ಮುಂಬೈ: ಬಾಲಿವುಡ್‌ನ ಪ್ರತಿಭಾವಂತ ನಟಿಯರಲ್ಲಿ ಆಲಿಯಾ ಭಟ್‌ (Alia Bhatt) ಕೂಡ ಒಬ್ಬರು. ಗ್ಲಾಮರ್‌ ಜತೆಗೆ ಅಭಿನಯಕ್ಕೆ ಒತ್ತು ಇರುವ ಪಾತ್ರವನ್ನು ಆಯ್ಕೆ ಮಾಡಿಕೊಳ್ಳುವುದು ಅವರ ವಿಶೇಷತೆ. ಇದೇ ಕಾರಣಕ್ಕೆ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯನ್ನೂ ಮುಡಿಗೇರಿಸಿಕೊಂಡಿದ್ದಾರೆ. ಅಕ್ಟೋಬರ್‌ 11ರಂದು ಆಲಿಯಾ ಭಟ್‌ ಅಭಿನಯದ ‘ಜಿಗ್ರಾ’ (Jigra) ಬಾಲಿವುಡ್‌ ಸಿನಿಮಾ ತೆರೆಕಂಡಿದೆ. ವಾಸನ್‌ ಬಾಲ ನಿರ್ದೇಶನದ ಈ ಚಿತ್ರ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿದ್ದು, ಪ್ರಚಾರದ ವೇಳೆ ಆಲಿಯಾ ಭಟ್‌ ಕುತೂಹಲಕಾರಿ ಸಂಗತಿಯೊಂದನ್ನು ಬಹಿರಂಗಪಡಿಸಿದ್ದಾರೆ. ತಮ್ಮ ಮಗಳ ಹೆಸರಿನಲ್ಲಿ ರಾಮ್‌ ಚರಣ್ (Ram Charan) ಆನೆಯೊಂದನ್ನು ದತ್ತು ಪಡೆದು ಅದನ್ನು ಮನೆಗೇ ಕಳುಹಿಸಿರುವ ಪ್ರಸಂಗವನ್ನು ವಿವರಿಸಿದ್ದಾರೆ.
2022ರಲ್ಲಿ ತೆರೆಕಂಡ ಟಾಲಿವುಡ್‌ ಸ್ಟಾರ್‌ ಡೈರಕ್ಟರ್‌ ಎಸ್‌.ಎಸ್‌.ರಾಜಮೌಳಿ ಆ್ಯಕ್ಷನ್‌ ಕಟ್‌ ಹೇಳಿದ ʼಆರ್‌ಆರ್‌ಆರ್‌ʼ ಚಿತ್ರದಲ್ಲಿ ರಾಮ್‌ಚರಣ್‌ ಮತ್ತು ಜೂನಿಯರ್‌ ಎನ್‌ಟಿಆರ್‌ ಜತೆ ಆಲಿಯಾ ಭಟ ನಾಯಕಿಯಾಗಿ ನಟಿಸಿದ್ದರು. ಈ ದಿನಗಳ ನೆನಪನ್ನು ಅವರು ಹಂಚಿಕೊಂಡಿದ್ದಾರೆ.
In conversation with @IMDb_in 🫶🏼
— Alia Bhatt (@aliaa08) October 11, 2024
Watch the full episode here: https://t.co/nlm5YMGF2W https://t.co/CKEjj4TB6j
ʼʼವಿವಿಧ ಶೆಡ್ಯೂಲ್‌ನಲ್ಲಿ ʼಆರ್‌ಆರ್‌ಆರ್‌ʼ ಸಿನಿಮಾದ ಶೂಟಿಂಗ್‌ ನಡೆದ ಕಾರಣ ನನಗೆ ರಾಮ್‌ ಚರಣ್ ಮತ್ತು ಜೂನಿಯರ್‌ ಎನ್‌ಟಿಆರ್‌ ಅವರೊಂದಿಗೆ ಹೆಚ್ಚು ಸಮಯವನ್ನು ಒಟ್ಟಾಗಿ ಕಳೆಯಲು ಸಾಧ್ಯವಾಗಿರಲಿಲ್ಲ. ಆದರೆ ಪ್ರಮೋಷನ್‌ ವೇಳೆ ನಾವು ಮೂವರು ತುಂಬ ಆತ್ಮೀಯರಾದೆವುʼʼ ಎಂದು ತಿಳಿಸಿದ್ದಾರೆ.
ಮನೆಗೇ ಆನೆ ಕಳುಹಿಸಿದ್ದ ರಾಮ್‌ ಚರಣ್
ಆಲಿಯಾ ಭಟ್‌ ಈ ವೇಳೆ ಮಜವಾದ ಸನ್ನಿವೇಶವೊಂದನ್ನು ಹಂಚಿಕೊಂಡಿದ್ದಾರೆ. ʼʼಆಗ ರಾಹಾ ಜನಿಸಿ ಒಂದು ತಿಂಗಳಷ್ಟೇ ಆಗಿತ್ತು. ವಾಕಿಂಗ್‌ಗಾಗಿ ಮನೆಯ ಹೊರಗೆ ಬಂದಿದ್ದೆ. ಆಗ ವ್ಯಕ್ತಿಯೊಬ್ಬ ಧಾವಿಸಿ ಬಂದು, ರಾಮ್‌ ಚರಣ್ ಸರ್‌ ನಿಮಗಾಗಿ ಆನೆಯನ್ನು ಕಳುಹಿಸಿದ್ದಾರೆ ಎಂದ. ಮನೆಯ ಬಳಿ ಆನೆ ನಡೆದು ಬರುವುದನ್ನು ಕಲ್ಪಿಸಿ ದಂಗಾಗಿ ಹೋದೆ. ಆದರೆ ಅದು ನಿಜವಾದ ಆನೆಯಾಗಿರಲಿಲ್ಲ. ಅದೊಂದು ಮರದಿಂದ ತಯಾರಿಸಿದ ಆನೆಯಾಗಿತ್ತು. ಆನೆಯೊಂದನ್ನು ನನ್ನ ಮಗಳು ರಾಹಾ ಹೆಸರಿನಲ್ಲಿ ದತ್ತು ಪಡೆದ ರಾಮ್‌ ಚರಣ್ ಮರದಿಂದ ತಯಾರಿಸಿದ ಆನೆಯ ಪ್ರತಿಕೃತಿಯನ್ನು ಕಳುಹಿಸಿದ್ದರು. ಇದೀಗ ಈ ಆನೆಗೆ ಎಲಿ ಎಂದು ಹೆಸರಿಟ್ಟಿದ್ದೇವೆ. ಇದೀಗ ಈ ಆನೆಯ ಗೊಂಬೆಯನ್ನು ಡೈನಿಂಗ್‌ ಟೇಬಲ್‌ ಪಕ್ಕ ಇಟ್ಟಿದ್ದೇವೆ. ರಾಹಾಗೆ ಇದು ಈಗ ಬಹಳ ಅಚ್ಚುಮೆಚ್ಚಿನ ಗೊಂಬೆʼʼ ಎಂದು ಆಲಿಯಾ ಭಟ್‌ ತಿಳಿಸಿದ್ದಾರೆ.
ಆಲಿಯಾ ಭಟ್‌ ನಟನೆಯನ್ನು ಹೊಗಳಿದ್ದ ರಾಮ್‌ ಚರಣ್
ಹಿಂದೊಮ್ಮೆ ಸಂದರ್ಶನವೊಂದರಲ್ಲಿ ಮಾತನಾಡಿದ್ದ ರಾಮ್‌ ಚರಣ್ ಅವರು ಆಲಿಯಾ ಭಟ್‌ ಅವರ ಅಭಿನಯವನ್ನು ಹೊಗಳಿದ್ದರು. ʼʼಹೈವೇʼ ಚಿತ್ರದಿಂದ ನಾನು ಆಲಿಯಾ ಭಟ್‌ ಅವರ ಅಭಿನಯವನ್ನು ಗಮನಿಸುತ್ತಿದ್ದೇನೆ. ʼರಾಝಿʼ ಸಿನಿಮಾ ಬಳಿಕ ನಾನು ಆಕೆಯ ಅಭಿಯಾನಿಯಾದೆ. ಅವರೊಂದಿಗೆ ಅಭಿನಯಿಸಿದ ಬಳಿಕ ಯಾಕಾಗಿ ಜನರು ಆಕೆಯನ್ನು ಅಷ್ಟೊಂದು ಇಷ್ಟಪಡುತ್ತಿದ್ದಾರೆ ಎನ್ನುವುದು ತಿಳಿಯಿತು. ಪಕ್ಕಾ ವೃತ್ತಿಪರವಾಗಿ ಇರುತ್ತಾರೆʼʼ ಎಂದು ಮೆಚ್ಚುಗೆ ಸೂಚಿಸಿದ್ದರು.
ಈ ಸುದ್ದಿಯನ್ನೂ ಓದಿ: Alia Bhatt: ಮತ್ತೊಂದು ಪವರ್‌ಫುಲ್‌ ಪಾತ್ರದಲ್ಲಿ ಆಲಿಯಾ ಭಟ್‌; ʼಜಿಗ್ರಾʼ ಚಿತ್ರದ ಪೋಸ್ಟರ್‌ ಔಟ್‌
