ಮುಂಬೈ: ಸ್ಯಾಂಡಲ್‌ವುಡ್‌ ಕಲಾವಿದ, ಬಹುಭಾಷಾ ನಟ ಕಿಶೋರ್‌ (Actor Kishore) ಸದ್ಯ ಕನ್ನಡದ ಜತೆ ವಿವಿಧ ಭಾಷೆಗಳಲ್ಲಿ ನಟಿಸುತ್ತಿದ್ದಾರೆ. ಕನ್ನಡ, ತಮಿಳು, ತೆಲುಗು, ಮಲಯಾಳಂನಲ್ಲಿ ಅಭಿನಯಿಸಿರುವ ಅವರು ಇದೀಗ ಬಾಲಿವುಡ್‌ ಚಿತ್ರದಲ್ಲಿಯೂ ಕಾಣಿಸಿಕೊಳ್ಳುತ್ತಿದ್ದಾರೆ. ಪ್ರಸ್ತುತ ಅವರು ಒಂದಲ್ಲ ಮೂರು ಬಾಲಿವುಡ್‌ ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ. ಈಗಾಗಲೇ ಎರಡು ಸಿನಿಮಾಗಳ ಶೂಟಿಂಗ್‌ ಪೂರ್ಣಗೊಳಿಸಿರುವ ಕಿಶೋರ್‌ ಬಹು ನಿರೀಕ್ಷಿತ ಚಿತ್ರವೊಂದಕ್ಕೆ ಆಯ್ಕೆಯಾಗಿದ್ದಾರೆ.
ಹೌದು, ಬಾಲಿವುಡ್‌ ಮಾತ್ರವಲ್ಲ ಇಡೀ ದೇಶದ ಸಿನಿ ರಸಿಕರ ಕುತೂಹಲ ಕೆರಳಿಸಿರುವ ಸಲ್ಮಾನ್‌ ಖಾನ್‌ (Salman Khan) ಅಭಿನಯದ ಮುಂದಿನ ಚಿತ್ರ ʼಸಿಖಂದರ್‌ʼ (Sikandar)ನ ಪ್ರಮುಖ ಪಾತ್ರವೊಂದಕ್ಕೆ ಕಿಶೋರ್‌ ಆಯ್ಕೆಯಾಗಿದ್ದಾರೆ ಎನ್ನಲಾಗಿದೆ.
ಗರಿಗೆದರಿದ ನಿರೀಕ್ಷೆ
ದಕ್ಷಿಣ ಭಾರತದ ಜನಪ್ರಿಯ ನಿರ್ದೇಶಕ ಎ.ಆರ್‌.ಮುರುಗದಾಸ್‌ (A.R. Murugadoss) ಮೊದಲ ಬಾರಿಗೆ ಸಲ್ಮಾನ್‌ ಖಾನ್‌ (Salman Khan)ಗೆ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ಚಿತ್ರ ʼಸಿಖಂದರ್‌ʼ. ಸಲ್ಲುಗೆ ಜೋಡಿಯಾಗಿ ಕನ್ನಡತಿ ರಶ್ಮಿಕಾ ಮಂದಣ್ಣ (Rashmika Mandanna) ಕಾಣಿಸಿಕೊಳ್ಳುತ್ತಿದ್ದಾರೆ. ಇವರ ಜತೆಗೆ ಪ್ರಮುಖ ಪಾತ್ರದಲ್ಲಿ ದಕ್ಷಿಣ ಭಾರತದ ಜನಪ್ರಿಯ ನಟಿ, ಬಹುಭಾಷಾ ಕಲಾವಿದೆ ಕಾಜಲ್ ಅಗರ್ವಾಲ್ (Kajal Aggarwal) ಕೂಡ ನಟಿಸುತ್ತಿದ್ದಾರೆ. ʼಘಜಿನಿʼಯಂತಹ ಸೂಪರ್‌ ಹಿಟ್‌ ಚಿತ್ರಗಳನ್ನು ನಿರ್ದೇಶಿಸಿರುವ ಎ.ಆರ್‌.ಮುರುಗದಾಸ್‌ ಸಿನಿಮಾ ಇದಾಗಿರುವುದರಿಂದ ಸಹಜವಾಗಿಯೇ ಚಿತ್ರದ ಮೇಲಿನ ನಿರೀಕ್ಷೆ ಬೆಟ್ಟದಷ್ಟಿದೆ. ಸಟ್ಟೇರಿದಾಗಿನಿಂದಲೂ ಟಾಕ್‌ ಆಫ್‌ ದಿ ಟೌನ್‌ ಆಗಿರುವ ಸಿನಿಮಾ ಇದೀಗ ಬಹು ತಾರಾಗಣದಿಂದ ಇನ್ನಷ್ಟು ಗಮನ ಸೆಳಯುತ್ತಿದೆ.
Salman Khan. pic.twitter.com/8HjVokzJ8g
— Sikandar | Eid 2025 (@SikandarVerse) October 28, 2024
ಕಿಶೋರ್‌ ಪಾತ್ರವೇನು?
ವಿವಿಧ ಭಾಷೆಗಳಲ್ಲಿ ವಿಲನ್‌ ಆಗಿ ತೆರೆ ಮೇಲೆ ಅಬ್ಬರಿಸಿರುವ ಕಿಶೋರ್‌ ʼಸಿಕಂದರ್‌ʼನಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಈಗಾಗಲೇ ಅವರು ತಮ್ಮ ಪಾಲಿನ ಚಿತ್ರೀಕರಣವನ್ನೂ ಆರಂಭಿಸಿದ್ದಾರಂತೆ. ಆದರೆ ಅಧಿಕೃತ ಘೋಷಣೆ ಇನ್ನಷ್ಟೇ ಹೊರ ಬರಬೇಕಿದೆ. ಸುನೀಲ್‌ ಶೆಟ್ಟಿ, ಪ್ರತೀಕ್‌ ಬಬ್ಬರ್‌, ಚೈತನ್ಯ ಚೌಧರಿ, ನವಾಬ್‌ ಶಾ ಮತ್ತಿತರರು ಮುಖ್ಯ ಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ.
ʼಕಾಂತಾರʼ ಚಿತ್ರದಲ್ಲಿ ಗಮನ ಸೆಳೆದ ಕಿಶೋರ್‌
2022ರಲ್ಲಿ ತೆರೆಕಂಡು ಬ್ಲಾಕ್‌ ಬಸ್ಟರ್‌ ಆಗಿ ಹೊರ ಹೊಮ್ಮಿದ ಸ್ಯಾಂಡಲ್‌ವುಡ್‌ನ ʼಕಾಂತಾರʼ ಚಿತ್ರದ ಮನೋಜ್ಞ ಅಭಿನಯದ ಮೂಲಕ ಕಿಶೋರ್‌ ಇಡೀ ದೇಶದ ಗಮನ ಸೆಳೆದಿದ್ದಾರೆ. ರಿಷಭ್‌ ಶೆಟ್ಟಿ ನಟಿಸಿ, ನಿರ್ದೇಶಿಸಿದ ಈ ಚಿತ್ರದ ಡಿಆರ್‌ಎಫ್‌ಒ ಮುರಳಿ ಪಾತ್ರದಲ್ಲಿ ಕಿಶೋರ್‌ ಮೋಡಿ ಮಾಡಿದ್ದಾರೆ. ರಿಷಭ್‌ ಶೆಟ್ಟಿ ಅವರ ಅಭಿನಯದ ಜತೆಗೆ ಕಿಶೋರ್‌ ನಟನೆಗೂ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.
ರಜನಿಕಾಂತ್‌ ಚಿತ್ರದಲ್ಲಿ ನಿರಂತರ ಅವಕಾಶ
ಮತ್ತೊಂದು ವಿಶೇಷ ಎಂದರೆ ಕಿಶೋರ್‌ ತಮಿಳಿನ ಸೂಪರ್‌ ಸ್ಟಾರ್‌ ರಜನಿಕಾಂತ್‌ ಚಿತ್ರಗಳಲ್ಲಿ ನಿರಂತರ ಅವಕಾಶ ಗಿಟ್ಟಿಸಿಕೊಳ್ಳುತ್ತಿದ್ದಾರೆ. ಕಳೆದ ವರ್ಷ ತೆರೆಕಂಡ ರಜನಿಕಾಂತ್‌ ಅವರ ʼಜೈಲರ್‌ʼ, ಈ ವರ್ಷ ಬಿಡುಗಡೆಯಾದ ʼವೆಟ್ಟೈಯಾನ್‌ʼ, ಮುಂಬರುವ ʼಕೂಲಿʼ ಸಿನಿಮಾಗಳ ಪ್ರಮುಖ ಪಾತ್ರದಲ್ಲಿ ಕಿಶೋರ್‌ ಅಭಿನಯಿಸಿದ್ದಾರೆ. ಖಡಕ್‌ ಪೊಲೀಸ್‌ ಆಫೀಸರ್‌ ಪಾತ್ರಕ್ಕೆ ಜನಪ್ರಿಯರಾಗಿರುವ ಅವರು ಸದ್ಯ ಕನ್ನಡದ ಹಲವು ಸಿನಿಮಾಗಳಲ್ಲಿಯೂ ನಟಿಸುತ್ತಿದ್ದಾರೆ.
ಈ ಸುದ್ದಿಯನ್ನೂ ಓದಿ: Kajal Aggarwal: ಸ್ಟಾರ್‌ ನಟ, ನಿರ್ದೇಶಕನ ಚಿತ್ರದೊಂದಿಗೆ ಬಾಲಿವುಡ್‌ಗೆ ಭರ್ಜರಿ ಕಂಬ್ಯಾಕ್‌ ಮಾಡಿದ ಕಾಜಲ್ ಅಗರ್ವಾಲ್
