'ಬಾಝ್‌ಬಾಲ್' ಮಾದರಿ ಇದುವರೆಗೆ ಅರ್ಥವಾಗಿಲ್ಲ ಎಂದ ಜಸ್‌ಪ್ರೀತ್‌ ಬುಮ್ರಾ

ಮುಂಬಯಿ: ಇಂಗ್ಲೆಂಡ್‌ ಕೋಚ್‌ ಆಗಿರುವ ನ್ಯೂಜಿಲೆಂಡ್‌ನ ಮಾಜಿ ನಾಯಕ ಬ್ರೆಂಡನ್ ಮೆಕ್ಕಲಂ, ನಾಯಕ ಬೆನ್ ಸ್ಟೋಕ್ಸ್ ಅವರು ಟೆಸ್ಟ್ ಕ್ರಿಕೆಟ್‌ನಲ್ಲಿ ಕಂಡುಕೊಂಡ ಆಕ್ರಮಣಕಾರಿಯಾಗಿ ಆಡುವ 'ಬಾಝ್‌ಬಾಲ್' ಮಾದರಿ(Bazball style) ನಿಜಕ್ಕೂ ನನಗೆ ಇದುವರೆಗೆ ಅರ್ಥವಾಗಿಲ್ಲ. ಆದರೆ ಇದು ಎದುರಾಳಿಗಳಿಗೆ ವಿಕೆಟ್ ಪಡೆಯುವ ಅವಕಾಶಗಳನ್ನು ಸೃಷ್ಟಿಸುತ್ತದೆ ಎಂದು ಜಸ್‌ಪ್ರೀತ್‌ ಬುಮ್ರಾ(Jasprit Bumrah) ಹೇಳಿದ್ದಾರೆ.

ಮುಂದಿನ ತಿಂಗಳು ಇಂಗ್ಲೆಂಡ್‌ನಲ್ಲಿ(India tour of England) ನಡೆಯುವ ಐದು ಪಂದ್ಯಗಳ ಟೆಸ್ಟ್‌ ಸರಣಿ ಬಗ್ಗೆ ಮೈಕೆಲ್ ಕ್ಲಾರ್ಕ್‌ ನಡೆಸಿಕೊಡುವ ಬಿಯಾಂಡ್ 23 ಕ್ರಿಕೆಟ್ ಪಾಡ್‌ಕ್ಯಾಸ್ಟ್‌ನಲ್ಲಿ ಮಾತನಾಡುವ ವೇಳೆ ಬುಮ್ರಾ ಈ ಹೇಳಿಕೆ ನೀಡಿದರು. 'ಸತ್ಯ ಹೇಳಬೇಕೆಂದರೆ ನನಗೆ ಬಾಝ್‌ಬಾಲ್' ಮಾದರಿ ಏನೆಂದು ಅರ್ಥವಾಗಿಲ್ಲ. ಆದರೆ ಎದುರಾಳಿಗಳಿಗೆ ವಿಕೆಟ್‌ ಕೀಳಲು ಸುಲಭವಾಗಿದೆʼ ಎಂದರು.

"ಇಂಗ್ಲೆಂಡ್‌ನಲ್ಲಿ ಆಡುವುದು ಯಾವಾಗಲೂ ವಿಭಿನ್ನ ಸವಾಲು. ನಾನು ಯಾವಾಗಲೂ ಡ್ಯೂಕ್ಸ್ ಚೆಂಡಿನೊಂದಿಗೆ ಬೌಲಿಂಗ್ ಮಾಡಲು ಇಷ್ಟಪಡುತ್ತೇನೆ. ಹವಾಮಾನ, ಕೆಲವೊಮ್ಮೆ ಸ್ವಿಂಗ್ ಪರಿಸ್ಥಿತಿಗಳು, ಮತ್ತು ನಂತರ ಚೆಂಡು ಮೃದುವಾದಾಗ, ಯಾವಾಗಲೂ ಸವಾಲು ಇರುತ್ತದೆ. ಹಾಗಾಗಿ ನಾನು ಯಾವಾಗಲೂ ಇಂಗ್ಲೆಂಡ್‌ನಲ್ಲಿ ಆಡಲು ಎದುರು ನೋಡುತ್ತಿದ್ದೇನೆ" ಎಂದು ಬುಮ್ರಾ ಹೇಳಿದರು.

"ನಿಸ್ಸಂಶಯವಾಗಿ ಇಂಗ್ಲೆಂಡ್‌ ಆಟಗಾರರು ಆಸಕ್ತಿದಾಯಕ ಶೈಲಿಯ ಟೆಸ್ಟ್‌ ಕ್ರಿಕೆಟ್ ಆಡುತ್ತಿದ್ದಾರೆ. ಆದರೆ ನನಗೆ ಅದು ನಿಜವಾಗಿಯೂ ಅರ್ಥವಾಗುವುದಿಲ್ಲ. ಬೌಲಿಂಗ್ ಘಟಕವಾಗಿ, ಬ್ಯಾಟ್ಸ್‌ಮನ್‌ಗಳು ನಿರ್ದಿಷ್ಟ ದಿನದಂದು ಆಕ್ರಮಣಕಾರಿಯಾಗಿ ವರ್ತಿಸಿದಾಗ, ವಿಕೆಟ್‌ಗಳನ್ನು ಪಡೆಯಬಹುದು ಎಂದು ನಾವು ಯಾವಾಗಲೂ ವಿಶ್ವಾಸ ಹೊಂದಿದ್ದೇವೆ" ಎಂದು ಬುಮ್ರಾ ತಿಳಿಸಿದರು.

ಇದನ್ನೂ ಓದಿ India tour of England: ಕಾರ್ಯದೊತ್ತಡ ತಗ್ಗಿಸಲು ಬುಮ್ರಾ ಸೀಮಿತ ಪಂದ್ಯಕ್ಕೆ ಮಾತ್ರ ಲಭ್ಯ; ಖಚಿತಪಡಿಸಿದ ಅಗರ್ಕರ್

ಕಾರ್ಯದೊತ್ತಡವನ್ನು ತಗ್ಗಿಸುವ ಸಲುವಾಗಿ ಇಂಗ್ಲೆಂಡ್ ಪ್ರವಾಸದ ಎಲ್ಲಾ ಐದು ಟೆಸ್ಟ್‌ಗಳಿಗೂ ವೇಗದ ಬೌಲರ್ ಜಸ್‌ಪ್ರೀತ್‌ ಬುಮ್ರಾ ಲಭ್ಯವಿರುವುದಿಲ್ಲ ಎಂದು ಈಗಾಗಲೇ ಮುಖ್ಯ ಆಯ್ಕೆದಾರ ಅಜಿತ್ ಅಗರ್ಕರ್ ತಿಳಿಸಿದ್ದಾರೆ.