲಕ ಸಂಶೋಧಕರು ಮೊದಲು ನ್ಯಾನೊ ಡೈಮಂಡ್ ರಚಿಸಲು ಸಮರ್ಥರಾದರು. ಆದರೆ, ಇದಕ್ಕೆ ಅಸಾಧಾರಣವಾದ ಹೆಚ್ಚಿನ ಒತ್ತಡ ಬೇಕಾಗುತ್ತದೆ. ಕ್ಯಾಲಿಫೋರ್ನಿಯಾದ ಎಸ್ ಎಲ್ ಎ ಸಿ ರಾಷ್ಟ್ರೀಯ ವೇಗವರ್ಧಕ ಪ್ರಯೋಗಾಲಯದಲ್ಲಿ ಸಂಶೋಧಕರು ಪಿಇಟಿ (ಪಾಲಿ ಇಥೈ ಲೀನ್ ಟೆರಾಪ್ತಲೇಟ) ಎಂಬ ಸರಳ ಪ್ಲಾಸ್ಟಿಕ್ ಅನ್ನು ಬಳಸುತ್ತಾರೆ - ಸಾಮಾನ್ಯವಾಗಿ ಬಾಟಲಿಗಳು ಮತ್ತು ಇತರ ಕಂಟೇನರ್‌ಗಳನ್ನು ತಯಾರಿಸಲು ಪಿಇಟಿ ಯನ್ನು ಬಳಸಲಾಗುತ್ತದೆ - ಇದು ಇಂಗಾಲ, ಹೈಡ್ರೋಜನ್ ಮತ್ತು ಆಮ್ಲಜನಕವನ್ನು ಹೊಂದಿರುತ್ತದೆ. ಪ್ಲಾಸ್ಟಿಕ್ ಮೇಲೆ ಶಕ್ತಿಯುತವಾದ ಲೇಸರ್ ಅನ್ನು ಹಾಯಿಸಿದಾಗ, ಅದು ೩೨೦೦ ಡಿಗ್ರಿ ಸೆಲ್ಸಿಯಸ್ ಮತ್ತು ೫೮೦೦ ಡಿಗ್ರಿ ಸೆಲ್ಸಿ ಯಸ್ ನಡುವಿನ ತಾಪಮಾನದಲ್ಲಿ ಬಿಸಿಯಾಗುತ್ತದೆ. ಲೇಸರ್ ಪಲ್ಸ್‌ನಿಂದ ಉತ್ಪತ್ತಿಯಾಗುವ ಆಘಾತ ತರಂಗಗಳು ಪ್ಲಾಸ್ಟಿಕ್ ಅನ್ನು ೭೨ ಗಿಗಾ ಪಾಸ್ಕಲ್ಗಳ ಒತ್ತಡಕ್ಕೆ ತರುತ್ತವೆ. ಇದು ಒತ್ತಡದ ಐದನೇ ಒಂದು ಭಾಗಕ್ಕೆ ಸಮಾನವಾಗಿರುತ್ತದೆ. ಇಂಗಾಲದಿಂದ ಹೈಡ್ರೋಜನ್ ಮತ್ತು ಆಮ್ಲಜನಕಗಳು ಪ್ರತ್ಯೇಕಿಸಲ್ಪಡುತ್ತವೆ. ಇದರಿಂದ ಕೆಲವು ನ್ಯಾನೊಮೀಟರ್ ಗಾತ್ರದ ಸಣ್ಣ ವಜ್ರದ ಹರಳಿನ ರಚನೆಗಳು ರೂಪುಗೊಳ್ಳುತ್ತವೆ. ಇದರ ಜೊತೆಗೆ ವಿದ್ಯುತ್ ವಾಹಕವಾದ ಸೂರ್ಪ ಅಯಾನಿಕ್ ನೀರು ಬಿಡುಗಡೆಯಾಗುತ್ತದೆ. ಈ ರೀತಿಯ ಪ್ರಕ್ರಿಯೆಗಳು ಯುರೇನಸ್, ನೆಪ್ಚೂನ್ ,ಅಲ್ಲದೇ ಟೈಟಾನ್ ನಂತಹ ಆಕಾಶಕಾಯಗಳಲ್ಲಿ ನಡೆಯುತ್ತವೆ ಎಂದು ಅಧ್ಯಯನ ತಿಳಿಸುತ್ತಿದೆ. ಗ್ರಹಗಳು ಏಕೆ ಅನಿರೀಕ್ಷಿತವಾಗಿ ಬಿಸಿಯಾಗುತ್ತವೆ ಎಂಬುದನ್ನು ಈ ಪ್ರಯೋಗದಿಂದ ತಿಳಿಯಬಹುದು. ಯುರೇನಸ್ ಒಳಗೆ, ವಜ್ರ ರಚನೆಯಿಂದ ಉಳಿದಿರುವ ಸೂಪರ್ ಅಯಾನಿಕ್ ನೀರಿನ ಪ್ಯಾಕೆಟ್‌ಗಳು ವಿದ್ಯುತ್ ಪ್ರವಾಹಗಳನ್ನು ನಡೆಸುತ್ತಿರಬಹುದು. ಅಲ್ಲದೇ, ಇದು ಅದರ ಕಾಂತಕ್ಷೇತ್ರದ ವಿಚಿತ್ರ ಆಕಾರದೊಂದಿಗೆ ಏನಾದರೂ ಸಂಬಂಧ ಹೊಂದಿರಬಹುದೇ ಎಂಬ ಕುತೂಹಲ ಮೂಡಿಸಿದೆ. ಪ್ರಯೋಗದ ಮುಂದಿನ ಹಂತವೆಂದರೆ; ಯುರೇನೆಸ್, ನೆಪ್ಚೂನ್ ಆಕಾಶಕಾಯಗಳ ಕುರಿತು ಅಧ್ಯಯನ ನಡೆಸಿ, ಅವುಗಳ ಸೃಷ್ಟಿಯ ರಹಸ್ಯವನ್ನು ಅರಿಯುವುದಾಗಿದೆ. ನ್ಯಾನೊ ಡೈಮಂಡ್ ರೂಪುಗೊಂಡ ನಂತರ ಅವುಗಳನ್ನು ಸಂಗ್ರಹಿಸು ವುದು ಇನ್ನೊಂದು ವಿಷಯ. ಇದೇ ರೀತಿಯ ವಸ್ತುಗಳನ್ನು ಈಗಾಗಲೇ ಕೈಗಾರಿಕಾ ಅಪಘರ್ಷಕ ಪ್ರಕ್ರಿಯೆಗಳಲ್ಲಿ ಬಳಸಲಾಗುತ್ತಿದೆ. ಅಲ್ಲದೇ,ಇದು ಅನೇಕ ವೈಜ್ಞಾನಿಕ ಅನ್ವಯಗಳಲ್ಲಿ ಉಪಯುಕ್ತವಾಗಬಹುದು. ಈ ರೀತಿಯ ವಜ್ರಗಳ ತಯಾರಿಕೆ ಹೆಚ್ಚಾದರೆ, ಮುಂದೊಂದು ದಿನ ಜನಸಾಮಾನ್ಯನೂ ಸಹ ವಜ್ರದ ಆಭರಣಗಳನ್ನು ಧರಿಸಬಹುದು!