ಮೀರತ್: ಇದು ಯಾವುದೇ ಆಕ್ಷನ್ ಸಿನೆಮಾ ಕಥೆಗೆ ಕಡಿಮೆಯಿಲ್ಲದ ನಿಜ ಕಥೆ. ಇದನ್ನು ಪೂರ್ತಿಯಾಗಿ ಓದಿ ಈ ವಿಡಿಯೋ ನೋಡಿದರಂತೂ ನೀವು ದಂಗಾಗುವುದು ಖಂಡಿತಾ! ಅಂತಹ ವೈರಲ್ ವಿಡಿಯೋ (Viral Video) ಸುದ್ದಿಯೊಂದು ನಮಗೆ ಉತ್ತರ ಪ್ರದೇಶದ ಮೀರತ್ ನಿಂದ ಸಿಕ್ಕಿದ್ದು ಅದರ ಡಿಟೇಲ್ಸನ್ನು ಇದೀಗ ನಾವು ನಿಮ್ಮ ಮುಂದಿಡ್ತಿದ್ದೇವೆ.
ತನ್ನ ನೋಟಿನ ಮಾಲೆಯನ್ನು ಕದ್ದು ಪರಾರಿಯಾಗ್ತಿದ್ದ ಖದೀಮನನ್ನು ಹಿಡಿಯಲು ಮದುಮಗನೊಬ್ಬ ತನ್ನ ಮದುವೆಯನ್ನೇ ಅರ್ಧದಲ್ಲಿ ಬಿಟ್ಟು ಮಿನಿ ಟ್ರಕ್ ಒಂದರಲ್ಲಿ ರಸ್ತೆಯುದ್ದಕ್ಕೂ ಚೇಸ್ ಮಾಡ್ಕೊಂಡು ಹೋಗಿ ಆತನನ್ನು ಸಾಹಸಮಯವಾಗಿ ಹಿಡಿದು ತನ್ನ ನೋಟಿನ ಮಾಲೆಯನ್ನು ತನ್ನ ಕೈವಶ ಮಾಡಿಕೊಂಡ ಘಟನೆ ಉತ್ತರಪ್ರದೇಶದ (Uttar Pradesh) ಮೀರತ್‌ನಲ್ಲಿ (Meerut) ನಡೆದಿದೆ.
ಮದುಮಗ ಸಾಂಪ್ರದಾಯಿಕವಾಗಿ ಕುದುರೆ ಮೇಲೆ ರಸ್ತೆಯಲ್ಲಿ ಬರುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದ್ದು, ಆ ಬಳಿಕ ನಡೆದ ವಿದ್ಯಮಾನ ರಣ ರೋಚಕ ವಿಚಾರವೇ ಸರಿ! ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಪಟ್ಟೆ ವೈರಲ್ ಆಗಿರುವ ಈ ವಿಡಿಯೋದಲ್ಲಿರುವಂತೆ, ಬೂದು ಬಣ್ಣದ ಸೂಟು ಹಾಗೂ ಪಿಂಕ್ ಟರ್ಬನ್ ನಲ್ಲಿರುವ ಮದುಮಗ, ಹೆದ್ದಾರಿಯಲ್ಲಿ ಬೈಕೊಂದರಲ್ಲಿ ಮಿನಿ-ಟ್ರಕ್ಕನ್ನು ಚೇಸ್ ಮಾಡಿಕೊಂಡು ಬಂದು, ಒಂದು ಹಂತದಲ್ಲಿ ಆತ ಬೈಕಿನಿಂದ ಮಿನಿ-ಟ್ರಕ್ಕಿನೊಳಗೆ ಸಾಹಸದಿಂದ ಟ್ರಕ್ಕಿನ ಬಾಗಿಲ ಕಿಟಕಿಯ ಮೂಲಕ ನುಗ್ಗಿ ಟ್ರಕ್ ಚಾಲಕನ ಬಳಿಯಿದ್ದ ನೋಟಿನ ಮಾಲೆಯನ್ನು ತೆಗೆದುಕೊಳ್ಳುತ್ತಿರುವುದು ಈ ವಿಡಿಯೋದಲ್ಲಿ ದಾಖಲಾಗಿದೆ.
ಇದೆಲ್ಲವೂ ಯಾವುದೊ ಒಂದು ಸಿನೆಮಾ ಸ್ಟಂಟ್ ನಂತೆ ನೋಡುಗರಿಗೆ ಅನ್ನಿಸಿದರೂ ಇದು ನಿಜವಾಗಿ ನಡೆದ ಘಟನೆ ಮತ್ತಿದು ಮೊಬೈಲ್ ನಲ್ಲಿ ರೆಕಾರ್ಡ್ ಆಗಿರುವುದರಿಂದ ಇದನ್ನು ನಂಬಲೇಬೇಕಾಗಿದೆ.
ಇಷ್ಟೆಲ್ಲಾ ಆದ ಬಳಿಕ ಈ ಮದುಮಗ ಅಷ್ಟಕ್ಕೇ ಸುಮ್ಮನಾಗದೆ, ಮಿನಿ-ಟ್ರಕ್ಕನ್ನು ನಿಲ್ಲಿಸಿ, ಅದರಿಂದ ಚಾಲಕ ಇಳಿಯುವಂತೆ ಮಾಡಿ, ಆತನಿಗೆ ರಸ್ತೆ ನಡುವಿನಲ್ಲೇ ಥಳಿಸುತ್ತಾನೆ. ಈ ಸಂದರ್ಭದಲ್ಲಿ ವರನಿಗೆ ಇನ್ನಿಬ್ಬರು ಸಾಥ್ ನೀಡಿದ್ದು, ಚಾಲಕನಿಗೆ ಯದ್ವಾ ತದ್ವಾ ಒದೆ ಬೀಳುತ್ತಿರುವುದೂ ಸಹ ಆ ವಿಡಿಯೋದಲ್ಲಿ ದಾಖಲಾಗಿದೆ. ಇನ್ನೂ ಗಮ್ಮತ್ತಿನ ವಿಷಯವೇನಪ್ಪಾ ಅಂದ್ರೆ, ತನ್ನ ಬೈಕಿನಲ್ಲಿ ಸಿಲಿಂಡರ್ ತೆಗೆದುಕೊಂಡು ಹೋಗುತ್ತಿದ್ದ ವ್ಯಕ್ತಿಯೂ ಸಹ ಇವರ ಈ ಗಲಾಟೆಯನ್ನು ನೋಡಿ ಬೈಕು ನಿಲ್ಲಿಸಿ, ‘ನಂದೂ ಒಂದಿರ್ಲಿ..’ ಎಂದು ಆ ಚಾಲಕನಿಗೆ ಬಾರಿಸುತ್ತಾನೆ!
ಇದನ್ನೂ ಓದಿ: Viral Video: ಜಸ್ಟ್ ಮಿಸ್! ಸೈಬೀರಿಯಾ ಹುಲಿ ದಾಳಿಯಿಂದ ಕೂದಲೆಳೆಯ ಅಂತರದಲ್ಲಿ ಪಾರಾದ ರೈತ!
ಸಖತ್ ಒದೆ ತಿಂದ ಚಾಲಕ, ವರನ ಬಳಿ ತನಗೆ ಹೊಡೆಯದಂತೆ ಅಂಗಲಾಚುತ್ತಿರುವ ದೃಶ್ಯಗಳೂ ಸಹ ಸೆರೆಯಾಗಿದೆ. ಮಾಹಿತಿಗಳ ಪ್ರಕಾರ ಚಾಲಕನಿಗೆ ಈ ನೋಟಿನ ಮಾಲೆಯನ್ನು ಅಪಹರಿಸುವ ಯಾವುದೇ ಉದ್ದೇಶವಿರಲಿಲ್ಲವಂತೆ, ಬದಲಾಗಿ ಆತ ಅಚಾನಕ್ ಅಗಿ ಈ ರೀತಿಯಾಗಿ ವರ್ತಿಸಿದ್ದಾನೆ ಎಂದು ತಿಳಿದುಬಂದಿದೆ.
ಒಟ್ಟಿನಲ್ಲಿ ಹೈವೇ ನಡುವಿನಲ್ಲೇ ಸಿನೆಮಾ ಸ್ಟಂಟ್ ರೀತಿಯಲ್ಲಿ ಈ ಘಟನೆ ನಡೆದಿದ್ದರೂ, ಮತ್ತು ಇದರ ವಿಡಿಯೋ ಎಲ್ಲಡೆ ವೈರಲ್ ಆಗುತ್ತಿದ್ದರೂ, ಘಟನೆಗೆ ಸಂಬಂಧಿಸಿದಂತೆ ಯಾವುದೇ ರೀತಿಯ ಪೊಲೀಸ್ ದೂರು ದಾಖಲಾಗಿಲ್ಲವೆಂದು ತಿಳಿದುಬಂದಿದೆ. ಒಟ್ಟಿನಲ್ಲಿ, ಮದುವೆಗೆ ಮೊದಲೇ ವರನೊಬ್ಬ ನಡೆಸಿರುವ ಈ ರೀತಿಯ ಸ್ಟಂಟ್ ಆತನ ಮನದನ್ನೆಯನ್ನು ಮತ್ತು ಅವರ ಮನೆಯವರನ್ನು ಸಖತ್ ಇಂಪ್ರೆಸ್ ಮಾಡಿರುವುದಂತೂ ಸತ್ಯ!
