ಲಂಡನ್‌: ಟೀಮ್ ಇಂಡಿಯಾದ ಸ್ಟಾರ್ ಆಟಗಾರ, ದಾಖಲೆಗಳ ಸರದಾರ, ಕಿಂಗ್ ಖ್ಯಾತಿಯ ವಿರಾಟ್ ಕೊಹ್ಲಿ(Virat Kohli) ಅವರಿಗೆ ಇಂದು (ನ. 5) 36ನೇ ವರ್ಷದ ಹುಟ್ಟುಹಬ್ಬ (Virat Kohli Birthday) ಆಚರಿಸಿಕೊಂಡಿದ್ದಾರೆ. ಈ ಪ್ರಯುಕ್ತ ಅವರ ಪತ್ನಿ ಅನುಷ್ಕಾ ಶರ್ಮಾ (Anushka Sharma) ಇದೇ ಮೊದಲ ಬಾರಿಗೆ ತಮ್ಮ ಪುತ್ರ ಅಕಾಯ್‌ (Akaay)ನ ಫೋಟೊವನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಆದರೆ ಇದರಲ್ಲೊಂದು ಟ್ವಿಸ್ಟ್‌ ಇದೆ. ಅಕಾಯ್‌ನನ್ನು ಕಣ್ತುಂಬಿಕೊಳ್ಳಬೇಕು ಎಂದು ಕಾಯುತ್ತಿದ್ದವರಿಗೆ ಮತ್ತೆ ನಿರಾಸೆಯಾಗಿದೆ. ಯಾಕೆಂದರೆ ಅನುಷ್ಕಾ ತಮ್ಮ 8 ತಿಂಗಳ ಮಗುವಿನ ಮುಖವನ್ನು ಹೈಡ್‌ ಮಾಡಿದ್ದಾರೆ.
ವಿರಾಟ್ ಕೊಹ್ಲಿ ತಮ್ಮಿಬ್ಬರು ಮಕ್ಕಳಾದ ಅಕಾಯ್‌ ಮತ್ತು ವಾಮಿಕಾಗಳನ್ನು ಎತ್ತಿಕೊಂಡಿರುವ ಫೋಟೊವನ್ನು ಅನುಷ್ಕಾ ಇನ್ಸ್‌ಸ್ಟಾಗ್ರಾಮ್‌ನಲ್ಲಿ ಶೇರ್‌ ಮಾಡಿದ್ದಾರೆ. ಆದರೆ ಹಾರ್ಟ್‌ ಎಮೋಜಿ ಹಾಕಿ ಮಕ್ಕಳಿಬ್ಬರ ಮುಖದ ಭಾಗವನ್ನು ಹೈಡ್‌ ಮಾಡಿದ್ದಾರೆ.
ತಮ್ಮಿಬ್ಬರು ಮಕ್ಕಳೊಂದಿಗೆ ಕಿಂಗ್ ಕೊಹ್ಲಿ ಆತ್ಮೀಯ ಕ್ಷಣಗಳನ್ನು ಕಳೆಯುತ್ತಿರುವುದು ಈ ಫೋಟೊದಲ್ಲಿ ಕಂಡು ಬಂದಿದೆ. ಈ ಕ್ಷಣವನ್ನು ಸ್ವತಃ ಅನುಷ್ಕಾ ಶರ್ಮಾ ಸೆರೆ ಹಿಡಿದಿದ್ದಾರೆ. ಈ ವರ್ಷದ ಫೆ. 15ರಂದು ಅನುಷ್ಕಾ ಶರ್ಮಾ ಅಕಾಯ್‌ಗೆ ಜನ್ಮ ನೀಡಿದ್ದರು. ಅಂದಿನಿಂದ ಒಮ್ಮೆಯೂ ಆತನ ಫೋಟೊ ಹೊರ ಬಂದಿರಲಿಲ್ಲ. ಹೀಗಾಗಿ ಅಕಾಯ್‌ನನ್ನು ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ತುದಿಗಾಲಿನಲ್ಲಿ ಕಾಯುತ್ತಿದ್ದರು.
ನೆಟ್ಟಿಗರು ಏನಂದ್ರು?
ಮಗನ ಮುಖ ರಿವೀಲ್‌ ಮಾಡದಿದ್ದರೂ ಅನುಷ್ಕಾ ಅವರ ಈ ಪೋಸ್ಟ್‌ ಸದ್ಯ ವೈರಲ್‌ ಆಗಿದೆ. ಅಭಿಮಾನಿಗಳು ಈ ಪೋಸ್ಟ್‌ಗೆ ಮೆಚ್ಚುಗೆಯ ಸುರಿಮಳೆಯನ್ನೇ ಸುರಿಸಿದ್ದಾರೆ. ʼʼರಾಜ ತನ್ನ ರಾಜಕುಮಾರ ಮತ್ತು ರಾಜಕುಮಾರಿಯೊಂದಿಗೆʼʼ ಎಂದು ಒಬ್ಬರು ಹೇಳಿದ್ದಾರೆ. ʼʼದಿನದ ಪೋಸ್ಟ್‌ʼʼ ಎಂದು ಇನ್ನೊಬ್ಬರು ತಿಳಿಸಿದ್ದಾರೆ. ಬಹುತೇಕರು ಕೊಹ್ಲಿಗೆ ಹುಟ್ಟುಹಬ್ಬದ ಶುಭಾಶಯ ತಿಳಿಸಿದ್ದಾರೆ. ಹಲವರು ಹಾರ್ಟ್‌ ಎಮೋಜಿ ಮೂಲಕ ಖುಷಿಯನ್ನು ವ್ಯಕ್ತಪಡಿಸಿದ್ದಾರೆ. ವಿಶೇಷ ಎಂದರೆ ವಿರಾಟ್-ಅನುಷ್ಕಾ ದಂಪತಿ ತಮ್ಮ ಮಕ್ಕಳನ್ನು ಸೋಷಿಯಲ್‌ ಮೀಡಿಯಾ, ಮಾಧ್ಯಮಗಳಿಂದ ದೂರ ಇಟ್ಟಿದ್ದಾರೆ. ತಮ್ಮ ಖಾಸಗಿತನವನ್ನು ಗೌರವಿಸಿ ಎಂದು ಇಬ್ಬರೂ ಈ ಹಿಂದೆ ಮನವಿ ಮಾಡಿದ್ದರು.
ಅನುಷ್ಕಾ ಶರ್ಮಾ ಮತ್ತು ವಿರಾಟ್ ಕೊಹ್ಲಿ 2017ರ ಡಿ. 11ರಂದು ಇಟಲಿಯಲ್ಲಿ ಸಪ್ತಪದಿ ತುಳಿದಿದ್ದರು. 2021ರ ಜ. 11ರಂದು ಮಗಳು ವಾಮಿಕಾ ಜನಿಸಿದಳು. ಅದಾಗಿ 3 ವರ್ಷಗಳ ತರುವಾಯ ಈ ವರ್ಷಾರಂಭದಲ್ಲಿ ಅನುಷ್ಕಾ ಅಕಾಯ್‌ಗೆ ಜನ್ಮ ನೀಡಿದರು. ಬಾಲಿವುಡ್‌ನ ಟಾಪ್‌ ನಟಿಯರಲ್ಲಿ ಒಬ್ಬರಾದ ಅನುಷ್ಕಾ ಶರ್ಮಾ ಸದ್ಯ ನಟನೆಯಿಂದ ಬಿಡುವು ಪಡೆದಿದ್ದಾರೆ. ನಿರ್ಮಾಪಕಿಯಾಗಿಯೂ ಗುರುತಿಸಿಕೊಂಡಿರುವ ಅವರ ʼಚಕ್ದಾ ಎಕ್ಸ್ಪ್ರೆಸ್ʼ ಸಿನಿಮಾ ತೆರೆಗೆ ಬರಲು ಬಾಕಿ ಇದೆ. ವಿಶೇಷ ಎಂದರೆ ಇದು ಕ್ರಿಕೆಟ್‌ಗೆ ಸಂಬಂಧಿಸಿದ ಸಿನಿಮಾವಾಗಿದ್ದು, ಭಾರತ ಮಹಿಳಾ ಕ್ರಿಕೆಟ್ ತಂಡದ ಮಾಜಿ ವೇಗದ ಬೌಲರ್ ಜೂಲನ್ ಗೋಸ್ವಾಮಿ ಅವರ ಬಯೋಪಿಕ್‌. ಜೂಲನ್ ಗೋಸ್ವಾಮಿ ಪಾತ್ರದಲ್ಲಿ ಅನುಷ್ಕಾ ಕಾಣಿಸಿಕೊಂಡಿದ್ದಾರೆ. 2022ರಲ್ಲೇ ಚಿತ್ರೀಕರಣ ಪೂರ್ಣಗೊಂಡಿರುವ ʼಚಕ್ದಾ ಎಕ್ಸ್ಪ್ರೆಸ್ʼ ರಿಲೀಸ್‌ ದಿನಾಂಕ ಇನ್ನೂ ಘೋಷಣೆಯಾಗಿಲ್ಲ.
ಈ ಸುದ್ದಿಯನ್ನೂ ಓದಿ: Happy Birthday Virat Kohli: 36ನೇ ವರ್ಷಕ್ಕೆ ಕಾಲಿಟ್ಟ ಕಿಂಗ್ ಕೊಹ್ಲಿ
