ಬೆಂಗಳೂರು: ಮೋದಕ (Modaka Recipes) ಗಣೇಶ ಚತುರ್ಥಿಯಂದು ಮಾಡುವಂತಹ ಅತ್ಯಂತ ಪ್ರಮುಖ ಸಿಹಿತಿಂಡಿಯಾಗಿದೆ. ಇದು ಗಣೇಶನಿಗೆ ಬಹಳ ಪ್ರಿಯವಾದ ತಿಂಡಿಯಾಗಿದೆ. ಅಕ್ಕಿ ಹಿಟ್ಟು ಮತ್ತು ಬೆಲ್ಲವನ್ನು ಬಳಸಿ ಮಾಡುವಂತಹ ಮೋದಕವನ್ನು ಗಣೇಶ ಚತುರ್ಥಿಯ ದಿನ ಪೂಜೆಯ ವೇಳೆ ಗಣೇಶನಿಗೆ ನೈವೇದ್ಯವಾಗಿ ಅರ್ಪಿಸುತ್ತಾರೆ. ಗಣೇಶನಿಗೆ ಮೋದಕವನ್ನು ಅರ್ಪಿಸಿದರೆ ಆತ ಬೇಡಿದನ್ನು ಕರುಣಿಸುತ್ತಾನೆ ಮತ್ತು ಸಂಕಷ್ಟದಿಂದ ಜನರನ್ನು ಕಾಪಾಡುತ್ತಾನೆ ಎಂಬ ನಂಬಿಕೆ ಇದೆ. ಹಾಗಾಗಿ ಗಣೇಶ ಚತುರ್ಥಿಯ ದಿನ ಗಣೇಶನಿಗೆ ಬಗೆ ಬಗೆಯ ಮೋದಕ(Modaka)ವನ್ನು ಮಾಡಿ ನೈವೇದ್ಯ ಅರ್ಪಿಸಿ.
ಚಾಕೊಲೇಟ್ ಮೋದಕ:
ಇದನ್ನು ಬಹಳ ಬೇಗನೆ ತಯಾರಿಸಬಹುದು ಮತ್ತು ಇದು ಬಹಳ ರುಚಿಕರವಾಗಿರುತ್ತದೆ. ಹಾಗಾದರೆ ಇದನ್ನು ತಯಾರಿಸುವುದು ಹೇಗೆ ಎಂಬುದನ್ನು ತಿಳಿಯೋಣ.
ಬೇಕಾಗುವ ಸಾಮಗ್ರಿಗಳು:
1 ಮಿಲ್ಕ್ ಮೇಡ್ ಮಿನಿ, ½ ಟೀ ಚಮಚ ತುಪ್ಪ, 1 ಕಪ್ ಟೋನ್ಡ್ ಹಾಲು, 1 ಟೀ ಚಮಚ ವಿನೆಗರ್ ಅಥವಾ ನಿಂಬೆ ರಸ, 1 ಟೀಸ್ಪೂನ್ ಕೋಕೋ ಪೌಡರ್, 1 ಟೀಸ್ಪೂನ್ ಕಾರ್ನ್ ಫ್ಲೋರ್
ಮಾಡುವ ವಿಧಾನಗಳು:
• ಹಂತ 1: ಬಾಣಲೆಯಲ್ಲಿ ತುಪ್ಪ, ಮಿಲ್ಕ್ ಮೇಡ್ ಮತ್ತು ಹಾಲನ್ನು ಕಡಿಮೆ ಉರಿಯಲ್ಲಿ ಬಿಸಿ ಮಾಡಿ. ಅದು ಕುದಿಯುವವರೆಗೆ ನಿರಂತರವಾಗಿ ಬೆರೆಸುತ್ತೀರಿ.
• ಹಂತ 2: ಅದಕ್ಕೆ ವಿನೆಗರ್/ನಿಂಬೆ ರಸವನ್ನು ಸೇರಿಸಿ ಮತ್ತು ಬಿಸಿ ಮಾಡುತ್ತಾ ಇರಿ. ಸ್ವಲ್ಪ ನೀರಿನಲ್ಲಿ ಕೋಕೋ ಮತ್ತು ಕಾರ್ನ್ ಫ್ಲೋರ್ ಅನ್ನು ಪೇಸ್ಟ್ ಮಾಡಿ ಮತ್ತು ಮಿಶ್ರಣಕ್ಕೆ ಸುರಿಯಿರಿ.
• ಹಂತ 3: ಮಿಶ್ರಣವು ಪ್ಯಾನ್‍ನ ಬದಿಗಳನ್ನು ಬಿಡುವವರೆಗೆ ಮಧ್ಯಮ ಉರಿಯಲ್ಲಿ ಬೇಯಿಸಿ. ನಂತರ ಪ್ಲೇಟ್ಗೆ ಹಾಕಿ.
• ಹಂತ 4: ಸ್ವಲ್ಪ ತಣ್ಣಗಾದಾಗ, ಮಿಶ್ರಣವನ್ನು ಮೋದಕದ ಅಚ್ಚುಗಳಲ್ಲಿ ಹಾಕಿ ಮೋದಕವನ್ನು ತಯಾರಿಸಿ.
ಓಟ್ಸ್ ಮೋದಕ:
ಓಟ್ಸ್ ಅನ್ನು ಉಪಹಾರಗಳಲ್ಲಿ ಹೆಚ್ಚಾಗಿ ಸೇವಿಸುತ್ತಾರೆ. ಈ ಓಟ್ಸ್ ಅನ್ನು ಬಳಸಿ ಮೋದಕ ಕೂಡ ತಯಾರಿಸಬಹುದು. ಅದು ಹೇಗೆ ಎಂಬುದನ್ನು ತಿಳಿದುಕೊಳ್ಳಿ.
ಬೇಕಾಗುವ ಸಾಮಾಗ್ರಿಗಳು:
1 ಮಿಲ್ಕ್ ಮೇಡ್ ಮಿನಿ, 1 ಕಪ್ ಟೋನ್ಡ್ ಹಾಲು, 1 ½ ಕಪ್ ಪ್ಲೇನ್ ಓಟ್ಸ್, 1 ಕಪ್ ಬಟರ್, ¼ ಚಮಚ ಏಲಕ್ಕಿ ಪುಡಿ
ಮಾಡುವ ವಿಧಾನಗಳು:
• ಹಂತ 1: ಸಾದಾ ಓಟ್ಸ್ ಅನ್ನು ಸ್ವಲ್ಪ ಬೆಣ್ಣೆಯೊಂದಿಗೆ ಕಡಿಮೆ ಉರಿಯಲ್ಲಿ ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಹುರಿಯಿರಿ. ತಣ್ಣಗಾದ ನಂತರ, ಅವುಗಳನ್ನು ಬ್ಲೆಂಡರ್ ನಲ್ಲಿ ಹಾಕಿ ನುಣ್ಣಗೆ ಪುಡಿ ಮಾಡಿ.
• ಹಂತ 2: ಪ್ಯಾನ್‍ನಲ್ಲಿ, ಮಿಲ್ಕ್ ಮೇಡ್ ಮತ್ತು ಹಾಲನ್ನು ಸೇರಿಸಿ ಮತ್ತು ಕಡಿಮೆ ಉರಿಯಲ್ಲಿ ಬೇಯಿಸಿ. ಅದು ಕುದಿಯುವವರೆಗೆ ನಿರಂತರವಾಗಿ ಕಲಕುತ್ತಾ ಇರಿ. ಅದಕ್ಕೆ ಪುಡಿ ಮಾಡಿದ ಓಟ್ಸ್ ಪುಡಿ ಮತ್ತು ಬೆಣ್ಣೆಯನ್ನು ಸೇರಿಸಿ. ಮಿಶ್ರಣವು ಪ್ಯಾನ್‍ನ ಬದಿಗಳನ್ನು ಬಿಡಲು ಪ್ರಾರಂಭಿಸುವವರೆಗೆ ಮಧ್ಯಮ ಉರಿಯಲ್ಲಿ ಬೇಯಿಸುವುದನ್ನು ಮುಂದುವರಿಸಿ. ನಂತರ ಕೆಳಗಿಳಿಸಿ ಏಲಕ್ಕಿ ಪುಡಿಯನ್ನು ಸೇರಿಸಿ.
• ಹಂತ 3: ಈ ಮಿಶ್ರಣವನ್ನು ಬಟ್ಟಲಿಗೆ ಹಾಕಿ ಮತ್ತು ಸ್ವಲ್ಪ ತಣ್ಣಗಾಗಲು ಬಿಡಿ. ಮಿಶ್ರಣವನ್ನು ಮೋದಕದ ಅಚ್ಚುಗಳಲ್ಲಿ ಹಾಕಿ ಮೋದಕವನ್ನು ತಯಾರಿಸಿ.
ಕಿತ್ತಳೆ ಹಣ್ಣಿನ ಮೋದಕ:
ಕಿತ್ತಳೆ ಹಣ್ಣು ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಹಾಗಾಗಿ ಗಣೇಶ ಚತುರ್ಥಿಯ ದಿನ ಕಿತ್ತಳೆ ಹಣ್ಣಿನಿಂದ ಮೋದಕವನ್ನು ತಯಾರಿಸಿ ಸೇವಿಸಿ.
ಬೇಕಾಗುವ ಸಾಮಗ್ರಿಗಳು:
1 ಮಿಲ್ಕ್ ಮೇಡ್ ಮಿನಿ, 1 ಕಪ್ ಟೋನ್ಡ್ ಹಾಲು, ½ ಕಪ್ ಅಕ್ಕಿ ಹಿಟ್ಟು, 3 ಕಿತ್ತಳೆ ಹಣ್ಣು, ½ ಕಪ್ ನೀರು, 1 ಕಪ್ ಬಟರ್
ಮಾಡುವ ವಿಧಾನಗಳು:
• ಹಂತ 1: ಕಿತ್ತಳೆಯನ್ನು ಕತ್ತರಿಸಿ ಸಿಪ್ಪೆ ತೆಗೆಯಿರಿ ಮತ್ತು ಅವುಗಳ ತಿರುಳನ್ನು ತೆಗೆದುಕೊಂಡು ಅರ್ಧ ಕಪ್ ನೀರಿನಲ್ಲಿ ಕಡಿಮೆ ಉರಿಯಲ್ಲಿ ಬೇಯಿಸಿ.
• ಹಂತ 2: ಬಾಣಲೆಯಲ್ಲಿ, ಅಕ್ಕಿ ಹಿಟ್ಟು, ಮಿಲ್ಕ್ ಮೇಡ್ ಮತ್ತು ಹಾಲನ್ನು ಸೇರಿಸಿ ಮತ್ತು ಕಡಿಮೆ ಉರಿಯಲ್ಲಿ ಬೇಯಿಸಿ. ಅದು ಕುದಿಯುವವರೆಗೆ ನಿರಂತರವಾಗಿ ಬೆರೆಸಿ. ಬೇಯಿಸಿದ ಕಿತ್ತಳೆ ತಿರುಳು ಮತ್ತು ಬೆಣ್ಣೆಯನ್ನು ಸೇರಿಸಿ. ಮಿಶ್ರಣವು ಪ್ಯಾನ್‍ನ ಬದಿಗಳನ್ನು ಬಿಡುವವರೆಗೆ ಮಧ್ಯಮ ಉರಿಯಲ್ಲಿ ಬೇಯಿಸುವುದನ್ನು ಮುಂದುವರಿಸಿ.
• ಹಂತ 3: ನಂತರ ಈ ಮಿಶ್ರಣವನ್ನು ಒಂದು ಪ್ಲೇಟ್ಗೆ ಹಾಕಿ ಮತ್ತು ಸ್ವಲ್ಪ ತಣ್ಣಗಾಗಲು ಬಿಡಿ. ಆಮೇಲೆ ಈ ಮಿಶ್ರಣವನ್ನು ಮೋದಕದ ಅಚ್ಚುಗಳಲ್ಲಿ ಹಾಕಿ ಮೋದಕವನ್ನು ತಯಾರಿಸಿ.
ಈ ರೀತಿಯಲ್ಲಿ ಗಣೇಶ ಚತುರ್ಥಿಗೆ ವಿವಿಧ ರೀತಿಯ ಬಣ್ಣ ಬಣ್ಣದ ಮೋದಕಗಳನ್ನು ತಯಾರಿಸಿ ಗಣೇಶನಿಗೆ ಅರ್ಪಿಸಿದರೆ ಗಣೇಶ ಪ್ರಸನ್ನನಾಗುತ್ತಾನೆ. ಮತ್ತು ನಿಮಗೂ ಹಬ್ಬದ ದಿನ ರುಚಿಕರವಾದ, ವಿವಿಧ ರೀತಿಯ ಮೋದಕಗಳನ್ನು ಸವಿಯುವ ಆನಂದ ಸಿಗುತ್ತದೆ.
