ಚೆನ್ನೈ: ಇತ್ತೀಚೆಗೆ ತೆರೆಕಂಡ ಕಾಲಿವುಡ್‌ನ ‘ಕಂಗುವ’ (Kanguva) ಬಾಕ್ಸ್‌ ಆಪೀಸ್‌ನಲ್ಲಿ ಮಕಾಡೆ ಮಲಗಿದೆ. ಸೂಪರ್ ಸ್ಟಾರ್ ಸೂರ್ಯ (Actor Suriya) ಅಭಿನಯದ ಈ ಬಹು ಕೋಟಿ ರೂ. ಬಜೆಟ್‌ನ ಚಿತ್ರ ಪ್ರೇಕ್ಷಕರ ಗಮನ ಸೆಳೆಯುವಲ್ಲಿ ವಿಫಲವಾಗಿದೆ. ಇದೀಗ ಸೂರ್ಯ ಈ ಸೋಲನ್ನು ಮರೆತು ಮತ್ತೊಂದು ಚಿತ್ರಕ್ಕೆ ಸಹಿ ಹಾಕಿದ್ದಾರೆ. ದಕ್ಷಿಣ ಭಾರತೀಯ ಚಿತ್ರರಂಗದ ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆಗಳಲ್ಲಿ ಒಂದಾದ ಡ್ರೀಮ್ ವಾರಿಯರ್ ಪಿಕ್ಚರ್ಸ್ ಈ ಚಿತ್ರ ನಿರ್ಮಾಣಕ್ಕೆ ಮುಂದಾಗಿದ್ದು, ಮುಹೂರ್ತ ನೆರವೇರಿದೆ. ಇದರಲ್ಲಿ ನಾಯಕಿಯಾಗಿ ತ್ರಿಶಾ ಕೃಷ್ಣನ್‌ (Trisha Krishnan) ನಟಿಸಲಿದ್ದಾರೆ. ಆ ಮೂಲಕ ಹಿಟ್ ಜೋಡಿ ಮತ್ತೊಮ್ಮೆ ತೆರೆ ಮೇಲೆ ಒಂದಾಗಲಿದೆ.
ಇದು ಸೂರ್ಯ ನಟನೆಯ 45ನೇ ಚಿತ್ರ ಎನ್ನುವುದು ವಿಶೇಷ. ಈ ಸಿನಿಮಾದ ಮುಹೂರ್ತ ಸಮಾರಂಭ ಅನೈಮಲೈನಲ್ಲಿರುವ ಅರುಲ್ಮಿಗು ಮಾಸಾನಿ ಅಮ್ಮನ್ ದೇವಸ್ಥಾನದಲ್ಲಿಂದು ನೇರವೇರಿದೆ. ಕೊಯಮತ್ತೂರಿನಲ್ಲಿ ಮೊದಲ ಹಂತದ ಶೂಟಿಂಗ್ ನಡೆಸಲು ಚಿತ್ರತಂಡ ಯೋಜನೆ ರೂಪಿಸಿದೆ. ಸೂರ್ಯ ಮತ್ತು ಇತರ ತಾರಾಬಳಗ ಒಳಗೊಂಡ ಪ್ರಮುಖ ದೃಶ್ಯಗಳನ್ನು ಇಲ್ಲಿ ಚಿತ್ರೀಕರಿಸಲು ಸಿನಿಮಾ ತಂಡ ಯೋಜನೆ ಹಾಕಿಕೊಂಡಿದೆ.
ಡ್ರೀಮ್ ವಾರಿಯರ್ ಪಿಕ್ಚರ್ಸ್ ಸಂಸ್ಥೆಯಡಿ ʼಧೀರನ್ʼ, ʼಅರುವಿʼ, ʼಎನ್‌ಜಿಕೆʼ, ʼರಾಕ್ಷಸಿʼ, ʼಖೈದಿʼ, ʼಭೋಲಾʼ ಸೇರಿದಂತೆ ಹಲವು ಸೂಪರ್ ಹಿಟ್ ಚಿತ್ರಗಳು ಮೂಡಿ ಬಂದಿವೆ. ಇದೀಗ ಡ್ರೀಮ್ ವಾರಿಯರ್ ಪಿಕ್ಚರ್ಸ್ ತಮಿಳಿನ ಸೂಪರ್ ಸ್ಟಾರ್ ಸೂರ್ಯ ಜತೆ ಕೈ ಜೋಡಿಸಿದೆ.
ʼಮೂಕುತಿ ಅಮ್ಮನ್ʼ ಮತ್ತು ʼವೀಟ್ಲ ವಿಶೇಷಂʼನಂತಹ ಸಾಮಾಜಿಕ ಸಂದೇಶ ಸಾರುವ ಚಿತ್ರಗಳ ಮೂಲಕ ಜನಪ್ರಿಯರಾಗಿರುವ ನಟ ಆರ್.ಜೆ. ಬಾಲಾಜಿ ಈ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಲಿದ್ದಾರೆ. ಆರ್.ಜೆ. ಬಾಲಾಜಿ ಅವರ ಚಿತ್ರಕಥೆ ಇಷ್ಟಪಟ್ಟಿರುವ ಆಸ್ಕರ್ ವಿಜೇತ ಎ.ಆರ್. ರೆಹಮಾನ್ ಈ ಸಿನಿಮಾಗೆ ಸಂಗೀತ ನಿರ್ದೇಶನ ಮಾಡಲಿದ್ದಾರೆ. ಈ ಹಿಂದೆ ಸೂರ್ಯ ಹಾಗೂ ರೆಹಮಾನ್ ʼಸಿಲ್ಲುನು ಒರು ಕಾದಲ್ʼ, ʼಆಯುಧ ಎಳುತ್ತುʼ ಮತ್ತು ’24’ನಂತಹ ಕ್ಲಾಸಿಕ್ ಚಿತ್ರಗಳಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು.
ಆರ್.ಜೆ. ಬಾಲಾಜಿ ಮತ್ತು ಡ್ರೀಮ್ ವಾರಿಯರ್ ಪಿಕ್ಚರ್ಸ್ ಈ ಪ್ರತಿಷ್ಠಿತ ಪ್ರಾಜೆಕ್ಟ್‌ಗೆ ಸೂರ್ಯ ಜತೆಗೆ ಹಲವು ದೊಡ್ಡ ತಾರಾಬಳಗ ಸೇರ್ಪಡೆಯಾಗಲಿದೆ. ಚಿತ್ರತಂಡ 2025 ರ ದ್ವಿತೀಯಾರ್ಧದಲ್ಲಿ ಚಿತ್ರ ಬಿಡುಗಡೆ ಮಾಡುವ ಯೋಜನೆ ಹಾಕಿಕೊಂಡಿದೆ.
ನಾಯಕಿಯಾಗಿ ತ್ರಿಶಾ
ವಿಸೇಷ ಎಂದರೆ ನಾಯಕಿಯಾಗಿ ದಕ್ಷಿಣ ಭಾರತದ ಜನಪ್ರಿಯ ನಟಿ ತ್ರಿಶಾ ಕೃಷ್ಣನ್‌ ಕಾಣಿಸಿಕೊಳ್ಳಲಿದ್ದಾರೆ. ಬರೋಬ್ಬರಿ 2 ದಶಕಗಳ ಬಳಿಕ ಸೂರ್ಯ-ತ್ರಿಶಾ ಜೋಡಿ ತೆರೆ ಮೇಲೆ ಒಂದಾಗುತ್ತಿದೆ. ಇವರ ಕಾಂಬಿನೇಷನ್‌ನ 4ನೇ ಚಿತ್ರ ಇದು. ಈ ಹಿಂದೆ ಇವರು ʼಮೌನಂ ಪೇಸಿಯಾದೆʼ, ʼಆಯುಧ ಎಳುತ್ತುʼ ಮತ್ತು ʼಆರುʼ ಚಿತ್ರಗಳಲ್ಲಿ ಇವರು ಜತೆಯಾಗಿ ನಟಿಸಿದ್ದರು.
ಈ ಚಿತ್ರದ ಜತೆಗೆ ಸೂರ್ಯ ಕಾರ್ತಿಕ್‌ ಸುಬ್ಬರಾಜ್‌ ನಿರ್ದೇಶನದ ಸಿನಿಮಾದಲ್ಲಿಯೂ ನಟಿಸುತ್ತಿದ್ದಾರೆ. ನಾಯಕಿಯಾಗಿ ಪೂಜಾ ಹೆಗ್ಡೆ ಕಾಣಿಸಿಕೊಳ್ಳುತ್ತಿದ್ದು, ಜಯರಾಮ್‌, ಜೀಜು ಜಾರ್ಜ್‌, ಪ್ರಕಾಶ್‌ ರಾಜ್‌ ಮತ್ತಿತರರು ಪ್ರಮುಖದ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ.
ಈ ಸುದ್ದಿಯನ್ನೂ ಓದಿ: Aishwarya Rai: ʻಬಚ್ಚನ್‌ʼ ಸರ್‌ನೇಮ್‌ ಕೈ ಬಿಟ್ರಾ ಐಶ್ವರ್ಯ ರೈ? ವೈರಲ್‌ ಆದ ವಿಡಿಯೋದಲ್ಲೇನಿದೆ?
