ಬೆಂಗಳೂರು : ಹದಿಹರೆಯದ ವಯಸ್ಸಿನಲ್ಲಿ ಮೊಡವೆಗಳ ಸಮಸ್ಯೆ ಕಾಡುವುದು ಸಹಜ. ಈ ಮೊಡವೆಗಳು ಮುಖದ ಸೌಂದರ್ಯವನ್ನು ಹಾಳುಮಾಡುವುದರಿಂದ ಇದನ್ನು ನಿವಾರಿಸಲು ಅನೇಕರು ಹಲವು ಪರಿಹಾರಗಳನ್ನು ಹುಡುಕುತ್ತಾರೆ. ಅದರಲ್ಲಿ ಕೆಲವರು ಹಸಿ ಬೆಳ್ಳುಳ್ಳಿಯನ್ನು ಮೊಡವೆಗಳಿಗೆ ಹಚ್ಚಿಕೊಳ್ಳಲು ಸಲಹೆ ನೀಡುತ್ತಾರೆ. ಹಸಿ ಬೆಳ್ಳುಳ್ಳಿ(Garlic Effect on Face )ಯಲ್ಲಿ ಅದರ ಆಂಟಿಮೈಕ್ರೊಬಿಯಲ್ ಗುಣಲಕ್ಷಣಗಳಿದ್ದು, ಇದು ಮೊಡವೆಗಳನ್ನು ನಿವಾರಿಸಲು ಸಹಕಾರಿಯಾಗಿದೆ ಎಂದು ಹೇಳುತ್ತಾರೆ. ಆದರೆ ಇದು ಚರ್ಮದ ಕಿರಿಕಿರಿ ಅಥವಾ ಅಲರ್ಜಿಗೆ ಕಾರಣವಾಗಬಹುದು ಎಂದು ಮತ್ತೆ ಕೆಲವರು ಹೇಳುತ್ತಾರೆ. ಆದರೆ ಇದು ಸತ್ಯವೇ? ಮಿಥ್ಯವೇ? ಎಂಬುದನ್ನು ತಿಳಿದುಕೊಳ್ಳಿ.
ಬೆಳ್ಳುಳ್ಳಿ:
ಬೆಳ್ಳುಳ್ಳಿ ಹಲವು ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ. ಇದರಲ್ಲಿರುವ ಅಲಿಸಿನ್ ಎಂಬ ರಾಸಾಯನಿಕ ಒಂದು ಆಂಟಿಮೈಕ್ರೊಬಿಯಲ್ ಆಗಿದೆ- ಇದು ಬ್ಯಾಕ್ಟೀರಿಯಾದ ಮೇಲೆ ದಾಳಿ ಮಾಡುತ್ತವೆ. ಮೊಡವೆಗಳು ಕೆಲವೊಮ್ಮೆ ಬ್ಯಾಕ್ಟೀರಿಯಾಗಳ ಕಾರಣದಿಂದ ಉಂಟಾಗುತ್ತವೆ, ಹಾಗಾಗಿ ಬೆಳ್ಳುಳ್ಳಿ ಮೊಡವೆಗಳನ್ನು ಪರಿಹರಿಸಲು ಸಹಕಾರಿ ಎಂದು ಹೇಳಲಾಗುತ್ತದೆ.
ವಾಸ್ತವವಾಗಿ, ಬೆಳ್ಳುಳ್ಳಿಯಲ್ಲಿರುವ ಅಲಿಸಿನ್ ಬ್ಯಾಕ್ಟೀರಿಯಾ ಹಾನಿ ಮತ್ತು ಉರಿಯೂತದ ವಿರುದ್ಧ ಹೋರಾಡುತ್ತದೆ ಎಂದು ಹೇಳಲಾಗುತ್ತದೆ. ಹಾಗಾಗಿ ಕೆಲವು ಸಂಶೋಧನೆಯ ಪ್ರಕಾರ ಇದು ಅನೇಕ ರೋಗಗಳನ್ನು ನಿವಾರಿಸುತ್ತದೆ ಎಂದು ಹೇಳಲಾಗಿದೆ. ಅದರ ಜೊತೆಗೆ ಇದು ಮೊಡವೆಗಳಿಗೆ ಚಿಕಿತ್ಸೆ ನೀಡಲು ಅತ್ಯುತ್ತಮ ಎಂದು ಊಹಿಸಬಹುದು. ಯಾಕೆಂದರೆ ಅಲಿಸಿನ್ ಬ್ಯಾಕ್ಟೀರಿಯಾದ ಬೆಳವಣಿಗೆಯನ್ನು ಕುಂಠಿತಗೊಳಿಸಲು ಕಾರ್ಯನಿರ್ವಹಿಸುತ್ತದೆ, ಮತ್ತು ಅದು ಮೊಡವೆಗಳಿಗೆ ಒಳ್ಳೆಯದು. ಆದರೆ, ಮೊಡವೆಗಳು ಕೇವಲ ಬ್ಯಾಕ್ಟೀರಿಯಾದಿಂದ ಮಾತ್ರವಲ್ಲ, ರಂಧ್ರಗಳಲ್ಲಿ ಕೊಳೆ ಸೇರಿಕೊಂಡಾಗ ಮತ್ತು ಹೆಚ್ಚಿದ ಸೆಬಮ್‍ನಿಂದ ಕೂಡ ಉಂಟಾಗುತ್ತದೆ ಎಂಬುದನ್ನು ಮರೆಯಬೇಡಿ.
ಹಾಗೇ ಬೆಳ್ಳುಳ್ಳಿಯಲ್ಲಿರುವ ಸಲ್ಫರ್ ಸಂಯುಕ್ತಗಳು ಮತ್ತು ಉತ್ಕರ್ಷಣ ನಿರೋಧಕಗಳು ಮೊಡವೆಗಳಿಂದ ಕಾಡುವ ಉರಿಯೂತವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಬೆಳ್ಳುಳ್ಳಿಗೆ ಸಂಬಂಧಿಸಿದ ಹೆಚ್ಚಿನ ಅಧ್ಯಯನಗಳಲ್ಲಿ ಅದು ಮೊಡವೆಗಳಿಗೆ ಉತ್ತಮವಾಗಿದೆ ಎನ್ನುವುದಕ್ಕಿಂತ ಹೆಚ್ಚು ಸಾಮಾನ್ಯ ಆರೋಗ್ಯ ಪ್ರಯೋಜನಗಳಿಗೆ ಸಹಕಾರಿಯಾಗಿದೆ ಎನ್ನಲಾಗಿದೆ. ಆದ್ದರಿಂದ, ಬೆಳ್ಳುಳ್ಳಿ ಮೊಡವೆಗಳಿಗೆ ಪರಿಣಾಮಕಾರಿ ಚಿಕಿತ್ಸೆಯಾಗಿ ಇದನ್ನು ಬಳಸಬಹುದು ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ.
ಹಸಿ ಬೆಳ್ಳುಳ್ಳಿಯನ್ನು ನಿಮ್ಮ ಚರ್ಮಕ್ಕೆ ಹಚ್ಚುವುದು ಸಾಕಷ್ಟು ಚರ್ಮದ ಸಮಸ್ಯೆಗಳನ್ನು ಉಂಟುಮಾಡಬಹುದು. ಅವುಗಳ ಬಗ್ಗೆ ತಿಳಿದುಕೊಳ್ಳೋಣ:
ಚರ್ಮಕ್ಕೆ ಕಿರಿಕಿರಿ: ಬೆಳ್ಳುಳ್ಳಿಯನ್ನು ನೇರವಾಗಿ ಚರ್ಮದ ಮೇಲೆ ಹಚ್ಚುವುದರಿಂದ ಚರ್ಮಕ್ಕೆ ಕಿರಿಕಿರಿಯಾಗುತ್ತದೆ. ಇದು ತುಂಬಾ ಬಲವಾದ ಮಸಾಲೆಯಾದ ಕಾರಣ ಇದು ಚರ್ಮವನ್ನು ಸುಡುತ್ತದೆ ಮತ್ತು ಕೆಂಪಾಗಿಸುತ್ತದೆ.
ಅಲರ್ಜಿಯ ಪ್ರತಿಕ್ರಿಯೆಗಳು: ಕೆಲವರಿಗೆ ಬೆಳ್ಳುಳ್ಳಿಯ ಅಲರ್ಜಿ ಇರುತ್ತದೆ. ನೀವು ಆಕಸ್ಮಿಕವಾಗಿ ಈ ವರ್ಗಕ್ಕೆ ಸೇರಿದರೆ, ಬೆಳ್ಳುಳ್ಳಿ ಬಳಸಿದ ತಕ್ಷಣ ಅಲರ್ಜಿಯನ್ನು ಅನುಭವಿಸುತ್ತೀರಿ. ಇದರಿಂದ ದದ್ದುಗಳು ಅಥವಾ ಊತ ಉಂಟಾಗಬಹುದು.
ಇದನ್ನೂ ಓದಿ: ದೇಹದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್‍ ಹೆಚ್ಚಾಗಿದೆಯಾ? ಚಿಂತೆ ಬೇಡ ಈ 5 ಬೀಜಗಳನ್ನು ಸೇವಿಸಿ…
ಶುಷ್ಕತೆ ಮತ್ತು ಸೂಕ್ಷ್ಮತೆ: ಬೆಳ್ಳುಳ್ಳಿಯಲ್ಲಿರುವ ಗಂಧಕವು ನಿಮ್ಮ ಚರ್ಮಕ್ಕೆ ತುಂಬಾ ಹಾನಿ ಮಾಡುತ್ತದೆ. ಇದು ಶುಷ್ಕತೆ ಮತ್ತು ಸಿಪ್ಪೆ ಸುಲಿಯುವಿಕೆಗೆ ಕಾರಣವಾಗಬಹುದು. ಇದು ನಿಮ್ಮ ಮೊಡವೆಗಳನ್ನು ನಿವಾರಿಸುವ ಬದಲು ಇನ್ನಷ್ಟು ಹದಗೆಡಿಸಬಹುದು. ಹಾಗಾಗಿ ಬೆಳ್ಳುಳ್ಳಿಯನ್ನು ಮೊಡವೆಗಳಿಗೆ ಬಳಸುವ ಮುನ್ನ ಎಚ್ಚರವಿರಲಿ.
