ನವದೆಹಲಿ: ಕನ್ನಡಿಗ ಕೆ.ಎಲ್‌ ರಾಹುಲ್(KL Rahul) ಅವರು ಮೆಗಾ ಹರಾಜಿನಲ್ಲಿ(IPL 2025 auction) 14 ಕೋಟಿ ರೂ. ಮೊತ್ತಕ್ಕೆ ಡೆಲ್ಲಿ ಕ್ಯಾಪಿಟಲ್ಸ್‌(Delhi Capitals) ತಂಡ ಸೇರ್ಪಡೆಗೊಂಡಿದ್ದಾರೆ. ರಾಹುಲ್ ಡೆಲ್ಲಿ(KL Rahul DC) ತಂಡ ಸೇರುತ್ತಿದ್ದಂತೆ ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ ಅಭಿಮಾನಿಗಳು ಭಾರೀ ಸಂಭ್ರಮಾಚರಣೆ ಮಾಡಿದ್ದಾರೆ. ಡೆಲ್ಲಿ ತಂಡದ ಅಭಿಮಾನಿಗಳು ವಿಶೇಷ ವಿಡಿಯೊ ಮೂಲಕ ರಾಹುಲ್‌ಗೆ ವೆಲ್‌ಕಮ್‌ ಮಾಡಿದ್ದಾರೆ. ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.
ʼಇನ್ನು ಮುಂದೆ ದಿಲ್ಲಿ ರಾಹುಲ್ ಹೆಸರನ್ನು ಕೇಳಲಿದೆ, ರಾಹುಲ್ ಎಂದರೆ ಕ್ಲಾಸ್‌, ಮಾಸ್‌ ಪ್ಲೇಯರ್‌ ಎಂದು ರಾಹುಲ್ ಬಗ್ಗೆ ಡೆಲ್ಲಿ ತಂಡದ ಅಭಿಮಾನಿಗಳು ಮೆಚ್ಚುಗೆಯ ಮಾತುಗಳನ್ನಾಡುವ ವಿಡಿಯೊವನ್ನು ಫ್ರಾಂಚೈಸಿ ತನ್ನ ಅಧಿಕೃತ ಟ್ವಿಟರ್‌ ಎಕ್ಸ್‌ನಲ್ಲಿ ಹಂಚಿಕೊಂಡಿದೆ. ಒಂದೆಡೆ ಡೆಲ್ಲಿ ಅಭಿಮಾನಿಗಳು ರಾಹುಲ್ ತಮ್ಮ ತಂಡಕ್ಕೆ ಸೇರ್ಪಡೆಗೊಂಡ ಸಂಭ್ರಮ ಆಚರಿಸುತ್ತಿದ್ದರೆ ಇನ್ನೊಂದೆಡೆ ಆರ್‌ಸಿಬಿ ಅಭಿಮಾನಿಗಳು ಆರ್‌ಸಿಬಿ ಫ್ರಾಂಚೈಸಿಗೆ ಹಿಡಿ ಶಾಪ ಹಾಕುತ್ತಿದ್ದಾರೆ.
ಹರಾಜಿಗೂ ಮುನ್ನ ಕೆ.ಎಲ್‌ ರಾಹುಲ್ ಆರ್‌ಸಿಬಿಗೆ ಬರಲಿದ್ದಾರೆ ಎಂದು ಎಲ್ಲ ಕನ್ನಡಿಗರು ತುದಿಗಾಲಲ್ಲಿ ನಿಂತು ಕಾಯುತ್ತಿದ್ದರು. ಹರಾಜಿನಲ್ಲಿ ರಾಹುಲ್ ಹೆಸರು ಕಾಣುತ್ತಿದ್ದಂತೆ ಅಭಿಮಾನಿಗಳು ಅವರ ಫೋಟೊಗಳನ್ನು ಕೂಡ ಎಡಿಟ್‌ ಮಾಡಿ ತವರಿಗೆ ಸ್ವಾಗತ ಎಂದು ಬರೆದು ಸ್ಟೇಟಸ್‌ ಹಾಕಲು ತಯಾರಿ ನಡೆಸಿದ್ದರು. ಆದರೆ ಆರ್‌ಸಿಬಿ 10 ಕೋಟಿ ತನಕ ಬಿಟ್ಟಿಂಗ್‌ ಮಾಡಿ ಹಿಂದೆ ಸರಿಯಿತು. ಅಂತಿಮವಾಗಿ ಅವರು ಡೆಲ್ಲಿ ತಂಡದ ಪಾಲಾದರು. ರಾಹುಲ್ ಬೇರೆ ತಂಡದ ಪರ ಸೇಲ್‌ ಆಗುತ್ತಿದ್ದಂತೆ ಇತ್ತ ಆರ್‌ಸಿಬಿ ಅಭಿಮಾನಿಗಳು ಫ್ರಾಂಚೈಸಿ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಲಾರಂಭಿಸಿದರು.
ಇದನ್ನೂ ಓದಿ RCB IPL Auction: ವಿಜಯ್‌ ಮಲ್ಯ ಇರುತ್ತಿದ್ದರೆ ಆರ್‌ಸಿಬಿಗೆ ಈ ಸ್ಥಿತಿ ಬರುತ್ತಿರಲಿಲ್ಲ ಎಂದ ಅಭಿಮಾನಿಗಳು
ರಾಹುಲ್ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡದ ನಾಯಕನಾಗುವುದು ಖಚಿತವಾಗಿದೆ. ಇದುವರೆಗೆ ರಾಹುಲ್ 132 ಐಪಿಎಲ್‌ ಪಂದ್ಯವನ್ನಾಡಿ 4683 ರನ್‌ ಬಾರಿಸಿದ್ದಾರೆ. ಈ ವೇಳೆ 4 ಶತಕ ಕೂಡ ಬಾರಿಸಿದ್ದಾರೆ. ಬ್ಯಾಟಿಂಗ್‌ ಸ್ಟ್ರೈಕ್‌ ರೇಟ್‌ ಕೂಡ ಉತ್ತಮವಾಗಿದೆ. ರಾಹುಲ್ ಮಾತ್ರವಲ್ಲದೆ ಕನ್ನಡಿಗನಾದ ಕರುಣ್‌ ನಾಯರ್‌ ಕೂಡ ಡೆಲ್ಲಿ ತಂಡ ಸೇರಿದ್ದಾರೆ. ಇಟ್ಟು ಇಬ್ಬರು ಕನ್ನಡಿಗರು ಡೆಲ್ಲಿ ತಂಡದಲ್ಲಿದ್ದಾರೆ. ಆದರೆ ಕನ್ನಡಿಗರ ತಂಡವಾದ ಆರ್‌ಸಿಬಿಯಲ್ಲಿ ಒಂದೇ ಒಂದು ಕನ್ನಡಿಗ ಆಟಗಾರ ಇಲ್ಲದಿರುವುದು ವಿಪರ್ಯಾಸವೇ ಸರಿ.
